MATEO 28

1Eseekite ich iyuwe sabta wɨchɨ deeych uje otsakɨr. Uje ehn dɨhɨrbɨt pisht lekɨtiyo poro uje terɨhɨ deeych domingo hn María Magdalena hn María yata ohno oteychɨm asa dukuta. 2Ɨchii ochuuna uje hnɨmich telerrza ich jwertpa pork Ɨrhĩch ɨr anjel ihnɨmich tãra poõrc hn chiyuhu ese kojach uje otsahuwe dukuta ebich shuu chukwerlabe hn sakaha eeych. 3Ese anjel ich hũre ɨtso yuebo hn ɨr ɨshuwo ich poro shɨ ɨtso nyebe. 4Erze ohyerptoso uje otɨbey dukuta ich otolpa hn õr ɨkiyo tãra. Õr torĩt shuu õr ɨtso uje otoy. 5Per ese anjel tatɨm erze tɨmcher ɨm: —Ye atɨlɨlo yok. Tɨkɨraha uje yesh ekulo Jesús uje ochowɨshɨhɨ krus eeychhna. 6Ye chɨhɨ lɨkpe. Wɨchɨ ɨkpoko ɨtso uje tatɨm olakni. Erẽtlo eychɨmlo ele owich uje ochɨbɨthna 7hn bolɨlo shɨchish atɨmlo erze ɨr akɨle uje ɨkpoko tokolɨhɨ erze topo õr ahɨr. Hmeychɨmlo, wɨchɨ tyenɨj hno tĩ̵r Galilea hn ahnɨlo ɨjɨch heke amlo ɨre wahacha. Wɨr uje Porrosht shuu titɨm olak.— 8Erze tɨmcher ich otokolɨhɨ asa dukuta ahɨr ohno shɨchish. Ich otola per õr aylpa. Ohno ooshɨ ohnoy ese anjel ahwoso par otatɨm Jesús akɨle. 9Uje ehn ohno hn Jesús tokolɨhɨ õr ɨkɨch. Seta õr. Otsɨtĩ̵r ɨre hn ochishew Jesús hnɨte hn oteeychãha ɨre. 10Jesús tatɨm õr ɨm: —Ye atɨlɨlo latɨk. Bolɨlo atɨmlo erze pɨshɨbo par uje otĩ̵r Galilea heke ochish yokɨhɨ wahacha.— 11Eseekite uje ehn erze tɨmcher ohno hn ohyerptoso nohmɨramo uje otɨbey asa dukuta ohno otĩ̵r ese dɨt otatɨm erze saserdote õr bahluwo nos wɨr kuche uje õr ɨre oteychɨmɨhɨ wahacha dukutaka. 12Erze saserdote õr bahluwo hn erze dɨt oso õr bahluwo otakɨsho lawich hn okeytkẽrye. Oshɨm erze ohyerptoso õr hnote ich kɨhniya. 13Otatɨm õr otsɨɨ: —Athɨlo on: “Dɨhlakɨke hn ɨr akɨle otɨrẽt ochiyuhu hn ohnoy uje oyumo.” 14Kɨmɨjɨ gobernador tẽr erze olak ahwoso ich oyuhu ɨre ehet kɨɨs par uje ye depyẽr olak.— 15Erze ohyerptoso ochishew erze hnote hn otata ɨtso uje erze õr bahluwo otatɨm õrke. Erze ahwoso uje ohyerptoso otata chũr lekɨtiyoho erze israel oso õr ehet nehech ele ahle. 16Eseekite hn Jesús akɨle uje õr onse ohno otĩ̵r Galilea. Otĩ̵r ese kojach uje Jesús tatɨm õrhna. 17Uje omo Jesús hn oteeychãha ɨre per yewo õr koswãha. 18Jesús sɨtĩ̵r ɨre õr hn tatɨm õr ɨm: —Porrosht nos ɨshɨm yok pukurbo par tɨkɨbey poõrc hn ele hnɨmich, 19heke bolɨlo etĩ̵rlo nos wɨr dihipo uje ode ĩ̵rmo lekɨtiyo par uhulo omasaha par pakɨle. Ohɨrmlo õr uje ye olotiis yok ẽrlo Porrosht iich hn ẽrlo piich hn ẽrlo Porrosht Ɨchɨbich. 20Nos ahakorãhalo oso par oshiyokõr erze kuche uje titɨm olakni. Hmeychɨmlo, shish yok de olak ahɨr nehech terɨhɨ uhurc nehe.—

will be added

X\