MATEO 24

1Eseekite uje ehn Jesús tokolɨhɨ templo patikɨt ehet par hno tĩ̵r owich yet hn ɨr akɨle otsɨtĩ̵r ɨre. Otsowa ɨre erze pwerto uje de templo patikɨt ehet. 2Jesús tatɨm õr ɨm: —Nos amlo erze pwerto uje oshiyokõr ochĩ̵ra kojano po. Titɨm olak ich tuu ũrpa. Erze kojano ich ye lakahaye eeyo nehe hnii sohmɨra. Nos otsehnɨmich.— 3Eseekite uje ehn Jesús sakaha ese wĩ̵rit eeych uje iich otsɨɨ Olivos hn ɨr akɨle otsɨtĩ̵r ɨre. Nĩhyok oso yewo uje ode õr ahɨr. Otatɨm otsɨɨ: —¿Latɨk nehe hn onehnɨmich asa templo hn yarɨraha uje ich terɨhɨ ɨshɨrĩt par oyɨraha uje eeshpo hn yarɨraha uje terɨhɨ uhurc?— 4Jesús tatɨm õr ɨm: —Abeylshɨp olak par uje nĩhyok yeẽk sehnyẽr olak 5pork tyenɨj oso okɨhniya uje ochii ɨre yokɨhɨ nehe hn otata otsɨɨ: “Yok Cristo” hn otsehnyẽr oso ich okɨhniya. 6Tyenɨj entlo nehe uje dihipo oteyehe ĩ̵rmo lekɨtiyo, hn entlo toy uje sehe oteye per ye as olak ɨbe. Wɨr tyenɨj tokole wap per yahpaa terɨhɨ uhurzpe. 7Tyenɨj dihipo oteye hn reye hõr duhut reye õr ohyerptoso oteye. Tyenɨj sewɨt ihnɨmich sẽhi oso owɨlo kɨhniya ĩ̵rmo hn tyenɨj hnɨmich telerrza owɨlo kɨhniya ĩ̵rmo toy. 8Nos wɨr erze kuche mɨhnũwo tyenɨj tokole wap hn kuche ma mɨhnũwo iyehe nẽr. 9Uje iyuwe erze mɨhnũwo webich oso ich oso yewo tyenɨj oshɨm olak oso par otsepyẽr olak hn oshuu olak oshuu atɨlo. Nos wɨr oso uje ode ĩ̵rmo lekɨtiyo tyenɨj otsɨtak olak shɨ pork ye otiislo yokpe. 10Ich okɨhniya tyenɨj oym yok nehe hn wɨr tyenɨj õr denunsya olak hn otsɨtakye. 11Ich okɨhniya uje ochii ɨr profetaha hn otsehnyẽr oso ich okɨhniya. 12Oso tyenɨj oshiyokõr kuche mɨhnũwo ich kɨhniya heke oshuu yẽrɨj onahmũrye. 13Per uje yeẽk ewenta hn ye niyokõr erze kuche mɨhnũwo hn ye lotiis yok nehech terɨhɨ uhurc ich ɨr owich de Porrosht ahɨr. 14Tyenɨj otsanɨmɨrãha pahwoso otatɨm erze dihipo kɨnãho uje ode ĩ̵rmo lekɨtiyo. Otatɨm õr erze ahwoso omo par uje oso õr pwele omasaha par Porrosht aabo. Uje nos ochuntɨhɨ ĩ̵rmo lekɨtiyo ich terɨhɨ uhurc. 15Uje yeẽk ler ese uje profetɨt Daniel chichewkite ich sehe tuu dɨraha uje tata. Uje eychɨmlo uje oshuu ese kuchɨt iyehetɨhɨ templo ehet nehe hn shuu asa templo mɨhnũ ɨtso uje ɨre tata 16ich erze oso uje odebuhu hnɨmich Judea tyenɨj oyuhwo otĩ̵r kojano deyo par otsakɨs ɨre. 17Kɨmɨjɨ yeẽk chɨhɨ dahuch eeych ich ye ompe uje masaha ehet par hnoy ɨr kushjãro. Shɨ tyenɨj yuhwo. 18Hn uje yeẽk chɨhɨ aach ich ye ompe uje cheeshpo par hnoy lasuwo. Shɨ tyenɨj yuhwo. 19Uje terɨhɨ erze daalo nehe ich yarhak par erze tɨmcher uje õr hmɨker hn erze uje yesh õr aabo ijaabo uje ochuku pork ye õr pwele ochoshpe par oyuhwo. 20Apurlo Porrosht par uje ye duhu tyempɨt mĩ̵hnɨk uje olak yuhwo hnii uje terɨhɨ deeych uje otsakɨr. 21Uje ĩ̵rmo tenit nehech ele ahle ich mɨhnũwo de per ye ɨlo erze uje tyenɨj tĩ̵r ĩ̵rmo nehe hn erze kuche mɨhnũwo ich ye deeshpo petɨk nehe tĩ̵r ĩ̵rmo. 22Kɨmɨjɨ ye Porrosht duhu erze daalo arhaab uje erze kuche mɨhnũwo tĩ̵r ĩ̵rmo nehe ich tyenɨj nos otoy, per Porrosht sontew pork sahmũr erze uje chiihla õr par omasaha par ɨr aabo. 23Heke uje yeẽk tatɨm olak ɨl: “Hmeychɨmlo, Cristo de lɨka,” o kɨmɨjɨ tatɨm olak ɨl: “Cristo de wahacha,” ich otiislo ɨre. 24Tyenɨj oso ode nehe uje ochii ɨr Cristoho hn yewo ochii ɨr profetaha. Tyenɨj oshiyokõr kuche deyo uje ye latɨk pwele niyokõr par sehe onehnyẽr erze oso uje Porrosht chiihla õr par ɨr aabo per ye õr pwele uje onehnyẽr õrpe. 25Hmeychɨmlo, uje ehn yahpaa wɨr õr prowa onehnyẽr olak ich titɨm olak erze uje tyenɨj oshiyokõr. 26Heke kɨmɨjɨ otatɨm olak nehe ɨle: “Hmeychɨmlo, Cristo de wahacha hnɨmich uje ɨsa,” ich ye etĩ̵rlo wahacha, o kɨmɨjɨ otatɨm olak ɨle: “Hmeychɨmlo, Cristo de lɨka pwert ehet,” ich otiislo õr. 27Yok tokõra poõrzni. Uje takaashpo nehe ich omo yokɨhɨ ĩ̵rmo lekɨtiyo ɨtso uje yuwebo hũre ich omoho dukuhla deeych warĩch hn uje deeych yakaha. 28Uje kuchɨt topɨt de ich wupuu takasho lawichɨhɨchɨs.— 29—Titɨm olak uje erze kuche mɨhnũwo yuwɨr ɨchii deeych ye dihitpe hn shekurko ɨtspo ye dihitpe hn porrzeebe kay tãra poõrc. Erze kuche uje ukurbosh wahacha poõrc ich telerrzpa shɨ ɨtso uje yeẽk chɨshɨt kuchɨt. 30Uje yuwɨrke erze hn tyenɨj omo yarta uje tokolɨhɨ poõrc shuu ɨmeheeych uje yok takaashpo. Nos wɨr oso uje ode ĩ̵rmo lekɨtiyo ich otolpa pork omo yok uje tokõra poõrzni. Ich tokonãha ukuhurrza. Uje tɨkɨrẽt ich pukurbo deyo de hn ich yok hũre 31hn tuu yeẽk sobɨta trompeta ich jwertpa. Tuu yok anjele otĩ̵r ĩ̵rmo lekɨtiyo par otõhwa Porrosht aabo uje chiihla õrni. 32Uhu olak eyuwo tɨsĩ̵r asa pohorrza waa je iich otsɨɨ higuera. Uje eshɨ tokole ich erahalo uje terɨhɨ ɨshɨrĩt uje daalo duhlu. 33Uje nos amlo erze kuche mɨhnũwo uje tĩ̵r ĩ̵rmo nehe ich erahalo uje terɨhɨ ɨshɨrĩt uje takaashpo ɨtso uje yok de pwert ebich par sehe tomsaha ehet. 34Titɨm olak ich tuu ũrpa. Erze oso uje omo erze kuche mɨhnũwo webich oso uje tĩ̵r ĩ̵rmo nehe ich ehn yewo ye otope ich tyenɨj nos omo erze kuche uje tĩ̵r ĩ̵rmo. 35Poõrc hn hnɨmich tyenɨj sɨhna ɨre nehe per pahwoso shish yakaha. 36Ese deeych hn asa orta uje takaashpo nehe ich nĩhyok yeẽk uje chɨraha, hnii erze anjele uje ode poõrc ye odɨrehepe, hnii yok ye tɨkɨrahape. Shɨ Papa wɨchɨ uje chɨraha. 37Uje ehn yahpaa Noé masaha pohorrza ehet ich oso oshiyokõr kuche uje otsahmũr. Yok tokõra poõrzni. Uje ta par takaashpo nehe ich oso oshiyokõr oshuu ɨtsshɨp uje erze oso yewo oshiyokõrkite uje Noé masaha pohorrza ehet. 38Uje ehn yahpaa kresyent bahlut tɨrẽtkite ich oso shish otaak hn oho hn õhiye ahɨr nehech terɨhɨ ese deeych uje Noé masaha asa pohorrza ehet. 39Ye odɨraha uje kresyent bahlut tyenɨj tɨrẽt nehech tarãha õr hnɨmich hn nos sɨhna õr. Uje takaashpo nehe tokõra poõrc ich oso ye odɨraha uje takaashpo ɨtso erze oso yewo uje kresyent sajuwe õrkite. 40Uje takaashpo nehe hn hnakɨrbo õr osiyer ode aach ich ohnoy yet shɨ yet sakaha. 41Uje tɨmcher õr otiyer oshuu molino shiyokõr oposo ich ohnoy yata shɨ yata sakaha. 42Heke shish tyenɨj emɨtlo olak pork ye erahalo ese deeych uje olak Ɨrhĩch tyenɨj cheeshpo nehe. 43Olak erahalo. Kɨmɨjɨ hnakɨrbich dɨraha orta uje echɨkɨt tɨrẽt ich tɨbey ɨre par uje ye duhu masaha dahuch ehetpe hn torha ɨr kushjãro. 44Heke olak tyenɨj shish emɨtlo olak pork yok uje tokõra poõrzni tyenɨj takaashpo uje ich uhu olak eyuwo tɨsĩ̵r uje ye takaashpe. 45¿Yeẽkpo ese hnakɨrbich uje shiyokõr debiyo hn eykdeyo heke ɨr yɨnsɨrc ɨshɨm dahuch par shuu tɨbey hn shuu ɨshɨm õr poso uje terɨhɨ orta? 46Ich om par ese hnakɨrbich uje ɨr yɨnsɨrc taãcha hn shish shiyokor debiyo . 47Titɨm olak ich tuu ũrpa. Heke ese yɨnsɨrc ɨshɨm ɨr ɨbiyo ma dich. Ich shuu nos tɨbey ɨr kushjãro. 48Per kɨmɨjɨ ese hnakɨrbich ɨr ɨluu mɨhnũ hn chɨbɨte uje ɨr yɨnsɨrc yahpaa deeshpe 49heke ɨchii sepyẽr erze nensɨrc ɨr ɨbiyo hn ɨre taak hn ɨhɨ hn ĩya erze oso uje õr yɨkehyõ. 50Ese deeych ich chɨbɨte uje ye yɨnsɨrc taãchpe hn chɨbɨtpo uje yelɨj ɨr yɨnsɨrc taachĩ̵hɨ asa orta wɨchɨ uje ɨr yɨnsɨrc taãcha 51hn sepyẽr ese debich hn chɨbɨte ese owich uje wɨr ode uje õr aho yũhɨrsh. Wɨr oyerh hn oches labɨtẽre.—

will be added

X\