MARCOS 11

1Eseekite uje ich ta par Jesús hõr dakɨle otaachĩ̵hɨ Jerusalén ich ode erze duuwo ɨkɨch Betfagé hn Betania. Erze duuwo dechɨ wĩ̵rit wɨrc uje iich otsɨɨ Olivos. Jesús shuu dakɨle uje õr osiyer ohno oyeebe. 2Tatɨm õr ɨm: --Bolɨlo etĩ̵rlo wahacha dɨt ijaabɨt uje de eyok ɨkɨch. Uje aachĩ̵hɨlo ese dɨt ebiche ich tyenɨj amlo buritɨt uje oshiyeru dehet wɨrc. Wɨchɨ yahpaa latɨk nonãha. Ehyulo kãrpɨta hn ohwĩ̵lo. 3Kɨmɨjɨ yeẽk nomo olak ɨl: "¿Ɨnaãpo heke ehyulo wɨchɨ kãrpɨta ese buritɨt?", hn atɨmlo on: "Ɨrhĩ̵ch sehe dahla hn shuu cheeshpo shɨchish."-- 4Ohno hn ochish ese buritɨt uje oshiyeru dehet wɨrc. Uje ehn ochiyuhu kãrpɨta 5hn erze oso uje odechɨ otatɨm õr otsɨɨ: --¿Ɨnaãpo heke ehyulo ese buritɨt kãrpɨta?-- 6Otatɨm õr uje Jesús tatɨm õr shuu ɨtsorz heke oym hn oshuu ohnoy. 7Otõhwa ese buritɨt otseya Jesús hn ochiyuhu õr ɨshuwo uje otsajuwe naner hn ochɨbɨte buritɨt eeych hn Jesús iyãha. 8Ich oso okɨhniya uje ochɨtiisɨhɨ ese dehet õr ɨshuwo uje otsajuwe nanẽr. Yewo otõhwa pohɨr uke ijeebe uje ĩhyo kɨhniya hn ochɨbɨte dehet. 9Ich oso okɨhniya oyeebe õya ɨre hn ich okɨhniya uje oyehe nẽr. Nos otɨbich otsɨɨ: --Ich õryok aylpa. Porrosht tyenɨj takashɨm wɨchɨ uje ɨre shuu tɨrẽt. 10Tyenɨj takashɨm ese uje tãra ɨr porokkite rey David par tɨbey ɨr hnɨmich. Õryok narim Porrosht uje de poõrc.-- 11Eseekite hn Jesús taachĩ̵hɨ Jerusalén. Hno masaha templo patikɨt ehet. Nos teychɨm lekɨtiyo per ich yɨlkashɨp heke tokole hno tĩ̵r dɨt Betania. Ɨr akɨle uje õr dose õya ɨre. 12Eseekite uje dechole hn Jesús hõr dakɨle otokolɨhɨ dɨt Betania. Ich Jesús iyuwo sẽhi. 13Umo pohorrza uje de dukuhla waa je iich otsɨɨ higuera. Ich ihyõ kɨhniya. Hno tĩ̵r par teychɨm sehe dɨraha kɨmɨjɨ ee chɨhɨ par tew. Uje taachĩ̵hɨ ahɨr hn umo uje nĩhyok ye eerĩ̵rsh shɨ ĩhyo pork yahpaa terɨhɨ ɨshɨrĩtpe uje ee de. 14Jesús tatɨm asa pohorrza ɨm: --Je ich nĩhyok ye latɨk tew ee nehe.-- Ɨr akɨle ochunt uje keytkẽr asa pohorrza. 15Eseekite uje Jesús hõr dakɨle otaachĩ̵hɨ Jerusalén hn hno masaha templo patikɨt ehet. Ɨchii shuu wɨr oso otokolɨhɨchɨs uje ochiwãha kuche hn uje otiya kuche. Sehnɨmich wɨr hnakɨrbo õr nemesa uje oshuu hnote kambya. Sehnɨmich wɨr toy erze oso õr ɨbe uje ochiwãha paloma. 16Ye duhu latɨk dɨkãha templo patikɨt ehet par shɨ hnoy ɨr kuche. 17Shiyokorãha oso tatɨm õr ɨm: --Porrosht ahwoso tata uje ɨre sole: "Pihyuch wɨchɨ par nos wɨr oso uje ode ĩ̵rmo lekɨtiyo õr orarɨhɨchɨs, per olak uhulo ɨtso uu echɨko õr ihyuch."-- 18Erze saserdote õr bahluwo hn erze uje oshiyokorãha oso erze ley uje Moisés chichewkite uje ochunt uje Jesús tata shuu ɨtsorz ohno ochukwi ɨr ɨluu par uje sehe oduhu oduhu toy. Otola Jesús pork nos wɨr oso ich ochishlabe uje ochunt uje Jesús shiyokorãha õr. 19Uje ich yɨlkashɨp hn Jesús hõr dakɨle otokolɨhɨ dɨt. 20Eseekite uje ich dechole hn ohno ochɨkãha asa pohorrza ahɨr hn omo uje ich kakshɨp. 21Pedro eyucha uje Jesús shiyokorĩ̵hɨ asa pohorrzahna hn tatɨm ɨm: --Maestro, hmeychɨm asa pohorrza waa je ajĩ̵r ɨkiyohna ich kakshɨp.-- 22Jesús tatɨm õr ɨm: --Ye otiislo Porrosht. 23Titɨm olak ich tuu ũrpa. Kɨmɨjɨ olak yeẽk tatɨm ese kojach dich par uje shuu tãra ɨre chɨmchaha ɨre awɨt, uje ye koswãha hn ye dotiis uje tĩ̵r awɨt shuu ɨtsorz ich tyenɨj tokole ɨtsorz. 24Heke titɨm olak. Uje olak orar apurlo Porrosht kuchẽrk hn ye otiislo uje ɨshɨmɨhɨ olak ich tyenɨj ɨshɨmɨhɨ olak. 25Uje sehe olak yeẽk orar per sɨtak yet ich tyenɨj perdonar wɨchɨ wap par uje olak Deych uje de poõrc perdonar olak yeẽk toy erze kuch mɨhnũwo uje shiyokõr. 26Kɨmɨjɨ ye olak perdonar yewo uje oshiyokõr mɨhnuwõho olak ich olak Deych uje de poõrc ɨtspo ye perdonar olakpe erze kuche mɨhnũwo uje ahakõrlo.-- 27Eseekite hn Jesús hõr ocheeshpo otĩ̵r Jerusalén. Uje ehn Jesús dɨrkɨhɨ templo patikɨt ehet hn erze saserdote õr bahluwo otaãcha. Erze uje oshiyokorãha oso erze ley uje Moisés chichewkite hn erze dɨt oso õr bahluwo ode õr ahɨr. 28Otatɨm Jesús otsɨɨ: --¿Latɨk ukurbo uje de owa heke ahakõr uhu ɨtsorz? ¿Yeẽk dosɨm owa akɨrbo par ahakõr uje ɨtsorz?-- 29Jesús tatɨm õr ɨm: --Yok ɨtspo sehe titɨm olak kuchɨt. Kɨmɨjɨ uhulo deeshɨ atɨmlo yok ich titɨm olak yeẽkpo uje ɨshɨm yok pukurbo par tiyokõr nãhu kuche uje ɨtsorz. 30Sehe tuu atɨmlo yok yeẽkpo uje shuu Juan uu tohɨrm oso tɨrẽtni ¿je Porrosht o je oso?-- 31Otatɨmye otsɨɨ: --Kɨmɨjɨ yitɨmlo uje Porrosht shuu tɨrẽt ich tyenɨj tatɨm eyoklo ɨm: "¿Ɨnaãpo heke shɨ otiislo Juan?" 32Kɨmɨjɨ yitɨmlo uje shɨ hnakɨrbo oshuu tɨrẽt ich ye ompe.-- Erze õr bahluwo otola erze oso uje otẽr Jesús pork nos õr pyens uje Juan wɨchɨ profetya. 33Otatɨm Jesús otsɨɨ: --Ye oyɨraha keshɨ yeẽkpo uje shuu Juan uu tohɨrm oso tɨrẽtni.-- Jesús tatɨm õr ɨm: --Yok ɨtspo ye titɨm olakpe yeẽkpo uje ɨshɨm yok pukurbo par tiyokõr erze kuche.--

will be added

X\