MATEO 2

1Eseekite uje Jesús shurẽhe wahacha dɨt Belén uje dechɨ hnɨmich Judea hn Herodes shish reyɨhɨchɨs ich hnakɨrbo otɨrẽt otãra deeych warĩch yɨt uje õr dɨt de otĩ̵r Jerusalén. Wɨr õr eykdeyo, ochɨraha porrzeebe. Otata otsɨɨ: 2—¿Chɨhɨ ɨraãpo uu israel oso õr rey uje shurhãni? Oyumo ese pɨkɨhnint ɨr porrzeebcha wahacha deeych warĩch hn oyɨrẽt par oyeeychãha ɨre.— 3Uje rey Herodes chunt uje ɨtsorz ich chishlabe hn tola. Nos wɨr oso uje ode dɨt Jerusalén ochishlabe hn otola toy. 4Herodes shuu nos wɨr otakɨsho lawich erze saserdote õr bahluwo hn erze uje oshiyokorãha oso waa ley waa je Moisés chichewkite. Tatɨm õr ɨm: —¿Ɨraãpo uje Cristo tyenɨj shurẽhe?— 5Otatɨm otsɨɨ: —Tyenɨj shurẽhe dɨt Belén uje de ese hnɨmich Judea pork profeta porokkite chichew shuu ɨtsorz ɨm: 6“Ese dɨt Belén uje de hnɨmich Judea wɨchɨ dɨt ijaap per ich bale pork erze israel oso õr bahlut tyenɨj tãra ese dɨt par tɨbey õr.”— 7Eseekite hn Herodes shuu otɨbii erze hnakɨrbo uje õr eykdeyo per ye nahmũrpe uje shuu oso yewo ochɨraha uje tɨbii õr. Tatɨm õr ɨm: —¿Latɨkni hn ese rey ɨr porrzeebcha tokole?— 8Uje otatɨm ɨre hn wɨchɨ tatɨm õr ɨm: —Bolɨlo etĩ̵rlo wahacha dɨt Belén ekulo ese pɨkɨhnint. Uje eshɨlo ich erẽtlo atɨmlo yok par uje takaha tɨkeeychãha ɨre toy.— 9Uje ochunt uje rey Herodes tataka hn otokole ohno. Asa porrzeebcha waa je omoho wahachhna deeych warĩch dechɨ õr ɨkɨch iyebe hn oyehe nẽr nehech asa porrzeebcha iyehechɨs owich uje ese pɨkɨhnint de. 10Uje erze hnakɨrbo omo asa porrzebcha uje iyehechɨs ich õr ayla. 11Omasaha pwert ehet hn omo ese pɨkɨhnint hn ɨr data María. Wɨr ocha dete hnɨmo hn oteeychãha ese pɨkɨhnint. Otsɨtsẽr ese uje otõhwa hn ochiyuhu oro oshɨm ɨre. Oshɨm ɨre incienso hn mirra uje aat ehmuuj. 12Uje omo hn õr yet chɨkẽra uje ye ompe ocheeshpo otĩ̵r Herodes heke ochɨkãha dehet yet uje tĩ̵r õr dɨt. 13Eseekite uje erze hnakɨrbo ohnoko uje õr eykdeyo hn José umo. Chɨkẽra deerc. Umo Ɨrhĩch ɨr anjel uje tatɨm ɨm: —Alehet, boy ese pɨkɨhnint hn asa ɨr data etĩ̵rlo wahacha egipto oso õr hnɨmich shɨchish. Shɨ akahachɨs nehech terɨhɨ uje titɨm owa nehe hn eeshpo, pork Herodes sehe duhu odukwi ese pɨkɨhnint par shuu oshuu oshuu toy.— 14José nĩ̵hɨ dɨhlich pehet. Chishew ese pɨkɨhnint hn ɨr data. Ohno otĩ̵r egipto oso õr hnɨmich. 15Otsakaha wahachni nehech terɨhɨ uje rey Herodes toy. Uje oshiyokõr oshuu ɨtsorz ich oshuu eyok Ɨrhĩch ɨr ahwoso yakaha uje shuu profeta chichewkite uje tata ɨm: —Porrosht sole: “Tɨkɨbii pijɨt par uje tokolɨhɨ egipto oso õr hnɨmich.”— 16Eseekite uje rey Herodes kemɨhɨ uje erze hnakɨrbo uje õr eykdeyo otsehnyẽr ɨre ich chesdelpa. Shuu ohyerptoso ohno otĩ̵r dɨt Belén hn nos wɨr duwo uje de ɨr wɨro par oshuu erze pɨkɨhnino ijaabo oshuu otoy uje õr do ãyo hn uje ehn oyehi pork erze hnakɨrbo uje õr eykdeyo otatɨm ɨrhna uje do ãyo uje asa porrzebcha tokole. 17Uje oshuu erze pɨkɨhnino oshuu ɨtsorz ich oshuu yakaha erze uje profeta Jeremías chichewkite ɨm: 18—Ochunt õr iyaa wahacha dɨt Ramá. Wɨr oyerh ich otsɨhnew. Wate Raquel uje yerh towĩ̵ra deyjo. Ich ye nahmũrpe uje yeẽk shuu ɨre ehet kɨɨs pork ich nos wɨr ɨr aabo ijaabo ɨteẽto otoy.— 19Eseekite uje rey Herodes tokite hn José umo hn chɨkẽra deerc. Ɨrhĩch ɨr anjel tatɨm ɨm: 20—Alehet, asew ese pɨkɨhnint hn ɨr data. Bolɨlo etĩ̵rlo israel oso õr hnɨmichpo pork ich tohna ese uje sehe duhu ese pɨkɨhnintni.— 21José iyehet. Chishew ese pɨkɨhnint hn ɨr data. Ohno ocheeshpo otĩ̵r israel oso õr hnɨmich. 22Uje José chunt uje rey Herodes ɨr ijɨt Arquelao tɨbey erze israel oso uje ode hnɨmich Judea ich tola par tĩ̵r wahacha. José umo hn chɨkẽra deerc. Porrosht tatɨm uje ich ye ompe sakaha wahacha, heke hno tĩ̵r hnɨmich Galilea. 23Uje taachĩ̵hɨchɨs hn hno sakaha dɨt Nazaret heke ich yakaha uje erze profeta poruwo wɨshɨ otata otsɨɨ: —Cristo wɨchɨ uu Nazaret osht.—

will be added

X\