APOCALIPSIS 14

1Esee hn takachɨm hn tokomo Obejɨt uje iyehetɨhɨ wahacha ese kojach uje iich otsɨɨ Sión. Erze uje õr syento kwarenta y kwatro mil ode ɨre ahɨr toy. Wɨr uje ese Obejɨt ɨr Deych hn ɨre õr iiyo de õr une. 2Esee hn tukunt ihyokõrak dich uje tãra poõrc. Wɨchɨ shɨ ɨtso uje awɨt uushɨ ich ihyokõrak dich hn shɨ ɨtso uje nar ich jwertpa. Ese ihyokõrt uje tukuntɨke shɨ ɨtso uje oso oshuu arpa. 3Wɨr oteeychɨ otseẽt imno ahle wahacha Porrosht ɨle ɨkɨch hn erze uje ɨtso loshɨpo uje ɨka õr ɨle ɨkɨch toy hn erze uje õr ɨbiyo iich otsɨɨ anciano õr ɨle ɨkɨch toy. Nĩhyok uje yeẽk pwele chɨraha ese imno uje õr ɨre otseẽt, shɨ erze uje õr syento kwarenta y kwatro mil uje otãra hnɨmich pork ese Obejɨt ɨshɨ õr hnɨtewɨhɨ Porrosht ahɨrkite. 4Wɨr uje yelɨj odishew tɨmcher yẽr pork shish otɨbey ɨre. Shish ohno õya ese Obejɨt uje tĩ̵r lekɨtiyo. Wɨr uje oshɨmɨhɨ ɨre Porrosht hn ese Obejɨt ɨtso jõro webich oso uje oshɨmɨhɨ Porrosht. 5Wɨr yelɨj otata dekushiĩ hn ye õr kuch mɨhnũwɨrsh. 6Esee hn tokomo anjel yet uje shɨ iyohochɨs poõrc pehet. Hno sanɨmɨrãha Porrosht ahwoso tatɨm nos wɨr oso uje ode ĩ̵rmo lekɨtiyo, hn nos wɨr dihipo hn nos wɨr uje otseẽt ahwoso kɨnãho kɨnãho. Tatɨm õr erze ahwoso oomo uje Porrosht chɨbɨte uje ehn yahpaa ĩ̵rmo chɨhɨkite. 7Ese anjel tata ich sɨhnew ɨm: —Atɨlɨlo Porrosht hn olak narim ɨre pork ich yej terɨhɨ ɨshɨrĩt par wɨchɨ sepyẽr oso. Eeychãhalo ese uje shiyokõr poõrc hn shiyokõr hnɨmich hn shiyokõr onoota bahluta hn nos wɨr owɨlo uje awɨt tãra hnɨmich.— 8Esee hn anjel yet iyehe nẽr tata ɨm: —Ich terɨhɨ ɨshɨrĩt uje otsɨhna ese dɨt bahlut Babilonia. Erze dɨt oso nos shuu dihipo oshiyokõr uje ich mɨhnũwo shɨ ɨtso uje shuu yɨkɨch sẽhi õr.— 9Esee hn anjel yet iyehe erze anjele osiyer õr nẽr hn chiilehet ich sɨhnew tata ɨm: —Uje yeẽk teeychãha ese loshɨpɨt uje tokolɨhɨ onoota bahluta hn teeychãha ese kojach pɨt uje seẽt ɨre hn shuu chɨbɨte ɨr yarta nenta o kɨmɨjɨ hmata 10ich Porrosht shuu mɨhnũwo tĩ̵r ɨre toy shɨ ɨtso uje wɨchɨ chishew wint uje ye latɨk nõya hn shuu wɨchɨ ɨhɨ. Porrosht ich sɨtak pɨshɨ wɨchɨ. Tyenɨj shuu otsẽru ɨre ochĩ̵ra jwekɨta hn asufre wahacha Porrosht anjele hn ese Obejɨt õr ɨkɨch. 11Shish duhlu hn dospa. Ɨr iibich tokole hn yelɨj nɨhna ɨre. Yelɨj tonkiya uje de asa jwekɨta ehet. Shish duhlu deeych hn dɨhlak. Wɨr erze uje oteeychãha ese loshɨpɨt uje tokolɨhɨ onoota hn ese kojach pɨt uje ɨtso ɨre hn ese loshɨpɨt yarta de õr. 12Porrosht aabo ochɨraha uje erze kuche mɨhnũwo tyenɨj tɨrẽt nehe heke tyenɨj õr ewenta erze kuche mɨhnũwo uje tĩ̵r õr hn oshiyokõr uje Porrosht ahwoso tata hn ye olotiis Jesús.— 13Esee hn tukunt ahwoso uje tãra poõrc tatɨm yok par uje tichew tuu ɨtsorz ɨm: —Ele ahle nehech terɨhɨ erze mɨhnũwo uhurc nehe erze uje otoy hn ye olotiis eyok Ɨrhĩch ich om par õr ɨre nehe.— Porrosht Ɨchɨbich tata toy ɨm: —Ich ompa par õr pork otsɨhna debiyo hn otsakɨr hn õr premyo de pork oshiyokõr uje ich om.— 14Esee hn takachɨm hn tokomo ukuhurrza waa je poro. Asa ukuhurrza yeẽk sakaha eeych. Tɨbɨte uje wɨchɨ ese hnakɨrbich uje tãra poõrzkite. Ɨr wolt uje iyãha pur oro ɨtso rey õr wolo hn meshete uje ich watakpa de ɨr hmata par ochĩ̵ra jõro. 15Anjel yet tokolɨhɨ asa templo ehet. Wɨchɨ tɨbich ich sɨhnew tatɨm ese uje sakaha ukuhurrza eeych ɨm: —Ahlo erze jõro hn eeshye pork ich terɨhɨ ɨshɨrĩt. Erze jõro uje de hnɨmich ich nos icho.— 16Ese uje sakaha asa ukuhurrza eeych ihyo erze jõro uje de hnɨmich hn chiishye. 17Esee hn anjel yet tokolɨhɨ asa templo ehet waa je de poõrc. Wɨchɨ tõhwa meshete toy uje ich watakpa par ochĩ̵ra jõro. 18Anjel yet uje tɨbey jwekɨta uje de altar eeych tokolɨhɨ ese altar hn tɨbich ich sɨhnew tatɨm ese anjel yet uje hnoy meshete uje ich watakpa ɨm: —Ahlo erze uva ɨr ee uje de hnɨmich pork ich nos icho.— 19Heke ese anjel ihyo erze jõro ee uje iich otsɨɨ uva uje de hnɨmich hn tãra chɨbɨte ɨr owich uje jotsak par ochiyuhu ɨr otich. Ese owich shɨ Porrosht sɨteẽta uje tyenɨj sepyẽr oso nehe. 20Erze uva otarãha hnɨmichɨhɨ wahacha dɨt nẽr par ochiyuhu otich. Ese ɨr owich dɨkɨrmɨsta tokolɨhɨ. Asa armɨsta ich data nehech terɨhɨ kabyuhwo ɨr freno hn terɨhɨ tre syento kilometro.

will be added

X\