MATEO 8

1Eseekite uje Jesús ihnɨmichɨhɨchɨs wĩ̵rit eeych ich oso okɨhniya uje õya ɨre. 2Hnakɨrbich sɨtĩ̵r ɨre uje lepra tew. Wɨchɨ icha dete hnɨmoho Jesús ɨkɨch hn tatɨm ɨm: —Ɨrhĩche, kɨmɨjɨ ahmũr ich sehe tuu ekuta yok pork owa akɨrbo de par ahakõr.— 3Jesús chɨbɨte nahmɨta eeych hn tatɨm ɨm: —Tahmũr heke tuu owa owich om.— Ɨchii ese lepra nihyokõho ɨr yũhurrza. 4Jesús tatɨm ɨm: —Hmeychɨm, ye atɨm latɨk uje tiyokorĩ̵hɨ owaka. Shɨ etĩ̵r saserdote hn owa ɨre eyũhurrza hn asɨm ɨre obejɨt ɨtso uje Moisés tatakite par ena Porrosht par uje nos oso odɨraha uje lepra nihyokõho eyũhurrza.— 5Eseekite uje ehn Jesús masaha dɨt Capernaum hn ohyerptoso õr bahlut tɨrẽt tĩ̵r ɨre. Sapur ɨre 6ɨm: —Ɨrhĩche, pɨbich de wahacha pihyuch ich permpa. Pɨlich worbɨt yakaha ɨre. Yesh de darpich eeych ich dospa.— 7Jesús tatɨm ɨm: —Takaha hn tukuta ɨre.— 8Per ese ohyerptoso õr bahlut tatɨm ɨm: —Ɨrhĩche, owa dichpa. Ye yok dichpe par tuu amsaha pihyuch ehet. Shɨ eyuhu ahwoso ich wɨchɨ owich om 9pork yok bahluwo ode uje ma õr deyo je yok. Uje otatɨm yok kuche ich tiyokõr. Hn ohyerptoso ode pɨhme par tɨkɨbey õr. Uje titɨm sohmet too: “bo” ich hno. Uje titɨm yet too: erẽt ich tɨrẽt. Uje tuu pɨbich shiyokõr kuche ich shiyokõr.— 10Uje Jesús chunt uje wɨchɨ tata ich chishlabe. Tatɨm erze oso uje õya ɨre ɨm: —Titɨm olak ich tuu ũrpa. Ye tish israel oso yeẽkpe uje ɨtso ele hnakɨrbich uje ye lotiis yokpe. 11Titɨm olak uje okɨhniya otɨrẽt nehe otãra deeych warĩch yɨt hn otãra uje deeych yakaha yɨt par uje wɨr otaakɨhɨ nemest wɨrc wahacha poõrc Abraham lɨshɨ ahɨr hn Isaac lɨshɨ hn Jacob lɨshɨ. 12Tɨkɨrẽtni hn titɨm oso ich okɨhniya par otĩ̵r Porrosht ahɨr nehe per ye onahmũrpe. Wɨr uje tyenɨj otãra õr ochɨbɨte õr ejwert dɨhlelta ehet nehe. Tyenɨj oyerh hn oches labɨterẽhe wahacha pork ich dospa.— 13Jesús tatɨm erze ohyerptoso õr bahlut ɨm: —Bo eyhi. Ye otiis yokpe heke tiyokõr uje atɨm yokɨke.— Shɨ yehe wate orta uje tatɨm ɨchii ese ɨr ɨbɨk owich om. 14Eseekite hn Jesús masaha Pedro ihyuch hn umo Pedro ohota. De darpich eeych permo, aat duhlu. 15Jesús sakahɨr wate hmata hn chukuta. Ich ye aat duhlpe. Iyehet hn sar õr poso. 16Eseekite uje ich deeych yaka hn otõhwa oso ich okɨhniya uje demonyo de õr aho otseya õr Jesús. Jesús tatɨm erze demonyo uje de õr aho hn shuu tokole. Nos chukuta erze uje õr permo toy. 17Uje Jesús shiyokõr shuu ɨtsorz ich shuu yakaha uje profeta Isaías tatakite pork tata ɨm: —Wɨchɨ uje chiyuhu eyok dosĩ̵ryo hn chukuta eyok uje eyok permo.— 18Eseekite uje Jesús umo erze oso uje okɨhniya ochɨpeẽsa ɨre hn tatɨm dakɨle ɨm: —Yukulo yɨtĩ̵rlo lagunta pɨt yet.— 19Hn hnakɨrbich uje shiyokorãha oso waa ley waa je Moisés chichewkite sɨtĩ̵r ɨre Jesús hn tatɨm ɨm: —Maestro, tokõya owa tɨtĩ̵r uje etĩ̵r.— 20Jesús tatɨm ɨm: —Watsɨtse uuwo de hn chɨpɨrme uje iyoho poõrc pehet ɨr uuwo de toy per yok uje tokõra poõrzni nĩhyok owich uje tokotsa pãrz hnɨmichɨhɨ.— 21Jesús ɨr akɨlt yet tatɨm ɨm: —Ɨrhĩche, wap sehe tɨtĩ̵r pihyuch. Uje papa toy nehe tihitsɨm hn tokõya owa.— 22Per Jesús tatɨm ɨm: —Mẽya yok. Erze uje ye odɨraha Porroshtpe wɨr shɨ õr ɨtso topo. Moym par uje wɨr odihitsɨm õr.— 23Eseekite hn Jesús dohɨr pohorrza ehet hõr erze dakɨle hn ohno. 24Wɨsɨk wɨsɨk hn myent data tɨbichu. Shuu erze owɨt wokor deyo masaha asa pohorrza ehet. Ich sehe duhu yaka, per Jesús shɨ umo. 25Ɨr akɨle otĩ̵r ɨre otsɨniyẽr. Otatɨm otsɨɨ: —Ɨrhĩche, akashɨm õryok. Yej eyok yaka.— 26Jesús tatɨm õr ɨm: —¿Ɨnaãpo heke atɨlɨlo? Yesh olak koswãha yok.— Uje tatɨm õr shuu ɨtsorz hn iyehet tatɨm asa myentɨta hn erze owɨt wokor par shuu iyehe. Ich asa myentɨta iyeheshɨp hn asa onoota wokor iyehepo. 27Õr ɨre ich ochishlabe. Otatɨmye otsɨɨ: —¿Latɨk ukurbo uje de ɨre heke asa myentɨta hn owɨt wokor chunt ɨre?— 28Eseekite uje Jesús taachĩ̵hɨ lagunta pɨt yet gadara oso õr hnɨmich hn hnakɨrbo õr osiyer uje demonyo de õr aho otokolɨhɨ dukuta otĩ̵r Jesús. Wɨr ich õr ehnito pisho heke nĩhyok uje yeẽk chɨkãha ese dehet. 29Wɨr otatɨm Jesús ich otsɨhnew lahwoso otsɨɨ: —Owa uu Porrosht Ijɨt. ¿Ɨnaãpo heke erẽt etĩ̵r ele owich uje õryok de? ¿Je erẽt par epiyer õryok? Yahpaa terɨhɨ ɨshɨrĩtpe.— 30Ich poohle kɨhniya taakɨhɨchɨs meytii dukulehe õr. 31Erze demonyo otatɨm Jesús otsɨɨ: —Kɨmɨjɨ eyuhu õryok ich uhu oyomsaha erze poohle aho.— 32Jesús tatɨm erze demonyo ɨm: —Bolɨlo.— Heke erze demonyo otokolɨhɨ erze hnakɨrbo õr aho hn ohno otĩ̵r erze poohle. Ɨchii erze poohle uushɨ. Ese wĩ̵rit uje wɨr de ich ɨlyaka. Nos uushɨ masaha awɨt hn yaka. 33Erze hnakɨrbo uje otɨbey poohle ooshɨ otĩ̵r dɨt ehet hn otatɨm erze oso nos wɨr kuche uje tokolɨhɨ erze poohle hn uje tokolɨhɨ erze hnakɨrbo toy uje demonyo de õr aho. 34Nos wɨr oso uje odechɨ dɨt ehet otokole hn ohno otĩ̵r ese owich uje Jesús de. Uje omo ɨre hn otatɨm otsɨɨ: —Atokolɨhɨ lɨka.—

will be added

X\