FILIPENSES 4

1Pɨshɨbo watsaklo, tahmũr olak hn sehe tekɨrɨhɨ olak. Olak uje uhulo yok ayla. Uje amsahalo par olak Porrosht aaboni ich uhulo pɨbiyo tokole ich ompa. Sehe tuu ye otiislo eyoklo Ɨrhĩch hn ye olak koswãha ɨre. 2Evodia hn Síntique, sehe tuu olak eyuwo ɨlyẽr pork olak Porrosht eebe. 3Owa sham uje abey Porrosht aaboho wahacha, shish yakɨsho eyok ɨbiyo. Sehe tuu akashɨm Evodia hn Síntique uhu õr eyuwo ɨlyẽr. Erze tɨmcher otakashɨm yokni uje tanɨmɨrãha Porrosht ahwoso. Shɨ õr ɨtso Clemente uje takashɨm yokpo hn erze yewo uje ode lɨka pahɨr. Wɨr õr iiyo de asa hutɨta uje de poõrc uje nos wɨr oso õr iiyo de uje õr ɨkɨrĩt de uje yelɨj nɨhna ɨre. 4Titɨm olak. Shish tyenɨj uhu olak ayla pork Jesús wɨchɨ uu eyok Ɨrhĩch, hn titɨm olakpo. Uhu olak ayla. 5Nos akashɨmlo oso par uje ochɨraha uje olak ɨle om. Eyok Ɨrhĩch yej taãchpo. 6Ye atɨlɨlo latɨk, per shish olak orar apurlo Porrosht hn asɨmlo ɨre hnechɨt par erze uje apurlo. 7Heke Porrosht shuu olak aho kɨɨs. Erze yewo ye odɨrehepe ɨnaapo heke olak aho kɨɨs shuu ɨtsorz. Uje olak aho kɨɨs ich ye eenɨlo kuchepe par uje atɨlɨlo, hn ye olak eyuwo tɨsĩ̵rpe pork olak de Jesucristo. 8Pɨshɨbo watsaklo, ich yej terɨhɨ ana hutɨta uhurc per sehe titɨm olak erze kuche ma. Sehe tuu olak eyuwo tɨsĩ̵r erze uje ich ũru hn erze uje shuu oso õr ɨluu om, hn erze uje oshiyokõr om uje Porrosht sahmũr, hn nos wɨr kuche uje shuu oso otsahmũrye, hn nos wɨr kuche uje oso ochɨraha uje ich om, hn nos wɨr kuche uje shuu oso õr eyuwo omɨhɨye, hn nos wɨr kuche uje shuu oso onɨna Porrosht. Wɨr tyenɨj yuhu eyok eyuwo tɨsĩ̵r, hn ye yuhu eyok eyuwo tɨsĩ̵r erze kuche mɨhnũwo uje hnakɨrbo hn tɨmcher oshiyokorĩ̵hɨye. 9Nos ahakõrlo erze uje tiyokorãha olakni, hn ahakõrlo erze uje titɨm olakni, hn ahakõrlo uje entlo uje tãra yok, hn erze uje amlo uje tiyokõr. Uje ahakõrlo uhulo ɨtsorz ich olak aho kɨɨs pork Porrosht de olak. 10Ich yok ayla hn tɨkeeychãha eyoklo Ɨrhĩch uje akashɨmlo yokpo. Ye titɨm olakpe uje ekeylo yok pork tɨkɨraha uje sehe akashɨmlo yok per ye olak pwelpe. 11Yelɨj tipuuhnɨm yeẽk uje kuche nihyokĩ̵hɨ pahɨr, pork ele ahle ich tɨkɨraha kɨmɨjɨ kuche kɨhniya chɨhɨ pahɨr o kɨmɨjɨ nihyokĩ̵hɨ pahɨr ich shish tuu pehet kɨɨs. 12Tɨkɨraha tuu pehet kɨɨs uje kuche nihyokĩ̵hɨ pahɨr hn tɨkɨraha tuu pehet kɨɨspo uje kuche kɨhniya de pahɨr. Kɨmɨjɨ mĩ̵hnɨk tĩ̵r yok o kɨmɨjɨ om ich shish tuu pehet kɨɨs. Kɨmɨjɨ oposo nihyokĩ̵hɨ pahɨr o kɨmɨjɨ chɨhɨ pahɨr hn uje kuche kɨhniya de pahɨr o kɨmɨjɨ nihyokĩ̵hɨ pahɨr ich shish tuu pehet kɨɨs. Ich kwestpa uje oso ochɨraha erze ɨluu par shish shuu õr aho kɨɨs. 13Nos yok pwele tiyokõr tuu ɨtsorz pork Jesucristo takashɨm yok chĩ̵ra lakɨrbo. 14Ich ompa uje akashɨmlo yok uje ehn erze kuche mɨhnũwo tĩ̵r yok. 15Olak uje ebuhulo ese dɨt Filipos uje dechɨ hnɨmich Macedonia, uje titɨm olak Porrosht ahwoso wapni hn tɨkɨtokolɨhɨchɨs olak ahɨr par uje tɨtĩ̵r hnɨmich yet, ich erahalo uje nĩhyok iglesya uje takashɨm yok, shɨ olak. 16Uje yok dechɨs ese dɨt Tesalonicani ich shish uhulo otõhwa hnote oshɨm yok par uje akashɨmlo yok. 17Ye tuu peyuwo tɨsĩ̵rpe par uje tuu asɨmlo yok kuche. Ich tahmũr uje Porrosht ɨshɨmɨhɨ olakpo ich ma kɨhniya je uje asɨmlo yok. 18Epafrodito nos ɨshɨm yok erze uje uhulo tõhwa par uje ɨshɨm yok. Erze uje asɨmɨhɨlo yok ich iyuwe uje yok nesita. Wɨr shɨ ɨtso erze kuche uje aat ehmuuj uje oshɨmɨhɨ Porrosht uje ɨre sahmũr. 19Porrosht ich ɨrhĩch dich, heke ich nos ɨshɨm olak erze kuche uje olak nesita pork olak de Jesucristo. 20Sehe tuu shish nos yeeychãhalo uu eyok Deych. Uje yuhulo ɨtsorz ich ɨhĩ̵rtpa. 21Nos tokosɨm olak saludo uje ye otiislo Jesucristope. Eyok leshɨbo uje ode lɨka pahɨr oshɨm olak saludo toy. 22Nos wɨr Porrosht aabo yewo uje ode lɨka dɨt oshɨm olak saludo, hn erze uje ode wahacha rey Cesar ihyuch otatɨm yok par uje oshɨm olak saludo toy. 23Sehe tuu eyok Ɨrhĩch Jesucristo dosɨr olak.

will be added

X\