MATEO 10

1Eseekite hn Jesús tɨbii dakɨle uje õr dose par otĩ̵r ɨre. Ɨshɨm õr ukurbo par shuu ochiyuhu erze ɨchɨbiyo mɨhnũwo oso õr aho hn ɨshɨm õr ukurbo par ochukuta erze uje õr permo kɨnãho kɨnãho. 2Erze apóstole uje õr dose wɨr erze. Uu webich osht iich otsɨɨ Simón. Ɨr iich yet otsɨɨ Pedro. Ese apostol yet iich otsɨɨ Andrés. Wɨchɨ Pedro leshap. Erze apóstole yewo õr iiyo otsɨɨ Santiago hn ɨr leshɨbich uje iich otsɨɨ Juan. Wɨr Zebedeo aabo. 3Erze apóstole yewo õr iiyo otsɨɨ Felipe hn Bartolomé hn Tomás hn Mateo. Wɨchɨ uje kobra nahnapso õr hnote par ɨshɨm gobierno. Apostol yet iich otsɨɨ Santiago. Ɨr deych iich otsɨɨ Alfeo. Apóstole yewo õr iiyo otsɨɨ Tadeo 4hn Simón. Wɨchɨ politikya. Hn ese apostol uhurc osht iich otsɨɨ Judas Iscariote. Wɨchɨ uje tyenɨj chiwãha Jesús. 5Wɨr erze dose uje Jesús shuu ohno otĩ̵r lekɨtiyo. Tatɨm õr ɨm: —Ye ekahalo erze dihipo kɨnãho õr laho, hn ye etĩ̵rlo erze samaria oso õr duwo. 6Shɨ etĩ̵rlo erze israel oso. Wɨr shɨ õr ɨtso obeje uje pyerte. 7Uje etĩ̵rlo lekɨtiyo ich shish atɨmlo oso uje ich yej terɨhɨ uje Porrosht shuu oso omasaha par ɨr aabo. 8Ekutulo erze uje õr permo, hn erze uje otoy ich uhulo õr ɨkpo. Ekutulo erze uje lepra yakaha õr hn eyuhulo demonyo uje de oso õr aho. Erze ukurbo uje tokosɨm olak ye bahatɨkɨsh heke uje ekutulo oso ich ye ebɨtɨlo bahat. 9Ye bolilo olak hnote uje oro, plata hn kobre. Ye emchahalo olak ɨhɨroso ɨljer ehet. 10Ye bolilo kotsɨrbo hn ye bolɨlo olak ɨshuwo yewo. Ye bolilo olak erihyo yewo hn olak ɨtɨle pork yeẽk uje chishew obiyo tyenɨj oshɨm ɨre uje tew. 11Uje aachɨhɨlo dɨt dich o kɨmɨjɨ dɨt ijaap ich ekulo yeẽk uje ɨluu om hn akahalo ɨr ihyuch nehech atokolɨhɨlo ese dɨt. 12Uje aachɨhɨlo ɨr ihyuch ich etɨlo õr par uje uhulo õr aho kɨɨs. 13Kɨmɨjɨ ese pwert yɨnsɨrc om ich erze olak ahwoso shuu õr aho kɨɨs per kɨmɨjɨ ye õr ɨluu om ich ese uje ehet kɨɨs cheeshpo tĩ̵r olak. 14Kɨmɨjɨ ye onahmũr uje akahalo õr ihyuch hn ye onahmũr otẽr olak ahwoso ich atokolɨhɨlo õr ihyuch o kɨmɨjɨ ese dɨt hn eshɨtlo ese hnɨmich ukult uje de olak hnɨte par yara par õr. 15Titɨm olak ich tuu ũrpa. Uje terɨhɨ ese deeych nehe uje erze dɨt oso otĩ̵r Porrosht ɨle ɨkɨch ich ma sepyẽr õr je uje tyenɨj sepyẽr erze duwo Sodoma hn Gomorra oso. 16Titɨm olak uje tuu etĩ̵rlo erze oso õr ehet shɨ ɨtso uje tuu obeje tĩ̵r ɨlpiyo ehet. Uhu olak eykdeyo ɨlo echĩ̵re hn uhu olak ɨlo paloma uje masaabo. 17Abeylshɨp olak pork hnakɨrbo uje õr ehnito tyenɨj oshɨm olak erze õr bahluwo hn yewo otsepyẽr olakɨhɨ sinagoga aho, 18hn yewo tyenɨj ohnoy olak otseya olak gobernador õr ɨkɨch hn erze reye õr ɨkɨch toy shɨ pork ye otiislo yokpe. Atɨmlo erze õr bahluwo uje tiyokõr par olak hn atɨmlo erze dihipo kɨnãho toy. 19Uje ohnoy olak otseya olak õr bahluwo ɨkɨch ich ye olak prekupar uje keshɨ uhulo ɨnaãpo par ekitkẽrlo õr pork uje terɨhɨ orta par ekitkẽrlo õr ich Porrosht shuu erahalo uje atɨmlo õr 20pork ye tãra olakpe uje ey olak uhut. Shɨ olak Deych Porrosht ɨr Ɨchɨbich uje chiilehetɨhɨ olak aho. 21Deeych yet nehe hn hnakɨrbich tyenɨj denunsya deshɨbich par shuu oshuu oshuu toy shɨ pork deshɨbich Porrosht aap, hn hnakɨrbich tyenɨj denunsya daabo par shuu oshuu õr oshuu otoy, hn ode uje tyenɨj õr denunsya deych hn data par shuu oshuu õr oshuu otoy. 22Nos wɨr oso tyenɨj otsɨtak olak shɨ pork ye otiislo yokpe, per yeẽk uje ewenta hn shish ye lotiis yok nehech terɨhɨ uhurc nehe ich wɨchɨ ɨr owich de Porrosht ahɨr. 23Uje oshiyokorĩ̵hɨ olak kuche mɨhnũwo dɨt ehet ich olak yuhwo etĩ̵rlo dɨt yet. Titɨm olak ich tuu ũrpa. Uje ehn yahpaa nos etĩ̵rlo erze israel oso õr duwo ich yok uje tokõra poõrzni tyenɨj takaashpo tɨtĩ̵r hnɨmich. 24Nĩhyok yeẽk uje ma chɨraha je ɨr maestro hn nĩhyok yeẽk uje õr ɨbɨk uje ɨre ma dich je ɨr nensɨrc. 25Shɨ pwele shiyokorãha ɨre nehech ɨtso ɨr maestro, hn ese uje õr ɨbɨk ye pwele sowe nensɨrzpe per ɨre pwele shuu ɨre ɨtso nensɨrc.— Hn Jesús tatɨm õr ɨm: —Yok ɨtso hnakɨrbich uje ɨr aabo ode. Oso otata uje yok Beelzebú uu demonyo õr bahlut heke ma ochinehnɨm olak toy uje ye otiislo yokpe. 26Titɨm olakɨke par uje erahalo heke ye atɨlɨlo õr pork nĩhyok uje otsakɨs je deeych yet nehe ich ochɨbɨte orhõta. Hn erze kuche uje ye onahmũr yewo ochɨraha je deeych yet nehe ich nos ochɨraha. 27Ahnũwo kuche uje titɨm olak uje dɨhlak ich tyenɨj atɨmlo õr uje deeych par uje nos ochɨraha. Ese uje titɨm olak taraashi ich tyenɨj atɨmlo osoho lekɨtiyo shɨ ɨtso uje alehelo pwert eeych hn ebichlo atɨmlo õr. 28Ye atɨlɨlo erze uje sehe oduhu olak oduhu atɨlo per wɨr ye õr pwelpe uje oshuu olak ɨchɨbiyo oshuu toy. Shɨ tyenɨj atɨlɨlo Porrosht uje pwele sɨhna olak hn sɨhna olak ɨchɨbiyo toy wahacha urhuta bahluta ehet. 29Erahalo uje ochiwãha chɨpɨrme ijeebe otiyer par pechporrza nohmɨra per hnii chɨpɨrmicha nohmɨra ye kayɨhɨ hnɨmichpe hn toy kɨmɨjɨ ye olak Deych Porrosht nahmũr uje toy. 30Porrosht ma sahmũr olak je erze chɨpɨrme nehech nos chɨraha olak akĩ̵re uje de olak hu keshɨ terɨhɨ latɨkpo. 31Heke ye atɨlɨlo latɨk pork olak ma bale je chɨpɨrme uje kɨhniya. 32Titɨm olak uje yeẽk ye lotiis yok hn tatɨm oso ich titɨm Papa uje de poõrc uje wɨchɨ ye lotiis yokpe. 33Per uje yeẽk tatɨm yewo uje sotiis yok ich yok ɨtspo tyenɨj titɨm Papa uje de poõrc uje wɨchɨ sotiis yok. 34Titɨm olak. ¿Je uhu olak eyuwo tɨsĩ̵r uje tɨkɨrẽtni par tuu oso õr aho kɨɨsɨhɨ nãhu ĩ̵rmo? Ye tɨkɨrẽtni par tiyokõr tuu ɨtsorz. Shɨ tɨkɨrẽtni par tuu otsehek ɨre shɨ ɨtso uje tuu oteye. 35Tɨkɨrẽtni par tuu oso omasaha par Porrosht aabo, heke hnakɨrbich uje ye Porrosht aap ich sɨtak deych, hn tɨmcharrza sɨtak data, hn ɨr lakaharza sɨtak dohota. 36Heke ese uje ye lotiis yok ich ɨr iiso otsɨtak ɨre shɨ ɨtso uje ɨr ɨmãho. 37Uje yeẽk sahmũr yok per ma sahmũr deych hn data ich ye ompe masaha par pɨbɨk. Ese uje sahmũr yok per ma sahmũr deyjo ich ye ompe masaha par pɨbɨk. 38Shish tyenɨj yeẽk ewenta uje oshiyokõr mɨhnɨkĩ̵hɨ ɨre shɨ pork ye lotiis yok ɨtso uje ĩhyo krus hn ĩya yok. Kɨmɨjɨ ye ewenta ich ye pwele masaha par pakɨlakpe. 39Ese uje ye ewentpe per shɨ tɨbey ɨr ɨkɨritĩ̵hɨ nãhu ĩ̵rmo, uje uhurc ich nos pyerte. Per ese uje ewenta pork sahmũr yok ich ye tɨbey dekɨritĩ̵hɨ nãhu ɨrmõpe hn shiyokõr uje Porrosht sahmũr ich ɨr ɨkɨrĩt de Porrosht ahɨr. 40Yeẽk uje sahmũr olak ahwoso ich sahmũr yok toy, hn uje sahmũr yok ich sahmũr Porrosht toy. Wɨchɨ uje shuu tɨkɨrẽtni. 41Uje yeẽk tẽr ese profetɨt shɨ pork wɨchɨ profeta ich ɨr premit de ɨtso ese profetɨt. Uje yeẽk tẽr Porrosht aabo ich ɨr premit de ɨtso õr premit. 42Titɨm olak. Yeẽk uje takashɨm Porrosht aabo yeẽk kɨmɨjɨ shɨ dosɨm awɨt uje kɨɨs hn wɨchɨ hnii ye Porrosht aabo õr bahluwape wɨchɨ ɨr premit de.—

will be added

X\