SANTIAGO 5

1Ẽrlo pahwoso uje titɨm olak uje olak ɨhĩ̵r deyo uje ahakõrlo mɨhnũwo. Tyenɨj eyerhlo hn ebichlo pork erze kuche mɨhnũwo uje tĩ̵r olak nehe ich dospa. 2Uu olak ɨshujãro ich nos taata, hn uu olak ɨshuwo ich nos ɨhnẽro tew. 3Olak oro hn olak plata ich ye jukur. Wɨr shɨ ɨtso uje fyerɨt taata hn ɨr ukult tokole. Erze ɨr ukulo shuu ɨmeheeych uje ye akashɨmlo yewo heke ahakõrlo mĩ̵hnɨk, hn erze ɨr ukulo tyenɨj shuu otsepyẽr olak shɨ ɨtso uje jwekɨta tew olak. Shɨ etiyẽrlo olak kuche uje ich ɨhĩ̵rtso ich kɨhniya ele hnɨmich nehech ele ahle. 4Ẽrlo pahwoso. Ehnyẽrlo erze uje ochish obiyoho olak shakɨrrza ehet ochekushu jõro, hn ye eshlo õrpe. Wɨr otɨbich hn eyok Ɨrhĩch uje ukurbo deyo de chunt õr. 5Uje olak de nãhu ĩ̵rmo ich olak ɨhĩ̵r deyo hn olak kushjãro kɨhniya ich ɨhĩ̵rtso hn shish eylo kuche uje ahmũrlo. Shɨ olak ɨtso wõjo uje ochĩ̵ra par uje oshuu sohlo. Erze wõjo sahmũr erze labɨso uje tew nehech terɨhɨ ese deeych uje oshuu. 6Olak denunsya erze uje ye oniyokõrpe uje mɨhnĩ̵kni hn tukulo õr uhulo otoy. Ye onontew olakpe. 7Pɨshɨbo watsaklo, tyenɨj olak ewenta erze uje prowa olak uje ehn yahpaa eyok Ɨrhĩch taãcha nehe. Shɨ olak ɨtso ese uje chukwẽr jõro ɨr shakɨrrza ehet hn iyem par uu jõro ee. Shɨ iyem ɨshɨrĩt uje ɨbɨk par chukwẽr jõro. Iyem toy ɨshɨrĩt par chekushu jõro. 8Olak ɨtspo shish tyenɨj olak ewenta erze uje prowa olak hn ye uhu olak koswãha pork eyok Ɨrhĩch tyenɨj taãcha shɨchish. 9Pɨshɨbo watsaklo, ye eshlo majamichɨhɨye pork kɨmɨjɨ eyehnɨmlo olak leshɨbo ich Porrosht wɨchɨ jwe uje tyenɨj sepyẽr olak. Wɨchɨ de par sepyẽr olak shɨchish shɨ ɨtso uje dechɨ pwert ebich par masaha ehet. 10Pɨshɨbo watsaklo, uhulo olak ɨlo uu profeta poruwo wɨshɨ uje otatɨm õr eyok Ɨrhĩch ɨr ahwoso. Uje kuche prowa õr ich shish õr ewenta. 11Erahalo uje nos otata uje ich õr aylpa erze uje õr ɨre ewenta erze kuche uje prowa õr. Ich nos entloni uje Job ewenta erze kuche uje prowa ɨre, hn erahalo uje ich uhurzkite hn eyok Ɨrhĩch takashɨm ɨre. Heke ɨmeheeych uje eyok Ɨrhĩch shish chuuna uje kuche mɨhnũwo tĩ̵r eyok hn takashɨm eyok. 12Pɨshɨbo watsaklo, titɨm olak erze uje ma tyenɨj ahakõrlo. Uje sehe athɨlo ẽhe ich shɨ on: —Ẽhe.— Hn uje sehe athɨlo uje nĩhyok ich shɨ athɨlo nĩhyok, hn ye ata ahwoso ma par uje uhu ɨmeheeych uje olak ahwoso ich ũru. Ye ebiilo kuche uje de poõrc hn ye ebiilo kuche uje de hnɨmich par uje shuu ɨmeheeych uje olak ahwoso ich ũru. Ye ebiilo kuche kɨnãho. Kɨmɨjɨ ebiilo yewo uhulo ɨtsorz ich Porrosht tyenɨj sepyẽr olak. 13Kɨmɨjɨ olak yeẽk uje kuche mĩ̵hntɨk tĩ̵r ɨre ich tyenɨj ɨre orar. Hn kɨmɨjɨ olak yeẽk ehet kɨɨs ich tyenɨj teechɨ seẽt imno uje shuu Porrosht ich dich. 14Kɨmɨjɨ olak yeẽk permo ich shuu otɨbii erze anciano uje otɨbey Porrosht aabo par uje wɨr õr orar otsapur Porrosht par ɨre. Shɨ otsapur eyok Ɨrhĩch ɨr iich hn otormĩ̵hɨ wɨchɨ aseyte. 15Uje erze anciano ye olotiis Porroshtpe hn otsapur par ese uje permo ich eyok Ɨrhĩch chukuta ɨre. Kɨmɨjɨ shiyokõr kuche mɨhnũwo ich Porrosht perdonar ɨre. 16Heke uje olak yeẽk shiyokõr mɨhnɨkĩ̵hɨ deshɨbich ich tyenɨj tĩ̵r ɨre par uje sapur perdon, hn shish olak orarye. Uje ahakõrlo uhulo ɨtsorz hn Porrosht chukuta olak. Porrosht aap uje ɨr ɨluut om uje orar ich ɨr ukurbo deyo de pork Porrosht tẽr ɨre hn shiyokõr uje sapur. 17Uu profeta Elías lɨshɨ hnakɨrap shɨ ɨtso eyok. Uje orar ich sɨnaha ɨre par uje ye ɨbɨkpe hn ye ɨbɨkpe nehech tre ãyo hn pehet ĩya. 18Uje orarponi par uje ɨbɨk hn ɨbɨk. Heke erze pohɨr nos pohna. Uje terɨhɨ ɨshɨrĩt hn ɨr ee de. 19Pɨshɨbo watsaklo, uje olak yeẽk saham uje ich ũru hn yet shuu cheeshpo par uje shiyokõr uje Porrosht ahwoso tata, 20ich erahalo uje yeẽk shuu iim erze mɨhnũwo uje shish shiyokõr ich takashɨm wɨchɨ par uje ye tope hn shuu Porrosht perdonar erze kuche mɨhnũwo uje wɨchɨ shiyokõr ich kɨhniya.

will be added

X\