JUAN 14

1Eseekite hn Jesús tatɨm õr ɨm: —Ye as olak ɨbe. Ye otiislo Porrosht hn ye otiislo yok toy. 2Wahacha Papa ihyuch ich owɨlo kɨhniya uje de. Kɨrẽhe ye ɨlorz ich ye titɨm olakpe uje takaha tinshii owɨlo par olak. 3Uje tɨmɨt nehe ich takaashpo takahi olak par uje olak dechɨ pahɨr toy. 4Olak erahalo ese dehet uje tĩ̵r ese owich uje tɨtĩ̵r.— 5Tomás tatɨm Jesús ɨm: —Ɨrhĩche, ye oyɨrahape ese uje etĩ̵r heke ye oyɨraha ese dehet.— 6Jesús tatɨm ɨre ɨm: —Shɨ yok uje tuu oso otĩ̵r Porrosht ahɨr shɨ ɨtso uje yok dehet uje seya oso Porrosht ahɨr. Erze uje ich ũru tãra yok. Yok tokosɨm oso õr ɨkɨrĩt uje yelɨj nɨhna ɨre. Shɨ yok uje tuu otaachĩ̵hɨ Porrosht ahɨr. 7Kɨmɨjɨ erahalo yok ich erahalo Papa toy. Ele ahle erahalo Papa hn amlo ɨre.— 8Felipe tatɨm ɨm: —Ɨrhĩche, owa õryok uu Eych. Shɨ ese uje sehe oyeychɨm.— 9Jesús tatɨm ɨm: —Felipe, ich osdeyo uje yok de olak ahɨr. ¿Je ye eraha yokpe? Yeẽk uje umo yok ich umo Papa toy. ¿Ɨnaãpo heke atɨm yok par uje sehe eychɨm Papa? 10¿Je otiis uje yok de Papa ehet hn Papa de pehet? Erze pahwoso uje titɨm olak ye shɨ yokpe uje titɨm olak. Papa uje de pehet wɨchɨ uje shiyokõr debiyo. 11Ye otiislo uje yok de Papa ehet hn Papa de pehet. Kɨmɨjɨ otiislo pahwoso per ye otiislo erze uje tiyokõr uje ye latɨk pwele niyokõr uje chɨbɨte orhõta uje Papa de pehet. 12Titɨm olak ich tuu ũrpa. Uje yeẽk ye lotiis yok ich shiyokõr ɨtso uje yok tiyokõr, hn shiyokõr obiyo ich ma deyo je yok pork tɨtĩ̵r Papa ahɨr. 13Nos wɨr kuche uje apurlo Papa hn ẽrlo piich ich tiyokõr par uje tuu Papa dich. 14Tiyokõr uje apurlo Papa hn ẽrlo piich.— 15Eseekite hn Jesús tatɨm õr ɨm: —Uje ahmũrlo yok ich ahakõrlo pahwoso uje titɨm olak. 16Tyenɨj tapur Papa hn shuu yet tɨrẽt tĩ̵r olak par takashɨm olak. Wɨchɨ tyenɨj shish de olak ahɨr. 17Wɨchɨ Porrosht Ɨchɨbich uje shish tata uje ich ũru. Ye ĩ̵rmo oso õr pwele onahmũr ɨrpe pork ye onomo ɨrpe hn ye odɨraha ɨrpe. Olak erahalo ɨre pork dechɨ olak ahɨr hn tyenɨj masaha olak aho nehe.— 18Jesús tatɨm õr ɨm: —Ye tokoym olakpe tuu olak ɨtso kuhnẽro. Tyenɨj takaashpo nehe. 19Shɨ pɨkaap hn erze ĩ̵rmo oso ye onomo yokpe per olak tyenɨj eychɨmlo yokpo nehe. Tyenɨj yok ɨkpo nehe heke tyenɨj olak ɨkpo toy. 20Uje terɨhɨ ese deeych uje yok ɨkpo nehe ich erahalo uje yok de Papa ehet hn olak de pehet hn yok de olak aho. 21Yeẽk uje chɨraha pahwoso hn shiyokõr wɨchɨ uje sahmũr yok. Yeẽk uje sahmũr yok shuu ɨtsorz ich Papa sahmũr ɨre hn yok tahmũr ɨre toy. Tuu ɨmeheeych uje yok de ɨre ahɨr.— 22Judas ye uu Judas Iscariotepe wɨchɨ tatɨm Jesús ɨm: —Ɨrhĩche, ¿uhu ɨnaãpo par uje oyomo owa hn ye erze ĩ̵rmo oso õr pwele onomo owape?— 23Jesús tatɨm ɨre ɨm: —Uje yeẽk sahmũr yok ich shiyokõr uje pahwoso tata, hn Papa sahmũr ɨre. Papa hn yok tyenɨj oyɨtĩ̵r ɨre hn oyiyakaha ɨre ahɨr. 24Uje yeẽk ye nahmũr yok ich ye niyokõrpe uje pahwoso tata. Erze uje yesh titɨm olak wɨr ye pahwosope. Wɨr tãra Papa uje shuu tɨkɨrẽtni. 25Uje ehn yesh yok de olak ahɨr ich titɨm olak ahnũwo pahwoso. 26Ese uje takashɨm olak nehe wɨchɨ Porrosht Ɨchɨbich uje Papa shuu tĩ̵r olak par sakaha powich. Wɨchɨ tyenɨj nos shiyokorãha olak hn shuu olak eyucha erze kuche uje titɨm olakni.— 27Hn Jesús tatɨm dakɨle ɨm: —Uje takaha ich shish tuu olak aho kɨɨs ɨtso yok uje pehet kɨɨs. Uje ĩ̵rmo oso oshuu olak aho kɨɨs ich ye ɨlope uje tuu olak aho kɨɨs. Ye as olak ɨbe hn ye atɨlɨlo latɨk. 28Ich entlo uje titɨm olakɨke uje tyenɨj takaha hn takaashpo nehe. Kɨmɨjɨ ahmũrlo yok ich olak ayla uje tɨtĩ̵r Papa ahɨr pork wɨchɨ ma dich je yok. 29Ele ahle titɨm olak par uje erahalo uje tyenɨj tɨtĩ̵r poõrc nehe. Uje pahwoso yakaha nehe ich ye otiislo yokpe. 30Ich ye tuu pahwoso berzope uje titɨm olak pork Satanás tɨrẽt tĩ̵r yok. Wɨchɨ uje tɨbey nãhu ĩ̵rmo. Wɨchɨ ye ɨr ukũrbɨrsh par tɨbey yok. 31Shɨ tiyokõr uje Papa tatɨm yok heke erze ĩ̵rmo oso ochɨraha uje tahmũr Papa.— Hn Jesús tatɨm dakɨle ɨm: —Alehetlo, yukulo.—

will be added

X\