MATEO 17

1Eseekite uje ich iyuwe daalo seys hn Jesús hnoy Pedro, Santiago hn Juan. Ese Juan wɨchɨ Santiago leshap. Jesús hno iyebe dohɨr kojach eeych uje ich porĩt hn wɨr oyehe nẽr. Nĩhyok yeẽk uje de õr ahɨr, shɨ õr ɨre. 2Jesús shuu ɨre kɨnaha dakɨle õr ɨkɨch. Ɨr ɨlehet hũre shɨ ɨtso deeych hn ɨr ishuwo ich poro shɨ ɨtso luu yokõrt. 3Wɨr omo Moisés hn Elías uje otokolɨhɨ Jesús ahɨr hn omo uje okeytkẽr Jesús. 4Heke Pedro tatɨm Jesús ɨm: —Ɨrhĩche, ich om uje õryok de lɨka. Kɨmɨjɨ ahmũr ich tiyokõr pwerto tre tĩ̵ra pohɨr ĩhyo, yet par owa hn yet par Moisés hn yet par Elías.— 5Uje ehn Pedro chiilehet hn ukuhurrza ihnɨmichɨhɨ õr eeych. Wate poro shɨ ɨtso uje hũre. Sajuwe õr hn ahwoso tãra ehet tatɨm õr ɨm: —Wɨchɨ uu yok Pijɨt pisht uje tahmũr, hn tahmũr uje shiyokõr. Ẽrlo uje wɨchɨ tata.— 6Uje erze ɨr akɨle ochunt erze ahwoso hn ocha dete hnɨmo nehech õr une terɨhɨ hnɨmich pork ich otolpa. 7Jesús hno tĩ̵r õr. Sakahɨr õr hn tatɨm õr ɨm: —Alehetlo. Ye atɨlɨlo.— 8Uje otsem dehe oteychɨm ich shɨ omo Jesús. Nĩhyok yeẽk uje de ɨre ahɨr. 9Uje ehn Jesús hõr dakɨle oyhnɨmichɨhɨ kojach eeych hn tatɨm õr ɨm: —Ye atɨmlo latɨk erze uje amloko. Yok tokõra poõrzni. Uje yok ɨkpo nehe hnii atɨmlo oso.— 10Erze ɨr akɨle shɨ õr eyucha Elías heke otatɨm Jesús otsɨɨ: —Erze uje oshiyokorãha oso waa ley waa je Moisés chichewkite ¿Ɨnaãpo heke otata uje tyenɨj Elías taãcha wap hn owa alehe nẽr?— 11Jesús tatɨm õr ɨm: —Ich ũru uje Elías tyenɨj tɨrẽt wap par shuu oso ochɨmɨt ɨre. 12Titɨm olak uje Elías taãchni per wɨr ye odɨraha ɨrpe. Shɨ oshiyokorĩ̵hɨ ɨre uje otsahmũr. Yok tokõra poõrzni. Tyenɨj oloter yok toy.— 13Uje ich uhurc Jesús ɨr akɨle okemɨhɨ uje shɨ eyucha Juan uu tohɨrm oso wɨchɨ ɨtso Elías. 14Eseekite uje Jesús hõr dakɨle otaachĩ̵hɨ wahacha uje oso ode hn hnakɨrbich sɨtĩ̵r ɨr Jesús. Icha dete hnɨmoho ɨkɨch hn tatɨm ɨm: 15—Ɨrhĩche, sehe tuu osɨr pijɨt. Atake chishew ɨre. Ich shuu permpa. Shish shuu kayɨhɨ jwekɨta ehet hn shuu kayɨhɨ awɨt toy. 16Tokõhwaka teya akɨle. Õr prowa sehe odukuta per ye õr pwelpe.— 17Jesús tatɨm erze oso ɨm: —Shɨ otiislo yok hn ahakõrlo uje ich mɨhnũwo. ¿Daalo terɨhɨ latɨkpo nehe uje shish yok de olak ahɨr hn shish tyenɨj yok ewenta olak pork shish otiislo yok? Õhwɨlo ese pɨkɨhnint eylo lɨka.— 18Jesús tatɨm ese demonit ɨm: —Atokolɨhɨ ese pɨkɨhnint ehet.— Ich tokole ɨchii ese pɨkɨhnint owich om. 19Uje oso onihyokɨhɨ Jesús ahɨr hn ɨr akɨle otĩ̵r ɨre. Otatɨm otsɨɨ: —¿Ɨnaãpo heke ye õryok pwelpe par oyiyuhu ese demonit?— 20Jesús tatɨm õr ɨm: —Ye olak pwele eyuhulope pork olak meytii koswãha yok. Titɨm olak ich tuu ũrpa. Kɨmɨjɨ ma ye otiislo yok nehech tokole shɨ ɨtso asa pohorrza eyhi uje iich otsɨɨ mostasa heke olak pwele atɨmlo ese kojach par uje sɨhnok lalerc ich hno. Uje olak ye otiislo yok ɨtsorz ich nos olak pwele ahakõrlo erze kuche. 21Ese demonit uje de ese pɨkɨhnint ehetɨke ich ye ɨlo demonyo yewope. Nos wɨr demonyo uje ɨtso ese uje de pɨkɨhnint ehetɨke ye shɨ tokolpe uje atɨmlo ɨre. Tyenɨj olak orar hn moymlo olak poso par eyuhulo erze demonyo.— 22Eseekite uje ehn Jesús hõr dakɨle odechɨ hnɨmich Galilea hn tatɨm õr ɨm: —Yok tokõra poõrzni. Tyenɨj yeẽk ɨshɨm yok oso 23hn wɨr oshuu yok oshuu tɨkɨtɨ, per je daalo tre nehe hn yok ɨkpo.— Uje tatɨm õr shuu ɨtsorz ich shuu õr dosdarakpa. 24Uje Jesús hõr dakɨle otaachĩ̵hɨ dɨt Capernaum hn erze uje õr kobra hnote par templo otĩ̵r Pedro hn otatɨm otsɨɨ: —¿Je owa maestro doshɨ erze hnote par templo?— 25Pedro tatɨm õr ɨm: —Ẽhe.— Uje Pedro masaha pwert ehet par tatɨm Jesús hn Jesús tatɨm ɨre wap ɨm: —Simón, sehe tuu atɨm yok. Erze reye uje ode ɨr hnɨmo ¿je oduhu daabo doshɨ ɨre hnote o je oduhu yewo odoshɨ ɨre?— 26Pedro tatɨm ɨm: —Erze yewo.— Jesús tatɨm ɨm: —Heke erze reye õr aabo ye odoshɨpe. 27Ye tahmũr uje tuu otsɨtak eyok heke bo etĩ̵r wahacha lagunta hn ẽsher. Uje ahɨru doshɨt webich osht ich eychɨm ɨr ahwo ehet, peychporrza de. Wɨchɨ par eshɨ yok hn eshɨ owa toy.—

will be added

X\