SANTIAGO 3

1Pɨshɨbo watsaklo, ye uhu olak kɨhniya uje amsahalo par ahakorãhalo õr Porrosht ahwoso. Uje Porrosht teychɨm daabo nehe kɨmɨjɨ oniyokõr uje om o kɨmɨjɨ ye oniyokõrpe ich erahalo uje õryok uje oyiyokorãha oso ich ma chukwi õryok ɨluu je erze yewo. 2Nos yɨnãhalo kuche ich kɨhniya. Kɨmɨjɨ yeẽk chɨhɨ Porrosht aabo õr ehet uje yelɨj nimehĩ uje tata ich ɨr ɨluu om pishɨ. Chɨraha uje tɨbey ɨre par uje ye niyokõrpe uje mĩ̵hnɨk. 3Shɨ tɨteẽta uje yɨmchahalo kabyuhwo freno ahwo par yonãhalo ich yuhulo shiyokõr uje eyok yahmũrlo. Eyok pwele yomtɨs ɨre. 4Hn tɨteẽta kuchɨt yet. Pohɨr wɨr ich deyo. Uje myent data tɨbichu ich chukus, per ɨr yɨnsɨro ochishew asa timon waa je ijaap hn ochobɨrho erze pohɨr oshuu tĩ̵r uje õr ɨre otsahmũr. 5Eyok ahãrc ich ɨtspo. Wɨchɨ ijaap per pwele tata kuche ich shuu dichpa par shuu eyok narim eyok. Erahalo uje jwekɨta waa je ijaap ich pwele sẽru hmonte uje ich dich hn shuu nos duhlu. 6Oso õr ahãrc ich ɨtso asa jwekɨta. Kuche mɨhnũwo ich kɨhniya tãra oso õr ahãrc. Wɨchɨ uje shuu õr ɨluu mɨhnũ hn shuu oshiyokõr uje ich mɨhnũwo. Õr ahãrc shɨ ɨtso jwekɨta uje tãra Satanás. 7Hnakɨrbo nos oshuu doshɨpo kɨnãho kɨnãho masaabo. Chɨpɨrme ɨtspo hn echĩ̵re hn erze uje de onoot bahluta ehet nos oshuu masaabo. 8Per shɨ õr ahãrc nohmɨra uje ye õr pwelpe par uje otsontew. Wɨchɨ shɨ ɨtso echeẽt uje ich wos deyo uje ye õr pwele oduhu masaappe pork õr ahãrc shish tata uje ich mɨhnũwo. 9Shɨ pork eyok ahãrc de ich yiitɨlo uje Porrosht uu eyok Deych ich dich. Hn ɨtspo eyok ahãrc yii eyok uhut hn yiyuhulo eyok ahwoso mɨhnũwo par eyok leshɨbo uje Porrosht shiyokõr õrni shuu õr ɨtso ɨre. 10Pɨshɨbo watsaklo, yiyuhu eyok ahwoso uje ich om hn yiyuhu eyok ahwoso uje ich mɨhnũwo hn nos tãra eyok ahwo. Ye ompe uje yiyokõrlo yuhulo ɨtsorz. 11Shɨ tɨteẽta jotsɨt uje sohmɨra. Ye õr pwelpe ochiyuhu awɨt uje ɨhĩ̵rt hn uje chiyok. Eyok ahwo ɨtspo, ye ompe uje ahwoso om hn ahwoso mɨhnũwo tãra eyok ahwo. 12Pɨshɨbo watsaklo, shɨ tɨteẽta kuchɨt yet. ¿Je õr pwele ochekushu naraje hn ɨr ee mango? ¿Je ompo uje ochekushu limon hn ɨr ee porosuwo? Ye ɨr ee tokolpe ɨtsorz. Ɨtso jotsɨt nohmet. Ye õr pwelpe ochiyuhu awɨt uje chiyok hn uje ich ɨhĩ̵rt. 13Titɨm olak. Ese uje ma eykdeyo olak ehet tyenɨj shuu ɨmeheeych uje eykdeyo pork ɨr ɨluu om hn shiyokõr uje om. Tyenɨj ye narim ɨre par uje shuu ochɨraha uje ɨre eykdeyo. 14Per kɨmɨjɨ abɨtlo pishɨ olak leshɨbo õr kushjãro hn kɨmɨjɨ sehe uhu olak no ma uje olak ma deyo hn atɨmlo yewo uje ɨtsorz ich ahakõrlo mĩ̵hnɨk. Porrosht ahwoso tata uje wɨr mɨhnũwo. Erze uje onarim ɨre otsata uje ich ũru. 15Erze õr eyuwo uje ɨtsorz ye tãra poõrzpe. Shɨ tãra erze oso uje ode nãhu ĩ̵rmo. Tãra erze uje õr ɨluu mɨhnũ. Tãra dyablo. 16Uje oso opota pishɨ yet kuche hn sehe oduhu ɨre ma deyo shish tokole uje yelɨj onahmũrye hn nos oshiyokõr kuche kɨhniya uje ich mɨhnũwo. 17Erze oso uje Porrosht shuu õr eykdeyo wɨr ich õr ɨluu ɨhĩ̵r pishɨ hn õr aho kɨɨs. Õr ɨle om hn oshiyokõr erze uje õr bahluwo otatɨm õr. Erze uje Porrosht shuu õr eykdeyo shish ochuuna uje oso õr losuhlaabo hn otakashɨm õr. Shish oshiyokõr uje ich om hn yelɨj oniyokõr kɨnaha par yet hn kɨnaha par yet hn yelɨj õr aho yũhursh. 18Oso uje oshuu oso yewo õr aho kɨɨs ich oshuu õr ɨluu om. Wɨr shɨ õr ɨtso uje ochukwẽr jõro ehi hn ich uhurc ich ochekushu uje ich om.

will be added

X\