JUDAS 1

1Yok Judas. Yok Jesucristo ɨr ɨbɨk, hn yok Santiago ɨr leshap. Tichew ana hutɨta par tokosɨm erze uje Porrosht uu eyok Deych chiihla õrkite hn sahmũr õr. Wɨr uje Jesucristo tɨbey õr. 2Sehe tuu Porrosht nuuna uje olak losuhlaabo hn takashɨm olak hn duhu olak aho kɨɨs hn duhu ma ahmũrloye. 3Pɨshɨbo watsaklo, wapni sehe tichew hutɨta par titɨm olak uje Jesucristo tooho krus eeychkite hn ɨshɨ eyok hnɨtewɨhɨ Porrosht ahɨr per ye tichewpe. Shɨ tichew ana hutɨta yata. Ma om uje titɨm olak par uje ye otiislo Jesucristo ɨr ahwoso hn moymlo. Ich ye ahwoso kɨnãho chɨhɨpe, shɨ erze uje oyanɨmɨrãha. 4Hnakɨrbo yewo ode uje õya olak. Wɨr ochii ɨre Porrosht aaboho. Ich osdeyo uje Porrosht chɨbɨte uje tyenɨj shuu otĩ̵r urhuta bahluta ehet nehe. Wɨr ye Porrosht aabope. Erze uje ich om uje Porrosht ɨshɨm eyok wɨr otsahmũr toy per oshuu ɨr ahwoso poshɨk par uje oshiyokõr uje ich mɨhnũwo. Wɨr shɨ sehe odishew tɨmcher par uje oshiyokõr uje ich mĩ̵hnɨk. Wɨr otsɨtak uu eyok yɨnsɨrc uje shɨ sohmɨra. Wɨchɨ uu eyok Ɨrhĩch Jesucristo. 5Olak ich nos erahalo per sehe tuu hap uhu olak eyucha uje eyok Ɨrhĩch chiyuhu erze Israel oso ese egipto oso õr hnɨmich ehetkite, per deeych yetkite hn nos sɨhna erze Israel oso uje otsotiis ɨre. 6Porrosht sepyẽr ɨr anjele toy. Wap chɨbɨte par uje oshiyokõr debiyo per ode uje oym lawich heke Porrosht chɨrmas õr shuu otĩ̵r ese owich uje ich dɨhlelt data. Porrosht shiyeru õr par uje shɨ oyem ese deeych uje tyenɨj sepyẽr õr nehe. 7Porrosht sepyẽr erze oso uje odebuhu dɨt Sodoma hn dɨt Gomorra hn nos wɨr duwo uje de ahɨr toy. Erze oso ich oshiyokõr uje ich mɨhnũwo pishokite ɨtso erze hnakɨrbo uje yesh otsehnyẽr olak. Erze hnakɨrbo hn tɨmcher uje ode dɨt Sodoma hn dɨt Gomorra ye ohnõyhi pishye ahɨrpe. Otorãhaye, hn tɨmcher tɨmcher õhiyer ahɨr hn hnakɨrbo hnakɨrbo õhiye ahɨr. Otsahat loshɨpo hn oshuu loshɨpo sahat ɨre. Pɨkɨhnino hn pɨkɨhnine nos oshiyokõr ɨtso õr, heke Porrosht sẽru õrkite. Porrosht shiyokõr shuu ɨtsorz par nos oso ochɨraha uje nos sepyẽr õr nehe chɨbɨte õr asa urhuta bahluta ehet waa je yelɨj nɨhna ɨre. 8Erze hnakɨrbo uje otsehnyẽr olak wɨr shɨ ɨtso erze dɨt Sodoma hn dɨt Gomorra oso. Ochɨbɨte uje nĩhyok uje yeẽk sepyẽr õr nehe uje oshiyokõr uje ich mɨhnũwo, heke oshiyokõr mɨhnuwõhoye. Wɨr ye otola õr bahluwope, hn ochish majamichɨhɨ erze õr bahluwo uje ma õr deyo. 9Per uje erze anjele õr bahlut pisht uje iich otsɨɨ Miguel hõr dyablo oshiyokosyeehe Moisés yũhurrza hn Miguel ye dish majamichɨhɨ dyablope. Shɨ tatɨm dyablo ɨm: --Tyenɨj Ɨrhĩch sepyẽr owa nehe.-- 10Per erze hnakɨrbo uje otsehnyẽr olak ochinehnɨm erze kuche uje õr ɨre ye odɨrehepe. Wɨr shɨ õr ɨtso loshɨpo. Shɨ oshiyokõr uje õr ɨre otsahmũr. Erze uje õr ɨre oshiyokõr wɨr je deeych yet nehe hn sɨhna õr. 11Ich yarhakpa erze uje tyenɨj tĩ̵r õr nehe uje otsehnyẽr olak. Wɨr õr ɨluu shɨ ɨtso uu Caín lɨshɨ ɨr ɨluu. Shɨ oshiyokõr oshuu ɨre ɨtso uu Balaam uje shɨ sahmũr hnote heke iim shiyokõr uje Porrosht sahmũr. Porrosht tyenɨj sepyẽr õr shɨ ɨtso uje sepyẽr Coré hõr pork wɨr õr prowa sehe odiyuhu Moisés uje Porrosht chɨbɨte par õr bahlutkite. 12Olak uje ahakõrlo õr ahamich par uje aaklo ich wɨr erze uje otsehnyẽr olak odechɨ olak ahɨr. Wɨr ich okuytɨm erze oposo par uje otaak hn oho hn ye oduhu deyuwo tɨsɨrĩ̵hɨ yewope. Wɨr shɨ õr ɨtso erze ukuhɨr uje shɨ myent hnoy par uje ye ɨbɨkpe, hn shɨ õr ɨtso pohɨr uje terɨhɨ ɨshɨrĩt per ye eẽrɨrsh hn kako hn ochiyuhu ɨr uro. 13Õr ɨtso onoota bahluta wokor ahlɨbe uje de wɨrc. Erze õr ahwoso uje ochiyuhu ich shɨ ɨtso erze ot wokor ahlɨbe. Uje otata lahwoso uje ich mɨhnũ pisho ich ye opookpe. Wɨr shɨ õr ɨtso porrzeebe uje tokolɨhɨ lawich hn hno tĩ̵r lawich uje dɨhlelt data. Porrosht chɨbɨte erze par uje shish odechɨ ese owich uje ma dɨhlele. 14Adán hn ɨr iiso nehech oterɨhɨ Enoc wɨr õr syete. Ese Enoc tata uje Porrosht sole: --Hmeychɨm uje Ɨrhĩch tɨrẽt ich anjele okɨhniya õya ɨre 15par uje nos sepyẽr erze uje oshiyokõr uje ich mɨhnũwo hn par chɨbɨte orhõta nos wɨr erze kuche mɨhnũwo uje õr ɨre oshiyokõr pork ye onahmũr Porroshtpe. Oshiyokõr uje Porrosht ye nahmũrpe, hn nos tyenɨj chɨbɨte orhõta nehe erze ahwoso mɨhnũwo uje õr ɨre otata. Ochiyuhu lahwoso mɨhnuwõho Porrosht.-- 16Erze uje otsehnyẽr olak shɨ otukuhna dejerpta uje ochiilehet hn yelɨj oduhu laho kɨɨs. Shɨ sehe oniyokõr uje õr ɨre otsahmũr. Shɨ onarim ɨre ich otsɨhnew par uje sehe oduhu yewo onunt. Wɨr shɨ onarim olak par uje oshuu olak aho kɨɨs hn sehe olapur olak kuche. 17Pɨshɨbo watsaklo, tyenɨj olak eyucha erze eyok Ɨrhĩch Jesucristo ɨr apóstole õr ahwoso uje otata uje tyenɨj tokole nehe. 18Erze apóstole otatɨm olak otsɨɨ: -- Uje yej terɨhɨ ĩ̵rmo uhurc nehe ich ode uje shɨ ochiyuhu lahwoso mɨhnuwõho Porrosht. Shɨ sehe oniyokõr erze mɨhnũwo uje õr ɨre otsahmũr.-- 19Wɨr shɨ sehe oduhu oso odehek ɨre. Shɨ oshuu deyuwo tɨsɨrĩ̵hɨ kuche uje de nãhu ĩ̵rmo. Ye Porrosht Ɨchɨbich chɨhɨ õr ahope. 20Pɨshɨbo watsaklo, ye ahakõrlo uhu olak ɨlo õr. Shɨ tyenɨj ma ye otiislo Porrosht. Uje olak orar ich uhulo Porrosht Ɨchɨbich niyokorãha olak. 21Ye ekeylo uje Porrosht sahmũr olak par uje ye ahakõrlo kuche mɨhnũwo uje ɨre ye nahmũrpe. Eyok Ɨrhĩch Jesucristo sosɨr olak. Shish anemlo ese deeych uje hnoy olak seya olak poõrc uje olak ɨkɨrĩt de uje yelɨj nɨhna ɨre. 22Akashɨmlo erze Porrosht aabo uje õr koswãha ɨre uhulo ye õr koswãha, 23hn akashɨmlo erze uje ye õr Porrosht aabope par uje uhulo omasaha par Porrosht aabo. Uhulo ɨlo uje eyuhulo orĩ̵hɨ jwekɨta ehet, hn eenɨlo uje yewo õr losuhlaabo uhulo omasaha par Porrosht aabo per tyenɨj etaklo erze õr ɨluu mɨhnũ uje oshiyokõr. Erze õr ɨluu mɨhnũ wɨr shɨ ɨtso õr ɨshuwo uje oyãha uje ich mɨhnũ pisho. 24Titɨm olak. Porrosht ɨr ukurbo deyo de. Wɨchɨ tɨbey olak par uje ye ahakõrlo erze kuche mɨhnũwo. Wɨchɨ tyenɨj hnoy olak seya olak dekɨch nehe uje ich ye olak hnɨtew chɨhɨ ɨre ahɨrpe. Ɨre ich hũre hn ich ayla uje aachɨhɨlo ɨre ahɨr. 25Porrosht shɨ sohmɨra. Wɨchɨ shuu eyok Ɨrhĩch Jesucristo ɨshɨ eyok hnɨtewɨhɨ dahɨr. Sehe tuu oso oduhu Porrosht ich dich. Wɨchɨ ich hũre hn ich dichpa hn ɨr ukurbo deyo de. Porrosht nos shiyokõr uje ɨre sahmũr. Wɨchɨ dekite nehech ele ahle hn shish de nehe. Shɨ ahnũwo uje sehe titɨm olak.

will be added

X\