JUAN 15

1Eseekite hn Jesús tatɨm õr ɨm: —Shɨ yok ɨtso uva diich hn Papa wɨchɨ uje tɨbey erze uva. 2Pakɨle wɨr õr ɨtso uke. Erze uke ĩya ese ɨr diich. Ese diich wɨchɨ yok. Kɨmɨjɨ ee ye chɨhɨpe ich Papa chekshehe per kɨmɨjɨ ɨr ee de ich shɨ chekshehe erze uje ye ompe par uje shuu ma ee kɨhniya. 3Erze pahwoso uje titɨm olakni shuu amsahalo par olak Porrosht aabo. 4Meylo yok hn yok ɨtspo shish tokõya olak. Erze uke uje ye tẽyhi ɨr diich ich yelɨj pohna per kɨmɨjɨ tẽyhi ɨr diich ich pohna hn ɨr ee de. Olak ɨtspo kɨmɨjɨ ye meylo yok ich ye olak pwele uje ahakõrlo pɨbiyope. 5Shɨ yok ɨtso diich hn olak ɨtso uke. Yeẽk uje shish ĩya yok ich yok shish tokõya ɨre. Heke wɨchɨ ɨtso pohɨr uje ɨr ee kɨhniya. Kɨmɨjɨ ye meylo yok ich ye olak pwele ahakõrlo latɨk. 6Uje yeẽk iim yok ich wɨchɨ shɨ ɨtso diich uke uje õhyo hn ochɨbɨte ejwert par uje kako hn otãra ochɨbɨte jwekɨta hn otsẽru. 7Kɨmɨjɨ shish meylo yok hn ahakõrlo uje titɨm olak ich olak pwele apurlo uje sehe uhulo tiyokõr ich tiyokõr par olak. 8Uje ahakõrlo uje titɨm olak ich shɨ olak ɨtso pohɨr uje ɨr ee kɨhniya heke ich uhulo Papa dich hn uhulo ɨmeheeych uje olak yok pakɨle pisho. 9Yok ich tahmũr olak tuu ɨtso uje Papa sahmũr yok. Shish ahmũrlo yok uhulo ɨtso uje tahmũr olak. 10Kɨmɨjɨ ahakõrlo uje pahwoso tata ich shish yahmũrloye ɨtso uje yok tiyokõr uje Papa tatɨm yok hn shish oyahmũrye. 11Ahnũwo pahwoso uje titɨm olakɨke par uje shuu olak ayla ɨtso uje yok ayla heke ich olak aylpa.— 12Hn Jesús tatɨm õr ɨm: —Sehe tuu ahmũrloye ɨtso yok uje tahmũr olak. 13Uje yeẽk sahmũr pishɨ nahyẽro ich takashɨm õr nehech kɨmɨjɨ tooho par õr ɨre. 14Kɨmɨjɨ ahakõrlo uje titɨm olak ich olak yok pihyẽro. 15Ele ahle ich ye tɨkɨbii olakpe too pɨlo pork erze uje õr yɨlo ye odɨraha uje õr yɨnsɨrc shiyokõr per shɨ tɨkɨbii olak too pihyẽro pork nos tuu erahalo erze kuche uje Papa tatɨm yok. 16Olak ye aahlɨlo yok petɨkni. Shɨ yok uje tiihla olak hn tokosɨm olak pɨbiyo par uje bolɨlo anɨmɨrãhalo pahwoso. Tahmũr uje olak ɨbiyo tokole om hn shish bale ɨtso uu pohɨr uje ee kɨhniya de heke nos wɨr kuche uje apurlo Papa ẽrlo piich ich ɨshɨm olak. 17Titɨm olak uje shish tyenɨj ahmũrloye. 18Uje ĩ̵rmo oso odɨtak olak ich olak eyucha uje wɨr otsɨtak yok wapni. 19Kɨmɨjɨ shɨ olak ɨlo ahnũwo ĩ̵rmo oso ich wɨr otsahmũr olak pork otsahmũr erze uje õr eyuwo ɨtso õr, per tiihla olakni par uje ye olak ɨlo õr heke ahnũwo ĩ̵rmo oso ich otsɨtak olak. 20Olak eyucha erze pahwoso uje titɨm olakɨke tuu ɨtsorz too: “Yeẽk uje õr yɨlak ye ma dichpe je nensɨrc.” Kɨmɨjɨ oloter yok ich oloter olak toy. Kɨmɨjɨ oniyokõr uje titɨm õr ich oshiyokõr uje atɨmlo õr toy. 21Nos tyenɨj oshiyokorĩ̵hɨ olak erze kuche mɨhnũwo pork ye otiislo yokpe. Oshiyokõr oshuu ɨtsorz pork wɨr ye odɨrehepe ese uje shuu tɨkɨrẽtni. 22Kɨrẽhe ye tɨkɨrẽtni ich ye titɨm õr uje õr ɨluu mɨhnũ ich ye odɨtak yokpe per ele ahle ye õr pwelpe uje otsata uje oshiyokõr mɨhnũwo. 23Yeẽk uje sɨtak yok ich sɨtak Papa toy. 24Kɨmɨjɨ ye tiyokõrni erze kuche uje ye latɨk pwele shiyokõr ich ye tuu ɨmeheeych uje õr ɨluu mɨhnũ, per oteychɨm uje tiyokõrni heke otsɨtak yok hn otsɨtak Papa toy. 25Wɨr otsɨtak yok oshuu ɨtsorz heke oshuu yakaha uje Porrosht ahwoso tata uje de õr ahɨr. Tata shuu ɨtsorz ɨm: “Ye tiyokõr latɨk per shɨ otsɨtak yok.” 26Deeych yet nehe hn tɨrẽt ese uje takashɨm olak. Wɨchɨ Porrosht Ɨchɨbich. Shish tata uje ich ũru. Tãra Dii Porrosht. Wɨchɨ tyenɨj shuu ɨmeheeych uje pahwoso ich ũru, 27hn olak tyenɨj uhulo ɨmeheeych toy uje pahwoso ich ũru pork wapni ɨchii olak de pahɨr uje tanɨmɨrãha Porrosht ahwoso.—

will be added

X\