APOCALIPSIS 15

1Esee hn tokomo yarta yata waa je ich data hn yarhakpa wahacha poõrc. Tokomo anjele õr syete uje tyenɨj ohnoy erze dosĩ̵ryo deyo uje syete nehe. Erze dosĩ̵ryo deyo wɨr ich uhurc uje Porrosht shuu tĩ̵r ĩ̵rmo par shuu õr eyuwo tɨsĩ̵r hn oym erze mɨhnũwo uje oshiyokõr. 2Hn tokomo toy shɨ ɨtso onoota bahluta per nĩhyok ye awɨtɨkɨsh, shɨ ɨtso pejta hn jwekɨta de lekɨtiyo ehet. Hn tokomo toy erze uje otserz ese loshɨpɨt uje tokolɨhɨ onoota bahluta hn ese kojach pɨt uje shɨ ɨtso ɨre. Wɨr otserz ese loshɨpɨt pork ye oduhu odɨbɨte õr yarepe ese ɨr iich hnii ɨr numɨro. Wɨr oyehe asa onoota wɨrc waa je ɨtso pejta hn oshuu arpa. Porrosht wɨchɨ uje ɨshɨm õr erze arpa. 3Otseẽt imno uje Moisés shiyokõrkite. Wɨchɨ Porrosht ɨbɨk. Ese imno shɨ eyucha ese Obejɨt. Otata otsɨɨ: —Õryok Ɨrhĩch Porrosht, owa akɨrbo deyo de hn ahakõr kuche deyo uje ich ɨhɨrts pisho. Shish ahakõr uje ich om hn shish atha uje ich ũru. Owa uu nos dihipo õr rey. 4Ɨrhĩche, nos tyenɨj otola owa nehe hn oshuu owa dich. Shɨ owa uje yelɨj ahakõr uje ich mɨhnũwo. Nos wɨr dihipo tyenɨj otɨrẽt nehe hn oteeychãha owa pork ebɨte orhõta uje epiyer erze uje oshiyokõr uje mɨhnũwo.— 5Esee hn takachɨm poõrc hn tokomo templo waa je otsɨtsẽrke. Wɨchɨ owich uje Porrosht ɨr ley de. 6Syete anjele otokolɨhɨ asa templo ehet. Wɨr tyenɨj ohnoy erze dosĩ̵ryo uje syete. Wɨr ich õr ɨshuwo poro hn hũre hn oshiyeru derhɨr õr ɨhɨroso uje oro. 7Erze kwatro uje ɨtso loshɨpo uje ɨka, yet ɨshɨm erze basɨ nohmɨr nohmɨr erze anjele. Erze basɨ oro hn kuche mɨhnũwo de ehet uje tãra Porrosht pork wɨchɨ sɨtakpa erze uje oshiyokõr mɨhnũwo. Porrosht wɨchɨ shish ɨka. 8Porrosht ich hũre hn ɨr ukurbo deyo de heke shuu asa templo ehet ich kiibich dich. Nĩhyok uje yeẽk masaha asa templo ehet nehech wɨr sɨhna ɨre erze dosĩ̵ryo deyo uje erze syete anjele ohnoy.

will be added

X\