APOCALIPSIS 11

1Esee hn ɨshɨm yok phich uje shɨ ɨtso õr ɨtɨlta hn tatɨm yok ɨm: —Eteẽta Porrosht ɨr templo hn eteẽta ese altar hn eskẽr erze uje odechɨ uje oteeychãha Porrosht 2per ye eteẽta ese patikɨt uje chɨpeẽsa templo pork Porrosht ɨshɨm ese patikɨt erze dihipo kɨnãho. Wɨr tyenɨj odechɨ ese dɨt nehech shekurko kwarentidos hn oshiyokõr mɨhnuwõho wahacha. Wɨchɨ dɨt uje Porrosht chiihlakite.— 3Porrosht ɨm: —Tuu pɨbiyo õr osiyer otatɨm erze oso õr pahwoso par laalo mil dos syento sesenta. Wɨr õr ɨshuwo uje oyãha shɨ ɨtso ponchuko.— 4Erze Porrosht ɨbiyo uje õr osiyer shɨ õr ɨtso erze pohɨr olivo uje otiyer hn shɨ õr ɨtso nampyon uje osiyer uje dechɨ eyok Ɨrhĩch ɨkɨch. Wɨchɨ uu ĩ̵rmo oso õr bahlut pisht. 5Uje yeẽk sehe niyokõr mɨhnɨkĩ̵hɨ erze profeta ich jwekɨta tãra erze profeta õr ahwo hn otsẽru wɨchɨ oshuu duhlu. Uje yeẽk sehe niyokõr mɨhnɨkĩ̵hɨ õr ich tyenɨj toy ɨtsorz. 6Erze Porrosht ɨbiyo uje õr osiyer õr ukurbo de par uje ye oduhu ɨbɨkpe par nos wɨr daalo uje otsanɨmɨrãha Porrosht ahwoso. Õr ukurbo depo par ochisãha awɨt dɨkɨrmɨsta. Õr ukurbo depo par oshuu erze kuche mɨhnũwo kɨnãho kɨnãho tĩ̵r nãhu ĩ̵rmo shɨ uje otsahmũr oshiyokõr. 7Uje erze profeta ochɨmɨt otsanɨmɨrãha Porrosht ahwoso hn ese uje ɨtso loshɨpɨt uje tokolɨhɨ jotsɨt uje ye uhurtɨkɨsh hõr erze profeta oteye hn wɨchɨ serz õr shuu õr shuu otoy. 8Iim orĩ̵hɨchɨs dehet uje de dɨt ehet. Ese dɨt ich dich. Otsɨteẽta ese dɨt oso õr ɨluu shɨ ɨtso Sodoma hn Egipto oso õr ɨluu. Ese dɨt wɨchɨ Jerusalén. Wɨchɨ owich uje ochowɨshɨhɨ erze profeta õr Ɨrhĩchkite ochɨbɨte krus eeych. 9Nos wɨr dihipo uje ode ĩ̵rmo lekɨtiyo hn erze uje otseẽt lahwoso kɨnãho kɨnãho shish oteychɨm erze topo uje õr osiyer nehech terɨhɨ daalo tre hn pehet iya. Ye odosɨm õrpe par uje ochihitsɨm õr. 10Nos wɨr oso uje odebuhu ĩ̵rmo lekɨtiyo ich õr aylpa uje erze profeta otoy. Wɨr ich õr aylpa nehech oshɨmɨhɨye kuche pork erze profeta uje õr osiyer shish oshiyokos õr. 11Per uje terɨhɨ daalo tre hn pehet ĩya Porrosht shuu õr ɨkpo hn oyehet. Nos wɨr uje oteychɨm õr uje õr ɨkpo hn oyehet ich otolpa sehek õr ebe. 12Ochunt ahwoso uje tãra poõrc ich sɨhnew tatɨm erze profeta ɨm: —Ohɨr lɨklo.— Erze uje otsɨtak õr oteychɨm õr uje odohɨr otĩ̵r poõrc hn omasaha ukuhurrza ehet. 13Ɨchii hnɨmich telerrzpa. Kɨmɨjɨ ese dɨt chɨhɨ po dye ich sohmet kay uje hnɨmich telerrza. Shuu oso otoy õr syete mil, hn erze oso yewo uje ye otope ich otolpa heke oshuu Porrosht ich dich uje de poõrc. 14Yuwɨrke erze dosĩ̵ryo uje iyehe ese webich osht nẽr uje agilt tata hn erze kuche mɨhnũwo yewo iyehe erze yewo nẽr shɨchish. 15Esee hn anjel yet uje iyehe erze seys õr nẽr sobɨta ɨr trompeta, hn ochunt ahwoso wahacha poõrc ich sɨhnew tata ɨm: —Erze õr bahluwo uje otɨbey ĩ̵rmo lekɨtiyo wɨr tyenɨj otokole hn eyok Ɨrhĩch hn ɨr Ijɨt Cristo omasaha õr owich par õr bahluwoho nãhu ĩ̵rmo. Porrosht tyenɨj shish tɨbey oso nehe.— 16Erze uje õr bentikwatro uje õr ɨbiyo iich otsɨɨ anciano wɨr otsakaha debe Porrosht ɨle ɨkɨch. Ochiyuwa dele hnɨmich nehech õr une terɨhɨ hnɨmich hn oteeychãha Porrosht. 17Otata otsɨɨ: —Ɨrhĩche Porrosht, akɨrbo deyo de. Oyɨnshɨp owa. Shish owa dekite nehech ele ahle shish owa de, hn oyɨnshɨp owa uje amsaha par abey oso ẽra akɨrbo. 18Erze dihipo kɨnãho ich otsɨtak pɨshɨ owa per ele ahle ich etak õr. Terɨhɨ ɨshɨrĩt par epiyer erze topo hn asɨm premyo erze ebiyo profeta poruwo wɨshɨ hn erze aabo yewo hn erze uje otola owa. Erze premyo de par nos wɨr õr ɨre kɨmɨjɨ õr ijaabo o kɨmɨjɨ õr deyo. Terɨhɨ ɨshɨrĩt par ehna erze oso uje oshiyokõr mɨhnɨkĩ̵hɨ nãhu ĩ̵rmo.— 19Esee hn otsɨtsẽr asa Porrosht ɨr templo waa je de poõrc. Asa templo ehet omo kejunt uje Porrosht ahwoso de ehet hn omo hnɨmich toy uje hũre ɨtso yuwebo, hn ihyokõrak dich, hn nar, hn hnɨmich telerrza, hn yuwebo kojano kayɨhɨ hnɨmich uje ich deyo.

will be added

X\