MATEO 19

1Eseekite uje Jesús nos tatɨm õr erze kuche hn tokolɨhɨchɨs hnɨmich Galilea. Hno tĩ̵r wahacha hnɨmich Judea Jordán pɨt yet. 2Ich oso okɨhniya oyehe nẽr hn nos chukuta erze uje õr permo. 3Erze uje õr ɨluuta iich otsɨɨ fariseo otsɨtĩ̵r ɨre Jesús. Wɨr shɨ sehe õr prowa Jesús heke otatɨm otsɨɨ: —Sehe oyɨraha kɨmɨjɨ hnakɨrbich sowe ley uje iim nerãhta shɨ pork sehe noym wate.— 4Jesús tatɨm õr ɨm: —Olak erahalo uje Porrosht ahwoso tata uje shiyokõr ɨrmõkite ich shiyokõr hnakɨrbich hn shiyokõr tɨmcharrza 5hn Porrosht tata ɨm: “Hnakɨrbich tyenɨj iim deych hn iim data par uje hõr nerãhta õhyiye ahɨr. Wɨr otokole shɨ õr nohmɨra” 6heke ich ye õr osiyerpe, shɨ õr sohmɨra. Porrosht shuu iĩye heke ye ompe uje hnakɨrbich sehek erze uje Porrosht shuu iĩye.— 7Otatɨm otsɨɨ: —Kɨmɨjɨ ye om otsehek ɨre ¿Ɨnaãpo heke Moisés chɨbɨte uje hnakɨrbich pwele shiyokõr hutɨta par ɨshɨm nerãhta hn iim wate?— 8Jesús tatɨm õr ɨm: —Shɨ pork olak hu kata heke Moisés chɨbɨte par uje atsɨlo ebɨtɨlo hute hn asɨmlo olak ɨrẽhte par moymlo õr, per uje ĩ̵rmo tenitkite ich ye ɨlorzpe. 9Per yok titɨm olak kɨnaha. Yeẽk uje iim nerãhta hn ĩhi yata ahɨr ich torãha nerãhta per kɨmɨjɨ wate torãha dabich wap ich wɨchɨ ye torãha nerãhta uje iim wate.— 10Jesús ɨr akɨle otatɨm otsɨɨ: —Kɨmɨjɨ hnakɨrbich ye pwele noym nerãhta ich ye ompe uje yeẽk chiileku.— 11Jesús tatɨm õr ɨm: —Ye nos hnakɨrbo õr pwele ewentpe uje nĩhyok õr ɨrẽhte. Shɨ erze uje Porrosht takashɨm õr uje ye duhu õr ɨrẽhtɨrsh ich wɨr uje õr pwele ewenta. 12Hnakɨrbo yewo ode uje oshũrha shɨ õr ɨtsorz heke yelɨj oduhu tɨmcher õr hmɨker. Hn hnakɨrbo yewo ode uje ye odiilekupe pork yewo ochiyuhu õr ite. Hn yewo ode uje ye onahmũr odiilekupe pork sehe oniyokõr Porrosht ɨbiyo uje ye õr pwele oniyokõr kɨmɨjɨ õr ɨrẽhte de. Yeẽk uje pwele shiyokõr shuu ɨtsorz ich om par ɨre.— 13Eseekite hn oso ohnoy pɨkɨhnino otseya õr Jesús par chɨbɨte nahme õr hu eeyo hn orar sapur par õr ɨre, per ɨr akɨle otatɨm erze oso par uje ye oduhu otõhwa erze pɨkɨhnino odeya õr Jesús. 14Jesús tatɨm dakɨle ɨm: —Moymlo erze pɨkɨhnino shɨ otɨrẽt otĩ̵r yok. Ye ontɨlo õr pork erze oso uje ye olotiis yok ich shɨ õr ɨtso erze pɨkɨhnino uje ye olotiis õr ahwospe wɨr uje omasaha par Porrosht aabo.— 15Jesús chɨbɨte nahme erze pɨkɨhnino õr hu eeyo. Uje yuwɨrke hn tokolɨhɨchɨs hno. 16Eseekite hn hnakɨrbich yet sɨtĩ̵r ɨre Jesús. Tatɨm ɨm: —Maestro, owa eluu om. ¿Tiyokõr latɨkpo uje om par pɨkɨrĩt de uje yelɨj nɨhna ɨre?— 17Jesús tatɨm wɨchɨ ɨm: —¿Ɨnaãpo heke atɨm yok uje pɨluu om? Shɨ sohmɨra de uje ich om. Kɨmɨjɨ sehe etĩ̵r ese owich uje ɨkɨrĩt de uje yelɨj nɨhna ɨre ich ye aluwe nos wɨr erze ley uje Moisés chichewkite.— 18Ese hnakɨrbich tatɨm ɨm: —¿Leyɨrãha uje tyenɨj tiyokõr?— Jesús tatɨm ɨm: —Ye tuk oso uhu otoy, hn ye orãha erãhta, hn ye ohɨr, hn ye atɨm ekushĩ jwe par uhu sepyẽr yet. 19Atɨla eych hn atɨla ata. Ahmũr eshɨbo uhu ɨtso uje ahmũr owa.— 20Ese hnakɨrbich tatɨm Jesús ɨm: —Nos tiyokõr erze uje atɨm yokɨke. ¿Yehe latɨk chɨhɨ par tiyokõr?— 21Jesús tatɨm ɨm: —Kɨmɨjɨ sehe uhu eluu om ich bo, hn nos anuwãha owa kushjãro uje de ahɨr. Asɨm baho erze losuhlaabo heke owa premyo kɨhniya de poõrc hn erẽt mẽya yok.— 22Uje ese hnakɨrbitɨt chunt erze uje Jesús tatɨm ɨreke ich tokole hno. Wɨchɨ ich dosdarakpa pork ɨre ich ɨrhĩch dich. 23Jesús tatɨm erze dakɨle ɨm: —Titɨm olak ich tuu ũrpa. Ich kwestpa par erze ɨhĩ̵r deyo omasaha par Porrosht aabo. 24Titɨm olakpo. Kameylo ye pwele masaha awujɨta ontape ich erze ɨhĩ̵r deyo õr ɨtspo ye õr pwele omasaha par Porrosht aabope.— 25Uje erze ɨr akɨle ochunt erze uje tatɨm õrke ich ochishlabpa. Otatɨmye otsɨɨ: —Kɨmɨjɨ ye erze ɨhĩ̵r deyo õr pwele otĩ̵r Porrosht ahɨr ich nĩhyok yeẽk uje pwele tĩ̵r ɨre ahɨr nehe.— 26Jesús teychɨm õr hn tatɨm õr ɨm: —Oso ye õr pwele oduhu ɨre Porrosht aabo per Porrosht pwele nos shiyokõr kuche. Wɨchɨ pwele shuu omasaha par ɨr aabo.— 27Pedro tatɨm ɨre ɨm: —Ɨrhĩche, nos oyukwim õryok kushjãroni par oyukwĩya owa. ¿Latɨk chɨhɨ par õryok nehe?— 28Jesús tatɨm õr ɨm: —Titɨm olak ich tuu ũrpa. Yok tokõra poõrzni. Uje takaashpo nehe ich tuu ĩ̵rmo ahle hn tiyakaha pɨbɨta waa je ich ɨhĩ̵rpa. Olak uje shish meylo yok tyenɨj akahalo erze olak ɨbe eeyo toy uje dose pork olak jwe nehe par eychɨmlo erze israel oso uje õr wee dose kɨmɨjɨ oniyokõr uje om o kɨmɨjɨ oniyokõr uje mɨhnũwo. 29Nos wɨr uje oym dahuwo o kɨmɨjɨ deshɨbo o kɨmɨjɨ nanɨme o kɨmɨjɨ deyo o kɨmɨjɨ datɨ o kɨmɨjɨ onoym deyjo o kɨmɨjɨ õr hnɨmo shɨ par oshiyokõr uje tahmũr, wɨr uje Porrosht ɨshɨm õr kushjãro ich shuu kɨhnipa hn ɨshɨm õr ɨkɨrĩt uje yelɨj nɨhna ɨre. 30Ele ahle ich okɨhniya uje oshuu ɨre deyo per deeych yet nehe ich Porrosht ye duhu õr deyope. Ele ahle ich okɨhniya uje oso ochɨbɨte uje ye õr deyope per uje terɨhɨ uhurc nehe ich Porrosht chɨbɨte wɨr shuu õr deyo.—

will be added

X\