JUAN 13

1Eseekite uje ehn yahpaa terɨhɨ ese õr ahamich uje iich otsɨɨ Pascua ich Jesús chɨraha uje yej terɨhɨ ɨshɨrĩt par tokolɨhɨ nãhu ĩ̵rmo hn hno tĩ̵r Deych ahɨr. Wɨchɨ shish sahmũr erze uje ye olotiis ɨrpe uje ode nãhu ĩ̵rmo. Sowa uje sahmũr õr pork tooho õrkite. 2Ich osdeyo uje dyablo chɨbɨte Judas Iscariote ɨr eyuwo par uje shuu chiwãha Jesús. Judas wɨchɨ Simón Iscariote ɨr ijɨt. 3Eseekite uje ehn Jesús hõr otaak ich chɨraha uje ɨr Deych chɨbɨte nos wɨr kuche ɨr hme hn chɨraha uje tãra Porrosht ahɨr hn tyenɨj cheeshpo tĩ̵r Porrosht ahɨr nehe. 4Chɨraha uje ɨre dich ɨtsorz per shɨ iyehetɨhɨchɨs nemest wɨrc hn chiyuhu ese bortɨsht uje tuuhna hn chishew towaylt, chiyuwa laharc shuu tĩ̵r hnɨmich. 5Sanuwãha awɨt pankanta ɨchii chuhrũ erze dakɨle õr hnɨte hn sekar chĩ̵ra ese towaylt uje chiyuwa laharc. 6Uje toka Simón Pedro par churhũ hnɨte hn Pedro tatɨm ɨm: —Ɨrhĩche, ¿je erhũ pɨr?— 7Jesús tatɨm ɨm: —Ele ahle uje tiyokõr ye erahape per je deeych yet nehe hn eraha.— 8Pedro tatɨm ɨm: —Yelɨj tuu erhũ pɨr.— Hn Jesús tatɨm ɨm: —Uje ye uhu tũrhu er ich ye owa pakɨlakpe.— 9Simón Pedro tatɨm ɨm: —Ɨrhĩche, ye shɨ erhũ pɨr. Erhũ pɨhme hn erhũ puhuta toy.— 10Jesús tatɨm ɨre ɨm: —Ese uje tɨsoho awɨt ich ye nesita uje tɨsohopo. Shɨ ɨr hnɨte wɨr uje tyenɨj churhũ pork ich nos nimpyo. Olak ich nos olak nimpyo. Shɨ sohmɨra uje ye nimpyope.— 11Jesús chɨraha ese uje tyenɨj chiwãha ɨre heke tatɨm õr uje ye nos õr nimpyope. 12Uje Jesús nos churhũ õr hnɨteke hn tuuhna ese shepɨkɨtpo hn sakahachɨs nemest wɨrc. Tatɨm õr ɨm: —¿Je erahalo erze uje tiyokõrke? 13Olak ebiilo yok on: “Maestro hn Ɨrhĩche.” Ich om uje uhulo ɨtsorz pork yok uu olak Ɨrhĩch hn yok uu olak Maestro. 14Ich yok uu olak Ɨrhĩch hn olak Maestro uje tũrhu olak hnɨte, heke olak tyenɨj erhũloye hnɨte. 15Erze uje tiyokõrke wɨr par uje tokowa olak par uje ahakõrlo uhulo ɨtso uje tiyokorãha olak. 16Ich ũrpa uje titɨm olak. Ese uje õr yɨlak ye ma dichpe je ɨr yɨnsɨrc hnii ese uje tɨrẽtni ye ma dichpe je ese uje shuu tɨrẽt. 17Kɨmɨjɨ erahalo erze uje titɨm olakɨke, ich om uje ahakõrlo. 18Nos titɨm olak erze pahwoso per olak nohmet de uje ye titɨm ɨrpe pork nos tɨkɨraha olak nohmɨr nohmɨr uje tiihla olakni. Tiihla olak nohmet shɨ par uje tuu Porrosht ahwoso yakaha uje tata shuu ɨtsorz ɨm: “Ese uje taakɨhɨ pahɨr ich sɨtak yok hn tyenɨj shiyokõr ɨtso uje tarãha yok hnɨmich chĩ̵ra derrza õrrza.” 19Ele ahle titɨm olak erze uje tyenɨj tɨr yok nehe, heke uje tĩ̵r yok ich erahalo uje yok tokõra poõrzni. 20Ich ũrpa uje titɨm olak. Uje tuu yeẽk hno tĩ̵r yet hn wɨchɨ sahmũr ɨre ich sahmũr yok toy. Ese uje sahmũr yok ich sahmũr toy ese uje shuu tɨkɨrẽtni.— 21Eseekite uje Jesús tatɨm õr shuu ɨtsorz ich chuuna hn dosdarakpa heke tatɨm õr ɨm: —Titɨm olak ich tuu ũrpa. Olak yet de uje sehe niwãha yok.— 22Erze ɨr akɨle oteychɨmye. Ye odɨraha yeẽkpo ese uje sorzɨhɨ. 23Wɨr õr yet de uje sakaha Jesús ahɨr. Wɨchɨ Juan uje Jesús sahmũrpa. 24Simón Pedro tatɨm Juan chĩ̵ra nahmɨta par shuu sapur yeẽkpo uje Jesús sorzɨhɨ. 25Wɨchɨ dechɨ Jesús ahɨr heke tatɨm ɨm: —Ɨrhĩche, ¿yeẽkpo ese?— 26Jesús tatɨm ɨm: —Ese uje taka yok pan hn tokosɨm ɨre wɨchɨ ese.— Ɨchii sɨta ɨr pan hn ɨshɨm Judas. Wɨchɨ uu Simón Iscariote ɨr ijɨt. 27Uje Judas chishew ese pan hn tew ich Satanás masaha ɨre ehet. Jesús tatɨm ɨre ɨm: —Ese uje sehe ahakõr ich ahakõr shɨchish.— 28Nĩhyok uje ɨr akɨle yeẽk uje sakaha nemest wɨrc chɨraha erze uje Jesús tatɨm Judas shuu ɨtsorz. 29Judas wɨchɨ uje tɨbey ese kotsɨrbɨt uje ochɨmchaha hnote heke erze yewo oshuu deyuwo tɨsĩ̵r uje Jesús shuu tiya kuchẽrk par ese õr ahamich o kɨmɨjɨ duhu dosɨm kuchẽrk uu losuhlaabo. 30Uje Judas chishew ese pan hn tew hn hno shɨchish tokole. Ich dɨhlak. 31Eseekite uje Judas tokolɨke hn Jesús tatɨm õr ɨm: —Yok tokõra poõrzni. Ele ahle Porrosht shuu yok dich hn tuu ɨre dich toy. 32Kɨmɨjɨ tuu Porrosht dich ich Porrosht shuu yok dich shɨchish. 33Olak shɨ olak ɨtso pijo. Ich yej terɨhɨ pɨshɨrĩt par uje tɨkɨtokolɨhɨ olak ahɨr. Ekulo yok nehe per shɨ ɨtso uje titɨm erze israel osohna ich titɨm olak toy. Ye olak pwele etĩ̵rlo ese owich uje takaha tɨtĩ̵r. 34Titɨm olak pahwoso ahlo. Tyenɨj ahmũrloye uhulo ɨtso yok uje tahmũr olak. Tyenɨj ahmũrloye uhulo ɨtsorz. 35Uje ahmũrloye uhulo ɨtsorz ich nos wɨr oso uje ode ĩ̵rmo lekɨtiyo ochɨraha uje olak yok pakɨle.— 36Eseekite hn Simón Pedro tatɨm Jesús ɨm: —Ɨrhĩche, ¿etĩ̵r ɨraãpo?— Jesús tatɨm ɨm: —Ese owich uje takaha tɨtĩ̵r ye owa pwele etĩ̵rpe, per je deeych yet nehe hn etĩ̵r yok.— 37Pedro tatɨm ɨm: —Ɨrhĩche, ¿Ɨnaãpo heke ye yok pwele par tokõya owa? Kɨmɨjɨ tɨkɨtɨ par takashɨm owa ich shɨ tɨkɨtɨ.— 38Jesús tatɨm ɨm: —¿Je ũru uje sehe akashɨm yok nehech atɨ? Titɨm owa ich tuu ũrpa. Uje ehn yahpaa kokot yerh ich atha yok tre bese uje ye eraha yokpe.—

will be added

X\