SANTIAGO 4

1Titɨm olak kɨmɨjɨ erahalo ¿ɨnaapo heke shish atsɨlye hn ahakosloye? Ahakõrlo ɨtsorz pork olak aho pota kuche hn erahalo uje ich ye ompe heke olak aho chiilehet. 2Sehe uhulo kuche chɨhɨ olak ahɨr per ye odosɨm olakpe. Heke ich tukulo yet hn abɨtlo yet ɨr kuche per ye olak pwelpe eshlo ese uje ich ahmũrlo. Heke ich ahakosloye hn atsɨlye per ye eshɨlpe pork ye apurlo Porroshtpe par uje ɨshɨm olak uje ahmũrlo. 3Uje apurlo Porrosht ich ye dosɨm olakpe pork shɨ sehe apurlo par olak no ma shɨ par uje ahakõrlo uje ahmũrlo. 4Olak athɨlo uje ahmũrlo Porrosht per ma ahmũrlo ĩ̵rmo ɨshujãro ɨtso tɨmcharrza uje torãha dabich. ¿Je ye erahalope erze uje ma otsahmũr ĩ̵rmo ɨshujãro ochii Porrosht namãha? Uje yeẽk chɨhɨ hn chɨbɨte uje erze ĩ̵rmo ɨshujãro ich ɨhĩ̵rtso par ɨre ich chii Porrosht namãha. 5¿Je olak eyuwo tɨsɨr uje ye jukur uje Porrosht ahwoso tata shuu ɨtsorz: —Porrosht Ɨchɨbich uje de eyok aho ich ajɨrmɨk pork sarhak eyok?— 6Porrosht takashɨm eyok pork ɨr ahwoso tata shuu ɨtsorz: —Porrosht sontew erze uje onarim ɨre per takashɨm erze uje yelɨj onarim ɨre.— 7Asɨmlo olak Porrosht par uje ahakõrlo uje ɨre sahmũr. Hn atɨmlo dyablo uje ye ahakõrlope uje ɨre sahmũr, hn wɨchɨ tokolɨhɨ olak ahɨr. 8Uhu olak eyuwo dishew par uje eeychãhalo Porrosht hn ɨre ɨtspo shuu deyuwo chish olak. Moymlo erze kuche mɨhnũwo uje ahakõrlo shɨ ɨtso uje erhũlo olak hme, hn olak tyenɨj enshiilo olak aho pork ye ompe uje olak aho yũhursh. 9Uje ahakõrlo kuche mɨhnũwo ich shish olak aylpa. Ye ompe uje ɨtsorz. Tyenɨj eenɨlo uje ahakõrlo mɨhnũwo heke olak dosdarak hn eyerhlopa. 10Ye olak narim olakɨhɨ eyok Ɨrhĩch ɨle ɨkɨch heke wɨchɨ takashɨm olak. 11Pɨshɨbo watsaklo, ye eyehnɨmlo olak leshɨbich. Uje eyehnɨmlo ɨre ich shɨ eyehnɨmlo Porrosht ɨr ley. Hn uje uhulo olak ɨtso jwe hn ebɨtɨlo shɨ ɨtso uje ich ye ompe Porrosht ɨr ley. Uje ebɨtɨlo olak uhulo ɨtsorz ich ye ahakõrlope uje asa ley tata. Shɨ uhulo olak ma deyo je Porrosht ɨr ley. 12Shɨ Porrosht wɨchɨ uje de uje chɨbɨte asa ley. Wɨchɨ uje yesh jwe. Pwele shuu oso õr owich de dahɨr hn pwele shuu otĩ̵r urhuta bahluta ehet. ¿Per owa yeẽkpo uje ebɨte owa par jwe par uje ata uje owa eshɨbich shiyokõr uje mĩ̵hnɨk? 13Ẽrlo uje titɨm olak, olak uje uhulo ɨtsorz on: —Ele ahle o kɨmɨjɨ dechole hn oyɨtĩ̵r ese dɨt o kɨmɨjɨ ese dɨt yet. Oyiyakahachɨs nehech ãyt nohmɨra par uje oyiyokõr õryok ɨbiyo hn oyerz hnote.— 14Per ye erahalope latɨkpo tokole dechole. ¿Eyok ɨkɨrĩt latɨkpo? Shɨ ɨtso ɨsɨhɨlt uje ihnɨmich, per wɨsɨk wɨsɨk ich nĩhyok. 15Ma om uje athɨlo on: —Kɨmɨjɨ eyok Ɨrhĩch nahmũr, dechole ich ehn õryok ɨka hn oyiyokõr wɨchɨ o kɨmɨjɨ oyiyokõr yet.— 16Per yelɨj athɨlo uhulo ɨtsorz. Shɨ olak narim olak uje ekitkẽrloye par uje ahakõrlo kuche. Uje olak narim olak uhulo ɨtsorz ich ahakõrlo uje mɨhnũwo. 17Ese uje chɨraha uje ich om par uje shiyokõr hn ye niyokõrpe ich shiyokõr uje ich mĩ̵hnɨk uje Porrosht ye nahmũrpe.

will be added

X\