LUCAS 14

1Eseekite uje ich deeych yet hn terɨhɨ sabta hn Jesús hno tĩ̵r ese hnakɨrbich ihyuch uje ɨr ɨluuta iich otsɨɨ fariseo. Wɨchɨ dɨt oso õr bahluwa. Jesús hno par uje taakɨhɨ ihyuch. Fariseo yewo odechɨ toy. Oteychɨm pishɨ Jesús kɨmɨjɨ niyokõr uje mĩ̵hnɨk. 2Hnakɨrbich dechɨ Jesús ɨkɨch uje permo, hmeyko koos, ɨtero hn dɨle nos koos. 3Jesús keytker erze hnakɨrbo uje oshiyokorãha oso waa ley waa je Moisés chichewkite hn erze yewo uje õr ɨluuta iich otsɨɨ fariseo. Jesús tatɨm õr ɨm: —¿Je otsowe ley uje ochukuta õr ese deeych uje otsakɨr o je ye otsowepe?— 4Per õr ɨre ye odiilehetpe. Heke Jesús chishew ese hnakɨrbich uje permo hn chukuta hn shuu hno tokolɨhɨ pwert ehet. 5Tatɨm õr ɨm: —Kɨmɨjɨ olak yeẽk uje ɨr ijɨt de o kɨmɨjɨ ɨr wey de uje kay hn masaha jotsɨt ehet ¿je ɨchii diyuhu ɨre shiyehe wɨchɨ ese deeych uje otsakɨr o je ye diyuhu ɨrpe?— 6Per õr ɨre ich ye olish latɨk. 7Eseekite ich Jesús umo erze uje otaachĩ̵hɨchɨs par uje otaakɨhɨ toy. Ochiihla erze õr bahluwo õr ɨbe par uje otsakaha pork sehe oduhu ɨr deyo. Jesús shiyokorãha õr tatɨm õr ɨm: 8—Uje yeẽk tatɨm olak yeẽk par uje tĩ̵r ɨr ahamich owich uje ich chiileku ye lakaha erze uje õr deyo õr ɨbe eeych pork ye dɨraha kɨmɨjɨ tatɨm yet par uje taãcha uje ich ma dich je ɨre. 9Kɨmɨjɨ lakaha wahacha hn ese uje shiyokõr õr ahamich tyenɨj tĩ̵r ɨre hn tatɨm ɨm: “Alehet. Lɨkɨ ɨbe ele hnakɨrbich.” Heke shuu pookshɨp. Ich tyenɨj sakaha asa õr ɨbɨta uje de uhurc. 10Uje yeẽk tatɨm olak par uje etĩ̵rlo ɨr ahamich owich ich ma om uje akahalo asa õr ɨbɨta uje de uhurc. Ese uje shuu etĩ̵r nahamich owich tɨrẽt hn tatɨm owa ɨm: “Akaha ese owich uje ich ma ɨhĩ̵rt, sham.” Heke nos wɨr uje odechɨ õr ahamich owich oteychɨm owa shɨ ɨtso uje owa dich. 11Tyenɨj ɨtsorz pork ese uje sehe duhu ɨre dich ich shɨ ɨtso uje ye jukur, hn ese uje ye duhu ɨre dichpe wɨchɨ uje oshuu ɨtso uje ich dich.— 12Eseekite hn Jesús tatɨm ese õr ahamich yɨnsɨrc ɨm: —Uje sehe ahakõr õr ahamich par uje otaak ich ye atɨm erze ahĩ̵re hn erze eshɨbo hnii erze eeyso hn erze ɨhĩ̵r deyo uje odebuhu ahuch ahɨr par uje otɨrẽt. Kɨmɨjɨ atɨm õr par uje uhu otɨrẽt ɨtsorz hn deeych yet nehe ich wɨr oshiyokõr õr ahamich dich yetpo hn otatɨm owa par uje etĩ̵r õr heke oshɨ ɨr hnɨtew uje de ahɨr. 13Uje ahakõr õr ahamich ich ma om uje ebii erze uje õr losuhlaabo hn erze uje õr wopo hn erze uje õr olɨbo par uje otɨrẽt otaak. 14Heke ich om par owa pork wɨr ye õr pwelpe oniyokõr õr ahamich yet hn oshɨ õr hnɨtew, per uje Porrosht aabo õr ɨkpo nehe ich tyenɨj Porrosht ɨshɨ ese õr ahamich bahat.— 15Hnakɨrbich yet dechɨ õr ahamich owich ese nemest wɨrc uje Jesús de. Uje chunt uje ɨtsorz hn tatɨm Jesús ɨm: —Ich om par yeẽk uje tyenɨj taakɨhɨ wahacha poõrc ese õr ahamich uje Porrosht shiyokõr par erze ɨr aabo nehe.— 16Uje Jesús chunt ɨre hn tatɨm ɨre ɨm: —Hnakɨrbich yet de uje sehe niyokõr õr ahamich dich. Tatɨm wɨr oso okɨhniya par uje otɨrẽt par otaak. 17Uje ich terɨhɨ ese õr ahamich orta hn shuu dakɨlt hno par uje tatɨm wɨr oso par otĩ̵r ese õr ahamich pork nos wɨr oposo de nemest eeych par uje otaak. 18Per nos wɨr õr ɨre ɨchii otatɨm wɨchɨ akɨlt uje ye õr pwele odope. Uu hnakɨrbich webich osht tatɨm ɨm: “Tɨkiya yok hnɨmichɨke, sham. Tyenɨj takaha takachɨm shɨchish heke ye yok pwelpe par uje tɨtĩ̵r ese ɨr ahamich. Atɨm ɨre par uje perdonar yok.” 19Hn yet tatɨm ɨm: “Tɨkiyaka sinko yunta wey, sham. Tyenɨj takaha takachɨm shɨchish par yok prowa kɨmɨjɨ om heke ye yok pwelpe par uje takaha tɨtĩ̵r ese ɨr ahamich. Atɨm ɨre par uje perdonar yok.” 20Hn yet tatɨm ɨm: “Yok tiipekuku heke ye yok pwelpe par uje tɨtĩ̵r ese ɨr ahamich.” 21Ese ɨrhĩch ɨbich cheeshpo hno tatɨm nensɨrc hn yɨnsɨrc ich chesdelo. Tatɨm debich ɨm: “Bo shɨchish etĩ̵r dɨt ehet. Õhwa erze uje õr losuhlaabo hn erze uje õr olɨbo hn erze uje õr wopo.” 22Uje sɨhna debiyo hn tatɨm nensɨrc ɨm: “Pɨnsɨrc, nos tiyokõrke erze uje atɨm yokɨke per erze õr ɨbe yesh de.” 23Ese ɨrhĩch tatɨm ese debich ɨm: “Bo etĩ̵r erze daho ijaabo hn erze daho deyo uje dechɨ dɨt nẽr par uje uhu oso omasaha pihyuch par ese õr ahamich. Õhwa õr nehech õr ɨlshɨp nemest wɨro. 24Titɨm olak ich ũrpa. Erze uje titɨm õr waphna par otĩ̵r ese õr ahamich wɨr hnii õr sohmɨra ye tuu omasaha par otaakpe.”— 25Eseekite ich oso okɨhniya uje oyehe Jesús nẽr. Somtɨs ɨre hn tatɨm õr ɨm: 26—Uje yeẽk tɨrẽt tĩ̵r yok pork sehe masaha par pakɨlak ich ma tyenɨj sahmũr yok je uje sahmũr deych hn data. Tyenɨj ma sahmũr yok je uje sahmũr nerãhta hõr daabo. Tyenɨj ma sahmũr yok je uje sahmũr leshɨbo hn nanɨme, hn tyenɨj ma sahmũr yok je uje sahmũr ɨre. Kɨmɨjɨ ye duhu ɨlorz ich ye pwele masaha par pakɨlakpe.— 27Jesús tatɨm õr ɨm: —Shish tyenɨj yeẽk ewenta uje oso oshiyokõr mɨhnɨkĩ̵hɨ ɨre shɨ pork ye dotiis yok shɨ ɨtso uje ihyõk krus hn ĩya yok. Kɨmɨjɨ ye ewenta duhu ɨlorz ich ye pwele masaha par pakɨlakpe.— 28Jesús sɨteẽta kuchɨt tatɨm õr ɨm: —Kɨmɨjɨ olak yeẽk chɨhɨ uje sehe niyokõr pwert dich ich tyenɨj sakɨr hn shuu deyuwo tɨsĩ̵r wap kɨmɨjɨ ɨr hnote chɨhɨ kɨhniya par uje shiyokõr. 29Kɨmɨjɨ nos chihitsɨm erze uhwɨrbe hn ɨr hnote nĩhyok ich ye nɨmɨtpe heke erze yewo omo ɨre uje ye nɨmɨtpe hn oloter ɨre oyana 30otsɨɨ: “Ɨchii shiyokõr pwert dichni ese hnakɨrbich per ɨr hnote iyehi heke ye pwel nɨmɨtpe.”— 31Jesús sɨteẽta kuchɨt yetpo ɨm: —Kɨmɨjɨ rey yet sehe do par uje hõr rey yet oteye ich tyenɨj sakɨr hn shuu deyuwo tɨsĩ̵r wap uje chĩ̵ra wɨr ɨr ohyerptoso uje õr dye mil kɨmɨjɨ ɨre pwele derz wɨr rey yet ohyerptoso uje õr beynte mil. 32Kɨmɨjɨ kemɨhɨ uje ye pwel derzpe heke uje ehn erze ɨmãho ode dukuhla hn shuu hnakɨrbo ohno par uje shuu otatɨm ese rey yet otsɨɨ: “Õryok rey sole: ¿Tiyokõr latɨkpo par uje tuu ehet kɨɨs?” 33Olak shɨ olak ɨtso ese rey yet heke tyenɨj olak eyuwo tɨsĩ̵r wap. Uje ye olak pwele moymlo olak kushjãro ich ye olak pwelpe amsahalo par pakɨle. 34Olak shɨ olak ɨtso sal. Erze sal ich ɨhĩ̵rtso per kɨmɨjɨ sɨhna ɨre uje ich ye chiyokpe ¿ich uhu ɨnaãpo par uje uhu chiyokpo? 35Ye ompe par uje otãra ochɨbɨte shakɨrrza pork shuu jõro toy hn ye ompe par uje otãra ochɨbɨte erze wõjo iche uje otɨbey par ochɨbɨte shakɨrrza ehet. Shɨ tyenɨj otãra ochɨbɨte ejwert. Olak uje entlo uje titɨm olakɨke uhu olak eyuwo tɨsĩ̵r.—

will be added

X\