LUCAS 9

1Eseekite hn Jesús shuu wɨr dakɨle uje õr dose otakɨsho lawich. Ɨshɨm õr ukurbo par ochiyuhu erze demonyo uje kɨnãho kɨnãho erze oso õr aho. Ɨshɨm õr ukurbo toy par uje ochukuta erze uje õr permo 2hn shuu ohno otĩ̵r lekɨtiyo par uje otsanɨmɨrãha Porrosht ahwoso otatɨm õr uje Porrosht shiyokõr par tɨbey daabo. Shuu ochukuta erze uje õr permo. 3Nos tatɨm wɨr dakɨle ɨm: —Ye bolilo latɨk par dehet pehet. Ye bolilo olak ɨtɨle. Ye bolilo kotsɨrbo. Ye bolilo oposo. Ye bolilo hnote hn ye bolilo olak ɨshuwo yewo.— 4Hn tatɨm õr ɨm: —Uje aachĩ̵hɨlo dɨt ich tyenɨj akahalo õr ihyuch shɨ uhulo nohmɨra nehech atokolɨhɨlo ese owich. 5Uje aachĩ̵hɨlo dɨt hn anɨmɨrãhalo pahwoso hn ye oso onahmũr otẽr ich tyenɨj atokolɨhɨlo, eshɨtlo olak hnɨte par hnɨmich ukult ihnɨmich. Wɨchɨ par yarta uje Porrosht tyenɨj sepyẽr õr.— 6Eseekite hn otokolɨhɨ Jesús ahɨr. Ohno otĩ̵r erze duwo ijaabo uje de lekɨtiyo par uje otsanɨmɨrãha Porrosht ahwoso. Otatɨm oso otsɨɨ: —Ye otiislo Cristo hn wɨchɨ ɨshɨ olak hnɨtewɨhɨ Porrosht ahɨr nehe.— Hn wɨr ochukuta erze uje õr permo. 7Eseekite hn rey Herodes nos chunt uje otata Jesús. Ye dɨraha latɨkpo uje ich ũru pork yewo otsɨɨ: —Wɨchɨ uu Juan lɨshɨ uje tohɨrm osoni. Ɨkpo.— 8Hn yewo otata otsɨɨ: —Wɨchɨ uu profeta Elías lɨshɨ.— Hn yewo otata otsɨɨ: —Wɨchɨ eyok poruwo wɨshɨ õr profeta uje ɨkpo.— 9Hn rey Herodes tata ɨm: —Ese Juan uu tohɨrm oso yok tuu ochekshehe etɨbichni. ¿Yeẽkpo ese uje otsɨɨ Jesús uje shiyokõr uje shish tukunt otata oshuu ɨtsorz?— Herodes sehe teychɨm pishɨ Jesús. 10Eseekite hn Jesús akɨle uje shuu otĩ̵r lekɨtiyoni ocheeshpo otĩ̵r ɨre. Otatɨm Jesús erze debiyo uje oshiyokõrhna. Jesús tokolɨhɨ oso õr ɨkɨch hn hnoy wɨr dakɨle seya õr wahacha dɨt Betsaida yɨt. 11Uje erze oso ochunt uje Jesús dechɨ hn ohno otsan ɨjɨch. Ɨre ye dɨtak õrpe. Shɨ sanɨmɨrãha Porrosht ahwoso tatɨm õr uje Porrosht shiyokõr uje tɨbey daabo. Jesús chukuta erze uje õr permo uje ode erze oso õr ehet. 12Uje ich ta par yɨlkashɨp hn Jesús akɨle otĩ̵r ɨre otatɨm otsɨɨ: —Atɨm wɨr oso par uje odo otĩ̵r wɨr duwo par uje olakaha hn otaakɨhɨ pork ese owich uje ode ich ɨsa.— 13Per Jesús tatɨm õr ɨm: —Asɨmlo õr oposo par uje otew.— Hn õr ɨre otatɨm Jesús otsɨɨ: —Shɨ pan de sinko hn doshiyo osiyer. Erze oso ich okɨhniya. ¿Je ahmũr uje oyuko oyiya oposo par õr ɨre?— 14Erze hnakɨrbo uje odechɨ wɨr kɨmɨjɨ õr sinko mil o kɨmɨjɨ otsowe. Jesús shuu wɨr dakɨle otatɨm erze oso par uje oshuu otsakɨr oshuu õr wee sinkwenta sinkwenta. 15Hn erze ɨr akɨle oshiyokõr oshuu ɨtsorz par nos oshuu otsakɨr. 16Jesús chishew erze pan sinko hn doshiyo osiyer. Teychɨm poõrc hn nɨna Porrosht. Sehek aho hn ɨshɨm wɨr dakɨle par uje shuu oshɨm wɨr oso. 17Nos wɨr õr ɨre otew nehech otsatso hn Jesús akɨle ochish erze oposye uje otsatsoko nehech oshuu kanastɨ dose yeno uje deyo. 18Eseekite uje ich deeych yet uje ehn Jesús orar hn ɨr akɨle odechɨ ahɨr. Tatɨm dakɨle ɨm: —Atɨmlo yok uje oso otserza yok yeẽkpo.— 19Erze akɨle otatɨm otsɨɨ: —Yewo otserza uje owa uu Juan lɨshɨ uje tohɨrm osni. Hn yewo otserza otsɨɨ: “Owa uu profeta Elías lɨshɨ.” Hn yewo otserza otsɨɨ: “Owa uu õryok poruwo wɨshɨ õr profeta uje ɨkpo.”— 20Jesús tatɨm wɨr dakɨle ɨm: —Hap olak ¿yok yeẽkpo?— Hn Pedro tatɨm ɨm: —Owa uu Cristo uje ãra Porrosht.— 21Jesús tatɨm õr ich sɨhnew ɨm: —Ye atɨmlo latɨk uje yok Cristo. 22Yok tokõra poõrzni. Tyenɨj oloter yok hn tyenɨj ye wɨr onahmũr yokpe erze õr bahluwo uje otɨbey dɨt. Erze saserdote õr bahluwo õr ɨtspo, tyenɨj ye onahmũr yokpe. Erze uje oshiyokorãha oso waa ley waa je Moisés chichewkite otsɨtak yok toy. Wɨr tyenɨj oshuu yok oshuu tɨkɨtɨ, per uje terɨhɨ daalo tre nehe hn yok ɨkpo.— 23Eseekite hn Jesús nos tatɨm wɨr oso ɨm: —Uje sehe yeẽk masaha par pakɨlak ich tyenɨj iim erze kuche uje sahmũr par shiyokõr uje tahmũr hn ewenta erze kuche uje tɨr ɨre shɨ ɨtso uje kal deeych ĩhyok krus par ĩya yok. 24Nos wɨr erze uje otsahmũr kuche uje de nãhu ĩ̵rmo, uje otoy ich ye õr ɨkɨrĩt chɨhɨ Porrosht ahɨrpe. Per erze uje oym kuche uje de nãhu ĩ̵rmo par oshiyokõr uje tahmũr ich õr ɨkɨrĩt de Porrosht ahɨr. 25Ye jukur kɨmɨjɨ yeẽk nos serz nãhu kuche uje de nãhu ĩ̵rmo per uje toy ich ye ɨr ɨkɨrĩt chɨhɨ Porrosht ahɨrpe.— 26Jesús tatɨm õr ɨm: —Yok tokõra poõrzni. Uje yeẽk chɨhɨ uje poym yok hn poym pahwoso, uje takaashpo nehe ich tɨkɨpim ɨre toy. Takaashpo nehe hn yok hũre ɨtso Dii Porrosht. Uje takaashpo nehe ɨr anjel õya yok. 27Titɨm olak ich tuu ũrpa. Nohmɨramo ode olak ehet uje ehn yahpaa otoy ich omo uje Porrosht tɨbey daabo.— 28Eseekite uje ich terɨhɨ daalo osho uje Jesús tatɨm õr shuu ɨtsorz hn hno dohɨr kojach eeych. Hnoy Pedro, Juan hn Santiago par uje ɨre orarɨhɨchɨs. 29Uje ehn Jesús orar hn shuu ɨre kɨnaha. Erze ɨr ɨshuwo ich poro pisho hn hũre shɨ ɨtso uje yuwebo hũre. 30Hnakɨrbo õr osiyer otokolɨhɨ Jesús ahɨr. Wɨchɨ Moisés lɨshɨ hn Elías lɨshɨ. Okeytker Jesús. 31Ich õr hũrepo. Erze õr osiyer hn Jesús okeytkẽrye otata uje tyenɨj tooho Jerusalén nehe. 32Per Pedro hõr wɨr nahĩ̵re ich kuhĩ̵rt sẽhi õr per uje oteychɨm Jesús uje hũre, ich kuhĩ̵rt dekushu. Omo toy erze hnakɨrbo uje oyehe Jesús ahɨr. 33Uje erze hnakɨrbo õr osiyer ode par uje ohno hn Pedro tatɨm Jesús ɨm: —Maestro, ich om uje õryok de lɨka ahɨr. Je ahmũr uje oyiyokõr pwerto oyuhu tre oyĩ̵ra pohɨr ĩhyo. Yet par owa hn yet par Moisés hn yet par Elías.— Per ɨre ye dɨrehepe uje tata shuu ɨtsorz. 34Uje ehn tata shuu ɨtsorz hn ukuhurrza ihnɨmichɨhɨ õr eeych hn sajuwe õr. Ich otolpa. 35Ochunt õr ahwoso uje tãra asa ukuhurrza ehet. Tata ɨm: —Wɨchɨ yok Pijɨt uje tiihlani. Ẽrlo uje tatɨm olak.— 36Uje ochunt erze õr ahwosoko hn oteychɨm. Shɨ Jesús sohmɨra uje dechɨ. Erze uje Pedro hõr ochunt hn omoko ich ye otatɨm oso shɨchishpe. 37Eseekite uje ich dechole hn oyhnɨmichɨhɨ kojach eeych. Oso okɨhniya otokole hn odalehe arhĩch par uje otseta Jesús. 38Hnakɨrbich dechɨ oso õr ehet uje tɨbich jwertpa sapur Jesús ɨm: —Maestro, sehe tuu eychɨm pijɨt. Shɨ nohmɨrap. 39Ɨchɨbich mĩ̵hnɨk masaha ɨre hn shuu tɨbich. Shuu atake hn shuu ahlɨbɨta tãra ahwo. Lotershɨp ɨre hn shish dechɨ ɨre ehet. 40Tapur akɨlehna par uje ochiyuhu ese ɨchɨbich mĩ̵hnɨk per ye õr pwelpe par uje ochiyuhu.— 41Jesús tatɨm õr ɨm: —Shɨ nos otiislo yok hn ahakõrlo uje mɨhnũwo. ¿Daalo terɨhɨ latɨkpo nehe uje shish yok de olak ahɨr hn shish yok ewenta uje otiislo yok?— Hn tatɨm ese hnakɨrbich ɨm: —Õhwa eyjɨt.— 42Uje ehn yahpaa ese pɨkɨhnint taachĩ̵hɨ Jesús ɨle ɨkɨch hn demonit chishew ɨrpo. Ɨshɨm atake hn shuu kayɨhɨ hnɨmich. Jesús chiyuhu ese ɨchɨbich mĩ̵hnt hn shuu ese pɨkɨhnint owich om. Ɨshɨm deychpo. 43Uje nos wɨr õr ɨre omo uu Porrosht ukurbo ich ochishlabe. Eseekite uje ehn erze oso ochishlabe hn Jesús tatɨm dakɨle ɨm: 44—Ẽrlo uje titɨm olak par uje ye ekeylo. Yok tokõra poõrzni. Tyenɨj yeẽk chɨbɨte yok hnakɨrbo õr hme.— 45Per erze ɨr akɨlo ye odɨraha uje Jesús tata pork Porrosht ye duhu õr eyuwo dishpe par uje ochɨraha erze uje tatɨm õrke hn otola heke ye olapur Jesús keshɨ duhu ɨnaãpo erze uje tatɨm õrke. 46Eseekite hn ɨr akɨle okeytkẽrye sehe odɨraha keshɨ yeẽkpo uje ma dichɨhɨ õr ehet. 47Jesús chɨraha wɨr õr eyuwo heke chishew pɨkɨhnint shuu iyehetɨhɨ dahɨr. 48Jesús tatɨm õr ɨm: —Uje yeẽk sahmũr ese pɨkɨhnint shɨ pork wɨchɨ sahmũr yok ich sahmũr yok toy hn uje sahmũr yok ich sahmũr ese uje shuu tɨkɨrẽtni. Heke yeẽk uje Porrosht aap uje shish takashɨm erze Porrosht aabo yewo wɨchɨ ich ma dich je erze yewo.— 49Eseekite hn Juan tatɨm Jesús ɨm: —Maestro, oyumo hnakɨrbich yethna uje chiyuhu demonyo chĩ̵ra eeych. Oyahɨrm ɨre pork wɨchɨ ye õryok ihyẽrakpe.— 50Hn Jesús tatɨm õr ɨm: —Ye ahɨrmlo ɨre pork yeẽk uje ye nontew eyok ich takashɨm eyok.— 51Eseekite ich yej terɨhɨ ɨshɨrĩt uje Jesús cheeshpo tĩ̵r poõrc nehe heke chɨbɨte uje tyenɨj hno tĩ̵r Jerusalén. 52Shuu hnakɨrbo ohno oyeebe. Ohno otĩ̵r dɨt uje dechɨ samaria oso õr hnɨmich par uje oteyãha uje Jesús sakaha. 53Erze samaria oso ochɨraha uje Jesús shɨ sehe tĩ̵r Jerusalén heke ye onahmũrpe uje sakahachɨs õr dɨt. 54Jesús akɨle uje õr iiyo otsɨɨ Santiago hn Juan ochunt uje wɨr oshuu ɨtsorz hn otatɨm otsɨɨ: —Ɨrhĩche, kɨmɨjɨ ahmũr ich oyapur jwekɨta uje tãra poõrc par sɨhna õr uje odechɨ ese dɨt ehet.— 55Jesús somtɨs ɨre teychɨm wɨr dakɨle hn tatɨm õr ɨm: —Ye ompe uje uhulo ɨtsorz.— 56Hn Jesús hõr otokolɨhɨ wahacha hn otĩ̵r dɨt yet. 57Eseekite uje ehn Jesús hõr dakɨle ohno ode dehet pehet hn hnakɨrbich tatɨm ɨre ɨm: —Sehe tokõya owa tɨtĩ̵r ese uje etĩ̵r.— 58Jesús tatɨm ɨm: —Watsɨtse uuwo de hn chɨpɨrme uje iyoho poõrc pehet ɨr uuwo de toy per yok uje tokõra poõrzni nĩhyok owich uje tokotsa pãrz hnɨmichɨhɨ.— 59Jesús tatɨm hnakɨrbich yet ɨm: —Yuko mẽya yok.— Per wɨchɨ tatɨm Jesús ɨm: —Ɨrhĩche, wap sehe tɨtĩ̵r pihyuch. Uje papa toy nehe hn tihitsɨm hn tokõya owa.— 60Jesús tatɨm ɨm: —Erze uje ye odɨraha Porroshtpe wɨr shɨ õr ɨtso topo. Moym par uje wɨr odihitsɨm õr per owa tyenɨj bo anɨmɨrãha Porrosht ahwoso atɨm õr uje Porrosht shiyokõr par tɨbey daabo.— 61Hn yet tatɨm Jesús ɨm: —Ɨrhĩche, sehe tokõya owa per tapur owa wap par uje takaha teta erze uje ode pihyuch.— 62Per Jesús sɨteẽta hnakɨrbich uje shuu arado ches hnɨmich per ye ɨr ɨbiyo tokole ompe pork shish teychɨm naner. Wɨchɨ shɨ ɨtso hnakɨrbich uje shɨ shuu deyuwo tɨsĩ̵r erze kuche uje iim. Wɨchɨ ye ompe par shiyokõr Porrosht ɨbiyo.

will be added

X\