MATEO 9

1Eseekite hn Jesús dohɨr asa pohorrza ehet cheeshpo tĩ̵r lagunta pɨt yet uje dɨt dechɨ uje ɨre debuhu. 2Ich oso otõhwa hnakɨrbich uje pɨlich worbɨt yakaha ɨre otseya Jesús. Shɨ de darpich eeych. Uje Jesús teychɨm uje ye olotiis ɨrpe hn tatɨm ese uje pɨlich worbɨt yakaha ɨm: —Pijɨte, uhu ehet kɨɨs pork yok perdonar nos erze kuche mɨhnũwo uje ahakõr.— 3Erze hnakɨrbo uje oshiyokorãha oso waa ley waa je Moisés chichewkite õr aho chiilehet otsɨɨ: —Jesús shɨ chiinehnɨm Porrosht.— 4Per Jesús nos chɨraha erze uje oshuu deyuwo tɨsĩ̵r. Tatɨm õr ɨm: —¿Ɨnaãpo heke uhu olak eyuwo tɨsĩ̵r uje mɨhnũwo? 5Uje titɨm ɨre uje yok perdonar erze kuche mɨhnũwo uje shish shiyokõr ich ye ɨmeheeychpe kɨmɨjɨ pukurbo chɨhɨ o kɨmɨjɨ nĩhyok. Per uje titɨm ɨre too: “Alehet, erk” ich ɨmeheeych uje pukurbo de pork tyenɨj iyehet hn dɨrk. 6Yok tokõra poõrzni. Tokowa olak uje pukurbo de uje yok de lɨka ĩ̵rmo par uje yok perdonar yeẽk uje shiyokõr mɨhnũwo.— Hn Jesús tatɨm ese uje pɨlich worbɨt yakaha ɨm: —Alehet. Asew ese eteno hn bo eyhi.— 7Ese uje pɨlich worbɨt yakaha iyehet hn hno seyhi. 8Uje erze oso omo uje ɨtsorz ich ochishlabe hn oteeychãha Porrosht pork wɨchɨ uje ɨshɨm Jesús ɨr ukurbo par uje ɨre perdonar oso. 9Eseekite uje ehn Jesús hno ich umo hnakɨrbich uje iich otsɨɨ Mateo uje sakaha owich hn kobra nahnapso õr hnote par gobierno. Jesús tatɨm ɨm: —Mẽya yok.— Iyehet hn hno ĩya ɨre. 10Eseekite uje ehn Jesús hõr dakɨle otaakɨhɨ pwert ehet hn hnakɨrbo okɨhniya uje õr kobra hnote par gobierno otaakɨhɨ õr ahɨr toy hn yewo otaakɨhɨ toy uje õr ɨluu mɨhnũ. 11Erze uje õr ɨluuta iich otsɨɨ fariseo omo Jesús uje taakɨhɨ wɨr õr ahɨr hn otatɨm erze ɨr akɨle otsɨɨ: —¿Ɨnaãpo heke olak maestro taakɨhɨ wɨr õr ahɨr erze uje õr kobra hnote par gobierno hn erze oso yewo uje oshiyokõr mɨhnũwo?— 12Uje Jesús chunt uje wɨr otata hn tatɨm õr ɨm: —Erze uje ye õr permope ye õr nesita lotorpe. Shɨ erze uje õr permo wɨr uje õr nesita. Erze oso uje otaakɨhɨ pahɨr wɨr shɨ ɨtso uje õr permo heke õr nesita lotor. 13Bolɨlo ahakorãha olak uje Porrosht ahwoso tata shuu ɨtsorz ɨm: “Porrosht ɨm: Eenɨlo uje yeẽk losuhlaab hn akashɨmlo ɨre. Wɨchɨ uje ma om je uje tukulo loshɨpɨt par eeychãhalo yok.”— Hn Jesús tatɨm õr ɨm: —Tɨkɨrẽtni ye par tokosɨr erze uje oshiyokõr uje om shɨ par tokosɨr erze uje oshiyokõr mɨhnũwo.— 14Eseekite hn Juan uu tohɨrm oso ɨr akɨle otsɨtĩ̵r ɨre Jesús hn otatɨm otsɨɨ: —Õryok hn erze fariseo shish oyukwim õryok poso par õryok orar. ¿Ɨnaãpo heke akɨle ye onoym labɨsope par uje õr orar?— 15Jesús tatɨm õr ɨm: —Uje yeẽk chiileku hn shiyokõr õr ahamich ich oso otĩ̵r ese ɨr ahamich. Uje ehn wɨchɨ de õr ahɨr ich ye õr dosdarakpe hn ye onoym labɨsope. Deeych yet nehe hn yewo ohnoy ese hnakɨrbich uje chiileku heke erze uje ode ɨr ahamich oym labɨso pork ich õr dosdarak.— 16Hn Jesús tatɨm õr uje ɨr ahwoso ich ahlo hn ye ompe ĩya erze õr ɨluu ɨler. Tatɨm õr ɨm: —Nĩhyok yeẽk uje chichew lasuwo obɨlo chĩ̵ra bortɨsht uje ichɨrãha pork ese bortɨsht uje ahle shuu wɨr tĩ̵rye hn shuu ese bortɨsht ɨlaro kara hn shuu obɨlo ma deyo. 17Nĩhyok ye latɨk chɨhɨ uje sanuwãha wint ahlt kwer ɨler ehet uje ɨtso boteyle pork ese wint ahlt tyenɨj shuu potɨta nehech shuu kara hn ese wint noshɨhɨ lekɨtiyo. Heke ese wint ahlt tyenɨj otsanuwãha erze kwer ahle ehet pork ye karape.— 18Eseekite uje ehn Jesús chiilehet hn israel oso õr bahlut taãcha. Icha dete hnɨmoho Jesús ɨkɨch hn tatɨm ɨm: —Pijɨta tokɨ per kɨmɨjɨ erẽt hn ebɨte ahme wate eeych ich ɨkpo.— 19Jesús iyehet hn hno ĩya ɨre. Ɨr akɨle õya ɨre toy. 20Ich oso okɨhniya oyehe nẽr hn tɨmcharrza dechɨ õr ahɨr. Ich dose ãyo uje wate permo, ɨr armɨtsɨ ihnɨmich. Sɨtĩ̵r ɨre Jesús tãra nẽr. Sakahɨr nerpta ɨrhɨ 21pork ehet chiilehet ɨm: —Uje shɨ takahɨr ɨr nerpta ich yok owich ome.— 22Jesús somtɨs ɨre hn teychɨm asa tɨmcharrza. Tatɨm ɨm: —Pijɨta, uhu ehet kɨɨs. Shɨ pork ye otiis yokpe heke tuu owa owich om.— Ɨchii asa tɨmcharrza owich om. 23Uje Jesús taachĩ̵hɨ ese õr bahlut ihyuch hn umo erze uje otsobɨta flawta hn erze uje oyerh ohye asa waa je tokɨ. 24Tatɨm erze oso ɨm: —Atokolɨhɨ lɨkɨlo pork asa pɨkɨhninta ye tope, shɨ umo.— Erze oso shɨ oyana Jesús. 25Uje ochiyuhu erze oso õr ejwertɨke hn Jesús masaha pwert ehet hn chishew asa pɨkɨhninta hmata hn wate iyehet. 26Ese uje Jesús shiyokõr ich chũr lekɨtiyo ese hnɨmich. 27Eseekite uje Jesús tokolɨhɨchɨs hn olɨbo õr osiyer oyehe ner. Otatɨm Jesús ich otsɨhnew lahwoso otsɨɨ: —Jesús, owa uje ãra owa porokkite rey David. Sehe oyuhu osɨr õryok.— 28Uje Jesús masaha pwert ehet ich erze hnakɨrbo uje õr osiyer uje õr olɨbo otsɨtĩ̵r ɨre. Jesús tatɨm õr ɨm: —¿Je ye otiislo yok uje yok pwele tuu olak owich om?— Otsɨɨ: —Ẽhe, Ɨrhĩche.— 29Jesús sakahɨr õr ɨle hn tatɨm õr ɨm: —Kɨmɨjɨ ye otiislo yok ich tuu olak owich om.— 30Ɨchii wɨr omo lekɨtiyo. Jesús tatɨm õr ich sɨhnew lahwoso ɨm: —Ye atɨmlo latɨk uje tukuta olak.— 31Per uje otokolɨhɨchɨs ich otatɨm oso oshuu chũr lekɨtiyo ese hnɨmich uje Jesús chukuta õrke. 32Eseekite uje ehn Jesús hõr dakɨle otokolɨhɨ pwert ehet ich oso otõhwa hnakɨrbich uje ɨrpɨk, demonyo de ɨre ehet. 33Uje Jesús chiyuhu ese demonitɨke ese hnakɨrbich ehet uje ɨrpɨk ich wɨchɨ chiilehetpo. Erze oso okɨhniya uje odechɨ ich ochishlabe uje wɨchɨ chiilehetpo. Otata otsɨɨ: —Yelɨj oyumo uje ɨtsorz ele israel oso õr hnɨmich.— 34Per erze uje õr ɨluu iich otsɨɨ fariseo otata otsɨɨ: —Uu demonyo õr bahlut wɨchɨ uje ɨshɨm Jesús ukurbo par chiyuhu demonyo.— 35Eseekite hn Jesús hno tĩ̵r nos wɨr duwo uje deyo hn ijaabo hn shiyokorãha oso õr sinagoga aho. Tatɨm õr ahwoso omo uje ich yej terɨhɨ uje Porrosht tɨbey oso hn nos chukuta erze uje õr permo kɨnãho kɨnãho. 36Uje Jesús umo erze oso uje ich okɨhniya ich chuuna uje õr losuhlaabo. Wɨr shɨ õr ɨtso obeje uje obɨlosh pork nĩhyok yeẽk uje tɨbey. 37Heke sɨteẽta tatɨm erze dakɨle ɨm: —Erze oso ich okɨhnipa shɨ õr ɨtso jõro uje kɨhniya uje ta par ochekushu hn olak shɨ olak ɨtso erze uje ochekushu. Porrosht wɨchɨ shɨ ɨtso ese jõro yɨnsɨrc. Erze uje tyenɨj ochekushu shɨ õr arhaabo. 38Apurlo ese jõro yɨnsɨrc par uje shuu ma okɨhniya par otĩ̵r ochekushu erze jõro.—

will be added

X\