APOCALIPSIS 13

1Esee hn tokomo loshɨpɨt uje tokolɨhɨ onoota bahluta. Ɨr hu syete hn ɨr wãpe dye. Kal ɨr wãpe ich wolo de shɨ ɨtso uje reye oyãha hn kal ɨr hu iich de uje Porrosht sɨtak. 2Ese loshɨpɨt uje tokolɨhɨ onoota bahluta uje tokomoko wɨchɨ shɨ ɨtso ɨlpiyo. Ɨr hnɨte deyo ɨtso ese loshɨpɨt uje iich otsɨɨ hoso hn ɨr ahwo shɨ ɨtso ɨlpiyo. Ese loshɨpɨt uje tokolɨhɨ poõrc wɨchɨ Satanás. Ɨshɨm ese loshɨpɨt uje tokolɨhɨ awɨt ɨr ukurbo hn shuu ɨre dich par uje tɨbey oso uje ode ĩ̵rmo lekɨtiyo. 3Ese loshɨpɨt yet uje tokolɨhɨ awɨt ɨr obich de huta yata uje tyenɨj shuu toy per ɨr obich owich ompo, heke nos wɨr oso uje ode ĩ̵rmo lekɨtiyo ochishlabe hn õya ɨre. 4Oteeychãha Satanás pork ɨshɨm lakɨrbo ese loshɨpɨt hn oteeychãha ese loshɨpɨt toy. Otata otsɨɨ: —Nihyok yeẽk uje ma dich ɨtso ese loshɨpɨt uje tokolɨhɨ awɨt hn nĩhyok yeẽk uje tatsɨkĩ̵r ɨre hn serz.— 5Porrosht ye nontew ese loshɨpɨtpe uje tokolɨhɨ awɨt uje ɨre shɨ narim ɨre hn chiyuhu lahwoso mɨhnũwo hn ye nontew ɨrpe uje masaha par tɨbey oso nehech shekurko kwarenta y dos 6heke wɨchɨ chiinehnɨm Porrosht hn chiinehnɨm Porrosht ɨr iich hn chiinehnɨm Porrosht ɨr owich, hn chiinehnɨm erze uje ode poõrc. 7Porrosht ye nontew ese loshɨpɨtpe uje tatsɨkĩ̵r Porrosht aabo nehech serz õr. Ye nontew ɨrpe uje tɨbey dihipo uje ode hnɨmo lekɨtiyo hn par tɨbey erze uje otseẽt ahwoso kɨnãho kɨnãho ĩ̵rmo lekɨtiyo. 8Nos wɨr uje ode ĩ̵rmo lekɨtiyo oteeychãha ɨre. Nos wɨr õr ɨre õr iiyo nihyokĩ̵hɨ asa hutɨta waa je wɨr õr iiyo de uje õr ɨkɨrĩt de uje yelɨj nɨhna ɨre. Ochichew õr iiyo uje ehn yahpaa ĩ̵rmo chɨhɨkite. Ese Obejɨt uje oshuu par tooho osokite wɨchɨ ɨr huto. 9Kɨmɨjɨ yeẽk nahmũr uje sehe tẽr ich tyenɨj tẽr uje titɨm olak. 10Erze uje Porrosht chɨbɨte par uje ochishew õr ich tyenɨj ochishew õr, hn erze uje Porrosht chɨbɨte par uje oshuu õr ochĩ̵ra õr espada ich tyenɨj oshuu õr oshuu otoy ochĩ̵ra õr espada heke Porrosht aabo tyenɨj õr ewenta erze mɨhnũwo uje tĩ̵r õr hn ye olotiis Porrosht. 11Esee hn tokomo loshɨpɨt yet uje tokolɨhɨ hnɨmich uut. Ɨr wãpe otiyer de ɨtso Obejɨt hn ɨr ahwoso shɨ ɨtso ese loshɨpɨt uje tokolɨhɨ poõrc. 12Ese loshɨpɨt uje tokolɨhɨ hnɨmich uut ɨr ukurbo tãra ese loshɨpɨt yet uje tokolɨhɨ onoota bahluta. Shɨ uje de ese loshɨpɨt yet ahɨr ich ɨr ukurbo de. Wɨchɨ shuu nos oso uje ode nãhu ĩ̵rmo oteeychãha ese loshɨpɨt uje tokolɨhɨ onoota bahluta uje ɨr huta obich deni per owich ompo. 13Ese loshɨpɨt uje tokolɨhɨ hnɨmich uut shiyokõr kuche deyo uje ye latɨk pwele shiyokõr nehech shuu jwekɨta tãra poõrc kayɨhɨ hnɨmich oso õr ɨle ɨkɨch. 14Porrosht ye nontew ɨrpe par shiyokõr erze yar kɨhniya shɨ par uje oso oteychɨm per shɨ pwele shiyokõr uje ese loshɨpɨt yet uje de ɨre ahɨr par uje sehnyẽr oso uje ode ĩ̵rmo lekɨtiyo. Wɨchɨ loshɨpɨt shuu ohno oshiyokõr kojach pɨt shuu seẽtshɨp ese loshɨpɨt uje tokolɨhɨ onoota bahluta uje yeẽk ihyo hutani chĩ̵ra espada per ye tope. 15Porrosht ye nontew ese loshɨpɨt uje tokolɨhɨ hnɨmich par uje ɨshɨm ese kojach pɨt ɨr ihyerc par uje chiilehet hn par shuu nos wɨr erze uje ye oteeychãha ese kojach pɨt shuu otoy. 16Ese kojach pɨt shuu nos ochɨbɨte oso õr yar kɨmɨjɨ ijaabo o kɨmɨjɨ deyo, kɨmɨjɨ ɨhĩ̵r deyo o kɨmɨjɨ losuhlaabo, kɨmɨjɨ erze uje õr yɨlo hn erze uje ye õr yɨlope. Ochɨbɨte õr yarta õr hme waãchta o kɨmɨjɨ õr une. 17Heke nĩhyok uje yeẽk tiya kuche hnii uje chiwãha ɨr kuche shɨ erze uje õr yar de. Asa yarta wate uu loshɨpɨt uje tokolɨhɨ onoota bahluta ɨr iich o kɨmɨjɨ ɨr numɨro uje tata ɨr iich. 18Shɨ yeẽk uje eykdeyo pwele shuu deyuwo tɨsĩ̵r par chɨraha hnakɨrtɨkɨhɨ ese loshɨpɨt ɨr numɨro. Ese numɨro hnakɨrbich ɨr numɨro. Ese numɨrt seys syento sesenta y seys.

will be added

X\