MARCOS 3

1Eseekite hn Jesús masaha sinagoga ehetpo. Hnakɨrbich dechɨ uje hmata ye jukur. 2Erze uje õr ɨluuta iich otsɨɨ fariseo odechɨ toy. Wɨr oteychɨm Jesús kɨmɨjɨ dukuta ese hnakɨrbich ese deeych uje otsakɨr. Õr ɨre ochukwi Jesús ɨluu par uje õr denunsya ɨre. 3Jesús tatɨm ese hnakɨrbich uje hmata ye jukur ɨm: --Alehe erze oso õr ɨkɨch.-- 4Tatɨm erze fariseo ɨm: --Uje terɨhɨ ese deeych uje otsakɨr ¿je yeẽk sowe ley uje shiyokõr uje om o je sowe uje shiyokõr uje mĩ̵hnɨk? ¿Je sowe ley uje chukuta yet o je sowe ley uje shuu yet shuu toy?-- Wɨr ye odiilehetpe. 5Jesús ich chowãha õr, teychɨm õr hn ich dosdarak pork õr hu kata. Heke tatɨm ese hnakɨrbich ɨm: --Ẽr ahmɨta.-- Hn chĩ̵r nahmɨta ɨchii owich om. 6Erze fariseo otokolɨhɨchɨs sinagoga ehet hn hõr wɨr Herodiano otakɨsho lawich par uje okeytkẽrye. Sehe oduhu Jesús oduhu toy. 7Eseekite hn Jesús tokolɨhɨchɨs hõr wɨr dakɨle. Ohno otĩ̵r asa lagunta wɨrc. Ich oso okɨhniya uje otãra ese hnɨmich Galilea oyehe nẽr. 8Uje oso ochunt nos wɨr kuche uje Jesús shiyokõr ich okɨhniya uje otãra wahacha hnɨmich Judea ohno õya ɨre hn yewo otãra Jerusalén hn yewo otãra hnɨmich Idumea hn otãra onoota Jordán pɨt hn otãra dɨt Tiro hn dɨt Sidón. Ohno otĩ̵r Jesús par uje oteychɨm. 9Jesús tatɨm wɨr dakɨle ɨm: --Emɨtlo pohorrza owich. Ahnũwo oso ich okɨhniya. Uje sehe omehe yokɨr hn tomsaha ehete.-- 10Ich chukuta oso okɨhniya uje õr permo per yesh ode okɨhniya uje õr permo. Ich ochukusye pork sehe odakahɨr Jesús par uje chukuta õr. 11Ɨchɨbiyo mɨhnũwo de oso yewo õr aho toy. Uje omo Jesús hn ocha dete hnɨmoho ɨkɨch hn erze demonyo ich otsɨhnew lahwoso otatɨm Jesús otsɨɨ: --Owa uu Porrosht Ijɨt pisht.-- 12Per Jesús tatɨm erze demonyo ɨm: --Apiklo. Ye ebɨtɨlo yok orhõta.-- 13Eseekite hn Jesús dohɨr kojach eeych hn tɨbii erze hnakɨrbo uje sahmũr õr, hn otĩ̵r ɨre. 14Jesús chiihla hnakɨrbo shuu õr dose par õya ɨre hn par shuu ohno otĩ̵r lekɨtiyo otsanɨmɨrãha Porrosht ahwoso. Chɨkẽra õr iiyo ɨm apóstole. 15Ɨshɨm õr ukurbo par ochiyuhu demonyo uje de oso õr aho. 16Ahnũwo hnakɨrbo õr dose uje Jesús chiihla õrkite. Uu webich osht iich otsɨɨ Simón. Jesús chukẽra iich yet ɨm Pedro. 17Yet iich otsɨɨ Santiago hn ɨr leshɨbich iich otsɨɨ Juan. Wɨr õr deych iich otsɨɨ Zebedeo. Wɨr uje Jesús chukẽra õr iich yet ɨm wɨr nar aabo pork õr ehnito. 18Erze yewo õr iiyo otsɨɨ Andrés, Felipe, Bartolomé, Mateo, Tomás hn Santiago. Wɨchɨ deych iich otsɨɨ Alfeo. Hn erze yewo wɨr õr iiyo otsɨɨ Tadeo, hn Simón. Ese Simón wɨchɨ politikya uje sehe diyuhu gobierno. 19Uu uhurc osht wɨchɨ Judas Iscariote. Wɨchɨ uje tyenɨj chiwãha Jesús nehe. 20Eseekite hn Jesús seyhi tĩ̵r dahuch. Ich oso okɨhniya otakɨsho lawichɨhɨ ahɨrpo. Heke hõr dakɨle ye õr pwele otaakpe. 21Uje ɨr iiso ochunt uje Jesús shish shiyokõr kuche shuu ɨtsorz heke ohno otĩ̵r ɨre par uje ochishew pork õr eyuwo tɨsĩ̵r uje wɨchɨ totihla. 22Eseekite hn wɨr odechɨ erze hnakɨrbo uje oshiyokorãha oso erze ley uje Moisés chichew. Otãra Jerusalén. Otata otsɨɨ: —Beelzebú uu demonyo õr bahlut de Jesús ehet hn ɨshɨm ɨre ukurbo par chiyuhu demonyo oso õr aho.— 23Jesús tɨbii õr hn sɨteẽta tatɨm õr ɨm: --Satanás ye pwele diyuhu duhut Satanás oso õr ahope. 24Kɨmɨjɨ oso odehek ɨre oduhu wee wee hn oteye heke otsehek ɨr hnɨmich. 25Hn ɨtspo kɨmɨjɨ oso otakɨsho lahuch hn oteye heke otsehek ɨre. 26Hn Satanás ɨtspo, kɨmɨjɨ datsĩ̵r debiyo heke ich uhurc ich ye ukurbĩ̵rsh. Tyenɨj chish ɨr uhurc.-- 27Kɨmɨjɨ hnakɨrbich chɨhɨ uje ɨr ukurbo de hn yet sehe masaha ɨr ihyuch par torha ɨr kushjãro ich ye pwelpe. Tyenɨj shiyeru wap chĩ̵ra lukwerc hnii pwele hnoy ɨr kushjãro.-- 28Hn Jesús tatɨm õr ɨm: --Ich ũrpa uje titɨm olak. Porrosht nos pwele perdonar oso uje oshiyokõr uje mɨhnũwo hn erze uje ochiyuhu lahwoso mɨhnũwo. 29Per yeẽk uje chiyuhu lahwoso mɨhnuwõho Porrosht Ɨchɨbich, ich Porrosht ye perdonar wɨchpe. Shish ɨr hnɨtewta de Porrosht ahɨr-- 30Jesús tatɨm õr shuu ɨtsorz pork otata uje ɨchɨbich mĩ̵hnt de ɨre ehet. 31Eseekite hn Jesús ɨr data hn ɨr leshɨbo otaãcha per shɨ oyehe ejwert hn oshuu otɨbii Jesús. 32Ich oso okɨhniya uje odechɨ otsakaha Jesús ahɨr. Otatɨm Jesús otsɨɨ: --Ata hn eshɨbo ode ejwert. Yesh ochukwi owa.-- 33Jesús tatɨm õr ɨm: --¿Je sehe erahalo yeniipo uje õr ɨtso mama hn yeniipo uje õr ɨtso pɨshɨbo?-- 34Jesús teychɨm erze oso uje otsakaha ɨr ahɨr hn tatɨm õr ɨm: --Wɨr shɨ õr ɨtso mama hn pɨshɨbo. 35Yeẽk uje shiyokõr uje Porrosht sahmũr wɨchɨ pɨshap hn wate pɨnap hn wate mama.--

will be added

X\