MARCOS 5

1Eseekite hn Jesús hõr otaachĩ̵hɨ lagunta pɨt yet Gerasa oso õr hnɨmich. 2Uje Jesús ihnɨmichɨhɨ pohorrza ehet hn hnakɨrbich dalehe arhĩch tãra dukuta. Ɨchɨbich mĩ̵hnt de ehet. 3Wɨchɨ shɨ debuhu dukuta. Nĩhyok yeẽk pwele shiyeru. Ye kenena ewentpe. 4Shish oshiyeru uke hn dɨle ochĩ̵ra kenena per shish chekushu. Nĩhyok yeẽk pwele sontew wɨchɨ. 5Uje dɨhlak hn uje deeych ich shish dɨrkɨhɨ lekɨtiyoho wĩ̵rye eeyo hn dukuta ehet. Ich tɨbich jwertpa hn shuu ɨre chĩ̵ra kojano po. 6Umo Jesús uje ehn de dukuhla hn uushɨ dalehe arhĩch. Icha dete hnɨmoho ɨkɨch. 7Ich sɨhnew lahwoso tatɨm Jesús ɨm: --Jesús, ¿sehe ahakõr latɨkɨhɨ yok? Tɨkɨraha owa. Owa uu Porrosht uje de poõrc ɨr Ijɨt pisht. Titɨm owaha Porrosht ɨle ɨkɨch par uje ye epiyer yok.-- 8Tatɨm shuu ɨtsorz pork Jesús tatɨm ese ɨchɨbich mĩ̵hntɨke ɨm: --Atokolɨhɨ ese hnakɨrbich ehet.-- 9Jesús tatɨm ɨm: --¿Eytɨkɨhɨ?-- Hn tatɨm Jesús ɨm: --Piich otsɨɨ Legión pork õryok kɨhniya.-- 10Shish sapur Jesús par uje ye diyuhu orĩ̵hɨchɨs ese hnɨmich uje ode. 11Wĩ̵rit dechɨ ye dukuhlape uje poohle de ich kɨhniya. Wɨr shɨ taakɨhɨchɨs. 12Erze demonyo otatɨm Jesús otsɨɨ: --Uhu oyɨtĩ̵r erze poohle par oyomsaha aho.-- 13Jesús tatɨm erze demonyo ɨm: --Bolɨlo.-- Hn erze ɨchɨbiyo mɨhnũwo otokolɨhɨ ese hnakɨrbich ehet hn ohno omasaha poohle aho. Erze poohle wɨr do mil. Nos uushɨ ihnɨmichɨhɨ Wĩ̵rit eeych uje ich ɨlyaka. Nos masaha lagunta ehet hn hmarta. 14Erze hnakɨrbo uje otɨbey wɨr poohle ohno ooshɨ otĩ̵r dɨt hn otĩ̵r erze uje ode aach. Otatɨm õr uje omoko. Heke nos wɨr oso ohno par uje oteychɨm uje tokole ɨtsorz. 15Uje otaachĩ̵hɨ Jesús ahɨr hn omo ese hnakɨrbich uje demonyo tokolɨhɨ ehetɨke. Shɨ sakahachɨs. Iyãha lasuwo hn ich ye totihlpe. Erze oso ich ochishlabe. 16Erze hnakɨrbo uje omo uje tokolɨhɨ wahachaka ich nos otatɨm oso uje tokolɨhɨ ese hnakɨrbich hn uje tokolɨhɨ wɨr poohle. 17Heke erze oso otsapur Jesús par uje tokolɨhɨchɨs ese õr hnɨmich. 18Jesús dohɨr pohorrza ehet hn ese hnakɨrbich uje demonyo tokolɨhɨ ehetɨke sapur Jesús par uje sehe nõya ɨre. 19Jesús ye nahmũrpe uje wɨchɨ ĩya ɨre. Tatɨm ɨm: --Bo eyhi etĩ̵r ahuch hõr wɨr eeyso hn nos atɨm õr erze uje Porrosht shiyokorĩ̵hɨ owa hn sosɨr owa.-- 20Ese hnakɨrbich hno tatɨm erze oso uje ode erze duwo uje dye uje iiyo otsɨɨ Decápolis. Nos tatɨm õr uje Jesús shiyokorĩ̵hɨ ɨre. Ich shuu nos wɨr oso ochishlabe. 21Eseekite uje Jesús cheeshpo iyãha pohorrza tĩ̵r lagunta pɨt yet ich oso okɨhniya uje otakɨsho lawichɨhɨ ɨre ahɨr lagunta wɨrc. 22Hnakɨrbich taachĩ̵hɨ ahɨr uje iich otsɨɨ Jairo. Wɨchɨ õr bahluwa toy uje tɨbey sinagoga. Uje umo Jesús hn icha dete hnɨmoho ɨkɨch. 23Sapur Jesús tatɨm ɨm: --Pijɨta ich yej toy. Erẽt, akahɨr par uje owich ompo.-- 24Jesús hno ĩya ɨre. Oso okɨhnipa uje õya ɨre hn shish ochukusye. 25Erze oso õr ehet tɨmcharrza de. Ich dose ãyo uje wate permo, ɨr armɨtsɨ ihnɨmich. 26Shish tĩ̵r meriko per shɨ oshuu ma doso. Ich sɨhna ɨr hnote per ye oduhu owich ompe. Shish ma owich mĩ̵hnɨk. 27Uje chunt otata Jesús ich sɨtĩ̵r ɨre tãra nẽr erze oso õr ehet hn sakahɨr Jesús nerpta ɨrhɨ. 28Ɨre ehet chiilehet ɨm: --Uje takahɨr nerpta ich yok owich ome.-- 29Uje sakahɨr Jesús nerpta ɨrhɨ ɨchii ɨr armɨtsɨ iyehe hn chuuna uje owich om. 30Jesús chuuna uje ɨr ukurbo tokole par chukuta yeẽk. Somtɨs ɨre teychɨm wɨr oso hn tatɨm õr ɨm: --¿Yeẽkpo uje sakahɨr piyerpta?-- 31Ɨr akɨle otatɨm otsɨɨ: --Hmeychɨm, oso ich ochukusye hn omehe owa. ¿Ɨnaãpo heke atɨm õr on: "Yeẽkpo uje sakahɨr yok."-- 32Per Jesús shish teychɨm wɨr oso uje ode ɨr wɨro pork sehe dɨraha yeẽkpo uje sakahɨr ɨreke. 33Asa tɨmcharrza tolpa nehech ɨkiyo tãra. Sɨtĩ̵r ɨr Jesús hn icha dete hnɨmoho ɨkɨch. Tatɨm Jesús uje ich ũru uje wate sakahɨrkɨ. 34Jesús tatɨm ɨm: --Pijɨta, shɨ pork ye otiis yokpe heke owa owich om. Bo uhu ehet kɨɨs pork owa sanoko.-- 35Uje ehn Jesús keytkẽr wate hn hnakɨrbo otaãcha. Otãra Jairo ihyuch. Wɨchɨ õr bahluwa toy uje tɨbey sinagoga. Erze hnakɨrbo otatɨm Jairo otsɨɨ: --Eyjɨta ich tokɨ. ¿Ɨnaãpo heke yesh ahakos ese maestro?-- 36Jesús chunt wɨr õr ahwoso hn tatɨm Jairo ɨm: --Ye atɨla. Ye otiis uje yok pwele tuu wate owich om.-- 37Jesús sontew erze oso, ye duhu onõya ɨrpe. Shɨ Pedro, hn Santiago hn Juan wɨr uje shuu õya ɨre. Ese Santiago wɨchɨ Juan leshap. 38Uje otaachĩ̵hɨ ese õr bahlut ihyuch uje tɨbey sinagoga hn Jesús umo erze oso ich okɨhniya uje odechɨ. Wɨr ich oyerh otsɨhnew. 39Jesús masaha pwert ehet hn tatɨm õr ɨm: --¿Ɨnaãpo heke eyerhlo ich ehnewlo? Asa pɨkɨhninta ye tope. Shɨ umo.-- 40Per erze oso shɨ oyana Jesús oloter heke shuu nos otokolɨhɨ pwert ehet. Shɨ hnoy asa pɨkɨhninta ɨr deych hn ɨr data hn erze ɨr akɨle otĩ̵r ese owich uje pɨkɨhninta de. 41Jesús chishew ɨr hmata hn tatɨm ɨm: --Talita kum.-- Ese ahwosht tata ɨm: --Pɨkɨhninta, titɨm owa too: "alehet."-- 42Ɨchii asa pɨkɨhninta iyehet hn dɨrk. Wate dose ãyo. Ɨr deych hn ɨr data ich ochishlabe. 43Jesús tatɨm õr ɨm: --Ye atɨmlo latɨk. Uhulo taak.--

will be added

X\