JUAN 21

1Eseekite uje ich deeych yet hn Jesús tokolɨhɨ dakɨle õr ɨkɨchpo asa lagunta Tiberias wɨrc. Uje ehn yahpaa Jesús tokolɨhɨ õr ɨkɨch ich okeytkẽrye oshuu ɨtsorz. 2Simón Pedro dechɨ onoota wɨrc hõr Tomás. Uu ɨr alokot otsɨɨ arãho. Natanael dechɨ toy. Wɨchɨ tãra dɨt Caná uje dechɨ hnɨmich Galilea. Zebedeo ɨr aabo odechɨ toy hn Jesús akɨle yewo õr osiyer odechɨ toy. 3Simón Pedro tatɨm õr ɨm: —Takaha tesher.— Hn õr ɨre otatɨm otsɨɨ: —Oyukwĩya owa oyẽsher toy.— Ohno oyãha pohorrza per ese dɨhlak uje ochesher ye odihyeru latɨk. 4Uje ich taa par dechole lekɨtiyo poro hn Jesús tokolɨhɨ onoota wɨrc per erze ɨr akɨle ye odɨraha uje wɨchɨ ɨre. 5Jesús tatɨm õr ɨm: —Olak pijo, ¿ahɨrlo latɨkɨpoko?— Õr ɨre otatɨm otsɨɨ: —Ye oyiyeru latɨk.— 6Jesús tatɨm õr ɨm: —Ãrlo ese olak ret ebɨtɨlo pohorrza waãchta hn tyenɨj ahɨrlo.— Heke oshiyokõr uje tatɨm õr. Ich ye õr pwele odish ɨre ese õr ret pork doshiyo ich kɨhniya uje masaha ehet. 7Ese Jesús ɨr akɨlt yet uje ich sahmũrpa tatɨm Pedro ɨm: —Wɨchɨ uu eyok Ɨrhĩch.— Uje Simón Pedro chɨraha uje wɨchɨ uu Ɨrhĩch hn iyãha lasuwo pork chiyuhuku par chish obiyo. Tãr ɨrehe asa lagunta ehet hn sahn narrza tĩ̵r wɨrc. 8Erze yewo shɨ otsakaha pohorrza ehet. Wɨr shɨ syen metro dukuhlehe onoot wɨrc, heke ochurzɨhɨ ɨr ret awɨt pork ich doshiyo kɨhniya uje de ehet. 9Uje oyhnɨmichɨhɨ pohorrza ehet hn omo jwekɨtɨhɨchɨs. Omo uje sanɨs loshɨt erze pichure eeych hn pan de Jesús ahɨr toy. 10Jesús tatɨm õr ɨm: —Ohwĩ̵lo loshiyo sohmɨramo uje ahɨrloko.— 11Simón Pedro dohɨr pohorrza ehet hn chishew ese ɨr ret. Ihnɨmich hn daliihi hnɨmich. Ich doshiyo kɨhniya de ehet uje ich deyo. Wɨr syento sinkwenta y tres per ese ɨr ret ye kãrpe. 12Jesús tatɨm õr ɨm: —Erẽtlo aaklo.— Nĩhyok ɨr akɨle yeẽk uje tatɨm ɨre ɨl: —¿Owa yeẽkpo?— Nos ochɨraha uje wɨchɨ uu õr Ɨrhĩch. 13Jesús sɨtĩ̵r ɨre asa jwekɨta hn chishew ese pan hn ɨshɨm õr. Ɨshɨm õr erze doshiyo toy. 14Uje Jesús ɨkponi ich tre bese uje tokolɨhɨ õr ɨkɨch. 15Eseekite uje ich nos otaakɨke hn Jesús tatɨm Simón Pedro ɨm: —Simón, owa uu Juan ijɨt. ¿Je ma ahmũr pishɨ yok je erze?— Simón Pedro tatɨm ɨm: —Ẽhe Ɨrhĩche, eraha uje tahmũr owa.— Jesús tatɨm ɨm: —Abey Porrosht aabo. Wɨr shɨ õr ɨtso uu yok obeje ijaabo.— 16Hn Jesús tatɨmpo ɨm: —Simón, owa uu Juan ijɨt. ¿Je ahmũr pishɨ yok?— Pedro tatɨm ɨm: —Ẽhe Ɨrhĩche, eraha uje tahmũr owa.— Jesús tatɨm ɨm: —Abey Porrosht aabo. Wɨr shɨ õr ɨtso uu yok obeje.— 17Ich tre bese uje tatɨm ɨm: —Simón, owa uu Juan ijɨt. ¿Je ahmũr yok?— Pedro ich dosdarak pork ich tre bese uje tatɨm kɨmɨjɨ nahmũr ɨre hn Pedro tatɨm ɨm: —Ɨrhĩche, owa nos eraha kuche hn eraha uje tahmũr owa.— Jesús tatɨmpo ɨm: —Abey Porrosht aabo. Wɨr shɨ õr ɨtso uu yok obeje. 18Titɨm owa ich tuu ũrpa. Uje ehn owa ijaap ich anãha asuwo hn etĩ̵r uje ahmũr, per uje owa ɨlaro nehe ich tyenɨj ẽr ahmiko hn yeẽk tyenɨj hnoy owa seya owa uje ye ahmũrpe.— 19Erze uje tatɨm ɨre shuu chɨraha uje tyenɨj ochowɨshɨhɨ ɨre krus eeych nehe par uje oshuu ɨre oshuu toy. Uje toy ɨtsorz ich shuu Porrosht dich. Hn Jesús tatɨm ɨm: —Mẽya yok.— 20Eseekite uje Pedro somtɨs ɨre teychɨm naner hn umo ese Jesús akɨlt uje ich sahmũrpa. Wɨchɨ tɨrẽt iyehe õr nẽr. Wɨchɨ uje de Jesús ahɨrni uje otaak hn tatɨm ɨm: —Ɨrhĩche, ¿yeẽkpo ese uje sehe niwãha owa?— 21Uje Pedro umo Juan uje iyehe õr nẽr hn tatɨm Jesús ɨm: —Ɨrhĩche, ¿latɨk tokolɨhɨ ɨre uje toy nehe?— 22Jesús tatɨm ɨm: —Kɨmɨjɨ tahmũr uje wɨchɨ shɨ ɨka nehech takaashpo nehe ich ye jukur par eraha. Shɨ mẽya yok.— 23Uje Porrosht aabo uje ode lekɨtiyo ochunt uje Jesús tatɨm Pedro shuu ɨtsorz hn otata uje ese Jesús akɨlt yet ich ye tope, per Jesús ye tata duhu ɨlorzpe. Shɨ tata ɨm: —Uje takaashpo nehe kɨmɨjɨ tahmũr ich shish wɨchɨ ɨka. Ye jukur uje eraha.— 24Yok wɨchɨ ese Jesús ɨr akɨlt. Nos tiita erze kuche hn nos tichew tɨbɨte ana hutɨta. Yɨrahalo uje tiita uje ich ũru. 25Kuche kɨhniya de uje Jesús shiyokõrni uje ye tichewpe. Kɨmɨjɨ yeẽk nos dichew dɨbɨte hutɨta erze uje Jesús shiyokõr ich tuu peyuwo tɨsĩ̵r uje nĩhyok owich ĩ̵rmo lekɨtiyo par nos wɨr erze hute.

will be added

X\