JUAN 16

1Hn Jesús tatɨm õr ɨm: —Nos titɨm olak ahnũwo kuche par uje erahalo heke uje erze mɨhnũwo tĩ̵r olak nehe ich ye ahakõrlo mɨhnũwo. 2Tyenɨj ochiyuhu olakɨhɨ sinagoga ehet. Deeych yet nehe hn yewo oshuu olak oshuu atɨlo. Uje oshiyokõr oshuu ɨtsorz ich õr eyuwo tɨsĩ̵r uje oshiyokõr Porrosht ɨbiyo. 3Tyenɨj oshiyokõr oshuu ɨtsorz pork ye odɨraha Dii Porroshtpe hn ye odɨraha yokpe. 4Titɨm olak ahnũwo par uje erahalo heke uje erze mɨhnũwo tĩ̵r olak nehe ich olak eyucha uje titɨm olakni. Wapni ye titɨm olakpe pork shish yok de olak ahɨr, 5per ele ahle takaha tɨtĩ̵r ese uje shuu tɨkɨrẽtni. Ye olak yeẽk tatɨm yok uje takaha tɨtĩ̵r ɨraãpo. 6Uje titɨm olak uje takaha ich shuu olak dosdarakpa, 7per ich ũru uje tyenɨj titɨm olak. Ich ma om uje takaha pork kɨmɨjɨ ye takaha ich Porrosht Ɨchɨbich uje tyenɨj takashɨm olak ye tɨrẽt tĩ̵r olakpe, per uje takaha ich tuu tɨrẽt tĩ̵r olak. 8Uje wɨchɨ tɨrẽt nehe ich shuu ĩ̵rmo oso ochuuna uje oshiyokõr mɨhnũwo, hn shuu ochɨraha uje Porrosht sahmũr uje tiyokõr. Wɨchɨ tyenɨj shuu ochɨraha uje õr hnɨtew de Porrosht ahɨr heke tyenɨj otĩ̵r urhuta bahluta ehet nehe. 9Porrosht Ɨchɨbich shuu ochuuna uje oshiyokõr mɨhnũwo pork otsotiis yok 10hn shuu ochɨraha uje Porrosht sahmũr erze uje tiyokõr pork tɨtĩ̵r ɨre hn ich ye amlo yokpe. 11Porrosht Ɨchɨbich tyenɨj shuu ochɨraha uje tyenɨj otĩ̵r urhuta bahluta ehet nehe pork Satanás uje tɨbey ĩ̵rmo tyenɨj tĩ̵r wahacha toy. 12Kuche de ich kɨhniya uje sehe titɨm olak per ele ahle ye titɨm olakpe pork ye olak eyuwo dishpe. 13Uje Porrosht Ɨchɨbich taãcha nehe wɨchɨ nos tyenɨj shuu erahalo uje ich ũru, pork ye tatɨm olak kuchepe uje shɨ tãra ɨr eyuwo. Shɨ tatɨm olak uje ɨre chunt uje Porrosht tata hn shuu erahalo erze kuche uje tyenɨj tĩ̵r ĩ̵rmo nehe. 14Wɨchɨ tyenɨj narim yok nehe hn tatɨm olak pahwoso uje titɨm olakni. 15Nos wɨr Dii Porrosht ukurbo de yok, heke titɨm olakɨke uje Porrosht Ɨchɨbich tyenɨj tatɨm olak nos wɨr pahwoso par shuu erahalo. 16Ich yej terɨhɨ uje ye amlo yokpe per je deeych yet nehe hn amlo yokpo.— 17Eseekite hn ɨr akɨle yewo otatɨmye otsɨɨ: —¿Duhu ɨnaãpoko erze uje tata ɨm: “Yej terɨhɨ uje ye amlo yok per je deeych yet nehe hn amlo yokpo?” ¿Duhu ɨnaãpo uje tata ɨm: “Tɨtĩ̵r Papa ahɨr?” 18¿Duhu ɨnaãpo erze uje tata ɨm: “Yej terɨhɨ?” Ye oyɨraha uje tata.— 19Jesús chɨraha uje sehe otatɨm ɨre heke tatɨm õr ɨm: —¿Je ekitkerloyeẽhe erze pahwoso uje titɨm olak too: “Yej terɨhɨ ɨshɨrĩt hn ye amlo yokpe hn deeych yet nehe hn amlo yokpo?” 20Titɨm olak ich tuu ũrpa. Olak tyenɨj eyerhlo hn olak dosdarak per erze ĩ̵rmo oso ich õr ayla. Wap ich olak dosdarak per ich uhurc nehe ich olak aylpa. 21Uje tɨmcharrza ɨr ijɨt tabɨta ich chuuna uje ich dospa pork ich yej terɨhɨ ɨshɨrĩt par uje ɨr ijɨt shũrha, per uje shũrha ich chɨkey ɨr dosĩ̵ryo. Ich ayla uje ɨr ijɨt shurẽhe lɨka ĩ̵rmo. 22Shɨ olak ɨtso wate pork yej terɨhɨ ɨshɨrĩt par olak dosdarak per tyenɨj takachɨm olakpo heke ich olak aylpa. Nĩhyok yeẽk pwele sontew uje olak ayla nehe.— 23Hn Jesús tatɨm õr ɨm: —Uje terɨhɨ ese deeych uje amlo yokpo nehe ich nĩhyok olak yeẽk uje tatɨm yok kuchɨt par uje sehe erahalo. Titɨm olak ich tuu ũrpa. Kɨmɨjɨ apurlo Dii Porrosht kuchɨt ẽrlo piich ich ɨshɨm olak. 24Nehech ele ahle yelɨj apurlo Porrosht kuche ẽrlo piich. Uje apurlo ich ɨshɨm olak par uje shuu olak aylpa. 25Ahnũwo kuche uje titɨm olakɨke shɨ tɨteẽta. Deeych yet nehe hn titɨm olak ich ye tɨteẽtape. Titɨm olak Dii Porrosht ich tuu ɨmeheeych. 26Uje terɨhɨ ese deeych uje apurlo Porrosht kuchɨt ẽrlo piich ich ɨshɨm olak. Ye nesita uje titɨm Dii Porrosht par uje ɨshɨm olak. 27Dii Porrosht tyenɨj ɨshɨm olak nehe pork wɨchɨ sahmũr olak pork ahmũrlo yok hn ye otiislope uje tokõra Ɨre. 28Tɨkɨtolɨhɨ Dii Porrosht ahɨrni hn tɨkɨrẽt tɨtĩ̵r nãhu ĩ̵rmo. Deeych yet nehe hn tɨkɨtolɨhɨ nãhu ĩ̵rmo hn tɨtĩ̵r Dii Porrosht ahɨrpo.— 29Ɨr akɨle otatɨm otsɨɨ: —Ahnũwo ahwoso uje atɨm oryõkɨke ich ɨmeheeych. Ye eteẽta latɨk. 30Ele ahle ich nos oyɨraha uje eraha kuche, pork uje ehn yahpaa oso olapur owa kuchɨt ich nos eraha õr eyuwo. Heke ye oyotiispe uje ãra Porrosht.— 31Jesús tatɨm õr ɨm: —Atɨmlo yokɨke uje ye otiislo yokpe. 32Per ele ahle ich yej terɨhɨ ɨshɨrĩt uje moymlo yok hn olak karẽhe lekɨtiyo etĩ̵rlo owɨlo par akahalo. Uje olak karẽhe lekɨtiyo ich ye yok nohmɨrape. Dii Porrosht de pahɨr. 33Ich titɨm olak ahnũwo kuche par uje tuu olak aho kɨɨs. Ahnũwo ĩ̵rmo oso tyenɨj oloter olak per tyenɨj olak ayla pork terz Satanás uje tɨbey nãhu ĩ̵rmo.—

will be added

X\