LUCAS 17

1Eseekite hn Jesús tatɨm dakɨle ɨm: —Shish de uje sehe duhu ahakõrlo kuche mɨhnũwo, per ich yarhakpa par ese hnakɨrbich uje shuu yet shiyokõr uje mĩ̵hnɨk. 2Ma om uje ehn yahpaa wɨchɨ duhu pɨkɨhnint niyokõr uje mĩ̵hnɨk ich oshuu ese hnakɨrbich tuuhna kojach dich hn otãra ochɨbɨte onoota bahluta ehet par uje toy par uje ye niyokõr ese mĩ̵hnɨk hn Porrosht sepyẽr ɨre nehe shuu dospa. 3Abeylshɨp olak. Kɨmɨjɨ olak yeẽk shiyokõr mɨhnɨkĩ̵hɨ deshɨbich ich tyenɨj deshɨbich tĩ̵r tatɨm ɨre. Kɨmɨjɨ shuu chuuna uje shiyokõr uje mĩ̵hnɨk ich tyenɨj wɨchɨ perdonar ɨre. 4Kɨmɨjɨ shiyehe wɨchɨ deeych hn eshɨbich shiyokõr mɨhnɨkĩ̵hɨ owa syete bese hn taãcha tĩ̵r owa syete bese par uje sapur perdon pork chuuna uje shiyokõr uje ich mĩ̵hnɨk ich shish tyenɨj owa perdonar ɨre.— 5Uje erze apóstole ochunt uje Jesús shuu ɨtsorz hn otatɨm otsɨɨ: —Akashɨm õryok par uje ma ye oyotiis owa.— 6Jesús tatɨm õr ɨm: —Kɨmɨjɨ olak yet ye lotiis yok pɨkaap ich shɨ ɨtso asa pohorrza eyhi ijeebe uje iich otsɨɨ mostasa, kɨmɨjɨ ye lotiis yok duhu ɨlorz heke pwele tatɨm pohorrza yata par uje chiyuhu ɨre hn chukwẽr ɨrehe onoota bahluta ehet hn asa pohorrza tyenɨj shiyokõr uje tatɨm ɨre.— 7Hn Jesús sɨteẽta tatɨm õr ɨm: —Kɨmɨjɨ olak yeẽk yɨlt chɨhɨ hn shuu chish obiyoho shakɨrrza ehet shuu arado somtɨs hnɨmich o kɨmɨjɨ shuu tɨbey obeje. Uje cheeshpo tãra aach ¿je atɨm ɨre on: “Erẽt akɨr aak.”? Ye atɨm uhu ɨlorzpe. 8Atɨm on: “Enshii pobɨso. Enshii owa hn ebɨte pobɨso nemest eeych par uje takaak hn tokoho. Uje takɨtso hn nɨsh aake hn ehe.” 9¿Je dosɨm ese debich hnechɨt dich uje shiyokõr erze ɨr ɨbiyoko? Ye dosɨmpe pork shɨ shiyokõr uje yɨnsɨrc tatɨm ɨre. 10Olak shɨ olak ɨtso ɨre. Uje ehnɨlo olak ɨbiyo heke atɨmloye on: “Õryok Porrosht ɨbiyo. Shɨ oyiyokõr uje tatɨm õryok. Yelɨj oyiyokõr ma par uje wɨchɨ nɨnshɨp õryok.”— 11Eseekite uje ehn Jesús hno tĩ̵r dɨt Jerusalén hn chɨkãha ese dehet uje samaria oso õr hnɨmich de pɨt hn galilea oso õr hnɨmich de pɨt yet. 12Uje de par taachĩ̵hɨ dɨt ijaabɨt ebich par masaha hn hnakɨrbo odechɨ õr dye uje õr permo. Lepra tew õr. Wɨr shɨ oyehe dukuhla 13hn otɨbich otsɨɨ: —Jesús, õryok yɨnsɨrc, osɨr õryok wɨshɨ.— 14Uje Jesús umo õr hn tatɨm õr ɨm: —Bolɨlo etĩ̵rlo wɨr saserdote hn owɨlo õr olak yũhur.— Ohno. Uje ehn ode dehet pehet hn ɨchii õr owich om. 15Nohmet teychɨm ɨre uje owich omɨke hn cheeshpo. Shish teeychãha Porrosht ich sɨhnew. 16Uje taachĩ̵hɨ Jesús ahɨr hn icha dete hnɨmoho ɨle ɨkɨch nehech unta terɨhɨ hnɨmich hn nɨnshɨp Jesús. Ese hnakɨrbich wɨchɨ samaria os. 17Jesús tatɨm erze oso uje õya ɨre ɨm: —Dye hnakɨrbo uje tukuta õrke. ¿Ochɨhɨ ɨraãpo erze uje õr nueve? 18Shɨ lɨka sohmɨra uje cheeshpo par ɨshɨm Porrosht hnechɨt dich hn teeychãha hn wɨchɨ dihip kɨnaha.— 19Hn tatɨm ese hnakɨrbich ɨm: —Alehet, bo pork ye otiis yok petɨkɨke heke owa owich om.— 20Eseekite uje deeych yet hn erze uje õr ɨluuta iich otsɨɨ fariseo otatɨm Jesús otsɨɨ: —¿Latɨk nehe hn Porrosht taãcha par tɨbey oso?— Jesús tatɨm õr ɨm: —Tyenɨj taãcha per ye oso õr pwele onomo ɨrpe. 21Nĩhyok yeẽk pwele ɨm: “Ele de lɨka,” o “De wahacha,” pork Porrosht de daabo õr aho hn tatɨm õr par uje oshiyokõr uje om.— 22Eseekite hn Jesús tatɨm dakɨle ɨm: —Yok tokõra poõrzni. Yok de olak ahɨr. Je deeych yet nehe hn yok nihyokĩ̵hɨ olak ahɨr. Deeych yet nehe ich ahmũrlo uje yok de olak ahɨrpo per ich yok nĩhyok. 23Heke tyenɨj oso otatɨm olak otsɨɨ: “Hmeychɨmlo, wɨchɨ de lɨka,” o otatɨm olak otsɨɨ: “Hmeychɨmlo, wɨchɨ de wahacha.” Ye etĩ̵rlo wahacha hn ye meylo õr. 24Yok tokõra poõrzni. Uje terɨhɨ ese deeych uje takaashpo nehe ich nos oso oteychɨm yok ĩ̵rmo lekɨtiyo shɨ ɨtso uje yuwebo hũre hn omoho lekɨtiyo. 25Per wap tyenɨj oso oloter yok ich oshuu dospa hn erze oso uje ode lɨka tyenɨj otata uje ye onahmũr yokpe.— 26Hn Jesús ɨm: —Uje ehn yahpaa Noé masaha pohorrza ehet ich oso oshiyokõr kuche uje otsahmũr. Yok tokõra poõrzni. Uje ta par takaashpo nehe ich oso oshiyokõr oshuu ɨtsshɨp uje erze oso yewo oshiyokõrkite uje Noé masaha pohorrza ehet 27pork uje ehn Noé lɨshɨ dekite hn õr ɨre shish otaak hn oho hn õhyiye ahɨr nehech terɨhɨ ese deeych uje Noé masaha asa pohorrza ehet. Kresyent bahlut taãcha hn sajuwe õr. Nos sɨhna õr. 28Ehn Lot lɨshɨ dekite erze oso shish oshiyokõr oshuu ɨtsorz. Otaak hn oho. Otiya kuche hn ochiwãha. Ochukwẽr nahĩ̵ro hn oshiyokõr dahuwo. 29Shish oshiyokõr oshuu ɨtsorz nehech terɨhɨ ese deeych uje Lot tokolɨhɨchɨskite dɨt Sodoma. Shiyehe ese deeych hn asufre duhlu kayɨhɨ õr eeyo shɨ ɨtso uje ɨbɨk per shɨ jwekɨta uje kay hn nos sɨhna õr.— 30Hn Jesús tatɨm dakɨle ɨm: —Yok tokõra poõrzni. Uje terɨhɨ ese deeych uje takaashpo nehe hn erze oso oteychɨm yok, ich yesh oshiyokõr shɨ ɨtso uje ehn Noé lɨshɨ dekite hn shɨ õr ɨtso uje ehn Lot lɨshɨ dekite. 31Uje terɨhɨ ese ɨshɨrĩt nehe kɨmɨjɨ yeẽk chɨhɨ dahuch eeych ich tyenɨj ihnɨmich shɨchish hn uushɨ. Ye ompe uje masaha dahuch ehet par uje hnoy ɨr kushjãro. Shɨ ɨtso kɨmɨjɨ yeẽk de aach. Ye ompe cheeshpo par uje hnoy ɨr kushjãro. 32Olak eyucha waa Lot lɨshɨ ɨr ɨrãhta. Teychɨm nanerkite hn toy. 33Uje yeẽk sahmũrpa ĩ̵rmo ɨshujãro ich tyenɨj nos pyert erze kushjãro hn pyerte ɨr ɨkɨrĩt toy, per uje iim erze ĩ̵rmo ɨshujãro ich tɨbey ɨr ɨkɨrĩt. 34Titɨm olak ich tuu ũrpa. Dɨhlak nehe hn oso õr osiyer otakɨsho darpich. Ohnoy yet hn shɨ yata sakaha o ohnoy yata hn shɨ yet sakahachɨs. 35Tɨmcher õr otiyer ode uje ochukwer may ochĩ̵ra molino. Ohnoy yata hn shɨ asa yata sakahachɨs. 36Hnakɨrbo õr osiyer odechɨ aach. Ohnoy yet hn ese yet shɨ sakahachɨs.— 37Jesús akɨlo otatɨm otsɨɨ: —Ɨrhĩche, ¿odoy õr odeya õr ɨraãpo?— Tatɨm dakɨle ɨm: —Uje kuchɨt topɨt de ich wupuu takasho lawichɨhɨchɨs.—

will be added

X\