JUAN 3

1Eseekite hn hnakɨrbich de uje iich otsɨɨ Nicodemo. Ɨr ɨluuta iich otsɨɨ fariseo. Wɨchɨ israel oso õr bahluwa toy. 2Uje dɨhlak hn wɨchɨ hno tekɨrɨhɨ Jesús. Tatɨm Jesús ɨm: —Maestro, oyɨraha uje Porrosht shuu erẽt par ahakorãha oso pork nĩhyok yeẽk shiyokõr erze kuche uje owa ahakõr kɨmɨjɨ Porrosht ye takashɨm ɨre.— 3Jesús tatɨm ɨm: —Titɨm owa ich tuu ũrpa. Uje yeẽk ye shurhãpo ich ye teychɨm ese owich uje Porrosht aabo otĩ̵r nehe.— 4Nicodemo tatɨm Jesús ɨm: —Nĩhyok yeẽk uje ich ɨlaro hn shurhãpo. ¿Je yeẽk pwele cheeshpo masaha data ehet par shurhãpo? Nĩhyok.— 5Jesús tatɨm ɨm: —Titɨm owa ich tuu ũrpa. Kal yeẽk uje shũrha ich hopta tokole hn awɨt ĩya, per tyenɨj Porrosht Ɨchɨbich shuu shurhãpo par uje pwele taachĩ̵hɨ Porrosht ahɨr nehe. 6Uje yeẽk shũrha ich shɨ ɨtso oso yewo, ye kɨnãhape, per ese uje Porrosht Ɨchɨbich shuu shurhã ich ɨr ɨkɨrĩt de uje yelɨj nɨhna ɨre. 7Ye as abe uje titɨm owaka uje nos tyenɨj oshũrhapo. 8Uje myentɨta tɨbichu shɨ ent uje de per ye eraha uje tãra hn ye eraha uje tĩ̵r. Shɨ ɨtso erze uje Porrosht Ɨchɨbich shuu oshũrhapo. Ye odɨraha uje wɨchɨ shiyokorĩ̵hɨ õr aho par shuu oshũrhapo.— 9Nicodemo tatɨm Jesús ɨm: —¿Porrosht Ɨchɨbich duhu ɨnaãpo uje shuu oshũrhapo?— 10Jesús tatɨm ɨm: —Owa israel oso õr maestro. ¿Ɨnaãpo heke ye erehepe uje ɨtsorz? 11Titɨm owa ich tuu ũrpa. Oyiita uje oyɨraha hn uje oyumo, per olak otiislo uje oyitɨm olak. 12Titɨm olakni ahnũwo kuche uje de nãhu ĩ̵rmo per otiislo yok heke ma otiislo yok kɨmɨjɨ titɨm olak kuche uje de wahacha poõrc. 13Nĩhyok yeẽk uje hno tĩ̵r poõrc, shɨ yok uje tokõra poõrzni hn tɨkihnɨmich, hn tyenɨj takaha tɨtĩ̵r poõrzpo. 14Shɨ ɨtso uje Moisés seem ese echeẽt ɨchɨbichkite wahacha ese hnɨmich uje ɨsa ich tyenɨj ochowɨsh yok pork yok tokõra poõrzni 15par uje nos wɨr oso uje ye olotiis yok ich õr ɨkɨrĩt de uje yelɨj nɨhna ɨre.— 16Eseekite hn Porrosht ich sahmũr pishɨ oso uje ode nãhu ĩ̵rmo heke shuu Deyjɨt tɨrẽtkite uje shɨ nohmɨra par uje nos wɨr uje ye olotiis ɨre ich ye otĩ̵r urhuta bahluta ehet nehe. Shɨ õr ɨkɨrĩt de uje yelɨj nɨhna ɨre. 17Porrosht shuu Deyjɨt tɨrẽtkite ye par uje dɨbɨte oso urhuta bahluta ehetpe. Shɨ shuu tɨrẽt par sosɨr õr hn shuu õr ɨkɨrĩt de uje yelɨj nɨhna ɨre. 18Ese uje ye lotiis Porrosht Ijɨtpe ich ye tĩ̵r urhuta bahluta ehet nehe, per Porrosht chɨbɨtkite uje erze yewo tyenɨj otĩ̵r urhuta bahluta ehet nehe pork otsotiis ɨr Ijɨt uje shɨ nohmɨra. 19Jesús wɨchɨ shɨ ɨtso luu uje tɨrẽt tĩ̵r nãhu ɨrmõkite per erze oso ich ma otsahmũr erze uje ich mɨhnũwo shɨ ɨtso uje ode dɨhlelta heke tyenɨj otĩ̵r urhuta bahluta ehet nehe. 20Nos wɨr erze uje oshiyokõr uje ich mɨhnũwo otsɨtak ese uje ɨtso luu. Wɨr ye odɨtĩ̵r ɨre asa luupe pork kɨmɨjɨ otĩ̵r ɨre ich chɨbɨte orhõta uje oshiyokõr mɨhnũwo, 21per nos wɨr uje oshiyokõr uje ich om otsɨtĩ̵r ɨre ese uje ɨtso luu par nos chɨbɨte orhõta erze kuche uje õr ɨre oshiyokõr wɨr uje Porrosht sahmũr. 22Eseekite hn Jesús hõr dakɨle ohno otĩ̵r wahacha hnɨmich Judea. Uje ehn otsakaha wahacha hn otohɨrm oso. 23Juan dechɨ hnɨmich Enón hn tohɨrm osohochɨs toy pork ese hnɨmich Enón ich onoo kɨhniya de. Wɨchɨ ich ye dukuhlehechɨspe ese dɨt Salim. Erze oso ohno otĩ̵r ese owich hn otohɨrm orĩ̵hɨchɨs. 24Ich shish Juan tohɨrm oso pork ehn yahpaa onɨmchaha karsel ehetpe. 25Eseekite hn Juan ɨr akɨle hõr ese israel osht oshiyokosye uje yeẽkpo ma om par tohɨrm oso. 26Ohno otĩ̵r Juan otsɨɨ: —Maestro, ese uje iyehe ahɨrni wahacha onoota Jordán pɨt uje athani uje wɨchɨ shɨ ɨtso Porrosht ɨr obejɨt, ele ahle wɨchɨ yesh tohɨrm oso hn nos otĩ̵r ɨre.— 27Juan tatɨm õr ɨm: —Nĩhyok uje yeẽk pwele shiyokõr erze obiyo kɨmɨjɨ Porrosht ye dosɨm ɨre. 28Olak ɨtspo entlo uje titɨm yewo uje ye yok Cristope. Shɨ Porrosht shuu tɨkɨrẽtni tiyebe par tiyokõr erze obiyo. 29Uje sehe yeẽk diileku ich asa ɨr ihyãta shɨ par ɨre hn ese hnakɨrbich ɨr ihyẽt uje chunt õr ahwoso ich aylpa. Ese hnakɨrbich wɨchɨ Cristo hn ɨr ihyãta wɨr Porrosht aabo hn ɨr ihyẽt wɨchɨ yok, heke ele ahle ich yok aylpa pork oso otĩ̵r ɨre. 30Jesús ich shish ma dich hn yok pukurbo ich shish ma ihnɨmich. 31Ese uje tɨrẽtni tãra poõrc wɨchɨ ma dich je nos wɨr oso. Yeẽk uje shɨ de nãhu ĩ̵rmo wɨchɨ shɨ ĩ̵rmo os heke shɨ tata erze kuche uje de nãhu ĩ̵rmo, per ese uje tãra poõrzni ma dich je nos wɨr oso. 32Jesús wɨchɨ tãra poõrzni. Tata uje chunt hn uje umo per nos otsotiis erze uje ɨre tata. 33Uje yeẽk ye lotiis ɨr ahwoso ich chɨbɨte orhõta uje Porrosht tata ich ũru. 34Porrosht shuu Jesús tɨrẽtni. Ɨre tatɨm oso erze kuche uje Porrosht tata pork Porrosht ɨshɨm Dechɨbich hn nos wɨr ukurbo. 35Porrosht ich sahmũr Deyjɨt heke chɨbɨte nos wɨr kuche ɨr hme. 36Ese uje ye lotiis Porrosht Ijɨt ich ɨr ɨkɨrĩt de uje yelɨj nɨhna ɨre, per ese uje ye niyokõrpe uje Porrosht Ijɨt tata ich nĩhyok ɨr ɨkɨrĩt. Porrosht sɨtak pishɨ wɨchɨ.—

will be added

X\