MATEO 12

1Eseekite uje terɨhɨ sabta hn Jesús hno chɨkãha shakɨrrza ehet. Ɨr akɨle ohno õya ɨre hn ochuuna uje sewɨt sẽhi õr heke ochekushu trigo ee hn otew. 2Erze uje õr ɨluuta iich otsɨɨ fariseo uje omo Jesús akɨle uje oshiyokõr hn otatɨm Jesús otsɨɨ: —Hmeychɨm erze akɨle, ich oyuwe erze ley. Ley tata uje ich ye ompe oshiyokõr obiyo sabta pork wɨchɨ ese deeych uje otsakɨr.— 3Jesús tatɨm õr ɨm: —Erahalo uje Porrosht ahwoso tata uje iyuwo sẽhi rey David hn ɨr ihyẽro. 4Omasaha ese patikɨt ehet uje Porrosht ihyuch de hn saserdote ɨshɨm õr erze pan uje oshɨmɨhɨ Porrosht par uje otew. Erze pan wɨr uje ochɨbɨte shɨ par uje saserdote otew, ye par yewope per David ye niyokõr mɨhnĩ̵kpe pork iyuwo sẽhi hn sapur. 5Olak erahalo uje Porrosht ahwoso uje Moisés chichewkite tata uje erze saserdote uje ochish obiyohochɨs Porrosht ɨr templo ehet ese deeych uje otsakɨr ich ye otsowe erze leype. 6Titɨm olak uje nohmet de olak ahɨr uje ich ma dich je asa templo. 7Porrosht ahwoso tata uje Porrosht ɨm: “Eenɨlo uje oso õr losuhlaabo hn akashɨmlo õr. Wɨchɨ ich ma om par ahakõrlo je uje tukulo loshɨpɨt par eeychãhalo yok.”— Hn Jesús tatɨm erze fariseo ɨm: —Kɨmɨjɨ eenɨlo uje oso õr losuhlaabo hn akashɨmlo õr ich ye athɨlope uje pakɨle oshiyokõr mɨhnũwo pork ye oniyokõr mɨhnũwope. 8Yok tokõra poõrzni. Yok ese deeych uje otsakɨr ɨr yɨnsɨrc.— 9Eseekite uje Jesús tokolɨhɨ shakɨrrza ehet hn hno masaha õr sinagoga ehet. 10Hnakɨrbich dechɨ uje hmata ye jukur. Yewo odechɨ toy uje sehe õr denunsya Jesús heke ochukwi ɨluu, otatɨm Jesús otsɨɨ: —Kɨmɨjɨ yeẽk dukuta yet ese deeych uje otsakɨr ¿je wɨchɨ sowe asa ley?— 11Jesús tatɨm õr ɨm: —Kɨmɨjɨ olak yeẽk obeje chɨhɨ uje kayɨhɨ jotsɨt ese deeych uje otsakɨr ¿je ye dope par diyuhu? 12Hnakɨrbich ma bale je obejɨt heke uje yeẽk shiyokõr om ese deeych uje otsakɨr ich ye sowe leype.— 13Jesús tatɨm ese hnakɨrbich ɨm: —Ẽr ahmikɨt.— Wɨchɨ chĩ̵r, ɨchii hmata sano ɨtso asa hmata yata. 14Erze uje õr ɨluuta iich otsɨɨ fariseo otokolɨhɨ sinagoga ehet hn ohno par okeytkẽrye ochukwi Jesús ɨluu pork sehe oduhu oduhu toy. 15Jesús chɨraha uje sehe oduhu ɨre heke tokolɨhɨ wahacha hn hno. Ich oso okɨhniya uje oyehe nẽr hn nos chukuta õr. 16Tatɨm õr par uje ye odɨbɨte ɨre orhõta. 17Uje tatɨm õr shuu ɨtsorz ich shuu yakaha erze Porrosht ahwoso uje profeta Isaías chichewkite. Wɨchɨ eyucha Cristo uje tata uje Porrosht ɨm: 18—Hmeychɨmlo pɨbich uje tiihla. Wɨchɨ ich tahmũr hn tahmũr uje shiyokõr. Tyenɨj tɨbɨte Pɨchɨbich ɨre ehet par sanɨmɨrãha pahwoso tatɨm erze dihipo kɨnãho par shuu omasaha par paabo. 19Wɨchɨ ye dihyokos yewo hn ye tɨbich nɨhnew lahwospe heke nĩhyok yeẽk tyenɨj chunt uje sɨhnew lahwoso uje wɨchɨ chɨkãha daho. 20hn ye nontew erze oso uje hnii omasaha par Porrosht aabo. Wɨr shɨ õr ɨtso tyermɨt uje sehe purho per wɨchɨ ye duhu purhope hn wɨr shɨ õr ɨtso nampyon uje ɨr meshɨt sehe toy per wɨchɨ ye duhu tope nehech uhurc hn erze uje ich om serz erze mɨhnũwo 21hn erze dihipo kɨnãho tyenɨj ye olotiis ɨrpe.— Wɨr uje Isaías chichewkite. 22Eseekite hn ohnoy hnakɨrbich otseya Jesús uje olɨbɨk hn ɨrpɨk. Demonyo de ɨre ehet. Jesús shuu wɨchɨ owich om heke pwele chiilehet hn teychɨm lekɨtiyo. 23Nos wɨr oso ich ochishlabe. Otatɨmye otsɨɨ: —¿Je wɨchɨ uu Cristo uje tãra ɨr porokkite rey David?— 24Uje erze fariseo ochunt hn otata otsɨɨ: —Beelzebú uu demonyo õr bahlut, wɨchɨ uje ɨshɨm Jesús ukurbo par chiyuhu demonyo.— 25Jesús nos chɨraha õr eyuwo heke tatɨm õr ɨm: —Kɨmɨjɨ nos wɨr oso uje otakɨsho ɨr hnɨmich otsɨtakye heke otsehek ɨre hn nĩhyok õr ukurbo, hn nos wɨr duwo hn nos wɨr uje õr iisoye ich otsɨtakye heke otsehek ɨre hn nĩhyok õr ukurbo. 26Shɨ ɨtspo kɨmɨjɨ Satanás diyuhu demonyo ich shɨ õr ɨre uje otsehek ɨre heke nĩhyok ɨr ukurbo per ye niyokõr duhu ɨlorzpe. 27Kɨmɨjɨ tiyuhu demonyo tĩ̵ra Beelzebú ukurbo, hn ¿erze olak akɨle õr ukurbo tãra ɨraãpo par uje ochiyuhu demonyo? Ebɨtɨlo uje õr ukurbo tãra Porrosht heke olak akɨle ochɨbɨte orhõta uje shɨ eymehilo. 28Per kɨmɨjɨ tiyuhu demonyo tĩ̵ra Porrosht Ɨchɨbich ich ɨmeheeych uje terɨhɨ ɨshɨrĩt par amsahalo par olak Porrosht aabo. 29Kɨmɨjɨ hnakɨrbich chɨhɨ uje ɨr ukurbo de hn yet sehe masaha ɨr ihyuch par torha ɨr kushjãro ich ye pwelpe. Tyenɨj shiyeru wap chĩ̵ra lukwerc hnii pwele hnoy ɨr kushjãro. 30—Erze uje otsahmũr õya yok wɨr pakɨlo hn erze yewo wɨr uje sehe onontew yok. Wɨr uje ye otakashɨm yok odish wɨr oso õrye wɨr uje oshuu oso ochũr lekɨtiyo.— 31Heke titɨm olak. Porrosht pwele perdonar oso nos wɨr kuche mɨhnũwo uje oshiyokõr hn nos wɨr mɨhnũwo uje otata per ye perdonarpe erze uje ochiyuhu lahwoso mɨhnuwõho Porrosht Ɨchɨbich. 32Porrosht pwele perdonar erze uje ochiyuhu lahwoso mɨhnuwõho yok uje tokõra poõrzni per erze uje ochiyuhu lahwoso mɨhnuwõho Porrosht Ɨchɨbich wɨr uje ye perdonar õrpe hnii ele deeych hnii deeych yet nehe. 33Olak athɨlo uje pɨluu mɨhnũ per ebɨtɨlo uje pɨbiyo ich om. Kɨmɨjɨ asa pohorrza om ich shish ɨr ee om, per kɨmɨjɨ asa pohorrza mɨhnũ ich ɨr ee ye ompe. Ɨr ee chɨbɨte orhõta kɨmɨjɨ om o kɨmɨjɨ mɨhnũ. Tiyokõr uje ich om shɨ ɨtso pohorrza uje ee om. 34Shɨ olak ɨtso echeẽt aabo uje wosdeyo. Ye olak pwelpe uje athɨlo ahwoso uje ich om pork olak ɨluu mɨhnũ. Erze uje de oso õr aho wɨr uje otata kɨmɨjɨ om o kɨmɨjɨ mɨhnũwo. 35Hnakɨrbich uje ɨr ɨluuta om ich tata uje om, hn hnakɨrbich uje ɨluuta mɨhnũ ich tata uje mɨhnũwo.— 36Hn Jesús tatɨm erze fariseo ɨm: —Sehe tuu erahalo uje terɨhɨ ese deeych nehe uje Porrosht sepyẽr oso, ich shuu nos oso otatɨm ɨre uje keshɨ ɨnaãpo heke otata erze õr ahwoso uje ye jukur. 37Shɨ erze olak ahwoso om uje athɨlo wɨr uje shuu ɨmeheeych uje ye ahakõrlo uje mɨhnũwope hn erze olak ahwoso uje athɨlo uje ye ompe ich tyenɨj shuu Porrosht sepyẽr olak.— 38Eseekite hn erze uje oshiyokorãha oso waa ley waa je Moisés chichewkite hn erze yewo uje õr ɨluuta iich otsɨɨ fariseo otatɨm Jesús otsɨɨ: —Maestro, sehe oyuhu ahakõr kuche uje ye latɨk pwele niyokõr par oyeychɨm.— 39Per Jesús nos tatɨm oso ɨm: —Oso uje shish oym Porrosht wɨr shɨ õr ɨtso tɨmcharrza waa je torãha dabich. Sehe oduhu tiyokõr yarta par ochɨraha uje tokõra poõrzni per ye tiyokõrpe. Shɨ tiyokõr yarta uje ɨtso uje tokolɨhɨ profeta Jonaskite. 40Wɨchɨ de doshɨt bahlut ehet daalo tre hn dɨhle trekite. Yok uje tokõra poõrzni. Tyenɨj yok de hnɨmich uut daalo tre hn dɨhle tre. 41Uje terɨhɨ ese deeych uje Porrosht sepyẽr oso nehe hn olak hn erze oso yewo uje amlo yok tyenɨj alehelo Porrosht ɨkɨch. Erze dɨt Nínive oso tyenɨj oyehet toy hn õr denunsya olak pork uje wɨr ochunt Porrosht ahwoso uje Jonás tatɨm õrkite ich wɨr oym erze mɨhnũwo uje oshiyokõr. Yok de olak ahɨr hn yok ma dich je Jonás per ye ahmũrlo ẽrlo pahwosope. 42Uje terɨhɨ ese deeych uje Porrosht sepyẽr nãhu ĩ̵rmo oso nehe ich erze oso uje oteychɨm yok tyenɨj oyehe Porrosht ɨkɨch. Asa reyna waa je tãra hnɨmich sur yɨt tyenɨj iyehe Porrosht ɨkɨch toy hn denunsya õr. Wate tãra hnɨmich uje dukuhla par tẽr uje rey Salomón tata pork wɨchɨ ich eykdeyo per yok de olak ahɨr. Yok ma dich je Salomón per olak ye ahmũrlo ẽrlo pahwosope.— 43Eseekite hn Jesús tatɨm õr ɨm: —Uje ɨchɨbich mɨhnt tokolɨhɨ hnakɨrbich ehet hn hno tĩ̵r lekɨtiyo ese owich uje kako par chukwi owich yet par sakaha per ye dishpe. 44Heke ehet chilehet ɨm: “Ma om takaashpo tɨtĩ̵r ese hnakɨrbich ehet uje tɨkɨtolɨhɨhna.” Uje cheeshpo ich chish ese hnakɨrbich ehet uje sakahahna shɨ ɨtso uje nĩhyok ye latɨk chɨhɨ ehet hn ich otsarz hn onɨshii hn oshuu om 45heke hno chish ɨchɨbiyo mɨhnũwo yewo uje õr syete. Ich ma õr mɨhnũwo pisho je ɨre. Nos omasaha ese hnakɨrbich ehet hn otsakaha toy. Uje uhurc ese hnakɨrbich ich ma ɨr ɨkɨrĩt mɨhnĩ̵kpa je waphna. Erze kuche mɨhnũwo shɨ sɨteẽta uje tyenɨj tĩ̵r erze oso nehe uje õr ɨluu mɨhnũ.— 46Eseekite uje ehn Jesús shiyokorãha erze oso hn ɨr data taãcha hn deshɨbo, shɨ oyehe ejwert. Sehe okeytkẽr ɨre. 47Yeẽk tatɨm Jesús ɨm: —Ata hn eshɨbo odechɨ ejwert. Sehe okeytkẽr owa.— 48Per Jesús tatɨm ese hnakɨrbich uje tatɨm ɨreke ɨm: —¿Je sehe eraha yeniipo uje õr ɨtso mama hn yeniipo uje õr ɨtso pɨshɨbo?— 49Jesús chishĩ̵r dakɨle tatɨm erze oso ɨm: —Wɨr shɨ õr ɨtso mama hn pɨshɨbo. 50Yeẽk uje shiyokõr uje Papa sahmũr uje de poõrc ich wɨchɨ pɨshap hn wate pɨnap hn wate mama.—

will be added

X\