FILIPENSES 3

1Pɨshɨbo watsaklo, uje ehn yahpaa terɨhɨ uhurc ana hutɨta uje tichew tokosɨm olak sehe titɨm olak ahnũwo. Shish tyenɨj olak ayla pork Jesucristo wɨchɨ uu eyok Ɨrhĩch. Ye tɨrmtsɨrpe uje tichew titɨm olakpo par uje olak ma erahalo hn ye eymehilo. 2Abeylshɨp olak par uje ye wɨr onehnyẽr olak erze hnakɨrbo uje õr ɨbiyo mɨhnũwo. Wɨr shɨ õr ɨtso erze poyto uje mɨhnũwo. Sehe odiyuhu olak yũhurrza pɨkaabɨt par uje olak yar de uje iich otsɨɨ sirkunsisyon par amsahalo par Porrosht aabo per õr ahwoso ich ye ũrpe. 3Shɨ eyok uje yeeychãha pishɨ Porrosht pork ɨr Ɨchɨbich de eyok aho hn ich eyok ayla uje Jesucristo ɨshɨ eyok hnɨtewɨhɨ Porrosht ahɨrni hn yelɨj eyok eyuwo tɨsĩ̵r par uje yiyokõr kuchẽrk kɨnaha par yomsaha par Porrosht aabo, shɨ eyok Porrosht aabo. Wɨr uu yar pishɨ par Porrosht aabo, ye asa waa je iich otsɨɨ sirkunsisyonpe. 4Kɨmɨjɨ yeẽk duhu deyuwo tɨsĩ̵r par uje sehe masaha par Porrosht aap chĩ̵ra lakɨrbo ich yok ma pwele par tomsaha par Porrosht aap tuu ɨtsorz per ye jukur. 5Ich daalo osho uje yok shũrha hn oshiyokõr yok yarta waa je iich otsɨɨ sirkunsisyon. Yok israelya. Uu yok porokkite iich otsɨɨ Benjamín. Yok hebreoya, ye yok dihip kɨnãhape. Pɨluuta iich otsɨɨ fariseo. Ma tahmũr Porrosht ɨr ley, 6hn tɨnaha yok par uje tiyokõr uje mɨhnɨkĩ̵hɨ erze Porrosht aabo. Nĩhyok uje yeẽk tata uje tɨkiyuwe asa Porrosht ɨr ley. 7Yok tuu peyuwo tɨsĩ̵rni uje nos bale erze kuche par uje tiyokõr per ye jukur. Shɨ uje ye tokotiis Jesucristope wɨchɨ uje bale. 8Nos wɨr erze kuche uje tiyokõrni ich ye jukur par uje tɨkɨraha yok Ɨrhĩch Jesucristo. Tɨkɨraha ɨre ich ma bale je nos wɨr erze kuche yewo, heke ele ahle erze kuche par yok ich ye jukur shɨ ɨtso uje nos tɨbɨte basurt. Shɨ bale uje ye tokotiis Cristope. 9Yok de Jesucristo. Ye jukur tiyokõr erze leype uje Moisés chichewkite par uje tokoshɨ yok hnɨtewɨhɨ Porrosht ahɨr. Shɨ uje ye tokotiis Cristope par uje wɨchɨ ɨshɨ yok hnɨtewɨhɨ Porrosht ahɨr hn Porrosht perdonar yok. 10Sehe tɨkɨrahapa Jesucristo hn sehe tɨkɨrahapa erze Porrosht ɨr ukurbo. Wɨchɨ uje shuu Cristo ɨkponi. Sehe shish tiyokõr erze Cristo ɨr ɨbiyo, hn kɨmɨjɨ kuche mɨhnũwo tĩ̵r yok shɨ pork tiyokõr Jesucristo ɨr ɨbiyo o kɨmɨjɨ ye tĩ̵r yokpe ich ɨtsye. Ye latɨkɨsh par yok. Sehe tokoym tiyokõr mɨhnũwo nehech yok ɨlo erze topo uje yelɨj oniyokõr uje mĩ̵hnɨk heke tokole ɨtso uje tokõya Cristo uje toni. 11Uje Porrosht aabo õr ɨkpo nehe ich sehe tuu yok chɨhɨ õr ahɨr toy. 12Uje hnii titɨm olakɨke tuu ɨtsorz ich ye titɨm olakpe uje yelɨj timehĩ kuche pork shish tɨkɨnãha pɨkaap. Hn yahpaa pɨluu ɨlo Cristo ɨr ɨluupe, per shish sehe tiyokõr erze uje shuu pɨluu ma om. Jesucristo wɨchɨ masahani par yok Ɨrhĩch par uje shuu pɨluu ɨtso ɨr ɨluu. 13Pɨshɨbo watsaklo, ye titɨm olakpe uje pɨluuta ɨtso Jesucristo ɨr ɨluuta, per shish tiyokõr tuu ɨtsorz. Ye tuu peyuwo tɨsĩ̵rpe erze kuche uje tiyokõrni. Shɨ tɨnaha yok par uje tuu pɨluuta ma om ɨtso Jesucristo ɨr ɨluuta. 14Shɨ yok ɨtso yeẽk uje uushɨ par serz ɨr premit. Heke tiyuhu yok par terz ese premit. Wɨchɨ uje yesh Porrosht tɨbeyɨhɨ wahacha poõrc par ɨshɨm yok pork ye tokotiis Jesucristope. 15Nos wɨr olak uje ye olak koswãha eyok Ɨrhĩch ich tyenɨj nos uhulo olak eyuwo ɨlo yok. Kɨmɨjɨ olak yeẽk eyuwo tɨsĩ̵r kɨnaha, ye ɨlo uje titɨm olakɨke ich Porrosht tyenɨj shuu erahalo uje pahwoso ich ũru. 16Nos wɨr uje Porrosht shuu yɨrahalo ich tyenɨj yiyokõrlo hn ye yukwimlo. 17Pɨshɨbo watsaklo, sehe tuu eẽtlo yok, hn eychɨmlo olak ehet yeniipo uje otseẽt yok par uje olak yewo otseẽt õr. 18Shish titɨm olakni nehech ele ahle ich titɨm olakpo uje ich okɨhniya uje otsotiis Jesús uje tooho krus eeych par uje ɨshɨ õr hnɨtewɨhɨ Porrosht ahɨr. Shɨ pork tahmũr olak ich titɨm olak nehech uhulo tɨkiyer. 19Uje terɨhɨ õr uhurc nehe ich otĩ̵r urhuta bahluta ehet. Wɨr shɨ oshuu deyuwo tɨsĩ̵r oposo, hn erze mɨhnũwo uje shish oshiyokõr tyenɨj shuu opook per ye opookpe. Shɨ onarim ɨre pork oshiyokõr oshuu ɨtsorz. Shɨ oshuu deyuwo tɨsĩ̵r erze kuche uje de nãhu ĩ̵rmo, 20per eyok kɨnãho. Eyoklo owich de wahacha poõrc. Shɨ yiyemlo eyok Ɨrhĩch Jesucristo uje cheeshpo nehe tãra poõrc uje ɨshɨ eyok hnɨtewɨhɨ Porrosht ahɨrni. 21Ɨre tyenɨj shuu eyok yũhurrza kɨnaha, shuu ɨtso neyũhurrza chĩ̵ra lakɨrbo. Ɨr ukurbo deyo de heke deeych yet nehe hn nos shuu oshiyokõr uje ɨre sahmũr.

will be added

X\