MATEO 4

1Eseekite hn Porrosht Ɨchɨbich shuu Jesús hno tĩ̵r ese owich uje ɨsa par uje dyablo prowa sehe duhu Jesús niyokõr uje mĩ̵hnɨk. 2Uje Jesús dechɨ ich ye taakpe daalo kwarenta hn dɨhle kwarenta. Ɨchii chuuna uje sewɨt sẽhi. 3Dyablo uje sehnyẽr oso sɨtĩ̵r ɨre Jesús. Tatɨm ɨm: —Kɨmɨjɨ owa Porrosht Ijo ich atɨm erze kojano po par uje chisãha ɨre pan.— 4Jesús tatɨm ɨm: —Porrosht ahwoso tata uje ye shɨ panpe uje shuu õr ɨkɨrĩt de per tyenɨj nos oshiyokõr uje Porrosht tata.— 5Dyablo hnoy Jesús seya wahacha Jerusalén uje Porrosht ɨr templo de. Chɨbɨte ɨre templo eeych uje ich ma porĩt. 6Tatɨm ɨm: —Kɨmɨjɨ owa Porrosht Ijo ich ãr owaha lɨka pork Porrosht ahwoso tata uje shuu ɨr anjele otɨbey owa. Wɨr ochishew owa ochĩ̵ra nahme par uje ye kojano duhu er.— 7Jesús tatɨm ɨm: —Porrosht ahwoso tata shuu ɨtsorz toy ɨm: “Ye epɨ owa Ɨrhĩch Porrosht.”— 8Dyablo hnoy Jesuspo seya kojach eeych uje ich ma porĩt. Nos sowa erze duwo uje de ĩ̵rmo lekɨtiyo hn nos wɨr kuche ɨhĩ̵rtso uje de aho. 9Dyablo tatɨm ɨm: —Kɨmɨjɨ atsa ete hnɨmoho pɨkɨch eeychãha yok ich nos tokosɨm owa.— 10Jesús tatɨm ɨm: —Satanás, atokolɨhɨ lɨka, bo pork Porrosht ahwoso tata ɨm: “Eeychãha owa Ɨrhĩch Porrosht hn ahakõr shɨ uje ɨre sahmũr.”— 11Heke dyablo tokolɨhɨ Jesús ahɨr hn anjele otaachĩ̵hɨ Jesús ahɨr par otakashɨm. 12Eseekite uje Jesús chunt uje ochɨmchaha Juan karsel ehet hn tokolɨhɨ hnɨmich Judea hno tĩ̵r Galilea. 13Tokolɨhɨ Nazaret hnaas hno tĩ̵r Capernaum uje de lagunta wɨrc. Ese dɨt dechɨ erze israel oso õr hnɨmich uhurc uje õr porokkite iich otsɨɨ Zabulón hn erze israel oso yewo õr hnɨmich uhurc uje õr porokkite iich otsɨɨ Neftalí. 14Uje Jesús debuhu ese dɨt Capernaum ich shuu Porrosht ahwoso yakaha uje profeta Isaías chichewkite shuu ɨtsorz ɨm: 15—Erze israel oso uje odebuhu ese hnɨmich uje otãra ɨr porokkite Zabulón hn erze israel oso uje odebuhu ese hnɨmich uje otãra ɨr porokkite Neftalí ode Jordán pɨt uje deeych warĩch. Ese hnɨmich iich otsɨɨ Galilea. Dihipo kɨnãho odebuhu wahacha toy. 16Erze oso uje odebuhu wahacha ye odɨraha Porroshtpe. Wɨr shɨ õr ɨtso uje ode dɨhlelta. Wɨr omo luuta waa je ich data. Erze uje odebuhu ese hnɨmich wɨr shɨ ɨtso uje tyenɨj otoy hn otĩ̵r urhuta bahluta ehet per ese uje ɨtso luu chihit õr par shuu ochɨraha ɨre.— 17Eseekite uje Jesús taachĩ̵hɨ Capernaum ɨchii sanɨmɨrãha Porrosht ahwoso tatɨm õr ɨm: —Moymlo erze olak ɨluu mɨhnũ hn ahakõrlo uje Porrosht sahmũr pork ich yej terɨhɨ uje Porrosht shuu oso omasaha par ɨr aabo.— 18Eseekite uje Jesús dɨrkɨhɨ lagunta Galilea wɨrc hn umo hnakɨrbo õr osiyer uje otãra ɨr retɨhɨ lagunta ehet. Õr leshɨbye. Uu yet iich otsɨɨ Simón. Ɨr iich yet otsɨɨ Pedro, hn ɨr leshɨbich iich otsɨɨ Andrés. Wɨr shɨ leshɨrtso. 19Jesús tatɨm õr ɨm: —Erẽtlo meylo yok hn tuu uhulo oso omasaha par Porrosht aabo ɨtso uje eshẽrlo loshiyo ẽrlo ret.— 20Ɨchii oym ɨr ret hn õya Jesús. 21Uje Jesús dɨrkɨhɨchɨs hn umo yewo toy, õr osiyer. Wɨr õr leshɨbye. Yet iich otsɨɨ Santiago hn ɨr leshɨbich iich otsɨɨ Juan. Õr deych iich otsɨɨ Zebedeo. Odechɨ deych ahɨr pohorrza ehet ochii ret obɨlo. Jesús tɨbii õr. 22Ɨchii oym ɨr deychɨhɨ pohorrza ehet hn oyhnɨmich ohno õya Jesús. 23Eseekite hn Jesús hno tĩ̵r lekɨtiyo hnɨmich Galilea shiyokorãha oso sinagoga aho. Tatɨm õr erze ahwoso omo uje ich yej terɨhɨ uje Porrosht tɨbey oso. Ich oso okɨhniya uje õr permo kɨnãho kɨnãho hn nos chukuta õr. 24Otatehe Jesús lekɨtiyo ese hnɨmich Siria. Nos otõhwa wɨr oso uje õr permo kɨnãho kɨnãho. Ode uje õr doso hn yewo demonyo de õr aho hn ode uje õr atake hn ode uje pɨlich worbɨt yakaha õr. Jesús nos chukuta õr. 25Ich oso okɨhniya uje õya ɨre. Otãra hnɨmich Galilea hn otãra erze duwo uje iiyo otsɨɨ Decápolis hn otãra Jerusalén hn otãra hnɨmich Judea hn otãra onoota Jordán pɨt hn õya Jesús.

will be added

X\