MARCOS 1

1Yok Marcos. Ɨchii tiita uu ahwoso oomo uje tata Jesucristo. Wɨchɨ uu Porrosht ɨr Ijɨt. 2Uu profeta Isaías chichewkite uje Porrosht tatɨm Cristo ɨm: --Hmeychɨm, tuu pɨbich hno wap par nɨshii oso õr ɨluu shɨ ɨtso uje nɨshii dehet par uje ochɨmɨt ɨre hn otaachĩ̵hɨ owa ahɨr nehe.-- 3Ese pɨbich de wahacha hnɨmich uje ɨsa nehe hn sɨhnew lahwoso ɨm: "Nos emɨtlo olak par anemlo ese Ɨrhĩ̵ch uje tyenɨj iyehe pyẽr. Moymlo erze olak ɨluu mɨhnũ. Enshii olak par anemlo olak Ɨrhĩch. Uhu olak ɨlo dehet uje onɨshii oshuu deresho par ese Ɨrhĩ̵ch."-- 4Eseekite hn Juan uu tohɨrm oso taachĩ̵hɨ wahacha ese hnɨmich uje ɨsa. Tatɨm oso ɨm: --Moymlo uu olak ɨluu mɨhnũ. Ahakõrlo uje om uje Porrosht sahmũr heke Porrosht perdonar erze mɨhnũwo uje ahakõrlo hn tokohɨrm olak.-- 5Nos wɨr oso uje odechɨ hnɨmich Judea hn nos wɨr oso uje odechɨ dɨt Jerusalén õr ɨhnapsoye. Ohno otĩ̵r Juan. Otatɨm uje oshiyokõr mɨhnũwo hn oym hn Juan tohɨrm orĩ̵hɨ onoota Jordán. 6Juan ɨr ɨshuwo oshiyokõr ochĩ̵ra kameylo wesho shɨ ɨtso ponchuko. Ɨr ɨhɨrrzosht wõjo yuhur. Shɨ tew eru uje om hn tɨbuhu reyne uje de hmonte. 7Juan sanɨmɨrãha Porrosht ahwoso tata ɨm: --Je deeych yet nehe ich hnakɨrbich yet tɨrẽt iyehe pyẽr. Wɨchɨ uu õr bahlut pisht heke ye yok pwelpe par uje tiyehe ɨkɨch par uje tihyu ɨr erihyo ashtũro. 8Yok shɨ tokohɨrm olakɨhɨ awɨt per ese uje tyenɨj tɨrẽt nehe wɨchɨ tyenɨj shiyokõr shɨ ɨtso uje tohɨrm olak chĩ̵ra Porrosht Ɨchɨbich.-- 9Eseekite hn Jesús tokolɨhɨchɨs dɨt Nazaret uje dechɨ hnɨmich Galilea hno tĩ̵r wahacha uje Juan de, hn Juan tohɨrm ɨrehechɨs onoota Jordán. 10Shiyehe uje Jesús tokolɨhɨ awɨt hn umo poõrc uje sɨtsẽr ɨre. Umo Porrosht Ɨchɨbich uje shɨ ɨtso palomɨt uje ihnɨmich hn iyehe ɨre eeych. 11Chunt ahwoso uje tãra poõrc ɨm: --Owa uu yok Pijɨt. Ich tahmũr owa hn tahmũr erze uje ahakõr.-- 12Eseekite hn Porrosht Ɨchɨbich shuu Jesús hno tĩ̵r hnɨmich uje ɨsa. 13Sakaha wahacha nehech daalo kwarenta. Uje dechɨ hn Satanás sehe duhu niyokõr uje mĩ̵hnɨk. Nĩhyok ye latɨk chɨhɨchɨs, shɨ loshɨpo. Porrosht ɨr anjele otakashɨm Jesús. 14Eseekite uje ochɨmchaha Juan uu tohɨrm oso karsel ehet hn Jesús hno tĩ̵r hnɨmich Galilea sanɨmɨrãha Porrosht ahwoso tatɨm oso ese om uje Porrosht shiyokõr par õr ɨre. 15Tatɨm õr ɨm: --Ich yej terɨhɨ ɨshɨrĩt uje Porrosht tɨbey oso. Moymlo uu olak ɨluu mɨhnũ. Ye otiislo ese om uje Porrosht shiyokõr par olak.-- 16Eseekite uje Jesús hno dɨrkɨhɨ lagunta Galilea wɨrc hn umo Simón hn Andrés. Wɨr õr leshɨbye. Otãra ɨr retɨhɨ lagunta. Wɨr shɨ leshĩ̵rtso. 17Jesús tatɨm õr ɨm: --Erẽtlo meylo yok hn tuu uhulo oso omasaha par Porrosht aabo ɨtso uje eshẽrlo loshiyo ẽrlo ret.-- 18Ɨchii oym ɨr ret hn õya ɨre. 19Uje Jesús dɨrkɨhɨchɨs hn umo Santiago hn ɨr leshɨbich Juan. Õr deych iich otsɨɨ Zebedeo. Odechɨ pohorrza ehet, ochichuwe ɨr ret obɨlo. 20Ɨchii Jesús tɨbii õr. Wɨr oym deychɨhɨ asa pohorrza ehet hn erze hnakɨrbo yewo uje ochishew õr ɨbiyo. Ohno õya Jesús. 21Ohno otĩ̵r dɨt Capernaum. Eseekite uje terɨhɨ ese deeych uje otsakɨr hn Jesús hõr ohno omasaha sinagoga ehet hn Jesús shiyokorãha erze oso Porrosht ahwoso. 22Erze oso ich ochishlabe uje shiyokorãha õr pork ye niyokorãha õr ɨlo erze uje oshiyokorãha oso erze ley uje Moisés chichewkite. Wɨchɨ shiyokorãha õr ɨtso uje ɨre ich dichpa. 23Uje ehn Jesús shiyokorãha orĩ̵hɨ sinagoga ehet hn hnakɨrbich dechɨ uje ɨchɨbich mĩ̵hnt de ehet. Wɨchɨ ich sɨhnew lahwoso tatɨm Jesús ɨm: 24--Jesús, owa dɨt Nazaret osht. ¿Je sehe ahakõr latɨkɨhɨ õryok? ¿Je erẽt par ehna õryok? Tɨkɨraha uje ãra Porrosht.-- 25Jesús tatɨm ese demonit ɨm: --Apik. Atokolɨhɨ ese hnakɨrbich ehet.-- 26Ese ɨchɨbich mĩ̵hnt shuu wɨchɨ hnakɨrbich atake. Ich tɨbich jwertpa hn tokolɨhɨ ɨre ehet. 27Nos wɨr oso ich ochishlabe. Omye otsɨɨ: --¿Latɨker erze uje Jesús shiyokorãha eyoklo? Ich kɨnãhapa. Jesús ich dichpa heke tatɨm erze ɨchɨbiyo mɨhnũwo hn wɨr oshiyokõr uje ɨre tata.-- 28Ɨchii nos oso ochuntɨhɨ lekɨtiyo ese hnɨmich Galilea uje Jesús shiyokõr. 29Eseekite uje otokolɨhɨ sinagoga ehet hn Jesús hno ĩya Simón hn Andrés tĩ̵r õr ihyuch. Santiago hn Juan õya õr. 30Simón ɨr ohota de darpich eeych. Ich aat duhlu. Wɨr otatɨm Jesús 31hn sɨtĩ̵r ɨre wate. Chishew hmata shuu iyehet. Ɨchii owich om hn sãr õr oposo. 32Eseekite uje ich deeych yaka hn erze oso nos ohnoy erze uje õr permo hn erze uje demonyo de õr aho otseya õr Jesús. 33Nos wɨr oso uje ode ese dɨt otakɨsho lawichɨhɨchɨs pwert ebich par oteychɨm. 34Jesús chukuta oso ich okɨhniya uje õr permo kɨnãho kɨnãho, hn chiyuhu demonyo oso õr aho ich okɨhniya toy. Jesús ye duhu erze demonyo dilehetpe pork wɨr chɨraha ɨre. 35Eseekite uje ehn yahpaa lekɨtiyo poro hn Jesús nɨhɨ hn hno tĩ̵r ese hnɨmich uje ɨsa par uje orarɨhɨchɨs sapur Porrosht. 36Simón hn erze uje ode ɨre ahɨr ohno ochukwi Jesús. 37Uje ochishɨke hn otatɨm otsɨɨ: --Nos wɨr oso ochukwi owa.-- 38Jesús tatɨm õr ɨm: --Yukulo yɨtĩ̵rlo duwo yewo toy uje deye ahɨr par tanɨmɨrãha Porrosht ahwoso pork tɨkɨrẽt tɨtĩ̵r ɨrmõni par tiyokõr tuu ɨtsorz.-- 39Hn Jesús hõr ohno odɨrkɨhɨ lekɨtiyoho ese hnɨmich Galilea sanɨmɨrãha Porrosht ahwosoho erze sinagoga aho, hn chiyuhu demonyo oso õr aho. 40Eseekite hn hnakɨrbich dechɨ uje lepra yakaha ɨre. Sɨtĩ̵r ɨre Jesús. Icha dete hnɨmoho ɨkɨch hn tatɨm ɨm: --Kɨmɨjɨ ahmũr ich uhu yok lɨshɨ owich om.-- 41Jesús chuuna uje wɨchɨ losuhlaap. Sakahɨr hn tatɨm ɨm: --Tahmũr heke tuu owa owich om.-- 42Ɨchii wɨchɨ lepra tokolɨhɨ ɨre hn owich om. 43Uje Jesús shuu hno ich sɨhnew lahwoso tatɨm ɨm: 44--Hmeychɨm, ye atɨm latɨk. Shɨ bo etĩ̵r saserdote uje de templo patikɨt ehet par teychɨm owa uje owa owich om. Asɨm loshɨpɨt par sẽru par teeychãha Porrosht ɨtso uje Moisés tatkite par uje nos wɨr oso odɨraha uje owa owich om.-- 45Per uje ese hnakɨrbich hno ɨchii nos tatɨm osoho lekɨtiyo. Heke Jesús ye pwele masaha dɨt ehetpe. Shɨ sakaha aach hn erze oso otãra lekɨtiyo otĩ̵r ɨre. Uje masaha dɨt ehet ich sakɨs ɨre par uje ye oso okɨhniya otakɨsho lawichɨhɨ ɨre ahɨr.

will be added

X\