MARCOS 4

1Eseekite hn Jesús shiyokorãha osoho lagunta wɨrc. Ich oso okɨhniya uje otakɨsho lahwɨchɨhɨ ɨre ahɨr, heke ii pohorrza ehet hn sakaha. Ich oso okɨhniya uje ode lagunta wɨrc par otẽr uje Jesús tatɨm õr. 2Wɨchɨ shiyokorãha õr Porrosht ahwoso ich kɨhniya per shish sɨteẽta kuche. Tatɨm õr ɨm: 3--Ẽrlo yok. Hnakɨrbich dekite uje hno par sɨtsẽr jõro eyhi. 4Uje sɨtsẽr shuu ɨtsorz hn eyhi kayɨhɨ dehet ehet. Chɨpɨrme taãcha hn tew. 5Uje sɨtsẽr erze eyhi hn yẽr kayɨhɨ uje kojano po de. Tokole shɨchish pork hnɨmich pɨkaap. 6Uje deeych tokole tew ich shuu kako pork nĩhyok ɨr uro. 7Erze eyhi yẽr uje sɨtsẽr kayɨhɨ uje wontɨ de. Tokole ii yẽr nehech wontɨ serz hn sajuwe heke ye eerĩ̵rsh. 8Per erze eyhi yẽr uje sɨtsẽr kayɨhɨ ese hnɨmich uje ɨhĩ̵rt. Ich kresa hn ee de, yẽr ee treynta, yẽr ee sesenta, hn yẽr ee syen.-- 9Hn Jesús tatɨm wɨr oso ɨm: --Olak ãr de par ẽrlo. Uhulo olak eyuwo tɨsĩ̵r erze uje titɨm olakɨke. 10Eseekite uje erze oso ohno shɨ Jesús dechɨ hõr wɨr yewo uje shish õya ɨre hn ɨr akɨle uje õr dose ich otatɨm Jesús otsɨɨ: --Erze ahwoso uje eteẽtaka ¿duhu ɨnaãpo?-- 11Jesús tatɨm õr ɨm: --Porrosht sehe duhu erahalo erze uje shiyokõr par tɨbey laabo. Per uje titɨm erze oso yewo ich ye tuu ɨmeheeychpe. Shɨ tɨteẽta õr kuche 12par uje oteychɨm pɨshɨ per ye onomope. Ich otẽr per ye ɨmeheeychpe par õr ɨre. Kɨmɨjɨ odɨraha ich otsapur Porrosht hn wɨchɨ perdonar õr.-- 13¿Je ye erahalope ese uje tɨteẽtaka? Kɨmɨjɨ ye erahalo ich nos ye erahalo wɨrpe erze yewo uje tɨteẽta. 14Ese uje tɨteẽta tata shuu ɨtsorz. Ese hnakɨrbich uje sɨtsẽr jõro eyhi ich shɨ ɨtso hnakɨrbich uje sanɨmɨrãha Porrosht ahwoso. 15Erze eyhi yẽr uje kayɨhɨ dehet ehet wɨr shɨ ɨtso oso uje ochunt Porrosht ahwoso ɨchii Satanás tĩ̵r õr hn chiyuhu Porrosht ahwoso uje ochuntɨke. Heke shuu ochɨkey. 16Erze eyhi yẽr uje kayɨhɨ ese hnɨmich eeych uje kojano de uut wɨr shɨ ɨtso erze oso uje ochunt Porrosht ahwoso ich otsahmũrpa hn õr ayla. 17Wɨr õr ɨtso erze jõro uje ye ũrɨrsh. Wap ich õr ewenta per uje kuche mɨhnũwo tĩ̵r Porrosht aabo pork ye olotiis pahwosope ich oym Porrosht shɨchish. 18Erze eyhi yẽr uje kayɨhɨ ese hnɨmich uje wontɨ de wɨr shɨ ɨtso oso uje ochunt Porrosht ahwoso ich otsahmũr 19per shɨ shuu deyuwo tɨsĩ̵r labɨso hn dasuwo. Ma sahmũr hnote, heke erze kuche sehnyẽr ɨre shɨ ɨtso erze wontɨ uje sajuwe jõro hn ye duhu eẽrɨrsh. 20Erze eyhi yẽr uje kayɨhɨ hnɨmich uje ɨhĩ̵rt wɨr shɨ ɨtso yeẽk uje chunt Porrosht ahwoso ich sahmũr. Wɨchɨ shɨ ɨtso erze jõro uje ee de. Yẽr ee treynta hn yẽr ee sesenta hn yẽr ee syen.-- 21Eseekite hn Jesús sɨteẽta kuchɨt tatɨm õr ɨm: —Uje yeẽk neru nampyont ich ye dɨbɨte kejunt uut hn ye dɨbɨte õr arpich uut. Shɨ chɨbɨte owich uje de porĩt par uje chihit lekɨtiyo. 22Pork nos kuche uje otsakɨs je deeych yet nehe ich ochɨraha shɨ ɨtso uje yet ye nahmũr uje yewo ochɨraha je deeych yet nehe ich nos ochɨraha. 23Olak ãr de. Uhu olak eyuwo tɨsĩ̵r uje titɨm olakɨke.-- 24Hn Jesús tatɨm õr ɨm: --Ẽrlo pahwoso uje titɨm olak. Erze kuche uje asɨmɨhɨlo yewo, Porrosht tyenɨj ɨshɨmɨhɨ olak hn shuu iyuwe 25pork ese uje chɨraha ich Porrosht tyenɨj shuu ma chɨraha, per ese uje ye dɨrehepe, ich Porrosht tyenɨj shuu chɨkey ese pɨkaap uje chɨraha.-- 26Eseekite hn Jesús sɨteẽta kuchɨt yet tatɨm õr ɨm: --Uje Porrosht shiyokõr par tɨbey daabo wɨchɨ shɨ ɨtso hnakɨrbich uje shuu otsɨtsẽr jõro eyhi uje om ɨr shakɨrrza ehet. 27Uje dɨhlak ich umo hn uje deeych ich nɨhɨ. Erze jõro eyhi uje sɨtsẽr ich tokole hn ich krese per ɨre ye dɨrehepe ɨnaãpo uje ɨtsorz. 28Shɨ ese hnɨmich wɨchɨ uje shuu wɨr jõro eyhi tokole. Wap tokole, shɨ ɨr ihyõ, hn ich uhurc ɨr ee de. 29Uje ɨr ee etan ich terɨhɨ ɨshɨrĩt heke ochekushu.-- 30Eseekite hn Jesús tatɨm õrpo ɨm: —¿Keshɨ tɨteẽta latɨkpo par tuu ɨmeheeych par erahalo uje Porrosht shiyokõr par tɨbey laabo? 31Uje Porrosht shiyokõr ich shɨ ɨtso asa pohorrza eyhi waa je iich otsɨɨ mostasa uje hnakɨrbich chukwerĩ̵hɨ ɨr shakɨrrza ehet. Asa pohorrza eyhi ich ma ijeebe je erze jõro eyhi yẽr 32per uje kresa ich ma data je erze jõro yewo. Ɨr uke ich deyo heke chɨpɨrme tĩ̵r ɨre hn shiyokorĩ̵hɨ dewo ɨr uke pork puurc de.-- 33Jesús sɨteẽta kuche ich kɨhniya uje shiyokorãha oso Porrosht ahwoso nehech ye õr pwele õr hu dishpe. 34Jesús shɨ sɨteẽta kuche uje tatɨm oso per uje wɨr otokole hn tatɨm dakɨle shuu ɨmeheeych par õr erze uje sɨteẽtaka. 35Eseekite uje deeych yaka hn Jesús tatɨm dakɨle ɨm: --Yukulo yɨtĩ̵rlo wahacha lagunta pɨt yet.-- 36Ɨr akɨle oym wɨr osohochɨs lagunta wɨrc hn õy pohorrza ehet uje Jesús de hn ohno. Ich pohɨr yẽr hno ĩya õr. 37Myentɨta data chish orĩ̵hɨ dehet pehet. Shuu owɨt wokor deyo masaha pohorrza ehet. Sehe yaka. 38Jesús shɨ umuhu pohorrza atsɨkɨta tɨtɨla õr ɨtɨch. Ɨr akɨle otsɨniyẽr. Otatɨm otsɨɨ: --Maestro, ¿je ye latɨkɨsh uje eyoklo yaka?-- 39Jesús nɨhɨ. Iyehet hn tatɨm myentɨta hõr lagunta ɨm: --Alehe.-- Asa myentɨta, hõr owɨt wokor iyeheshɨp. 40Jesús tatɨm dakɨle ɨm: --¿Ɨnaãpo heke atɨlɨlo? ¿Je otiislo yok?-- 41Nos wɨr õr ɨre ich ochishlabe hn otolpa. Otatɨmye otsɨɨ: --¿Yeẽkpo ele? Heke asa myentɨta hn owɨt wokor chunt ɨre hn shiyokõr uje tata.--

will be added

X\