MARCOS 6

1Eseekite hn Jesús tokolɨhɨchɨs hno tĩ̵r hnɨmich yet uje neẽheni. Ɨr akɨle ohno õya ɨre. 2Uje ich terɨhɨ deeych uje otsakɨr hn ɨre ɨchii shiyokorãha oso sinagoga ehet. Ich oso okɨhniya otẽr ɨre hn ochishlabe. Otatɨmye otsɨɨ: --¿Oniyokorãha ɨrehe ɨraãpo heke ich chɨraha shiyokõr erze kuche? ¿Duhu wɨr õr eyuwo tãra ɨraãpo? ¿Ɨnaãpo heke pwele shiyokõr erze kuche uje ye latɨk pwele niyokõr? 3Lɨkɨ shɨ karpinterya. Ɨr data wate María hn ɨr leshɨbo wɨr Santiago, José, Judas hn Simón. Ɨr nanɨme ode lɨka eyoklo ahɨr toy.-- Erze oso ye oduhu Jesús dichpe. 4Jesús tatɨm õr ɨm: --Lekɨtiyo nos otola profetɨt per erze ɨr ɨhnapso uje ode ese owich uje profetɨt tãra ye otolpe hn ɨr iiso õr ɨtspo, hn erze uje ode ɨr ihyuch õr ɨtspo, ye otola ɨrpe.-- 5Heke Jesús ye pwele niyokõr erze kuche uje ye latɨk pwele niyokõr. Shɨ sakahɨr oso nohmɨramo uje õr permo hn shuu õr owich om. 6Jesús ich chishlabe pork erze oso ich otsotiis ɨre. Tokolɨhɨchɨs hn hno tĩ̵r lekɨtiyo erze duuwo ijaabo uje deye ahɨr hn shiyokorãha õr Porrosht ahwoso. 7Eseekite hn Jesús tɨbii wɨr dakɨle uje õr dose. Shuu õr osiyer osiyer õyye par uje ohno otĩ̵r lekɨtiyo hn ɨshɨm õr ukurbo par uje ochiyuhu ɨchɨbiyo mɨhnũwo uje de oso õr aho. 8Tatɨm õr ɨm: --Ye bolilo latɨk par dehet pehet, shɨ olak ɨtɨle. Ye bolilo kotsɨrbo hn oposo hn ye emchahalo hnote olak ɨhɨrrzoso. 9Erɨhɨlo olak erihyo per ye bolilo olak ɨshuwo yewo.-- 10Jesús tatɨm õr ɨm: --Uje aachĩ̵hɨlo dɨt ich tyenɨj shɨ akahalo õr ihyuch uhulo nohmɨra nehech atokolɨhɨlo ese owich. 11Kɨmɨjɨ dɨt oso ye onahmũr uje akahalo õr ahɨr hn ye onahmũr otẽr olak ahwoso ich tyenɨj atokolɨhɨlo õr dɨt. Uje atokolɨhɨlo ich eshɨtlo olak erihyo par uje hnɨmich ukult kay. Wɨchɨ par yara par ese dɨt oso ochɨraha uje ich oshiyokõr mɨhnĩ̵kpa.-- 12Eseekite hn Jesús akɨle ohno otĩ̵r lekɨtiyo otsanɨmɨrãha Porrosht ahwoso. Sehe oduhu oso onoym wɨr deluu mɨhnũ par oshiyokõr uje Porrosht sahmũr. 13Ochiyuhu demonyo oso õr aho ich okɨhniya hn erze uje õr permo ich otormĩ̵hɨ õr aseyte hn oshuu õr owich om. 14Eseekite hn rey Herodes chunt uje Jesús shiyokõr pork oso otatehe lekɨtiyo. Wɨchɨ tata ɨm: --Juan uu tohɨrm oso ich ɨkpo heke ich ɨr ukurbo deyo de hn shiyokõr kuche uje ye latɨk pwele niyokõr.-- 15Yewo otsɨɨ: --Wɨchɨ profeta Elías lɨshɨ.-- Hn yewo otsɨɨ: --Wɨchɨ profetya ɨtso uu profeta poruwo wɨshɨ.-- 16Uje rey Herodes chunt hn tata ɨm: --Wɨchɨ uu Juan uje tuu ochekshehe etɨbichni, ɨkpo.-- 17Ese rey Herodes shuu oshiyeru Juan ochĩ̵ra kenena hn ochɨmchaha karsel ehetni pork shiyokos Herodes uje ĩhi Herodías ahɨr. Wate ɨr leshɨbich Felipe ɨrãhto. 18Pork Juan tatɨm ɨrni ɨm: --Aluwe ley uje ẽhi eshɨbich ɨrãhta ahɨr.-- 19Heke Herodías ich sɨtak pishɨ Juan. Sehe duhu oduhu toy per ye pwelpe 20pork rey Herodes ich tola Juan. Tɨbey ɨre pork chɨraha uje Juan ɨr ɨluu ich om hn sahmũr Porrosht. Uje tẽr Juan ich shish shuu deyuwo tɨsĩ̵r, ye dɨraha uje shiyokõr per shish sahmũr tẽr. 21Eseekite uje ich terɨhɨ Herodes kumpre ãyo hn shuu oshiyokõr õr ahamich dich. Herodías chɨraha uje tyenɨj shiyokõr par uje shuu Herodes shuu oshuu Juan oshuu toy. Herodes tɨbii erze õr bahluwo uje ochishew obiyohochɨs ese palasyo hn nos wɨr ohyerptoso õr bahluwo hn nos wɨr oso yewo uje ich õr ɨhĩ̵r deyo uje odechɨ hnɨmich Galilea. 22Uje Herodías ɨr ijɨta shiyokõr weylɨhɨchɨs oso õr ɨkɨch ich otsahmũrpa. Heke ese rey tatɨm asa pɨkɨhninta ɨm: --Apur uje ahmũr ich tokosɨm owa.-- 23Herodes chɨbɨte lahwoso ich shuu ũrpa tatɨm ɨm: --Uje apur yok kuchẽrk ich tokosɨm owa. Kɨmɨjɨ apur yok hnɨmich pehet ich tokosɨm owa.-- 24Wate tokolɨhɨchɨs hno tĩ̵r data hn tatɨm ɨm: --¿Tapur latɨkpo?-- Hn ɨr data tatɨm ɨm: --Apur Juan uu tohɨrm oso ɨr huta.-- 25Ɨchii cheeshpo tĩ̵r ese rey. Tatɨm ɨm: --Ele aahle sehe tuu asɨm yok Juan uu tohɨrm oso ɨr huta. Emchaha preta ehet waa je data.-- 26Uje ese rey chunt ich dosdarak per ich chɨbɨte lahwosoko erze oso õr ɨkɨch shuu ũrpa heke par ɨre ich ye ompe iim lahwoso uje tatɨm wate. 27Ɨchii shuu ohyerptosht uje tɨbey ɨre hno tĩ̵r karsel ehet par chekshehe Juan etɨbich hn tõhwa ɨr huta. 28Wɨchɨ hno tĩ̵r karsel ehet hn chekshehe Juan etɨbich. Chɨmchaha huta preta ehet waa je data hn tõhwa ɨshɨm asa pɨkɨhninta. Wate ɨshɨm data. 29Uje Juan ɨr akɨle ochunt uje ɨtsorz hn otɨrẽt ohnoy ɨr yũhurrza ochihitsɨm. 30Eseekite hn Jesús akɨle ocheeshpo uje shuu ohnoni otsanɨmɨrãha Porrosht ahwoso. Otakɨsho lawichɨhɨ Jesús ahɨr. Nos otatɨm erze kuche uje oshiyokõr hn otatɨm toy uje oshiyokorãha oso. 31Jesús tatɨm õr ɨm: --Yukulo yɨtĩ̵rlo wahacha hnɨmich uje ɨsa par eyoklo tonkiya.-- Tatɨm õr shuu ɨtsorz pork ich oso okɨhniya otaãcha hn yewo ohno nehech nĩhyok ye õr tyempɨrsh par otaak. 32Hn Jesús hõr dakɨle oyãha pohorrza hn ohno otĩ̵r hnɨmich uje ɨsa. 33Per ich oso okɨhniya omo õr uje ohno hn ochɨraha õr. Nos otokolɨhɨ erze duuwo uje dechɨ hn ohno ooshɨ ochiil õr ɨkɨch otĩ̵r ese owich uje tyenɨj Jesús hõr oyehe. 34Uje Jesús ihnɨmichɨhɨ pohorrza ehet hn umo erze oso ich okɨhniya hn chuuna uje õr losuhlaabo pork wɨr shɨ õr ɨtso obeje uje nĩhyok ye latɨk tɨbey. Ɨchii shiyokorãha õr kuche ich kɨhniya. 35Uje ich yɨlkashɨp hn ɨr akɨle otsɨtĩ̵r ɨre. Otatɨm otsɨɨ: --Ich yɨlkashɨp. Ele hnɨmich uje eyok de ich ɨsa. 36Uhu wɨr oso odo otĩ̵r duuwo par uje otiya oposo par otew.-- 37Per Jesús tatɨm õr ɨm: --Asɨmlo õr poso par uje otew.-- Otatɨm Jesús otsɨɨ: --¿Je sehe uhu oyuko oyiya oposo par uje oyosɨm nãhu oso uje ich okɨhniya par uje otew? Erze oposo bahat ich debichpa. Shɨ ɨtso uje hnakɨrbich chishew obiyo nehech terɨhɨ shekurko osho.-- 38Jesús tatɨm wɨr dakɨle ɨm: --¿Pan terɨhɨ latɨkpo uje de olak ahɨr? Bolɨlo eychɨmlo.-- Uje ohno oteychɨmke hn otatɨm Jesús otsɨɨ: --Pan sinko de hn loshiyo osiyer.-- 39Jesús shuu otatɨm erze oso par otsakaha erze ɨhnemiyo eeych uje verde õr wee wee. 40Ich nos otsakɨr, yewo õr wee syen hn yewo õr wee sinkwenta. 41Jesús chishew erze pan uje sinko hn loshiyo osiyer. Teychɨm poõrc, nɨna Porrosht hn sehek erze pan. Ɨshɨm wɨr dakɨle par oshɨm erze oso. Sehek erze loshiyo toy uje osiyer hn ɨshɨm dakɨle par oshɨm erze oso. 42Nos wɨr oso otew nehech otsatso. 43Ɨr akɨle ochish erze panye hn erze loshiyo uje oso otsatsoko nehech oshuu kanastɨ deyo yeno dose. 44Erze hnakɨrbo uje otew erze pankite wɨr õr sinko mil. 45Eseekite hn Jesús shuu wɨr dakɨle odohɨr pohorrza ehet shɨchish. Shuu ohno otĩ̵r dɨt Betsaida uje de lagunta pɨt yet. Jesús ye dope, shɨ sakaha erze oso õr ahɨr par shuu otseyhi. 46Uje shuu ohno hn dohɨr kojach eeych par orarɨhɨchɨs. 47Uje ich dɨhlak hn asa pohorrza dechɨ lagunta ehet pisht hn Jesús shɨ ɨre nohmɨra de wahacha ese hnɨmich. 48Jesús umo wɨr dakɨle uje ich ochĩ̵ra hn ochiyuhu ɨre pork otsatsɨrãha myent arhĩch. Uje ich deeych huta hn Jesús hno tĩ̵r õr dɨrkɨhɨ awɨt eeych, per ɨre shuu ɨtso uje sehe sowe õr. 49Uje omo dɨrkɨhɨ awɨt eeych ich õr eyuwo tɨsĩ̵r jelje lɨkɨchɨbich. Ich otɨbich 50pork ich nos omo ɨre hn ich otolpa. Ɨchii Jesús tatɨm õr ɨm: --Yok, ye atɨlɨlo hn ye as olak ɨbe.-- 51Uje dohɨr asa pohorrza ehet uje ɨr akɨle ode hn asa myentɨta iyehe. Nos wɨr õr ɨre ich ochishlabe 52pork ye odɨrehepe ɨnaãpo Jesús ɨshɨm wɨr oso erze pan par otew nehech otsatso. Nos wɨr õr ɨre ich õr hu kata. 53Eseekite uje otaachĩ̵hɨ ese hnɨmich Genesaret uje de lagunta pɨt yet ich oshiyeru ɨr pohorrza lagunta wɨrc. 54Uje oyhnɨmichɨhɨ pohorrza ehet ich oso ochɨraha uje wɨchɨ Jesús. 55Heke nos ohno ooshɨ par otõhwa erze uje õr permo uje ode lekɨtiyo. Wɨr shɨ ode darpɨlo eeyo. Erze oso ochukwi ese owich uje Jesús de par otseya erze uje õr permo. 56Jesús hno tĩ̵r lekɨtiyo duuwo ijaabo aho hn duuwo deyo aho hn tĩ̵r aach. Ich nos ohnoy erze permo otseya õr wahacha ese owich uje ochiwãha kuche hn ochɨbɨte õr dehet wɨrc uje Jesús tyenɨj chɨkãha. Uje Jesús chɨkãhachɨs ich nos otsapur par uje otsakahɨr ɨr nerpta ɨrhɨ, hn nos wɨr uje otsakahɨr ich shuu õr owich om.

will be added

X\