MATEO 14

1Eseekite hn Herodes wɨchɨ õr bahluwaha ese hnɨmich Galilea. Chunt nos wɨr kuche uje Jesús shiyokõr. 2Sẽrza tatɨm erze debiyo ɨm: —Wɨchɨ uu Juan uje tohɨrm oso ich ɨkpo heke ukurbo de par shiyokõr kuche uje ye latɨk pwele niyokõr.— 3Antni Herodes shuu ochishew Juan hn oshiyeru kenena meyko hn ochɨmchaha karsel ehet. Shiyeru Juan shɨ pork Herodías sɨtak. Wate Herodes leshɨbich Felipe ɨr ɨrãhto per Herodes ĩhi wate ahɨr. 4Herodes shuu oshiyeru Juan pork Juan tatɨm ɨm: —Owa aluwe ley uje ẽhi wate ahɨr par erãhto.— 5Herodes sehe duhu Juan duhu toy per ich tola erze oso pork wɨr ye olotiispe uje Juan wɨchɨ profetya. 6Eseekite uje Herodes kumpre ãyo hn shiyokõr õr ahamich dich. Herodías waa je Herodes ĩhi ahɨr ɨr ijɨta tokole shiyokõr weylehe erze oso õr ɨkɨch hn Herodes ich sahmũr uje wate shiyokõr. 7Heke chɨbɨte lahwoso par uje wate sapur kuchẽrk ich ɨshɨm. 8Ɨr data sakɨt ɨre heke tatɨm Herodes ɨm: —Asɨm yok Juan uu tohɨrm oso ɨr huta. Emchaha preta waa je data ehet waa je data hn uhu otõhwa odeya lɨka.— 9Uje Herodes chunt uje ɨtsorz ich dosdarak per chɨbɨte lahwosoko erze oso õr ɨkɨch heke tatɨm ohyerptosht par tõhwa. 10Shuu ohno otɨr karsel ehet par ochekshehe Juan etɨbich. 11Ochɨmchaha preta ehet hn otõhwa oshɨm asa pɨkɨhninta. Wate hnoy ɨshɨm data Herodías. 12Eseekite hn Juan ɨr akɨle otĩ̵r karsel ehet hn ohnoy ɨr yũhurrza. Ochihitsɨm hn ohno otatɨm Jesús. 13Uje Jesús chunt hn tokolɨhɨchɨs iyãha pohorrza hn hno tĩ̵r owich yet uje ɨsa. Uje oso ochunt uje Jesús hnooko hn otokolɨhɨ erze duwo ohno otsahn ɨjɨch odɨrkɨhɨ hnɨmich. 14Uje Jesús taachĩ̵hɨ wahacha hn ihnɨmichɨhɨ pohorrza ehet ich umo erze oso uje ich okɨhniya. Chuuna uje õr losuhlaabo hn chukuta erze uje õr permo. 15Uje ich yɨlkashɨp hn Jesús akɨle otatɨm ɨre otsɨɨ: —Ele owich uje eyok de ich ɨsa hn ich yɨlkashɨp. Atɨm erze oso par uje odo otĩ̵r erze duwo hn otiya labɨso par otew.— 16Jesús tatɨm erze dakɨle ɨm: —Ye nesitpe uje ohno. Asɨmlo õr uje otew.— 17Ɨr akɨle otatɨm otsɨɨ: —Shɨ pan sinko hn doshiyo osiyer uje de.— 18Jesús tatɨm õr ɨm: —Ohwĩ̵lo, asɨmlo yok.— 19Jesús tatɨm erze oso par uje shuu otsakahachɨs ɨhnemich eeych. Chishew erze pan uje sinko hn doshiyo osiyer. Teychɨm poõrc hn nɨhna Porrosht par erze poso. Sehek hn ɨshɨm erze dakɨle par shuu oshɨm erze oso. 20Nos wɨr oso otew nehech otsatso. Erze ɨr akɨle ochish erze oposye uje otsatsako nehech oshuu kanaste dose yeno uje deyo. 21Erze uje otew erze oposo wɨr õr sinko mil hnakɨrbo per ye otɨskẽr tɨmcherpe hn erze pɨkɨhnino. 22Eseekite hn Jesús shuu wɨr dakɨle ohno oyãha pohorrza par shuu otĩ̵r wahacha lagunta pɨt yet per ɨre shɨ sakaha erze oso õr ahɨr par shuu otseyhi. 23Uje tatɨm õr par shuu ohno hn dohɨr kojach eeych shɨ ɨre nohmɨra par orar. Uje dɨhlak wɨchɨ shɨ dechɨ shɨ sohmɨra. 24Asa pohorrza ich dukulehe ese hnɨmich. Otsatsɨrãha myent arhĩch heke erze owɨt wokor ich shuu asa pohorrza. 25Uje ich deeych huta hn Jesús hno sahn õr ɨjɨch dɨrkɨhɨ awɨt eeych. 26Uje erze ɨr akɨle omo uje dɨrkɨhɨ awɨt eeych ich otolpa hn otɨbich otsɨɨ: —Lɨkɨchɨbich de wahacha.— Ich otɨbich ich otsɨhnew pork ich otolpa. 27Ɨchii Jesús tatɨm õr ɨm: —Yok, ye atɨlɨlo hn ye as olak ɨbe.— 28Pedro tatɨm ɨm: —Ɨrhĩche, kɨmɨjɨ owa ich atɨm yok par uje tɨtĩ̵r owa tɨkɨrkɨhɨ awɨt eeych.— 29Jesús tatɨm ɨm: —Erẽt.— Heke Pedro ihnɨmichɨhɨ asa pohorrza ehet, dɨrkɨhɨ awɨt eeych tĩ̵r Jesús. 30Per uje eyuwo tɨsĩ̵r uje myent data ich tola ɨchii sehe yaka. Tɨbii Jesús ɨm: —Ɨrhĩche, sehe tuu akashɨm yok.— 31Ɨchii Jesús chĩ̵r nahmikɨt hn chishew. Tatɨm ɨm: —Shish otiis yok. ¿Ɨnaãpo owa koswãha yok?— 32Uje odohɨr asa pohorrza ehet ich myent iyehe. 33Erze uje ode asa pohorrza ehet otĩ̵r Jesús hn ocha dete hnɨmoho ɨkɨch oteeychãha ɨre. Otatɨm otsɨɨ: —Ich ũrpa uje owa uu Porrosht Ijɨt.— 34Eseekite ich otaachĩ̵hɨ wahacha hnɨmich Genesaret uje de lagunta pɨt yet. 35Uje erze oso uje odechɨ okemɨhɨ uje wɨchɨ Jesús ich oshuu erze yewo ohno otĩ̵r lekɨtiyo par uje nos otõhwa erze uje õr permo. 36Otsapur Jesús par uje sehe olakɨhɨr shɨ ɨr nerpta ɨhɨr, hn nos wɨr uje otsakɨhɨr ich nos shuu õr sano.

will be added

X\