MATEO 18

1Eseekite uje shiyehe wɨchɨ deeych hn Jesús ɨr akɨle otĩ̵r ɨre, otatɨm otsɨɨ: —¿Yeẽkpo uje ma dichɨhɨ Porrosht aabo õr ehet?— 2Jesús tɨbii pɨkɨhnint shuu iyehe õr ehet hn tatɨm õr ɨm: 3—Titɨm olak ich tuu ũrpa. Kɨmɨjɨ ye uhu olak eyuwo kɨnãho hn ye otiislo yok ɨtso pɨkɨhnino uje ye olotiis ahwospe ich ye amsahalo par olak Porrosht aabo. 4Yeẽk uje ye narim ɨre hn ye lotiis Porrosht shɨ ɨtso ese pɨkɨhnint uje ye lotiis õr ahwospe wɨchɨ ich ma dich Porrosht aabo õr ehet.— 5Hn Jesús tatɨm õr ɨm: —Uje yeẽk sahmũr ese pɨkɨhnint shɨ pork wɨchɨ sahmũr yok ich sahmũr yok toy. 6Per kɨmɨjɨ yeẽk duhu erze pɨkɨhnino yeẽk uje ye lotiis yok niyokõr uje mĩ̵hnɨk, uje ehn yahpaa duhu niyokõr uje mĩ̵hnɨk ich ma om par ɨre kɨmɨjɨ yeẽk duhu tuuhna kojach dich hn tãra chɨbɨte onoota ehet par uje toy. 7Ich yarhakpa par erze oso uje oshuu yewo oshiyokõr mɨhnũwo. Shish de uje oshuu yewo oshiyokõr mɨhnũwo per ich yarhakpa erze uje tyenɨj tĩ̵r ese hnakɨrbich uje shuu yet shiyokõr uje mĩ̵hnɨk. 8Kɨmɨjɨ olak yeẽk niyokõr uje mĩ̵hnɨk shɨ ɨtso uje hmata shuu shiyokõr mĩ̵hnɨk o kɨmɨjɨ hnɨtɨta duhu niyokõr uje mĩ̵hnɨk ich tyenɨj iim uje shiyokõr ese mĩ̵hnɨk shɨ ɨtso uje chekshehe namɨta nohmata o kɨmɨjɨ derrza hn tãra. Ich ma om shɨ ɨtso uje pɨlich worbɨt yakaha ɨre par uje taachĩ̵hɨ ese owich nehe uje õr ɨkɨrĩt de uje yelɨj nɨhna ɨre, je uje hme otiyer hn hnɨte otiyer de hn shuu ochɨmchaha ɨre asa jwekɨta ehet waa je yelɨj nɨhna ɨre. 9Kɨmɨjɨ olak yeẽk teychɨm kuche heke shiyokõr mĩ̵hnɨk shɨ ɨtso uje ɨr onta shuu shiyokõr ese mĩ̵hnɨk, ich ma om uje iim, ye teychɨm shɨ ɨtso uje chiyuhu nonta hn tãra. Ich ma om uje shɨ onta nohmɨra de uje taachĩ̵hɨ ese owich nehe uje õr ɨkɨrĩt de uje yelɨj nɨhna ɨre, je uje ɨle otiyer de hn shuu otãra ɨre ochɨbɨte ɨre asa urhuta bahluta ehet nehe.— 10Eseekite hn Jesús tatɨm dakɨle ɨm: —Abeylshɨp olak par uje ye olak yeẽk dɨbɨte uje erze pɨkɨhnino ijaabo yeẽk ye jukur. Titɨm olak erze anjele uje otɨbey erze pɨkɨhnino shish otĩ̵r Papa ɨle ɨkɨch wahacha poõrc. 11Yok uje tokõra poõrc tɨkɨrẽtni par tokoshɨ oso õr hnɨtewɨhɨ Porrosht ahɨr. Wɨr shɨ õr ɨtso uje õr pyerte. 12Uhu olak eyuwo tɨsĩ̵r erze uje tyenɨj titɨm olak. Kɨmɨjɨ hnakɨrbich ɨr obeje chɨhɨ syen hn sohmata pyerte, wɨchɨ iim erze yerĩ̵hɨchɨs uje noventa y nueve ese wĩ̵rit eeych hn hno chukwi asa yata waa je pyerte. 13Titɨm olak uje wɨchɨ chish asa waa je pyerte ich aylpa. Ich ma aylpa par asa nohmata je erze yẽr uje noventa y nueve uje ye pyertpe. 14Olak Deych uje de poõrc ɨtspo, ye nahmũrpe uje erze pɨkɨhnino yeẽk pyerte.— 15—Titɨm olak. Kɨmɨjɨ Porrosht aabo yeẽk niyokõr mɨhnɨkĩ̵hɨ olak yet ich wɨchɨ tyenɨj tĩ̵r ɨre hn tatɨm uje shiyokõr mɨhnɨkĩ̵hɨ ɨre. Shɨ ɨre hn ese yet uje okeytkẽrye. Kɨmɨjɨ wɨchɨ tẽr ɨre ich takashɨm ɨre shuu cheeshpo par shiyokõr uje Porrosht sahmũr. 16Kɨmɨjɨ ye nahmũr tẽr ɨre ich tyenɨj hnoy hnakɨrbich yet o kɨmɨjɨ õr osiyer par uje otĩ̵r otẽr uje keytkẽr wɨchɨ toy. Heke erze õr osiyer o kɨmɨjɨ õr tre ochɨraha uje wɨchɨ shiyokõr. 17Kɨmɨjɨ ye nahmũr tẽr õr ich tyenɨj otatɨm nos wɨr Porrosht aabo uje otaakɨsho lawichɨhɨ iglesya ehet. Kɨmɨjɨ ye nahmũr tẽr erze Porrosht aabo ich tyenɨj wɨr ochɨbɨte uje wɨchɨ shɨ ɨtso uje ɨre ye Porrosht aappe per Porrosht aap. Wɨchɨ shɨ ɨtso dihip kɨnaha uje ye dɨraha Porroshtpe hn shɨ ɨtso wɨr yeẽk erze uje õr kobra hnote par gobierno. 18Titɨm olak ich tuu ũrpa. Uje ontɨlo wɨchɨ ele ĩ̵rmo uhulo ɨtsorz ich Porrosht sontewɨhɨ wahacha poõrc toy. Erze uje ye ontɨlo õr lɨka hnɨmich ich Porrosht ye nontewɨhɨ wahacha poõrc toy. 19Ich titɨm olakpo. Kɨmɨjɨ olak osiyer uje olak eyuwo ɨtsye ele ĩ̵rmo uje apurlo Papa uje de poõrc, ich shiyokõr uje apurlo ɨre par olak 20pork kɨmɨjɨ õr osiyer o kɨmɨjɨ õr tre uje otakɨsho lawich shɨ pork ye olotiis yok ich yok dechɨ õr ehet.— 21Heke Pedro tĩ̵r Jesús hn tatɨm ɨm: —Ɨrhĩche, uje shish pɨshɨbich shiyokõr mɨhnɨkĩ̵hɨ yok ¿je om uje yok perdonar nehech terɨhɨ syete bese?— 22Jesús tatɨm ɨm: —Ye titɨm owape uje owa perdonar ɨre nehech terɨhɨ syete bese. Ye uhurtɨkɨsh uje tyenɨj owa perdonar ɨre.— 23—Heke tyenɨj titɨm owa. Ese uje Porrosht shiyokõr par tɨbey daabo shɨ sɨteẽta uje rey nɨshii debiyo õr hnɨtew. 24Uje ehn nɨshii erze yewo õr hnɨtew hn otõhwa yet uje ɨr hnɨtewta ich datpa, milyones. 25Ɨr ɨbich ich ye pwele uje doshɨ ɨr hnɨtewtape heke ɨr ɨrhĩch tatɨm par uje chiwãha ɨre par õr yɨlak, ɨr ɨrãhta hn ɨr aabo hn nos wɨr ɨr kushjãro par uje ɨshɨ ɨr hnɨtewta. 26Ɨr ɨbich icha dete hnɨmoho ese rey ɨkɨch hn sapur ɨre ɨm: “Ɨrhĩche, sehe tuu hap enta yok lɨshɨ nehech nos tokoshɨ yok hnɨtewta nehe.” 27Heke ese rey chuuna uje ese ɨr ɨbich ich losuhlaap hn iim erze ɨr hnɨtew uje de ɨre. 28Uje ese ɨr ɨbich tokolɨhɨchɨs hno hn chish rey ɨbich yet uje ɨr hnɨtewta de ɨre pɨkaap. Chishew wɨchɨ weheta hn tatɨm ɨm: “Eshɨ asa owa hnɨtewta uje de yok.” 29Wɨchɨ icha dete hnɨmoho ɨre ɨkɨch hn tatɨm ɨm: “Sehe tuu hap enta yok lɨshɨ nehech nos tokoshɨ yok hnɨtewta nehe.” 30Per ese yet ye nahmũrpe uje neta wɨchɨ. Shuu ochɨmchaha karsel ehet nehech nos ɨshɨ ɨr hnɨtewta. 31Uje erze rey ɨr ɨbiyo yewo omo uje wɨchɨ shiyokorĩ̵hɨ ese deshɨbich yet ich shuu õr dosdarakpa. Wɨr ohno hn otatɨm rey uje wɨchɨ shiyokõrke. 32Heke ese rey shuu otɨbii wɨchɨ. Tatɨm ɨm: “Owa ich eluu mɨhnũ. Uje apur yokhna ich nos tokoym erze owa hnɨtew uje de yok. 33¿Ɨnaãpo heke ye eenape uje eshɨbich losuhlaap shɨ ɨtso uje tukuuna uje owa losuhlaaphna?” 34Heke ese rey ich chesdelpa. Chowãha wɨchɨ hn ɨshɨm ɨre erze uje otɨbey karsel ehet par oloter ɨre nehech nos ɨshɨ ɨr hnɨtewta.— 35Jesús tatɨm dakɨle ɨm: —Papa uje de poõrc tyenɨj shiyokorĩ̵hɨ olak shuu ɨtsorz ɨtso erze uje titɨm olakɨke kɨmɨjɨ ye olak perdonar olak leshɨbo hn shɨ emerɨhɨ olak aho.—

will be added

X\