JUAN 4

1Eseekite hn Jesús chunt uje erze uje õr ɨluu iich otsɨɨ fariseo ochɨraha uje ɨre tohɨrm oso par ɨr akɨle ich ma okɨhniya je Juan uu tohɨrm oso. 2Jesús ye tohɨrm osope, shɨ ɨr akɨle wɨr uje otohɨrm oso. 3Uje Jesús chunt uje erze fariseo ochɨraha ɨtsorz hn tokolɨhɨchɨs hnɨmich Judea par hno tĩ̵r hnɨmich Galilea. 4Par hno tĩ̵r Galilea ich chɨkãha erze samaria oso õr hnɨmich ehet. 5Chɨkãhachɨs nehech taachĩ̵hɨ ese dɨt uje iich otsɨɨ Sicar. Ese dɨt ye dukuhlehechɨspe ese hnɨmich uje Jacob ɨshɨm deyjɨt Josekite. 6Jotsɨt dechɨ uje Jacob shuu ochihitsakite. Jesús ich chɨrmtsɨr pork ese uje tĩ̵r ich dukuhla, heke sakahachɨs jotsɨt wɨrc. Ich yej terɨhɨ deeych pehet. 7Eseekite hn tɨmcharrza samaria yãr tɨrẽt tĩ̵r ese jotsɨt par uje chiyuhu awɨt. Jesús tatɨm wate ɨm: —Asɨm yok tokoho.— 8Jesús ɨr akɨle ich ye ochɨhɨ ɨr ahɨrpe. Ohno otĩ̵r ese dɨt par otiya oposo par otew. 9Asa tɨmcharrza tatɨm Jesús ɨm: —Owa israelya hn yok samaria yãr. ¿Ɨnaãpo heke sehe uhu tokosɨm owa awɨt? Erze israel oso hn erze samaria oso shish otsɨtakye.— 10Jesús tatɨm wate ɨm: —Kɨmɨjɨ eraha ese uje Porrosht sehe dosɨm oso hn kɨmɨjɨ eraha yok yeẽkpo uje tapur owa awɨt ich apur yok hn tokosɨm owa ese awɨt uje shuu õr ɨkɨrĩt de uje yelɨj nɨhna ɨre.— 11Asa tɨmcharrza tatɨm Jesús ɨm: —Ɨrhĩche, ich jotsakpa ese jotsɨt. Ye owa kuchẽrk chɨhɨpe par eyuhu ese awɨt. ¿Uhu tãra ɨraãpo ese awɨt uje shuu õr ɨkɨrĩt de par asɨm yok?— 12Hn tatɨm Jesús ɨm: —Õryok porokkite Jacob ɨshɨm õryok ele jotsɨt. Ɨre ɨhɨ ele awɨt hn nos wɨr ɨr aabo oho toy hn nos wɨr ɨr echiyo. ¿Je owa ma dich je Jacob?— 13Jesús tatɨm asa tɨmcharrza ɨm: —Nos wɨr uje oho ese awɨt uje tãra ele jotsɨt ich shish õr iich sẽhi õrpo, 14mahn erze uje oho ele awɨt uje yok tokosɨm õr ich yelɨj õr iich nẽhi õrpo. Ese awɨt ich ye uhurtɨkɨsh, shish de õr aho hn shuu õr ɨkɨrĩt de uje yelɨj nɨhna ɨre.— 15Asa tɨmcharrza tatɨm Jesús ɨm: —Ɨrhĩche, sehe tuu asɨm yok ese awɨt par tokoho par uje ye piich nẽhi yokpo hn par uje ye takaashpo tɨtĩ̵r ele jotsɨt hn tiyuhu awɨt.— 16Jesús tatɨm ɨm: —Bo õhwa abich hn eeshpo.— 17Asa tɨmcharrza tatɨm Jesús ɨm: —Nĩhyok ye pabĩ̵rkɨsh.— Jesús tatɨm ɨm: —Ich ũru uje atɨm yok uje ye abĩ̵rkɨsh 18pork owa abiyo odeni õr sinko hn ese uje yesh de ahɨr wɨchɨ ye abich pishtpe. Ich ũru uje atɨm yok uhu ɨtsorz.— 19Uje asa tɨmcharrza chunt uje Jesús tatɨm ɨre shuu ɨtsorz hn tatɨm ɨm: —Ɨrhĩche, ele ahle ich tɨkɨraha uje owa profetya. 20Õryok poruwo wɨshɨ oteeychãha Porrosht ele kojach eeych per olak uje olak israel oso shish athɨlo uje Jerusalén wɨchɨ owich uje nos tyenɨj oteeychãha Porroshtɨhɨ.— 21Jesús tatɨm asa tɨmcharrza ɨm: —Ye otiis yok uje titɨm owa uje deeych yet nehe owa hn eeyso ich ye eeychãhalo Porroshtɨhɨ ele kojach eeych hnii wahacha Jerusalén. 22Olak samaria oso ye erahalope yeẽkpo ese uje eeychãhalo. Õryok israel oso oyɨraha ese uje oyeeychãha pork ese uje ɨshɨ õr hnɨtewɨhɨ Porrosht ahɨr nehe shɨ tãra erze israel oso. 23Ele ahle ich terɨhɨ ɨshɨrĩt erze uje oteeychãha pishɨ Porrosht ich otsɨnãha ɨre hn otata uje ich ũru pork Porrosht chukwi erze uje oshiyokõr oshuu ɨtsorz. 24Porrosht wɨchɨ ɨchɨbich heke erze uje oteeychãha pishɨ ɨre ich otsɨnãha ɨre hn otata uje ich ũru hn Porrosht Ɨchɨbich takashɨm õr.— 25Asa tɨmcharrza tatɨm ɨm: —Tɨkɨraha uje Mesías tyenɨj taãcha nehe. Ɨr iich yet otsɨɨ Cristo. Uje taãcha nehe ich nos tatɨm õryok erze kuche par oyɨraha.— 26Jesús tatɨm wate ɨm: —Wɨchɨ yok uje yesh tɨkitkẽr owa.— 27Eseekite hn Jesús ɨr akɨle otaãcha. Ich ochishlabe uje Jesús keytkẽr tɨmcharrza nohmata per ye otatɨm Jesús uje asa tɨmcharrza ¿duhu ɨnaãpoko? hn ye otatɨmpe uje ¿Ɨnaãpo heke keytkẽr asa tɨmcharrza? 28Asa tɨmcharrza iim ese deybɨt hn hno tĩ̵r dɨt. Tatɨm oso ɨm: 29—Yukulo eychɨmlo ese hnakɨrbich. Nos tatɨm yok uje tiyokõrni. ¿Je wɨchɨ Cristo?— 30Heke otokolɨhɨ ese dɨt ohno otĩ̵r uje Jesús de. 31Eseekite uje ehn erze oso otɨrẽt hn erze ɨr akɨle otatɨm Jesús otsɨɨ: —Maestro, aak.— 32Per tatɨm õr ɨm: —Kuchẽrk de uje taw uje ye erehelope.— 33Erze ɨr akɨle otatɨmye otsɨɨ: —¿Je yeẽk tõhwa posoko par uje tew?— 34Jesús tatɨm õr ɨm: —Porrosht shuu tɨkɨrẽtni. Sehe nos tiyokõr erze uje sahmũr hn tɨmɨt ɨr ɨbiyo. Wɨr shɨ ɨtso pobɨso. 35Olak shish athɨlo uje ich yej terɨhɨ shekurko kwatro uje ochekushu jõro nehe. Per titɨm olak too: “Hmeychɨmlo erze jõro, ich de par ochekushu.” 36Ese uje chekushu erze jõro ee ich oshɨ ɨre pork shiyokõr ɨtso uje chiish oso õrye shuu otakɨsho lawich nohmet par uje õr ɨkɨrĩt de uje yelɨj nɨhna ɨre. Ese uje tatɨm oso Cristo wɨchɨ shɨ ɨtso uje chukwẽr jõro hn ese uje chekushu wɨchɨ shɨ ɨtso uje shuu oso omasaha par Porrosht aabo heke ese uje chukwẽr hn ese uje chekushu ich õr aylpa. 37Ich ũru uje oso otata oshuu ɨtsorz: “Yet de uje chukwẽr hn yet de uje chekushu.” 38Tuu bolɨlo par ekushulo erze uje ye ekwẽrlope. Yewo otsanɨmɨrãha otatɨm oso yok shɨ ɨtso uje ochukwẽr jõro hn olak ekushulo uje wɨr ochukwẽr.— 39Eseekite hn erze samaria oso uje odebuhu ese dɨt ich okɨhniya uje ye olotiis Jesuspe pork ochunt uje asa tɨmcharrza tatɨm õr ɨm: —Jesús nos tatɨm yok erze kuche uje tiyokõr.— 40Heke uje erze samaria oso otaachĩ̵hɨ Jesús ahɨr hn otsapur ɨre par uje sakaha õr ahɨr. Ich sakaha õr ahɨr shuu daalo osiyer. 41Uje ochunt Jesús ɨr ahwoso ich ma okɨhniya uje ye olotiis ɨrpe. 42Otatɨm asa tɨmcharrza otsɨɨ: —Ele ahle ich ye shɨ erze ahwoso uje atɨm oryõkɨke uje shuu ye oyotiis Jesuspe. Oyunt ɨr ahwoso toy heke oyɨraha uje ich ũru uje wɨchɨ uje tyenɨj ɨshɨ oso õr hnɨtewɨhɨ Porrosht ahɨr nehe.— 43Eseekite uje ich iyuwe daalo osiyer hn Jesús tokolɨhɨchɨs samaria oso õr hnɨmich hn hno tĩ̵r Galilea. 44Jesús tatɨm oso ɨm: —Erze ɨr ɨhnapso uje ode ese owich uje profetɨt tãra ich ye otola ɨrpe.— 45Uje Jesús taachĩ̵hɨ Galilea ich erze oso otsahmũr ɨre pork wɨr ode ese õr ahamich uje iich otsɨɨ Pascua wahacha Jerusalenhna hn oteychɨm erze kuche uje Jesús shiyokorĩ̵hɨ wahacha. 46Eseekite hn Jesús taachĩ̵hɨpo ese dɨt Caná uje de hnɨmich Galilea. Wɨchɨ ese dɨt uje Jesús shuu awɨt chisãha ɨre wintni. Eseekite hn õr bahlut dechɨ dɨt Capernaum uje ɨr ijɨt permo. 47Ese õr bahlut chunt uje Jesús tokolɨhɨ Judea hn taachĩ̵hɨ Galilea heke hno tĩ̵r Jesús par sapur par uje sehe duhu do tĩ̵r dahuch hn dukuta ɨr ijɨt pork ich yej toy. 48Heke Jesús tatɨm ɨm: —Shɨ sehe uhulo tiyokõr kuche uje ye latɨk pwele niyokõr par uje tɨbɨte orhõta uje pukurbo de. Kɨmɨjɨ ye tiyokõr ich shish otiislo yok.— 49Ese õr bahlut tatɨm ɨm: —Ɨrhĩche, erẽt shɨchish pork pijɨt ich yej toy.— 50Jesús tatɨm ɨm: —Bo eyhi etĩ̵r ahuch. Eyjɨt ich ye tope.— Ese õr bahlut ye lotiispe uje Jesús tatɨm hn hno seyhi. 51Uje ehn hno cheeshpo tĩ̵r dahuch hn ɨr ɨbiyo ochishɨhɨ dehet pehet. Otatɨm otsɨɨ: —Eyjɨt ich owich omɨke.— 52Tatɨm erze debiyo ɨm: —¿Latɨk orahna ich owich om?— Otatɨm ɨre otsɨɨ: —A la una yɨlkahna ich ɨr aat ye duhlpe.— 53Ese pɨkɨhnint ɨr deych chɨraha uje wate asa orta uje Jesús tatɨm ɨre uje ye ɨr ijɨt tope heke ɨre hn nos wɨr ɨr iiso ye olotiis Jesuspe. 54Uje Jesús chukuta ese pɨkɨhnint ich shiyokõr yarta yata uje iyehe asa webich otɨta nẽr uje chisãha awɨt wint. Uje tokolɨhɨ Judea hn tĩ̵r Galilea ich shiyokõr erze yar.

will be added

X\