JUAN 12

1Eseekite uje ehn yahpaa terɨhɨ daalo seys par ese õr ahamich uje iich otsɨɨ Pascua hn Jesús hno tĩ̵r wahacha dɨt Betania. Ese dɨt wɨchɨ uje Lázaro debuhu uje Jesús shuu ɨkponi. 2Wɨr oshiyokõr oposohochɨs par Jesús. Marta ɨshɨm õr poso hn Lázaro sakaha Jesús ahɨr hõr wɨr yewo nemest wɨrc. 3María tõhwa perfume uje iich otsɨɨ nardo par tormĩ̵hɨ Jesús hnɨte. Ese perfume kɨmɨjɨ medyo litro. Wɨchɨ ich debichpa. Tormĩ̵hɨ Jesús hnɨte ese perfume hn sekar chĩ̵ra lakĩ̵rt. Ɨr ihyuch ich perfume aat dichpa. 4Jesús ɨr akɨle odechɨ. Sohmet de uje iich otsɨɨ Judas Iscariote. Wɨchɨ uje tyenɨj chiwãha Jesús nehe. Judas tata ɨm: 5—¿Ɨnaãpo heke ye anuwãhalope ese perfume uhulo debich, shɨ ɨtso uje hnakɨrbich chishew obiyo nehech ãyt nohmɨra par asɨmlo baho erze losuhlaabo?— 6Judas shɨ tata shuu ɨtsorz. Wɨchɨ ye nahmũr takashɨm erze losuhlaabope. Tata shuu ɨtsorz pork ɨre echɨkɨt. Tɨbey ese kotsɨrbɨt ijaabɨt uje erze hnote de uje oso oshɨm Jesús. Torha erze hnote uje ochɨmchaha ese kotsɨrbɨt ehet. 7Jesús tatɨm õr ɨm: —Ye ahakoslo wate. Shɨ chɨhmer ese perfumeni nehech ele ahle par uje tormĩ̵hɨ yok shɨ ɨtso uje tɨkɨtɨke, pork deeych yet nehe hn ochihitsɨm yok. 8Erze losuhlaabo shish ode olak ahɨr nehe per ye shish yok chɨhɨ olak ahɨr petɨk nehe.— 9Eseekite hn erze israel oso ich okɨhniya ochunt uje Jesús dechɨ dɨt Betania heke ohno otĩ̵r wahacha par oteychɨm ɨre. Ye shɨ sehe oteychɨm Jesuspe. Sehe oteychɨm Lázaro toy uje Jesús shuu ɨkponi, 10heke erze saserdote õr bahluwo ochɨbɨte par uje sehe oduhu Lázaro oduhu toy. 11Pork erze israel oso ich okɨhniya uje omo Lázaro uje ɨkponi heke oym erze israel oso õr bahluwo hn ye olotiis Jesuspe. 12Eseekite ich oso okɨhniya ohno otĩ̵r Jerusalén par ese õr ahamich. Uje deychole hn wɨr ochunt uje Jesús yehe tɨrẽt. 13Ohnõy hĩ̵r ihyõ hn ohno otokolɨhɨ Jerusalén par uje olalehe Jesús arhĩch. Otata ich otsɨhnew lahwoso otsɨɨ: —Sehe oyuhu Porrosht dosĩ̵r õryok. Sehe oyuhu õryok Ɨrhĩch Porrosht diyuhu lahwoso omoho ese uje shuu tɨrẽt. Wɨchɨ uu israel oso õr rey.— 14Jesús chish buritɨt hn iyãha shɨ ɨtso uje Porrosht ahwoso tata ɨm: 15—Olak uje ebuhulo ese dɨt Jerusalén ye atɨlɨlo latɨk. Jerusalén ɨr iich yet otsɨɨ Sión. Eychɨmlo, olak rey yehe tɨrẽt iyãha buritɨt uje ijaap.— 16Wap erze ɨr akɨle ye odɨraha erze ahwoso uje sorzɨhɨ Jesús, per uje Jesús hno tĩ̵r poõrc ich õr eyucha uje Porrosht ahwoso tata shuu ɨtsorz. Ɨre nos shuu yakaha. 17Erze oso uje ode Jesús ahɨrni hn omo uje tɨbii Lázaro uje de dukuta ehet hn shuu ɨkpo wɨr otata erze uje õr ɨre omoni. 18Erze oso ich okɨhniya uje ochunt uje Jesús shuu Lázaro ɨkponi heke otokolɨhɨ dɨt odalehe arhĩch. 19Erze fariseo okeytkẽrye otsɨɨ: —Hmeychɨmlo, ye eyok pwele yiyokõrlo latɨk. Nos wɨr oso ohno õya ɨre.— 20Eseekite hn uu Griego yewo nohmɨramo ohno õya erze yewo uje otĩ̵r ese õr ahamich uje de wahacha Jerusalén par oteeychãha Porrosht. 21Wɨr otsɨtĩ̵r ɨre Felipe. Wɨchɨ tãra dɨt Betsaida uje de hnɨmich Galilea. Otatɨm Felipe otsɨɨ: —Ɨrhĩche, sehe oyekɨrɨhɨ Jesús.— 22Felipe hno tatɨm Andrés hn ohno otatɨm Jesús. 23Jesús tatɨm õr ɨm: —Ich yej terɨhɨ pɨshɨrĩt. Yok uje tokõra poõrzni tyenɨj takaha tɨtĩ̵r poõrzpo. 24Titɨm olak ich tuu ũrpa. Uje trigo eyhita kayɨhɨ hnɨmich per ye masaha hnɨmich uutpe ich shɨ eyhita nohmɨra uje dechɨ, per uje ochukwẽr ɨtso uje ochihitsɨm topɨt ich tokole hn ɨr ee de ich kɨhniya. Shɨ yok ɨtso uu trigo eyhita pork tyenɨj tɨkɨtɨ par uje tuu Porrosht aabo okɨhniya uje ode nehe. 25Ese uje ich sahmũr erze kuche uje de nãhu ĩ̵rmo, uje uhurc hn nos pyerte. Per ese uje ye nahmũr erze kuche uje de nãhu ĩ̵rmo ich tɨbey ɨre par uje ɨr ɨkɨrĩt de uje yelɨj nɨhna ɨre. 26Uje yeẽk chishew pɨbiyo ich shish tyenɨj chɨkãha pɨjɨch heke ese owich uje yok de ich wɨchɨ shish de toy. Kɨmɨjɨ yeẽk niyokõr pɨbiyo ich Papa narim ɨre.— 27Hn Jesús tatɨm õr ɨm: —Ele ahle ich yok dosdarakpa. ¿Titɨm Papa latɨkpo? ¿Je om uje titɨm par takashɨm yok par uje ye erze kuche mɨhnũwo tĩ̵r yok nehe? Ye ompe uje titɨm ɨre tuu ɨtsorz. Tɨkɨrẽt tɨtĩ̵r ɨrmõni par uje wɨr tĩ̵r yok.— 28Hn Jesús tatɨm Porrosht ɨm: —Papa, ebɨte orhõta uje owa dich.— Uje tata shuu ɨtsorz hn õr ahwoso tãra poõrc ɨm: —Ich tuu ɨmeheeych uje yok dich hn tyenɨj tuu ɨmeheeychpo nehe.— 29Erze oso uje odechɨ ochunt erze ahwoso hn otatɨmye otsɨɨ: —Nar.— Yewo otsɨɨ: —Anjel keytkẽr ɨre.— 30Jesús tatɨm õr ɨm: —Erze ahwoso uje entloko ye par takashɨm yokpe, shɨ par uje takashɨm olak. 31Ele ahle ich terɨhɨ ɨshɨrĩt uje tɨbɨte orhõta uje oso õr ɨluu ich mɨhnũ heke Porrosht tyenɨj sepyẽr õr nehe hn tẽrz Satanás uje tɨbey nãhu ĩ̵rmo. 32Uje ochowɨshɨhɨ yok krus eeych nehe ich nos tuu oso otɨrẽt otĩ̵r yok. 33Uje tata shuu ɨtsorz ich shuu ɨmeheeych uje ɨre tyenɨj tooho krus eeych.— 34Erze oso otatɨm Jesús otsɨɨ: —Oyunt uje Porrosht ahwoso tata uje Cristo tyenɨj shish de, ye tope. ¿Ɨnaãpo heke atha ese uje tãra poõrc tyenɨj ochowɨshɨhɨ krus eeych? ¿Yeẽkpo ese uje tãra poõrc?— 35Jesús tatɨm õr ɨm: —Ese uje ɨtso luu yesh de olak ahɨr per shɨ par daalo arhaabo. Tyenɨj erkɨhɨlo asa luu yokõrt uje yesh chihit olak pork deeych yet nehe ich dɨhlele. Uje yeẽk dɨrk uje dɨhlak ich ye dɨraha uje tĩ̵r. 36Ese uje ɨtso luu uje ehn chihit olak ye otiislo ɨre par uje amsahalo par ɨr aabo heke ich olak shɨ ɨtso luu pork erahalo uje ich ũru.— Uje Jesús tata shuu ɨtsorz hn hno sakɨs ɨre. 37Shiyokorĩ̵hɨ kuche õr ɨle ɨkɨch ich kɨhniya uje ye latɨk pwele niyokõr per shish otsotiis ɨre 38par uje nos yakaha erze uje profeta Isaías lɨshɨ chichewkite. Ɨr ahwoso shuu ɨtsorz ɨm: —Ɨrhĩche, nos oso otsotiis ahwoso uje titɨm õr. Ye latɨk dɨraha uje ahakõr erze kuche ẽra akɨrbo.— 39Heke shish otsotiis pork profeta Isaías tata toy ɨm: 40—Porrosht shiyeru õr ɨle par uje ye onomo hn ye oduhu deyuwo tɨsĩ̵r par ochɨraha, pork kɨmɨjɨ onomo hn odɨraha ich otĩ̵r Porrosht hn wɨchɨ ɨshɨ õr hnɨtewɨhɨ dahɨr.— 41Isaías tata shuu ɨtsorzkite pork umo Cristo uje hũre hn tatɨm oso uje teychɨm. 42Isaías tatkite uje otsotiis ɨr ahwoso per shish israel oso ich okɨhniya ye olotiis Jesuspe hn õr bahluwo yewo õr ɨtspo ye olotiispe, per erze õr bahluwo ye oduhu oso odɨrehepe pork otola erze fariseo. Erze fariseo ochɨbɨte uje yeẽk uje ye lotiis Jesuspe ich ochiyuhu sinagoga ehet. 43Erze õr bahluwo otola uje otatɨm yewo uje ye olotiis Jesuspe pork ma otsahmũr uje oso onarim õr je uje Porrosht narim õr. 44Eseekite hn Jesús sɨhnew lahwoso tatɨm õr ɨm: —Uje yeẽk ye lotiis yok ich ye lotiis Papa toy. Wɨchɨ uje shuu tɨkɨrẽtni. 45Yeẽk uje umo yok ich umo ese uje shuu tɨkɨrẽtni. 46Yok ɨtso luu uje tɨkɨrẽtni tɨtĩ̵r nãhu ĩ̵rmo hn tuu ochɨraha uje ich ũru. Heke yeẽk uje ye lotiis yok ich shɨ ɨtso uje ye dakaha dɨhlelta ehetpe. 47Yeẽk uje chunt pahwoso hn ye nahmũr niyokõrpe ich ye yokpe uje tɨbɨte ɨr ɨluu orhõta. Ye tɨkɨrẽt petɨkni par uje yok tomsaha jwe par ahnũwo ĩ̵rmo oso. Shɨ tɨkɨrẽt pork sehe tokosɨm õr ɨkɨrĩt uje yelɨj nɨhna ɨre. 48Yeẽk uje sɨtak yok hn ye nahmũr pahwosope de uje chɨbɨte orhõta uje shiyokõr mĩ̵hnɨk. Uje terɨhɨ ĩ̵rmo uhurc nehe ich pahwoso uje wɨchɨ chunt wɨr uje chɨbɨte orhõta uje shiyokõr mĩ̵hnɨk. 49Ye shɨ titɨm olak uje tahmũr. Papa uje shuu tɨkɨrẽtni wɨchɨ uje tatɨm yok par shuu titɨm olak. 50Erze Papa ɨr ahwoso uje shuu titɨm olak shuu oso õr ɨkɨrĩt de uje yelɨj nɨhna ɨre. Erze uje titɨm olak wɨr uje Papa tatɨm yok par shuu titɨm olak.—

will be added

X\