MARCOS 13

1Eseekite uje Jesús tokolɨhɨchɨs templo patikɨt ehet hn ɨr akɨlt yet tatɨm ɨm: --Maestro, hmeychɨm erze kojano ich deyo pisho hn erze pwerto ich ɨhĩ̵rtso.-- 2Jesús tatɨm ɨre ɨm: --Eychɨm erze pwerto deyo. Erze kojano ich ye lakahaye eeyo nehe hnii sohmɨra. Nos otsehnɨmich.-- 3Eseekite hn Jesús hõr dakɨle otsakaha ese wĩ̵rit eeych uje iich otsɨɨ Olivos templo ɨkɨch. Shɨ õr ɨre uje odechɨ. Pedro, Santiago, Juan hn Andrés otatɨm Jesús otsɨɨ: 4--¿Latɨk nehe hn onehnɨmich asa templo? ¿Yarɨrãha tokole wap par uje oyɨraha?-- 5Jesús tatɨm õr ɨm: --Abeylshɨp olak par uje nĩhyok yeẽk sehnyẽr olak 6pork tyenɨj oso okɨhniya ochii ɨr yokɨhɨ otsɨɨ: "Yok uu Cristo" heke otsehnyẽr oso ich okɨhniya nehe. 7Tyenɨj entlo nehe uje oso oteyehe ĩ̵rmo lekɨtiyo, hn entlo toy uje sehe oteye per ye as olak ɨbe. Wɨr tyenɨj tokole wap per yahpaa terɨhɨ uhurzpe. 8Pork tyenɨj dihipo oteye hn reye hõr duhut reye õr ohyerptoso oteye. Tyenɨj hnɨmich telerrza owɨlo kɨhniya ĩ̵rmo lekɨtiyo hn tyenɨj sewɨt ihnɨmich sẽhi oso toy. Nos wɨr erze kuche mɨhnũwo tyenɨj tokole wap hn kuche ma mɨhnũwo iyehe nẽr. 9Abeylshɨp olak. Tyenɨj ohnoy olak otseya olak õr bahluwo õr ɨkɨch duwo aho. Tyenɨj otsepyẽr olakɨhɨ sinagoga aho hn ohnoy olak otseya olak gobernadore õr ɨkɨch hn erze reye õr ɨkɨch shɨ pork ye otiislo yokpe par uje atɨmlo õr pahwoso. 10Uje ehn yahpaa terɨhɨ uhurc nehe ich nos otatɨm oso ĩ̵rmo lekɨtiyo uje tiyokõr par õr ɨre. 11Uje ohnoy olak otseya olak õr bahluwo õr ɨkɨch par uje otsepyẽr olak ich ye olak prekupar uje keshɨ uhulo ɨnaãpo par ekitkẽrlo õr pork uje terɨhɨ orta par ekitkẽrlo õr ich Porrosht shuu erahalo uje atɨmlo õr. Porrosht Ɨchɨbich wɨchɨ uje shiyokorãha olak heke ye olakpe uje ekitkẽrlo õr. Shɨ Porrosht Ɨchɨbich wɨchɨ uje keytkẽr õr. 12Deeych yet nehe hn hnakɨrbich tyenɨj denunsya deshɨbich par shuu oshuu oshuu toy shɨ pork deshɨbich Porrosht aap, hn hnakɨrbich tyenɨj denunsya daabo par shuu oshuu õr oshuu otoy, hn ode uje tyenɨj õr denunsya deych hn data par shuu oshuu õr oshuu otoy. 13Nos wɨr oso tyenɨj otsɨtak olak shɨ pork ye otiislo yokpe per yeẽk uje ewenta hn shish ye lotiis yok nehech terɨhɨ uhurc nehe ich wɨchɨ ɨr owich de Porrosht ahɨr. 14Uje eychɨmlo uje oshuu ese kuchɨt iyehetɨhɨ ese owich uje ye ompe uje de ich shuu ese owich mĩ̵hnɨk heke erze oso uje odebuhu hnɨmich Judea tyenɨj oyuhwo otĩ̵r kojano deyo par otsakɨs ɨre. Yeẽk uje ler ich tyenɨj chɨraha uje tata shuu ɨtsorz. 15Kɨmɨjɨ yeẽk chɨhɨ dahuch eeych ich ye ompe uje masaha ehet par hnoy ɨr kushjãro. 16Shɨ tyenɨj yuhwo. Hn uje yeẽk chɨhɨ aach ich ye ompe uje cheeshpo par hnoy lasuwo. Shɨ tyenɨj yuhwo. 17Uje terɨhɨ erze daalo nehe ich yarhak par erze tɨmcher uje õr hmɨker hn erze uje yesh õr aabo ijaabo uje ochuku pork ye õr pwele ochoshpe par oyuhwo. 18Apurlo Porrosht par uje ye duhu tyempɨt mĩ̵hnɨk uje olak yuhwo. 19Uje ĩ̵rmo tenit uje Porrosht shiyokõr nehech ele ahle ich mɨhnũwo de per ye ɨlo erze uje tyenɨj tĩ̵r ĩ̵rmo nehe hn erze kuche mɨhnũwo ich ye deeshpe tĩ̵r ɨrmõpo. 20Kɨmɨjɨ Porrosht ye duhu erze daalo arhaabo uje erze kuche mɨhnũwo tĩ̵r ĩ̵rmo nehe ich tyenɨj nos otoy, per sontew pork sahmũr erze uje chiihla õr par omasaha par ɨr aabo. 21Heke uje yeẽk tatɨm olak ɨl: "Hmeychɨmlo, Cristo de lɨka," o kɨmɨjɨ tatɨm olak ɨl: "Cristo de wahacha," ich otiislo ɨre. 22Tyenɨj oso ode nehe uje ochii ɨr Cristoho hn yewo ochii ɨr profetaha. Tyenɨj oshiyokõr kuche deyo uje ye latɨk pwele niyokõr par sehe onehnyẽr erze oso uje Porrosht chiihla õr par ɨr aabo per ye õr pwele uje onehnyẽr õrpe. 23Hmeychɨmlo, uje ehn yahpaa wɨr õr prowa onehnyẽr olak ich titɨm olak erze uje tyenɨj oshiyokõr.-- 24Eseekite hn Jesús tatɨm õr toy ɨm: --Uje erze kuche mɨhnũwo yuwɨr ɨchii deeych ye dihitpe hn shekurko ɨtspo ye dihitpe 25hn porrzeebe kay tãra poõrc. Erze kuche uje ukurbosh wahacha poõrc ich telerrzpa shɨ ɨtso uje yeẽk chishɨt kuchɨt. 26Uje nos oteychɨm oshuu ɨtsorz hn tyenɨj oteychɨm yokpo uje tokõra poõrzni uje takaashpo nehe tokonãha ukuhurrza. Pukurbo deyo de hn ich yok hũre. 27Tuu yok anjele otĩ̵r ĩ̵rmo lekɨtiyo hn tuu otĩ̵r poõrc lekɨtiyo par otõhwa Porrosht aabo uje chiihla õrni. 28Uhu olak eyuwo tɨsĩ̵r asa pohorrza waa je iich otsɨɨ higuera. Uje eshɨ tokole ich erahalo uje terɨhɨ ɨshɨrĩt uje daalo duhlu. 29Uje nos amlo erze kuche mɨhnũwo uje tĩ̵r ĩ̵rmo nehe ich erahalo uje terɨhɨ ɨshɨrĩt uje takaashpo ɨtso uje yok de pwert ebich par sehe tomsaha ehet. 30Titɨm olak ich tuu ũrpa. Erze oso uje omo erze kuche mɨhnũwo webich oso uje tĩ̵r ĩ̵rmo nehe ich ehn yewo ye otope ich tyenɨj nos omo erze kuche uje tĩ̵r ĩ̵rmo. 31Poõrc hn hnɨmich tyenɨj sɨhna ɨre nehe per pahwoso shish yakaha. 32Ese deeych hn asa orta uje takaashpo nehe ich nĩhyok yeẽk uje chɨraha, hnii erze anjele uje ode poõrc ye odɨrehepe, hnii yok ye tɨkɨrahape. Shɨ Papa wɨchɨ uje chɨraha. 33Heke shish tyenɨj emɨtlo olak pork ye erahalo ese deeych uje olak Ɨrhĩch tyenɨj cheeshpo nehe. 34Ahnũwo pahwoso uje titɨm olak shɨ ɨtso hnakɨrbich uje sehe tokole hno tĩ̵r hnɨmich yet. Shuu debiyo otɨbey dahuch. Kal nohmɨra ich ɨshɨm ɨbiyo par uje shiyokõr. Shuu nohmet tɨbey ɨr pwert uhurrza. 35Heke shish tyenɨj emɨtlo olak pork yok ɨtso ese pwert yɨnsɨrc. Ye erahalo kɨmɨjɨ takaachĩ̵hɨ dɨhlak o kɨmɨjɨ dɨhlich pehet o kɨmɨjɨ deeych huta o kɨmɨjɨ dɨhɨrbɨt. 36Kɨmɨjɨ takaãcha shɨchish ich ye ompe uje tish olak shɨ ɨtso uje amlo. Shish emɨtlo olak. 37Erze pahwoso uje titɨm olak ich nos titɨm oso lekɨtiyo par uje shish ochɨmɨt ɨre.--

will be added

X\