LUCAS 21

1Eseekite hn Jesús seem deheta hn umo ɨhĩ̵r deyo uje ochɨmchaha hnote ese kejunt uje dechɨ templo patikɨt ehet par uje oshɨm Porrosht. 2Hn umopo poluuta uje ich losuhlaappa. Wate chɨmchaha ese kejunt ehet peychpor otiyer uje ich ijeebe par uje ɨshɨmɨhɨ Porrosht. 3Jesús tatɨm õr ɨm: —Titɨm olak ich tuu ũrpa. Asa poluuta uje ich losuhlaappa chɨmchaha ma kɨhniya kejunt ehet je nos wɨr erze oso yewo. 4Nos wɨr õr ɨre ich õr hnote ich kɨhniya per shɨ oshɨm Porrosht pɨkaap uje de õr ahɨr mahn asa poluuta waa je ich losuhlaappa nos wɨr hnote uje de ahɨr wɨr par tiya labɨso per nos ɨshɨmɨhɨ Porrosht.— 5Eseekite hn Jesús akɨle sohmɨramo otatɨm otsɨɨ: —Hmeychɨm erze kojano uje ich deyo hn ɨhĩ̵rtso uje oshiyokõr ochĩ̵ra asa templo. Shɨ oshɨmɨhɨ Porrosht.— Mahn Jesús tatɨm õr ɨm: 6—Je deeych yet nehe hn yewo otaãcha hn ochukus otsehnɨmich erze kojano uje eychɨmloko. Nĩhyok ye onoymɨhɨ kojach uje de leshɨbo eeyo.— 7Otatɨm otsɨɨ: —Maestro, ¿latɨk nehe hn tokole erze kuche uje athaka? ¿Latɨkpo uje tyenɨj tokole wap par uje oyɨraha ɨshɨrĩt uje oshiyokõr oshuu ɨtsorz?— 8Jesús tatɨm õr ɨm: —Tyenɨj abeylshɨp olak par uje ye wɨr onehnyẽr olak. Tyenɨj oso okɨhniya uje ochii ɨre yokɨhɨ nehe hn otata otsɨɨ: "Yok Cristo" hn otata toy otsɨɨ: “Ich yej terɨhɨ ese ɨshɨrĩt par uje Porrosht sepyẽr oso.” Ye meylo õr. 9Tyenɨj entlo uje dihipo oteye hn tyenɨj entlo toy uje õr ɨhnapso oteye par uje ochiyuhu gobierno hn omasaha owich, per ye atɨlɨlo. Wɨr tyenɨj tokole wap per yahpaa terɨhɨ uhurzpe.— 10Jesús tatɨm õr ɨm: —Tyenɨj dihipo oteye hn gobierno hõr duhut gobierno yet oshuu ɨr ohyerptoso oteye toy. 11Hn ĩ̵rmo lekɨtiyo tyenɨj hnɨmich telerrza jwertpa, hn sewɨt dich ihnɨmichɨhɨ lekɨtiyo, hn tyenɨj permo de lekɨtiyo uje ich dospa, hn kuche de uje shuu oso õr ebɨ yesh kãra ich otolpa, hn oso oteychɨm poõrc hn omo kuche uje yelɨj onomo par uje ochɨraha uje terɨhɨ ɨshɨrĩt uje Porrosht sɨhna ĩ̵rmo. 12Per wap uje ehn yahpaa nos tokole erze kuche hn oso tyenɨj ochishew olak nehe hn tyenɨj oshiyokõr mɨhnɨkĩ̵hɨ olak. Tyenɨj ohnoy olak otseya olak sinagoga aho par otsepyẽr olak, hn tyenɨj ohnoy olak ochɨmchaha olak karsel aho. Tyenɨj ohnoy olak otseya olak rey õr ɨkɨch par uje wɨr oshuu otsepyẽr olak, hn tyenɨj ohnoy olak otseya olak gobernador õr ɨkɨch par uje wɨr oshuu otsepyẽr olak toy. Tyenɨj nos oshiyokorĩ̵hɨ olak oshuu ɨtsorz pork ye otiislo yokpe. 13Uje ohnoy olak par uje otsepyẽr olak ich tyenɨj atɨmlo õr uje tokoshɨ olak hnɨtewɨhɨ Porrosht ahɨr heke ye otiislo yokpe. 14Ye uhulo olak eyuwo tɨsĩ̵r on: “¿Keshɨ oyitɨm õr latɨkpo par uje onoym õryok?” 15Shɨ yok tyenɨj tɨbɨte pahwoso par erahalo uje atɨmlo erze õr bahluwo. Wɨr tyenɨj ye odish latɨk pork tyenɨj tuu olak eykdeyo. 16Olak deyo hn olak datɨ tyenɨj oshɨm olak ohyerptoso nehe par uje wɨr otsepyẽr olak, hn olak leshɨbo tyenɨj oshɨm olak ohyerptoso toy par uje wɨr otsepyẽr olak, hn olak iiso õr ɨtspo tyenɨj oshɨm olak ohyerptoso, hn olak ihyẽro õr ɨtspo tyenɨj oshɨm olak ohyerptoso hn erze ohyerptoso tyenɨj oshuu olak nohmɨramo oshuu atɨlo. 17Nos wɨr oso tyenɨj otsɨtak olak shɨ pork ye otiislo yokpe 18per olak uje olak Porrosht aabo ye etĩ̵rlo urhuta bahluta ehet petɨk nehe hnii olak akĩ̵rt nohmɨra. 19Shɨ tyenɨj olak ewenta uje oshiyokõr mɨhnɨkĩ̵hɨ olak nehe heke olak ɨkɨrĩt de Porrosht ahɨr.— 20Jesús tatɨm õr ɨm: —Uje amɨlo ese dɨt Jerusalén oso õr ɨmãho ochɨpeẽsa õr dɨt nehe ich tyenɨj erahalo uje yej terɨhɨ ɨshɨrĩt par uje otsɨhna ese dɨt. 21Uje erze oso uje odechɨ hnɨmich Judea omo uje ɨtsorz nehe ich tyenɨj otokolɨhɨchɨs shɨchish ohno otĩ̵r kojano par uje otsakɨs ɨre. Erze oso uje odechɨ dɨt Jerusalén ehet tyenɨj otokolɨhɨchɨs par uje otsakɨs ɨre. Erze uje ode aach tyenɨj ye otĩ̵r dɨt Jerusalén ehet 22pork ich terɨhɨ ese ɨshɨrĩt uje Porrosht sepyẽr erze dɨt Jerusalén oso pork ɨr ahwoso tyenɨj yakaha shuu ɨtsorz. 23Uje terɨhɨ ese deeych nehe ich yarhakpa par erze tɨmcher uje õr hmɨker, hn ich yarhakpa par erze tɨmcher uje otsekwẽr laabo pork ye õr pwelpe par uje ooshɨ. Uje terɨhɨ ese deeych ich dospa par erze oso uje odebuhu lekɨtiyo ese hnɨmich hn uje odebuhu dɨt Jerusalén ehet pork Porrosht sepyẽr pishɨ õr. 24Õr ɨmãho tyenɨj oshuu õr ochĩ̵ra õr espada nehe hn ohnoy yewo otseya õr lekɨtiyo dihipo õr hnɨmo, hn dihipo kɨnãho tyenɨj odebuhu ese dɨt Jerusalén nehech terɨhɨ ese ɨshɨrĩt par uje otokolɨhɨchɨs. 25Tyenɨj omo kuchẽrk kɨnaha tokolɨhɨ ese deeych hn ese shekurko hn erze porrzeebe par uje ochɨraha uje ich terɨhɨ ese deeych uje takaashpo nehe. Oso uje odebuhu ĩ̵rmo lekɨtiyo ich ochishlabpa pork ochunt onoota bahluta ɨr wokor ihyokõrak dich uje shuu hnɨmich wɨrc. 26Oso tyenɨj otolpa nehe nehech nohmɨramo õr torĩt shuu õr uje õr eyuwo tɨsĩ̵r erze kuche uje de poõrc uje tyenɨj kayɨhɨ õr eyo pork erze kuche uje de poõrc ich nos telerrzpa shɨ ɨtso uje yeẽk chishɨt kuchɨt. 27Uje nos oteychɨm ɨtsorz hn tyenɨj oteychɨm yok toy uje tokõra poõrzni uje takaashpo nehe tokonãha ukuhurrza. Pukurbo deyo de hn ich yok hũrpa. 28Uje yesh tokole ɨtsorz hn tyenɨj alehetlo hn eychɨmlo poõrc pork ich yej terɨhɨ deeych uje tish olak.— 29Jesús tatɨm õr ɨm: —Uhu olak eyuwo tɨsĩ̵r erze pohɨr uje tɨteẽta iich otsɨɨ higuera hn erze pohɨr yẽr. 30Uje amɨlo erze pohɨr uje ĩhyo ahlo tokole ich erahalo ese ɨshɨrĩt uje kɨɨs ich sɨhna ɨre hn ese ɨshɨrĩt uje duhlu ich yej taãcha. 31Nos wɨr erze yar uje titɨm olakɨke ich ɨtso erze pohɨr uje ĩhyo ahlo tokole. Wɨr shuu erahalo uje ich yej terɨhɨ ese ɨshɨrĩt uje Porrosht taãcha par tɨbey daabo.— 32Jesús tatɨm õr ɨm: —Titɨm olak ich tuu ũrpa. Erze oso uje omo erze kuche mɨhnũwo webich oso uje tĩ̵r ĩ̵rmo nehe ich ehn yewo ye otope ich tyenɨj nos omo erze kuche uje tĩ̵r ĩ̵rmo. 33Poõrc hn hnɨmich tyenɨj sɨhna ɨre nehe per pahwoso shish yakaha. 34Abeylshɨp olak par uje ye ahakõrlo erze mɨhnũwo uje yewo oshiyokõr nehech yakaha olak hn ye eenɨlo uje ich mɨhnũwo. Ye uhulo yɨkɨch nẽhi olak. Ye uhulo olak eyuwo shɨ tɨsɨrĩ̵hɨ olak poso hn olak ɨshuwo. Ye uhu takarãha olak hnɨmich pork tyenɨj takaãcha shɨchish hn tish olak uje ahakõrlo uhulo ɨlorz 35shɨ ɨtso uje trampta chishew olak. Tɨkɨrẽt nehe par nos tepyẽr oso uje ode ĩ̵rmo lekɨtiyo. 36Shish tyenɨj emɨtlo olak hn shish olak orar apurlo Porrosht par uje olak pwele ewenta erze uje ich mɨhnũwo uje tyenɨj masaha ĩ̵rmo nehe par uje aachĩ̵hɨlo pahɨr uje tokõra poõrzni.— 37Uje deeych ich Jesús shish shiyokorãha osoho wahacha templo patikɨt ehet. Uje dɨhlak ich hno sakaha wahacha wĩ̵rit eeych uje iich otsɨɨ Olivos. 38Uje ehn dɨhɨrbak ich nos wɨr oso ohno otĩ̵r wahacha templo patikɨt ehet par uje otẽr uje Jesús shiyokorãha õr.

will be added

X\