JUAN 17

1Eseekite uje Jesús nos tatɨm õr erze kuche hn teychɨm poõrc orar sapur Porrosht ɨm: —Papa, ich terɨhɨ ɨshɨrĩt par uje tɨkɨtɨ. Sehe tuu uhu yok dich par uje tuu owa dich toy. 2Asɨm yok pukurboni hn uhu yok ma dich je nos wɨr oso par tokosɨm õr ɨkɨrĩt uje yelɨj nɨhna ɨre erze uje asɨm õr yokni. 3Ese õr ɨkɨrĩt uje yelɨj nɨhna ɨre wɨchɨ uje ochɨraha owa hn ochɨraha yok. Shɨ owa Porrosht pisht uje ich ũru. Ochɨraha uje yok Cristo hn ochɨraha uje owa uje uhu tɨkɨrẽtni. 4Yok tuu owa dichɨhɨ nãhu ĩ̵rmo, hn nos tɨmɨt erze uje asɨm yokni par tiyokõr. 5Papa, ele ahle sehe tuu uhu yok dichɨhɨ ahɨr ɨtso uje wapni pork uje ehn yahpaa ĩ̵rmo chɨhɨkite ich yok dich ɨtso owa. 6Erze oso uje asɨm õr yokni ich tuu ochɨraha owa. Wɨr ode nãhu ĩ̵rmo per ye õr ɨlo ĩ̵rmo osope. Wɨr uje aahla õrkite hn asɨm õr yok hn oshiyokõr uje ahwoso tata. 7Ele ahle ich ochɨraha nos wɨr kuche uje asɨm yok shɨ tãra owa. 8Erze ahwoso uje atɨm yok ich titɨm õr hn wɨr otsahmũr. Ochɨraha uje ich ũru uje tokõra owa hn ye olotiispe uje owa uje uhu tɨkɨrẽtni. 9Yok orar tapur owa par õr ɨre. Ye tapur owa par erze ĩ̵rmo osope. Shɨ tapur par erze uje asɨm õr yokni pork wɨr uje aahla õrkite. 10Nos wɨr uje aahla õrkite wɨr par yok hn wɨr par owa toy. Wɨr uje oshuu yok dich. 11Ye shish tiyakaha nãhu ɨrmõpe per erze uje aahla õrkite wɨr tyenɨj otsakaha. Papa, yelɨj ahakõr uje mɨhnũwo. Ele ahle takaha tɨtĩ̵r owa. Erze uje asɨm õr yokni sehe tuu shish abey õr ẽra akɨrbo par uje shish õr eyuwo ɨlye ɨtso owa hn yok. 12Uje ehn yok de õr ahɨr ich tɨkɨbey õr tĩ̵ra akɨrbo uje asɨm yok. Nĩhyok õr yeẽk uje iim yok. Shɨ Judas wɨchɨ sohmɨra uje iim yok, hn ɨr owich de urhuta bahluta ehet. Ese uje shiyokorĩ̵hɨ yok shuu ahwoso yakaha. 13Ele ahle ich yej terɨhɨ uje takaashpo tɨtĩ̵r owa, per uje ehn yesh yok de lɨka ĩ̵rmo ich yok orar titɨm owa par uje tuu õr aylpa ɨtso yok. 14Titɨm õr ahwosni per ĩ̵rmo oso ich otsɨtak õr pork wɨr ye õr ɨlo erze ĩ̵rmo osope hn yok ɨtspo ye yok ɨlo õrpe. 15Ye tapur owape par uje eyuhu orĩ̵hɨ ĩ̵rmo ehet. Shɨ sehe tuu abey õr par uje ye Satanás nehnyẽr õr. 16Wɨr ye õr ɨlo erze ĩ̵rmo osope hn yok ɨtspo ye yok ɨlo erze ĩ̵rmo osope. 17Uhu pakɨle õr ɨluu om ẽra owa ahwoso. Ahwoso ich ũru. 18Shɨ ɨtso yok uje uhu tɨkɨrẽtni tɨtĩ̵r nãhu ĩ̵rmo ich yok tuu otĩ̵r ĩ̵rmo lekɨtiyo. 19Tɨbɨte yok par uje tiyokõr uje ahmũr heke takashɨm õr par uje ochɨraha ahwoso uje ich ũru heke ochɨbɨte ɨre par uje oshiyokõr uje ahmũr. 20Yok orar tapur owa ye shɨ par uje akashɨm erze uje ode pahɨr. Yok orar tapur owa par erze yewo uje deeych yet nehe hn ye olotiis yok uje ochunt õr ahwoso. 21Tapur owa par uje uhu nos õr eyuwo ɨlye shɨ ɨtso uje owa de pehet hn yok de ehet par uje wɨr ode eyok aho toy. Uje õr eyuwo ɨlye ich erze ĩ̵rmo oso ye olotiispe uje owa uhu tɨkɨrẽtni. 22Erze obiyo ɨhĩ̵rtso uje asɨm yokni ich tokosɨm õr par uje shuu õr eyuwo ɨtsye shɨ ɨtso eyok uje eyok eyuwo ɨtsye. 23Yok de wɨr õr aho hn owa de pehet par uje õr eyuwo ɨtsye heke erze ĩ̵rmo oso ochɨraha uje owa uje uhu tɨkɨrẽtni hn ahmũr erze uje ye olotiis yokpe ɨtso uje ahmũr yok. 24Papa, erze uje asɨm õr yokni ich tahmũr uje ode pahɨr par uje oteychɨm uje uhu yok dich. Uje ehn yahpaa ĩ̵rmo chɨhɨkite ich uhu yok dich pork ahmũr yok. 25Papa, yelɨj ehnyẽr yeẽk. Shish yakaha uje ata. Erze ĩ̵rmo oso ye odɨraha owape per yok tɨkɨraha owa hn erze uje ye olotiis yok ochɨraha uje uhu tɨkɨrẽtni. 26Yok tuu ochɨraha owani hn shish ma tuu ochɨraha owa par uje wɨr otsahmũrye ɨtso uje ahmũr yok hn yok de õr aho toy.—

will be added

X\