MARCOS 12

1Eseekite hn Jesús sɨteẽta tatɨm õr ɨm: -- Hnakɨrbich dekite uje chukwẽr uva ɨr shakɨrrza ehet hn chichuwe. Chihitsa jotsɨt par chiyuhu uva otich hn shiyokõr owich uje de porĩt par dohɨr teychɨm ɨr shakɨrrza ehet par tɨbey. Shuu yewo otsahla ɨr shakɨrrza. Ɨr bahat par uje shuu oshɨm ɨre jõro ee yẽr. Tokolɨhɨchɨs hno tĩ̵r hnɨmich yet. 2Uje ich terɨhɨ jõro ɨshɨrĩt par ochekushu hn shuu debich hno tĩ̵r erze hnakɨrbo uje shuu otsahla ɨr shakɨrrzani par uje shuu oshɨm ɨr uva yẽr. 3Per erze hnakɨrbo ochishew wɨchɨ hn oshuu dospa, hn oshuu hno cheeshɨ shɨ sɨhn nahme. 4Hn õr yɨnsɨrc shuu yet hnopo tĩ̵r erze hnakɨrbo. Uje taachĩ̵hɨ wahacha hn wɨr oshuu huta hn oloter ɨre. 5Ich shuu yet hnopo hn oshuu oshuu toy. Ich shuu yewo ohno okɨhniya per shɨ nohmɨr nohmɨr hn wɨr oshuu yewo dospa hn oshuu yewo oshuu otoy. 6Ese hnakɨrbich ɨr ijɨt shɨ nohmɨra de. Wɨchɨ ich sahmũr. Ich uhurc hn shuu hno tĩ̵r õr. Ehet chiilehet ɨm: --Tyenɨj otola ele pijɨt.-- 7Per wɨr otatɨmye otsɨɨ: --Wɨchɨ uu shakɨrrza yɨnsɨrc ɨr ijɨt. Uje ɨr deych toy nehe ich asa shakɨrrza wate par ɨre. Ma om uje yuhulo yuhulo toy heke wate par eyok.-- 8Wɨr ochishew ese shakɨrrza yɨnsɨrc ijɨt hn oshuu oshuu toy. Otãra ochɨbɨte patikɨt pɨt. 9Uje ese hnɨmich yɨnsɨrc tɨrẽt nehe ¿duhu ɨnaapõho wɨr hnakɨrbo? Tyenɨj nos shuu õr shuu otoy. Hn tyenɨj ɨshɨm yewo nehe par shuu otsahla.-- 10Hn Jesús tatɨm õr ɨm: --Tɨkɨraha uje olak ler Porrosht ahwoso hn erahalo uje tata Cristo shuu ɨtsorz. "Erze uje oshiyokõr pwertɨt ochĩ̵ra kojano oym ese kojach nohmet. Ochɨbɨte uje ich ye jukur. Per uje uhurc ich ma bale je erze kojano yewo. 11Porrosht wɨchɨ uje shuu tokole ɨtsorz heke ich shuu yish eyok ɨbe." Wɨr uje Porrosht ahwoso tata.-- 12Erze õr bahluwo sehe odihyeru Jesús pork ochɨraha erze uje Jesús sɨteẽta shɨ sorzɨhɨ õr pork õr ɨluu mɨhnũ. Per ich otola wɨr oso uje ode Jesús ahɨr. Heke oym ɨre hn otokole ohno. 13Eseekite hn erze saserdote õr bahluwo oshuu fariseo yewo hn herodiano yewo ohno otĩ̵r Jesús. Sehe oduhu Jesús nimehĩ lahwotɨk par õr denunsya ɨre. 14Uje otaachĩ̵hɨ Jesús ahɨr hn otatɨm otsɨɨ: --Maestro, oyɨraha erze uje ata ich om. Yelɨj uhu wɨr hnakɨrbo õr kɨnãho pork uje õr hnotɨ de hn uje õr dosuhlaabo shɨ uhu õr ɨtsye. Ahakorãha erze oso uu Porrosht ɨr ɨluu ich uhu ũru. Sehe oyuhu atɨm õryok kɨmɨjɨ oyiyuwe ley uje oyoshɨ erze hnote uje ese romano oso õr bahlut pisht kobra o kɨmɨjɨ ye oyiyuwepe. 15Per Jesús chɨraha uje wɨr õr aho yũhɨrsh hn tatɨm õr ɨm: --¿Ɨnaãpo heke sehe uhulo timehĩ pahwotɨk? Owɨlo yok peychporrza nohmata par takachɨm.-- 16Otõhwa peychporrza. Jesús tatɨm õr ɨm: --¿Yeẽk ɨchɨbich chɨhɨ hn yeẽk iich chɨhɨ asa peychporrza?-- Otatɨm Jesús otsɨɨ: --Rey César.-- 17Jesús tatɨm õr ɨm: --Eshɨlo uje rey César sapur hn eshɨlo uje Porrosht sapur.-- Erze Jesús ahwoso shuu ochishlabe. 18Eseekite hn hnakɨrbo yewo otĩ̵r Jesús uje õr ɨluuta iich otsɨɨ saduseo. Wɨr otsotiis uje oso tyenɨj õr ɨkpo nehe. Oshiyokõr ɨtso uje sehe odɨraha kuchɨt. 19Otatɨm Jesús otsɨɨ: --Maestro, Moisés tata uje kɨmɨjɨ hnakɨrbich toy hn nĩhyok ɨr aabo ich ɨr leshɨbich tyenɨj ĩhi asa lakaharza ahɨr. Uje ijɨtɨsh ich par ese ɨr leshɨbich aap uje toni. Wɨr uje Moisés tatkite. 20Hnakɨrbo õr syete ode eyok ahɨrni uje õr leshɨbye. Uu webich osht chiilekuni hn toy. Nĩhyok ɨr aabo 21heke ɨr leshɨbich ĩhi asa poluuta ahɨr. Wɨchɨ toypo hn nĩhyok ɨr aabo heke leshɨbich yet ĩhi ahɨr. 22Nos wɨr õr ɨre uje õr syete õyhi wate ahɨrni hn nos otoy ye õr abĩ̵rsh. Ich uhurc hn asa tɨmcharrza toy. 23Uje topo õr ɨkpo nehe ich yeẽkpo wate ɨr abey pork nos wɨr õr ɨre uje õr syete õhyi wate ahɨrni.-- 24Jesús tatɨm õr ɨm: --Olak shɨ eymehilo pork ye erahalope uje Porrosht ahwoso tata hn ye erahalo Porrosht ukurbope. 25Uje topo õr ɨkpo nehe ich hnakɨrbo hn tɨmcher ye onõyhi ye ahɨrpe. Wɨr shɨ õr ɨtso Porrosht ɨr anjele uje ode poõrc. 26Sehe tuu erahalo uje topo tyenɨj õr ɨkpo nehe. Tɨkɨraha uje olak ler Porrosht ahwoso uje tata Moisés uje iyehe waa pohorrza ijaapta ahɨrkite uje jwekɨta de ehet. Porrosht tatɨm Moisés ɨm: "Yok uu Abraham lɨshɨ ɨr Porrosht hn Isaac lɨshɨ ɨr Porrosht hn Jacob lɨshɨ." 27Porrosht wɨchɨ ye topo õr Porroshtpe. Wɨchɨ oso uje õr ɨka õr Porrosht heke õr ɨkpo nehe. Nos wɨr olak shɨ eymehilo.-- 28Eseekite hn hnakɨrbich nohmet dechɨ uje shiyokorãha oso erze ley uje Moisés chichewkite. Chunt uje Jesús hõr erze saduseo okeytkẽrye hn chunt uje Jesús ɨr ahwoso ich ompa uje tatɨm õr. Wɨchɨ sɨtĩ̵r ɨre Jesús. Shɨ sehe prowa heke tatɨm par sehe tẽr ahwotɨk ɨm: --¿Leyɨrãha waa je ma data?-- 29Jesús tatɨm ɨm: --Asa ley ma data tata shuu ɨtsorz ɨm: "Olak israel oso ẽrlo pahwoso. Uu Ɨrhĩch wɨchɨ uu eyoklo Porrosht wɨchɨ shɨ sohmɨra. 30Enaha owa par ahmũr uu owa Ɨrhĩch Porrosht hn ye uhu ehet kɨnaha hnii ye uu eyuwo kɨnãho." 31Waa ley yata tata shuu ɨtsorz ɨm: "Ahmũr eshɨbo uhu ɨtso uje ahmũr owa." Nĩhyok ley yẽr uje ma deyo je erze otiyer.-- 32Ese uje shiyokorãha oso erze ley uje Moisés chichewkite tatɨm ɨm: --Maestro, ich ũrpa uje atɨm yok on: "Porrosht shɨ sohmɨra de. Nĩhyok ye Porrosht kɨnehẽtɨkɨsh. 33Tyenɨj ahmũr pishɨ Porrosht hn ye uhu ehet kɨnaha hnii ye uu eyuwo kɨnãho hn enaha akɨrbo par ahakõr uje sahmũr, hn tyenɨj ahmũr eshɨbo uhu ɨtso uje ahmũr owa. Uje ahakõr uje ɨtsorz ich ahakõr ma om je uje shɨ tuk loshɨpɨt ebɨte jwekɨta eeych hn ẽru par uje eeychãha Porrosht.-- 34Uje Jesús chunt uje ɨre tatɨm shuu ɨtsorz hn tatɨm ɨm: --Owa ich yej amsaha par Porrosht aap.-- Shiyehe wɨchɨ deeych ich otola otsapurpo par uje sehe odɨraha kuche. 35Eseekite uje Jesús shiyokorãha osoho wahacha templo patikɨt ehet hn tatɨm õr ɨm: --¿Ɨnaãpo heke erze hnakɨrbo uje oshiyokorãha oso erze ley uje Moisés chichewkite otata otsɨɨ: "Cristo tãra ɨr porokkite rey David?" 36Porrosht Ɨchɨbich shuu rey David lɨshɨ chiilehetkite ɨm: "Ese Ɨrhĩch Porrosht tatɨm yok Ɨrhĩch ɨm: Akaha paãchta nehech nos tuu arãha amãho õr hnɨmich." 37¿Ɨnaãpo heke rey David tata uje Cristo wɨchɨ ɨr Ɨrhĩch? Nos otata uje Cristo tãra ɨre."-- Erze oso ich okɨhniya. Nos wɨr Jesús ahwoso uje tatɨm õr ich shuu õr ayla. 38Eseekite hn Jesús tatɨm erze oso ɨm: --Abeylshɨp olak par uje ye wɨr onehnyẽr olak erze uje oshiyokorãha oso erze ley uje Moisés chichewkite. Uje odɨrkɨhɨ lekɨtiyo ich otsahmũr oyãha lasuwo uje ich berzo par oshuu oso õr eyuwo tɨsĩ̵r uje õr ɨhĩ̵r deyo . Otsahmũr uje oso otseta õr uje ode dɨt ehet oshuu ɨr ɨtso õr bahluwo. 39Otsahmũr otsakaha erze õr bahluwo õr ɨbe eeyo uje de sinagoga ehet. Uje otĩ̵r õr ahamich ich otsahmũr uje otsakaha erze õr bahluwo õr ɨbe eeyo par uje otaak. 40Ochenshaha erze poluu yesh õr ihyuwo õr ahɨr. Uje õr orar ich oshuu berzakpa par oshuu oso õr eyuwo tɨsĩ̵r uje ochɨrahapa Porrosht. Porrosht tyenɨj sepyẽr õr nehe shuu dospa.-- 41Eseekite ich Jesús sakaha kejunt ɨkɨch hn teychɨm erze oso okɨhniya uje ochɨmchaha hnote ese kejunt ehet par oshɨm Porrosht. Ɨhĩ̵r deyo ochɨmchaha hnote ich kɨhniya toy. 42Tɨmcharrza poluuta taãcha. Chɨmchaha peychpor ijeebe otiyer ehet par ɨshɨmɨhɨ Porrosht. 43Jesús tɨbii dakɨle hn tatɨm õr ɨm: --Titɨm olak ich tuu ũrpa. Asa poluuta ich losuhlaap. Chɨmchaha ma kɨhniya kejunt ehet je nos wɨr erze oso yewo. 44Nos wɨr õr ɨre ich õr hnote kɨhniya per shɨ oshɨm Porrosht pɨkaap uje de õr ahɨr mahn asa poluuta ich losuhlaap. Nos wɨr hnote uje de ahɨr wɨr par tiya labɨso per nos ɨshɨmɨhɨ Porrosht.

will be added

X\