FILIPENSES 1

1Yok Pablo. Timoteo de lɨka pahɨr. Õryok Jesucristo ɨr ɨbiyo. Oyichew ana hutɨta oyosɨm olak uje olak Porrosht aabo uje olak dechɨ dɨt Filipos hn oyosɨm toy par erze uje otɨbey olak uje olak Porrosht aabo hn par erze diácono toy. 2Sehe oyuhu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs. 3Uje peyucha olak ich shish tɨkɨnshɨp Porrosht par olak 4hn shish yok ayla uje yok orar tapur Porrosht par olak 5pork akashɨmlo yok uje tanɨmɨrãha Porrosht ahwoso titɨm õr uje Jesús ɨshɨ õr hnɨtewɨhɨ Porrosht ahɨrkite. Uje amsahaloni par olak Porrosht aabo ɨchii akashɨmlo yok uje tanɨmɨrãha ɨr ahwoso nehech ele ahle. 6Tɨkɨraha uje amsahaloni par Porrosht aabo ɨchii Porrosht nɨshii saraãshi olak ɨluu heke tɨkɨraha toy uje Jesucristo cheeshpo nehe ɨchii Porrosht chɨmɨt erze obiyo uje nɨshii olak aho hn shuu olak ɨluu ɨtso Jesucristo ɨr ɨluu. 7Ich om uje peyuwo tɨsĩ̵r tuu ɨtsorz pork tahmũr olak pork akashɨmlo yok uje tiyokõr erze obiyo uje ich ompa pork wɨr uje Porrosht ɨshɨm eyoklo par uje yiyokõrlo. Kɨmɨjɨ yok dechɨ karsel ehet o kɨmɨjɨ tɨtĩ̵r lekɨtiyo shish tiyokõr erze obiyo par uje tuu ɨmeheeych uje Jesús ahwoso ich ũru uje shɨ tyenɨj ye olotiis Jesucristo par uje ɨshɨ õr hnɨtewɨhɨ Porrosht ahɨr. Ich shish akashɨmlo yok. 8Porrosht chɨraha uje tahmũr olak shɨ ɨtso uje Jesucristo sahmũr olak. 9Shish yok orar tapur Porrosht par uje ma ahmũrloye hn yok orar par uje Porrosht shuu erahalo uje ich ũru par uje ɨmeheeych erze õr ukushiĩ uje otata. 10Shish yok orar tapur Porrosht par uje ahmũrlo erze uje ich ũru, heke shish olak ɨluu om. Nĩhyok ye latɨk chɨhɨ uje tata uje ahakõrlo uje mĩ̵hnɨk nehech terɨhɨ ese deeych uje Jesucristo cheeshpo nehe. 11Shish ahakõrlo uje ich om pork ye otiislo Jesucristope par uje oso oteeychãha Porrosht hn oshuu dich. 12Pɨshɨbo watsaklo, sehe tuu erahalo uje ochɨmchaha yok karsel ehet ich shuu Porrosht ahwoso chũr lekɨtiyo uje tata uje Jesús ɨshɨ õr hnɨtewɨhɨ Porrosht ahɨrkite. 13Heke nos wɨr ohyerptoso uje otɨbey karsel hn nos wɨr oso yewo toy ochɨraha uje yok dechɨ karsel ehet shɨ pork ye tokotiis Cristope. 14Porrosht aabo ochunt uje yok dechɨ karsel ehet heke ich okɨhniya oduurapo hn ma ye olotiis eyok Ɨrhĩchpe, heke otsanɨmɨrãha ɨr ahwoso, hn ye otola erze oso yewope. 15Ode uje opota erze oso uje otsahmũr yok heke otsanɨmɨrãha Porrosht ahwoso par uje sehe oduhu oso onahmũr ɨre toy. Ode toy uje shɨ sehe onanɨmɨrãha Porrosht ahwoso par uje onarim ɨre, per yewo ode uje ich õr ɨluu om, 16heke otsanɨmɨrãha Porrosht ahwoso shɨ pork otsahmũr yok. Ochɨraha uje yok dechɨ karsel ehet par uje tuu ɨmeheeych uje Jesús ahwoso ich ũru uje tata uje ɨshɨ õr hnɨtewɨhɨ Porrosht ahɨrkite. 17Per yewo ode uje otsanɨmɨrãha Porrosht ahwoso shɨ par uje sehe onarim ɨre. Wɨr õr aho yuhurĩ̵sh. Shɨ pork yok de karsel ehet heke otsanɨmɨrãha oshuu ɨtsorz par uje oshuu yok ma dosdarak, 18per par yok ich ye latɨkɨsh kɨmɨjɨ wɨr õr aho yuhurĩ̵sh o kɨmɨjɨ õr ɨluu om. Shɨ uje otsanɨmɨrãha Cristo ɨr ahwoso ich shuu yok aylpa. 19Tyenɨj yok aylpo pork tɨkɨraha uje olak orar apurlo Porrosht par yok hn tɨkɨrahapo uje Jesucristo ɨr Ɨchɨbich takashɨm yok heke tyenɨj tɨkitokolɨhɨ karsel ehet nehe. 20Kɨmɨjɨ oduhu yok oduhu tɨkɨtɨ o kɨmɨjɨ ye oduhu yokpe ich shish sehe ye tɨkɨtɨla õrpe hn ye tɨkɨpookpe per shish tiyokõr uje Cristo sahmũr hn shish yok narim ɨre. 21Pork uje ehn yok ɨka shish tiyokõr Cristo ɨr ɨbiyo per uje tɨkɨtɨ shɨ ɨtso uje terz pork powich de Cristo ahɨr. 22Kɨmɨjɨ onoymɨhɨ yok ich shish tyenɨj tiyokõr erze Cristo ɨr ɨbiyo uje bale. Ye tɨkɨraha uje ich om par tiihla. 23Sehe takashɨm olak per sehe tɨtĩ̵r Cristo ahɨr hn ye yok pwelpe tiyokõr erze uje osiyer. Ma om par yok uje tɨkɨtɨ hn tɨtĩ̵r Cristo ahɨr, 24per par olak ich ma om uje ehn yok ɨka. 25Tɨkɨraha uje tyenɨj yesh yok ɨka par uje ma takashɨm olak ye otiislo Jesucristo heke olak aylpa. 26Uje tekɨrɨhɨ olakpo nehe ich tyenɨj olak narim Jesucristo pork takashɨm yok shuu ɨtsorz. 27Sehe tuu ahakõrlo uje ich om pork nos Porrosht aabo tyenɨj oshiyokõr uje Cristo ɨr ahwoso tata. Wɨchɨ uje ɨshɨ eyok hnɨtewɨhɨ Porrosht ahɨrkite. Heke kɨmɨjɨ tekɨrɨhɨ olak nehe o kɨmɨjɨ ye yok pwele par uje tekɨrɨhɨ olak ich shish tukunt olak uje ye olak koswãha Cristope hn uhu olak eyuwo ɨlye uje anɨmɨrãhalo Porrosht ahwoso ich atɨmlo õr uje tyenɨj ye olotiis uje Jesús ɨshɨ õr hnɨtewɨhɨ Porrosht ahɨrkite par uje omasaha par Porrosht aabo. 28Ye as olak ɨbe hn atɨlɨlo erze uje ye onahmũr Porroshtpe uje sehe onontew olak uje ahakõrlo erze obiyo. Uje ye atɨlɨlo õr ich Porrosht shuu ɨmeheeych uje nĩhyok õr owich Porrosht ahɨr heke tyenɨj otĩ̵r urhuta bahluta ehet nehe, mahn olak owich de Porrosht ahɨr. 29Porrosht chɨbɨte uje ye otiislo Cristope hn chɨbɨte toy uje tyenɨj olak ewenta erze kuche mɨhnũwo uje tĩ̵r olak shɨ pork ye otiislo Cristope. 30Amloni erze kuche mɨhnũwo uje tĩ̵r yok. Ich entlo uje yesh tĩ̵r yok ma. Wɨr uje tĩ̵r olak toy pork ode uje sehe onontew Porrosht ɨr ɨbiyo.

will be added

X\