APOCALIPSIS 10

1Esee hn tokomo anjel yet uje ukurbo deyo de uje tãra poõrc yesh dal hnɨmich. Ukuhurrza chɨpeẽsa ɨre hn shekshorrza de ɨr huta eeych. Ɨr ɨle ich hũre shɨ ɨtso deeych uje chihit hn ɨr hnɨte ich shɨ ɨtso uhwurbe per shɨ yokacha data. 2Ɨr hmata hutɨta de ochɨpaãsho arpich ijaap. Asa hutɨta ich ye odihyerupe. Shɨ ɨsãha. Uje ihnɨmich ich chɨbɨte derza waãchta onoota bahluta hn ɨr hnɨtɨta waachjãrrza chɨbɨte hnɨmich. 3Tɨbich sɨhnew shɨ ɨtso ɨlpiyo uje yerh. Uje tɨbich ɨtsorz ich nar nehech syete bese. 4Ich sehe tichew uje tukunt uje tata per ahwoso tãra poõrc tatɨm yok ɨm: —Ye atha erze uje nar syete tataka hn ye atsew ebɨte hutɨta.— 5Ese anjel uje tokomo uje iyehetɨhɨ wahachaka onoota bahluta eeych hn hnɨmich eeych wɨchɨ seem nahmɨta waãchta. 6Hn ese anjel tata Porrosht iich uje yelɨj nɨhna ɨre par uje shuu ɨmeheeych uje ɨr ahwoso uje tyenɨj tata ich ũru. Porrosht wɨchɨ uje shiyokõr poõrzkite hn nos wɨr kuche uje de ehet hn shiyokõr hnɨmich hn nos wɨr kuche uje de ehet hn shiyokõr onoota bahluta hn nos wɨr kuche uje de ehet. Ese anjel tata ɨm: —Porrosht ye seem osope. 7Uje ese anjel yet uje iyehe erze anjele yewo õr nẽr uje õr seys, uje wɨchɨ sobɨta ɨr trompeta ich tyenɨj yakaha uje Porrosht tatɨm uu debiyo profeta poruwo wɨshkite.— 8Esee hn erze õr ahwoso uje tukuntɨke uje tãra poõrc tatɨm yokpo ɨm: —Bey asa hutɨta uje de ese anjel ɨr hmata uje ɨr hnɨtɨta de onoota bahluta eeych hn ɨr hnɨtɨta yata de hnɨmich eeych. Asa hutɨta ich ɨsãha.— 9Takaha hn tapur ese anjel too: —Asɨm yok asa hutɨta ijaabta.— Ɨshɨm yok hn tatɨm yok ɨm: —Boy hn ew. Uje ew ich tete shɨ ɨtso reyne per owa ehet tyenɨj chiyokpa.— 10Uje tishew asa hutɨta ijaabta waa je de anjel hmata hn taw ich tete ɨtso reyne per shuu pehet ich chiyokpa. 11Tatɨm yok ɨm: —Nos tyenɨj atɨmpo wɨr oso uje tyenɨj tĩ̵r õr nehe. Tyenɨj atɨmpo wɨr dihipo kɨnãho hn erze uje otseẽt ahwoso kɨnãho kɨnãho ĩ̵rmo lekɨtiyo hn tyenɨj atɨmpo nos wɨr õr bahluwo.—

will be added

X\