MATEO 11

1Uje Jesús sɨhna lahwoso uje tatɨm erze dakɨle uje õr dose par oshiyokõr ɨr ɨbiyo ich shuu ohno otsanɨmɨrãha ɨr ahwoso hn ɨre hno tĩ̵r kal duwo sanɨmɨrãha Porrosht ahwoso. 2Eseekite hn Juan uu tohɨrm oso de karsel ehet. Uje chunt uje Cristo shiyokõr hn shuu dakɨle yewo ohno otĩ̵r ɨre. 3Otatɨm Jesús otsɨɨ: —Juan sole: “¿Je owa uje yesh oyiyem o je oyiyem kɨnehẽt?”— 4Jesús tatɨm õr ɨm: —Bolɨlo atɨmlo Juan uje entloko hn uje amlo. 5Atɨmlo uje olɨbo ich omo lekɨtiyo, hn erze uje pɨlich worbɨt yakaha õr ich odɨrk, hn erze uje lepra yakaha õr ich õr owich om, hn erze uje õr armo ich ochunt lekɨtiyo, hn erze uje otoy ich õr ɨkpo. Titɨm losuhlaabo erze ahwoso oomo par omasaha par Porrosht aabo. 6Ich om par yeẽk uje ye nowãha yok.— 7Uje Jesús tatɨm Juan akɨle shuu ɨtsorz hn ohno ocheeshpo ɨch Jesús eyucha Juan tatɨm erze oso ɨm: —Sehe tuu atɨmlo yok. ¿Ɨnaãpo heke etĩ̵rlo wahachni owich uje ɨsa? ¿Je etĩ̵r par eychɨmlo ese uje ɨtso tyermɨt uje myent tɨbichu? 8Kɨmɨjɨ ye etĩ̵rlo ese owich uje ɨsa par eychɨmlo ese tyermɨt atɨmlo yok ɨnaãpo heke etĩ̵rlo wahachni. ¿Je etĩ̵rlo par eychɨmlo hnakɨrbich uje ɨshuwo ɨhĩ̵rtso? Nĩhyok pork erze uje õr ɨshuwo ɨhĩ̵rtso odebuhu reye õr ihyuwo. 9¿Je etĩ̵rlo wahachni par eychɨmlo latɨkpo? ¿Je etĩ̵rlo par eychɨmlo profetɨt yet? Ẽhe, etĩ̵rlo wahacha par eychɨmlo profetɨt. Titɨm olak uje wɨchɨ ma dich je profeta yewo. 10Juan wɨchɨ uje Porrosht ahwoso tata uje Porrosht tatɨm Cristo ɨm: “Hmeychɨm, tuu pɨbich hno wap par nɨshii oso õr ɨluu shɨ ɨtso uje nɨshii dehet par uje ochɨmɨt ɨre hn otaachĩ̵hɨ owa ahɨr nehe.” 11Titɨm olak ich tuu ũrpa. Nĩhyok hnakɨrbich uje ma dich je Juan uu tohɨrm oso. Juan ich dich per Porrosht aap uje ye dichpe ich ma dich je Juan. 12Uje ehn Juan tohɨrm oso nehech ele ahle ich oso oshiyokõr shɨ ɨtso uje ochukusye par omasaha par Porrosht aabo hn oso ochiyuhu ɨre par omasaha toy. 13Erze Porrosht ahwoso uje nos wɨr profeta ochichewkite hn erze uje Moisés chichewkite tata uje Cristo tyenɨj tɨrẽt nehe per Juan uu tohɨrm oso tata uje yej taãcha. 14Oso otata uje Elías tyenɨj tɨrẽt nehe per titɨm olak kɨmɨjɨ sehe ẽrlo ich Juan wɨchɨ Elías. 15Olak ãr de par uje entlo. Uhulo olak eyuwo tɨsĩ̵r erze uje titɨm olak. 16¿Tɨteẽta latɨkpo par tuu erahalo erze oso uje yesh õr ɨka õr ɨluu? Õr ɨluu ich shɨ ɨtso pɨkɨhnino uje otsakaha dɨt ehet hn otatɨm nahĩ̵re ich otsɨhnew otsɨɨ: 17“Oyobɨta flawta per ye ahakõrlo weylape. Oyeeychɨ oyeẽt musika uje dosdarak par topo per ye ahmũrlope uje eyerhlo.” 18Titɨm olak ɨtsorz pork uje Juan uu tohɨrm oso tɨrẽtni ich ye tepe erze uje oso yewo otew, hn ye dohope uje oso yewo oho per otata uje demonit de ɨre ehet. 19Yok tokõra poõrzni. Ich takaak ɨtso oso yewo hn tokooho per wɨr otata otsɨɨ: “Hmeychɨmlo, wɨchɨ ich jar hn yɨkẽhik. Ɨr ihyẽro wɨr uje õr kobra nahnapso õr hnote par gobierno hn erze uje õr ɨluu mɨhnũ.” Porrosht ich eykdeyo hn shiyokõr uje sahmũr. Deeych yet nehe ich ɨmeheeych uje ɨre ich eykdeyo pork erze uje shiyokõr ich tokole om.— 20Eseekite ɨchii Jesús tata uje mɨhnũwo tyenɨj tĩ̵r erze oso uje odebuhu erze duwo uje wɨchɨ shiyokõr kuche ich kɨhniyani uje ye latɨk pwele niyokõr. Oteychɨm per shish otsotiis hn ye onoympe uje oshiyokõr mɨhnũwo. 21Jesús tata ɨm: —Ich yarhakpa uje tyenɨj tĩ̵r erze dɨt Corazín oso hn erze dɨt Betsaida oso pork tiyokõr kuche ich kɨhniya wahacha erze duwo aho per shish otsotiis yok. Kɨmɨjɨ tiyokorĩ̵hɨ wahachni ese duwo Tiro hn Sidón ich osdeyo uje erze oso oym uje oshiyokõr mɨhnũwo hn oshiyokõr õr ɨshuwo ochĩ̵ra ponchuko hn oyãha hn ochukshãha piitsɨt õr hu eyo par uje ochɨbɨte orhõta uje onoym deluu mɨhnũ. 22Tiita uje terɨhɨ ese deeych nehe uje otĩ̵r Porrosht ɨle ɨkɨch ich ma sepyẽr erze dɨt Corazín oso hn erze dɨt Betsaida oso je uje sepyẽr erze dɨt Tiro oso hn dɨt Sidón oso.— 23Hn Jesús tata ɨm: —Erze dɨt Capernaum oso ich onarim ɨre shɨ ɨtso uje yej otaachĩ̵hɨ poõrc per tyenɨj ochɨrmas õr hn ochɨmchaha õr urhuta bahluta ehet. Erze kuche uje tiyokorĩ̵hɨ õr ahɨr uje ye latɨk pwele niyokõr kɨmɨjɨ tiyokorĩ̵hɨ dɨt Sodomakite ich ese dɨt shish de nehech ele ahle. 24Tiita uje terɨhɨ ese deeych uje otĩ̵r Porrosht ɨle ɨkɨch nehe ich ma sepyẽr erze dɨt Capernaum oso je uje sepyẽr ese dɨt Sodoma oso.— 25Eseekite hn Jesús tatɨm Porrosht ɨm: —Papa, owa uu poõrc yɨnsɨrc hn hnɨmich yɨnsɨrc. Tɨkɨna owa pork akɨs erze kuche uje ahakõr par uje erze oso uje õr eykdeyo ye odɨrehepe hn erze uje õr dɨtuwo ye odɨrehepe. Owa aabo wɨr õr ɨtso pɨkɨhnino ijaabo. Wɨr uje uhu ochɨraha erze kuche uje ahakõr. 26Papa, shɨ ahakõr uhu ɨtsorz pork ahmũr uhu ɨtsorz.— 27Jesús nos tatɨm oso ɨm: —Papa nos chɨbɨte kuche pɨhme. Nĩhyok yeẽk uje chɨraha yok uje yok uu Porrosht Ijɨt pisht, shɨ Papa wɨchɨ uje chɨraha. Nĩhyok yeẽk uje chɨraha Papa, shɨ yok tɨkɨraha hn erze uje tuu ochɨraha ɨre. 28Erẽtlo etĩ̵rlo yok nos wɨr olak uje ahakõrlo obiyo ich kɨhniya hn uje ich ɨhne pork sehe eshɨ olak hnɨtewɨhɨ Porrosht ahɨr. Etĩ̵rlo yok hn tuu olak tonkiya. 29Shɨ ɨtso uje ochɨbɨte hyuwo wey etɨbich par uje shiyokorãha ese yet ich tyenɨj etĩ̵rlo yok par tiyokorãha olak pork ye yok ehnitakpe hn ye yok narim yokpe. Heke tuu olak tonkiya pork ye olak nesita ahakõrlo kuche par eshɨlo olak hnɨtewɨhɨ Porrosht ahɨr. 30Erze pahwoso uje titɨm olakɨke wɨr ich hɨroj shɨ ɨtso hyuwo uje ochɨbɨte wey etɨbich hn hnoy nerhũwo uje hɨroj.—

will be added

X\