FILIPENSES 2

1Titɨm olak par uje tɨkɨraha. ¿Je Cristo ɨr ahwoso duhu olak duurapo? ¿Je erahalo uje Cristo sahmũr olak? ¿Je duhu olak aho kɨɨs? ¿Je Porrosht Ɨchɨbich duhu ahmũrloye? ¿Je olak aho nuuna uje olak yeẽk chɨhɨ uje losuhlaap? ¿Je akashɨmloye? 2Kɨmɨjɨ nos wɨr uje titɨm olakɨke chɨhɨ olak ɨtsorz ich uhulo yok ayla uje nos uhulo olak eyuwo ɨlye hn ahmũrloye hn akashɨlo olak eyuwo. 3Ye ahakõrlo kuche shɨ par uje shuu olak deyo hn ye olak narim olak. Kal olak nohmɨra tyenɨj shuu deyuwo tɨsĩ̵r uje erze yewo ma õr deyo je olak. 4Ye shɨ uhu olak eyuwo tɨsĩ̵r olak ɨbiyo uje ahakõrlo shɨ par olak, per tyenɨj akashɨmlo yewo toy. 5Uhu olak eyuwo tɨsĩ̵r ɨtso Cristo. 6Cristo wɨchɨ Porrosht. Par ɨre ich ye latɨkɨsh 7uje iim lakɨrbo par uje shuu ɨre ɨtso uje õr ɨbɨk, hn wɨchɨ shũrha hnakɨrap. 8Uje ɨre hnakɨrap ich yelɨj narim ɨre. Shɨ shiyokõr uje Porrosht sahmũr, heke tooho kruskite uje ich dospa. 9Heke Porrosht shuu wɨchɨ ma dich hn chɨbɨte ɨr iich ma dich je nos wɨr yewo. 10Jesús ɨr iich ich dichpa heke nos wɨr erze uje ode poõrc hn uje ode nãhu ĩ̵rmo hn erze uje ode hnɨmich uut tyenɨj nos ocha dete hnɨmoho ɨkɨch, 11hn tyenɨj nos oso otata uje Jesucristo wɨchɨ uu Ɨrhĩch. Uje oshuu ɨtsorz ich oshuu Porrosht uu eyok Deych ich dich. 12Pɨshɨbo watsaklo, uje ehn yok de olak ahɨrni ich shish ahakõrlo uje titɨm olak. Ele ahle ich ye yok chɨhɨ olak ahɨrpe per sehe shish tuu ahakõrlo uje ma om par uje olak ɨluu ɨlo Jesucristo ɨr ɨluu. Shish tyenɨj atɨlɨlo erze kuche mɨhnũwo nehech olak ɨkiyo tãra hn ye ahakõrlo. Enaha olak par uje ma ahakõrlo uje Cristo sahmũr 13pork Porrosht chish obiyoho olak aho par uje shuu olak ɨluu ɨtso ɨre pork sahmũr uje olak ɨluu ɨtso ɨre. 14Nos wɨr erze uje tyenɨj ahakõrlo ich ye ekũna ejerpta hn ye ahakosɨlye 15par uje ye latɨk chɨhɨ uje pwele tata uje ahakõrlo uje mĩ̵hnɨk hn shish olak ɨluu ich om, heke ɨmeheeych uje olak Porrosht aabo uje ye ahakõrlo uje mĩ̵hnɨk uje ebuhulo erze oso õr ehet uje õr kushĩyo hn õr ɨluu mɨhnũ. Heke shɨ olak ɨtso luu uje chihit nãhu ĩ̵rmo oso uje shɨ õr ɨtso dɨhlele pork wɨr ich õr ɨluu mɨhnũ, 16hn olak shish tyenɨj anɨmɨrãhalo Porrosht ahwoso atɨmlo õr par uje omasaha par Porrosht aabo par uje õr ɨkɨrĩt de uje yelɨj nɨhna ɨre. Heke uje Cristo cheeshpo nehe ich yok ayla pork pɨbiyo ich tokole om olak ahɨr. 17Kɨmɨjɨ tɨkɨtɨ nehe shɨ pork tanɨmɨrãha Porrosht ahwoso titɨm olak heke ye otiislo Jesuspe, par yok ich ye latɨkɨsh kɨmɨjɨ tɨkɨtɨ ɨtsorz. Shɨ yok ayla heke olak ayla toy. 18Hn tyenɨj olak ayla heke yok ayla toy. 19Kɨmɨjɨ eyok Ɨrhĩch nahmũr, ich daalo arhaabo hn tuu Timoteo do tĩ̵r olak par uje teychɨm olak. Uje deeshpo nehe hn tatɨm yok uje yesh olak owich om ich tyenɨj shuu pehet kɨɨs. 20Nĩhyok ye tish yeẽkpe uje ɨtso ɨre uje wɨchɨ sehe takashɨm olak. 21Nos wɨr yewo uje ode lɨka shɨ oshuu deyuwo tɨsɨrĩ̵hɨ erze kuche shɨ par õr ɨre. Ye oduhu deyuwo tɨsĩ̵rpe erze Jesucristo ɨr ɨbiyo. 22Olak erahalo uje Timoteo ɨr ɨluuta ich om. Takashɨm yok uje tanɨmɨrãha Porrosht ahwoso shɨ ɨtso uje pɨkɨhnint takashɨm deych. 23Wap sehe tɨkɨraha uje gobierno shiyokorĩ̵hɨ yok nehe hnii tuu Timoteo hno par tĩ̵r olak, 24hn kɨmɨjɨ eyok Ɨrhĩch nahmũr, ich tekɨrɨhɨ olakpo shɨchish. 25Sehe tuu Apafrodito do deeshɨ tĩ̵r olakpo. Wɨchɨ yok pɨshap hn pihyẽrak pork wɨchɨ Porrosht aap. Uhulo tĩ̵r yokni par takashɨm yok. 26Sehe tuu do tĩ̵r olak pork ɨre eyucha olak hn ich dosdarak uje entloni uje permo. 27Ich ũru uje ɨre permoni, sehe toy. Per Porrosht chuuna uje wɨchɨ losuhlaap hn sosɨr ɨre, hn uje sosɨr ɨre ich sosɨr yok toy par uje ye duhu yok ma dosdarak, pork yesh yok dosdarakɨhɨ lɨka karsel ehet. 28Heke sehe tuu do tĩ̵r olak shɨchish par uje olak ayla uje amlo ɨrpo hn par uje ye yok ma dosdarak. 29Asɨmlo eyok Ɨrhĩch hnechɨt uje Apafrodito taachĩ̵hɨ olak ahɨrpo. Tyenɨj olak narim erze uje õr ɨtso ɨre 30pork uje wɨchɨ shiyokõr erze Cristo ɨbiyoni ich kasi toy. Kasi ɨr ɨkɨrĩt sɨhna ɨre uje uhulo takashɨm yok pork ye olak chɨhɨ pahɨr petɨkni par akashɨmlo yok.

will be added

X\