LUCAS 23

1Eseekite hn nos wɨr õr bahluwo oyehet hn ohnoy Jesús otseya wahacha Pilato ɨkɨch. 2Uje nos otaachĩ̵hɨ Pilato ahɨr ɨchii õr denunsya Jesús otatɨm Pilato otsɨɨ: —Oyakɨsh õryok owich hn oyikɨtkẽrye hn par õryok ich ɨmeheeych uje ele hnakɨrbich shuu nos wɨr dɨt oso õr eyuwo mɨhnũwo. Tatɨm oso uje ye doshɨ hnote ese romano oso õr bahlut pishtpe. Wɨchɨ shɨ tatpo uje ɨre uu Cristo uje ich rey.— 3Pilato tatɨm Jesús ɨm: —¿Je owa uu israel oso õr rey?— Jesús tatɨm ɨm: —Ẽhe, ich ũru uje atɨm yok.— 4Pilato tatɨm erze saserdote õr bahluwo hn erze oso yewo ɨm: —Ye tish latɨk uje mĩ̵hnɨk uje ele hnakɨrbich shiyokõr.— 5Õr ɨre otatɨm Pilato ich otsɨhnew lahwoso otsɨɨ: —Wɨchɨ shish shiyokorãha oso lɨka hnɨmich Judea shuu oso õr eyuwo mɨhnũwo. Ɨchii shiyokorãha oso wahachni hnɨmich Galilea nehech taachĩ̵hɨ lɨka Judea.— 6Uje Pilato chunt uje wɨr oshuu ɨtsorz hn tatɨm õr ɨm: —¿Je lɨka galilea os?— 7Uje chɨraha uje Jesús galilea os hn shuu ohnoy otseya wahacha rey Herodes pork wɨchɨ reyɨhɨ wahacha galilea oso õr hnɨmich. Tekɨrɨhɨ dɨt Jerusalén. 8Eseekite uje rey Herodes umo Jesús ich aylpa pork ɨre ich osdeyo uje sehe teychɨm. Chuntni uje Jesús shiyokõr kuche uje ye latɨk pwele shiyokõr hn ɨre sehe duhu niyokõr kuche par uje teychɨm. 9Tatɨm Jesús kuche ich kɨhniya par uje sehe dɨraha per ye Jesús diilehetpe. 10Wɨr odechɨ toy ɨre ahɨr erze saserdote õr bahluwo hn erze hnakɨrbo uje oshiyokorãha oso waa ley waa je Moisés chichewkite. Shish õr denunsya ɨre ich otsɨhnew lahwoso. 11Eseekite hn rey Herodes hn nos wɨr ɨr ohyerptoso shɨ oloter Jesús oshuu ɨtso uje ye jukur. Oshuu iyãha õr ɨshuwo uje ich ɨhĩ̵rts pisho shɨ ɨtso uje rey iyãha hn oshuu ohnoy otseya Pilato ɨkɨchpo. 12Rey Herodes hõr Pilato antkite õr ɨmãhoye per ese deeych uje Pilato shuu ohnoy Jesús otseya Herodes ɨkɨch heke õr aho kɨɨsɨhɨye hn õr ihyẽroye. 13Eseekite hn Pilato shuu wɨr otakɨsho lawich erze saserdote õr bahluwo hn erze õr bahluwo uje otɨbey dɨt hn erze dɨt oso. 14Tatɨm õr ɨm: —Olak ohwĩ̵lo ele hnakɨrbich hn atɨmlo yok uje shuu dɨt oso õr eyuwo mɨhnũwo. Tɨkitkerĩ̵hɨ olak ɨkɨch per ye tish uje mĩ̵hnɨk uje shiyokõr uje atɨmlo yokɨke.— 15Hn ɨm: —Rey Herodes ɨtspo, ye dishpe uje wɨchɨ shiyokõr uje mĩ̵hnɨk, heke shuu cheeshpo tĩ̵r lɨka. Ich ɨmeheeychpa uje ɨre ye niyokõr latɨk uje mĩ̵hnɨk par uje oshuu oshuu toy. 16Heke shɨ tyenɨj tuu otsepyẽr hn tuu do deyhi.— 17Erze oso shɨ õr ɨluu uje kal terɨhɨ ãyt õr ahamich uje iich otsɨɨ Pascua ich oshuu Pilato tãra hnakɨrbich nohmet uje de karsel ehet. 18Nos wɨr õr ɨre ich otakɨsho lahwoso hn otɨbich ich otsɨhnew otsɨɨ: —Tukulo ese hnakɨrbich uhulo toy, hn eyuhulo ese Barrabás karsel ehet.— 19Wɨchɨ hnakɨrbich dechɨ pork prowa sehe diyuhu gobierno wahacha Jerusalenni hn shuu hnakɨrbich yet shuu toy, heke ochɨmchaha karsel ehet. 20Pilato keytker erze osopo pork ɨre sehe diyuhu Jesús, 21per erze oso ich otɨbich jwertpa otsɨɨ: —Uhu olowɨsh odɨbɨte krus eeych par uje toy. Uhu olowɨsh odɨbɨte krus eeych par uje toy.— 22Ich tre bese uje Pilato tatɨm õr shuu ɨtsorz ɨm: —¿Ɨnaãpo heke atɨmlo yok uje tyenɨj toy? ¿Niyokõr latɨkpo? Yok ye tish latɨk uje Jesús shiyokõr uje iyuwe asa ley par uje tuu oshuu oshuu toy. Shɨ tyenɨj tuu otsepyẽr ochĩ̵ra shɨkote hn tuu deyhi.— 23Per õr ɨre shish otɨbich otatɨm Pilato par uje shuu ochowɨshɨhɨ krus eeych par uje toy. Otɨbich nehech Pilato tẽr õr. 24Wɨchɨ shuu ohyerptoso oshiyokõr uje wɨr otatɨm ɨre, 25heke chiyuhu ese hnakɨrbich karsel ehet uje wɨr ochiihlaka. Ɨre prowa chiyuhu gobiernoni hn shuu hnakɨrbich yet shuu toy. Hn Pilato shuu erze ohyerptoso ohnoy Jesús par uje wɨr oshuu oshuu toy shɨ ɨtso uje oso otsapurku. 26Eseekite uje ehn erze ohyerptoso ohnoy Jesús par uje oshuu oshuu toy hn ochishɨhɨ hnakɨrbich dehet pehet uje iich otsɨɨ Simón. Wɨchɨ cirene os. Ɨre tãra aach par hno tĩ̵r dɨt ehet. Oshɨm ɨre Jesús krus par uje wɨchɨ ihyõk iyehe Jesús nẽr. 27Ich oso okɨhniya oyehe nẽr. Tɨmcher õya õr toy. Wɨr ich oyerh hn otɨbich pork ich õr odosdarakpa uje Jesús tyenɨj toy. 28Jesús somtɨs ɨre hn tatɨm õr ɨm: —Tɨmcher, olak uje ebuhulo dɨt Jerusalén, ye eyerhlo owĩ̵rlo yok. Tyenɨj eyerhlo owĩ̵rlo olak hn erze olak aabo. 29Erze daalo ich yarhak par olak uje olak aabo ode heke atɨmlo yẽr uje ich ma om par erze tɨmcher uje õr ebɨr. Ma om par erze uje yahpaa õr aabĩ̵rsh. Ma om par erze uje yelɨj olekwẽr laabo. 30Uje terɨhɨ ese deeych nehe hn Jerusalén oso otolpa nehech otata otsɨɨ: “Ma om par erze kojano deyo kayɨhɨ õryok eeych par uje oyɨtɨ hn erze wĩ̵rye nos lajuwe õryok.”— 31Jesús tatɨm õr ɨm: —Erze kuche mɨhnũwo uje oshiyokorĩ̵hɨ yok ich shuu paat doso. Ich shɨ ɨtso jwekɨta uje otsẽru asa pohorrza uje ɨchɨrãha per ich kwestpa uje duhlu pork ye tiyokõrpe uje mĩ̵hnɨk. Deeych yet nehe hn erze kuche mɨhnũwo uje oshiyokorĩ̵hɨ olak ich ma mĩ̵hnɨk pork ich shɨ olak ɨtso asa pohorrza uje ɨlaro hn duhlu shɨchish pork ahakõrlo uje ich mɨhnũwo.— 32Eseekite hn ohyerptoso ohnoy toy erze echɨko õr osiyer par uje oshuu õr oshuu otoy õya Jesús. 33Uje otaachĩ̵hɨ ese wĩ̵rit uje iich otsɨɨ huta debiyo hn ochowɨsh Jesús ochɨbɨte krus eeych. Ochowɨsh echɨkɨt ochɨbɨte ɨr krus eeych wahacha Jesús waãchta hn ochɨbɨte yet ɨr waachjãrrza. 34Jesús orar sapur Porrosht ɨm: —Dii Porrosht, titɨm owa par uje owa perdonar nãhu oso uje oshuu yok oshuu tɨkɨtɨ pork ye odɨrehepe erze uje oshiyokõr.— Ohyerptoso otsehek Jesús ɨshuwo hn oloter kuchɨt par uje yeẽk chiyey ich wɨchɨ par ɨre. 35Erze oso uje odechɨ oteychɨm Jesús hn erze õr bahluwo ochiyuhu lahwoso mɨhnuwõho Jesús hn oloter ɨre. Otatɨmye otsɨɨ: —Dukutha erze oso yewo mahn ye pwele sohnɨmichɨhɨ krus eeychpe. Kɨmɨjɨ wɨchɨ uu Cristo uje Porrosht chiihlani par uje ɨshɨ eyok hnɨtew ich tyenɨj sohnɨmichɨhɨ krus eeych.— 36Wɨr õr ɨtspo erze ohyerptoso, ochiyuhu lahwoso mɨhnuwõho hn oloter. Otsɨtĩ̵r ɨre hn oshɨm minagre par oshuu ɨhɨ. 37Otatɨm otsɨɨ: —Kɨmɨjɨ owa uu israel oso õr rey ich ahnɨmichɨhɨchɨs krus eeych.— 38Ochɨbɨte tabɨlt krus Jesús huta eeych. Pilato chichew chɨbɨte ɨm: —Lɨkɨ uu israel oso õr rey.— 39Eseekite hn echɨkɨt yet dechɨ ahɨr ɨr krus eeych. Tatɨm Jesús lahwoso mɨhnũwo shɨ loter hn tatɨm ɨm: —Kɨmɨjɨ owa uu Cristo ich ahnɨmichɨhɨ krus eeych hn ermas õryok wɨshɨ toy.— 40Per uu echɨkɨt yet tatɨm leshɨbich ɨm: —Ye ompe uje uhu ɨlorz. ¿Je ye atɨla Porroshtpe? Hmeychɨm, owa ich owa dospa shɨ owa ɨtso ɨre. 41Ich eyok dospa uje erze kuche mɨhnũwo ɨmehe eyok uje yiyokõr mɨhnũwo, mahn ese hnakɨrbich ye niyokõrpe uje mĩ̵hnɨk.— 42Hn tatɨm Jesús ɨm: —Jesús, ye ekey yok lɨshɨ uje amsaha par rey nehe hn abey oso.— 43Jesús tatɨm ɨm: —Ich ũrpa uje titɨm owa. Ele deeych ich owa de pahɨr wahacha owich uje ich om uje iich otsɨɨ paraíso.— 44Eseekite uje ich terɨhɨ deeych pehet hn dɨhlelta ihnɨmichɨhɨ lekɨtiyo nehech terɨhɨ a la tre yɨlka. 45Uje ese deeych ich ye hũrpe hn ese bortɨsht uje dechɨ templo ehet par shuu aho osiyer ich shiyãs ɨre nehech po osiyer. 46Jesús tɨbich ich jwertpa ɨm: —Dii Porrosht, tokosɨm owa pɨchɨbich.— Uje tata shuu ɨtsorz hn sɨtsẽr dehyerc, ich tokɨ. 47Hn ese ohyerptoso õr kapitan umoko nos wɨr kuche uje tokole uje Jesús tokɨ heke tata ɨm: —Ich ũrpa uje ele hnakɨrbich ye niyokõrpe uje mĩ̵hnɨk.— Uje tata shuu ɨtsorz ich chɨbɨte uje Porrosht ich dich. 48Nos wɨr oso uje odechɨ oteychɨm Jesuspo. Ich omoko uje tokɨ hn otokolɨhɨchɨs ohno. Oshuu derjor pork ich õr dosdarakpa. Shɨ õr ɨluu. 49Per nos wɨr oso uje ochɨraha Jesús hn erze tɨmcher uje õya Jesusni uje tokolɨhɨ Galilea shɨ oyehe dukuhla oteychɨm ɨre uje oshiyokõr mɨhnɨkĩ̵hɨ. 50Eseekite hn hnakɨrbich dechɨ Jerusalén uje iich otsɨɨ José. Ɨre Arimatea os. Arimatea dechɨ hnɨmich Judea. Wɨchɨ õr bahluwa toy ĩya wate Junta Suprema. Ɨr ɨluu ich om. Shish oshiyokõr uje Porrosht ɨr ley tata. 51Ese José ye nahmũrpe uje Junta Suprema ochɨbɨte par oshuu Jesús. Iyem uje Cristo tɨbey oso nehe. 52Ɨre hno tĩ̵r Pilato hn sapur Jesús yũhurrza. 53Uje ɨshɨm ɨre ɨchii hno chɨrmasɨhɨ krus eeych hn chɨpeẽsa sawɨnta waa je ich ɨhĩ̵rpa. Hnoy seya wahacha dukuta uje oshiyokorĩ̵hɨ kojach ohwɨt. Asa dukuta yahpaa odɨbɨte latɨk. 54Ese deeych wɨchɨ uje onɨshii erze oposo par dechole par uje otaak pork wɨchɨ uu deeych uje otsakɨr. 55Eseekite hn erze tɨmcher uje ehn õya Jesusni uje tokolɨhɨ Galilea ohno oyehe José nẽr hn oteychɨm uje hnoy Jesús seya wahacha dukuta uje de kojach ohwɨt hn chɨbɨtɨchɨ. 56Uje oteychɨmke ɨchii ohno ocheeshpo otĩ̵r dahuwo. Onɨshii pohɨr uje aat ehmuuj hn perfume par uje ochɨbɨte Jesús dukuta per ese deeych uje otsakɨr ich wɨr otsakɨr pork Moisés ley tata shuu ɨtsorz heke ye õr pwelpe odeeshpo shɨchish.

will be added

X\