SANTIAGO 2

1Pɨshɨbo watsaklo, eyok ye yotiislo eyok Ɨrhĩch Jesucristo. Wɨchɨ ich dichpa. Olak Porrosht aabo toy, heke ye ompe uje ahakõrlo uhulo kɨnaha par yet hn kɨnaha par yet. Tyenɨj nos uhulo õr ɨlye. 2Shɨ tɨteẽta tuu ɨtsorz. Kɨmɨjɨ akashɨlo olak owich hn hnakɨrbich taãcha uje ich ɨrhĩch dich. Ɨr hmarte oro hn ɨr ɨshuwo ich ɨhĩ̵rts pisho, hn hnakɨrbich losuhlaap taãcha toy uje ɨr ɨshuwo ɨlaraabo. 3Kɨmɨjɨ eychɨmlo ese ɨrhĩch dich uje ɨr ɨshuwo ɨhĩ̵rtso hn atɨmlo par uje sakaha ese owich uje ich ɨhĩ̵rtpa, hn atɨmlo ese losuhlaap on: —Shɨ alehe wahacha— o kɨmɨjɨ atɨmlo on: —Akahachɨs hnɨmich pɨbɨta ahɨr.— 4Uje ahakõrlo uhulo ɨtsorz ich ahakõrlo kɨnaha par yet hn kɨnaha par yet. Ich uhulo olak ɨtso jwe uje õr ɨluu mɨhnũ pork ye ahakõrlo uhulo õr ɨlyepe. 5Pɨshɨbo watsaklo, ẽrlo ahnũwo pahwoso uje titɨm olak. Porrosht chiihla erze uje oso ochii õr losuhlaaboho par uje ye olotiis ɨrpe pork chɨbɨte lahwoso par ɨshɨm wɨr õr owich erze uje otsahmũr ɨre. 6Per olak uhulo opook erze uje õr losuhlaabo pork ye uhulo õr ɨlo erze ɨhĩ̵r deyope. Ye oniyokõr uje mɨhnɨkĩ̵hɨ olak per erze ɨhĩ̵r deyo wɨr uje oloter olak hn oshuu ohnoy olak otseya olak jwe ɨkɨch. 7Wɨr uje shɨ oloter Cristo ɨr iich toy. Cristo wɨchɨ uu olak yɨnsɨrc. 8Kɨmɨjɨ yelɨj aluwelo asa ley waa je ich ɨhĩ̵rpa uje de Porrosht ahwoso ehet ich ahakõrlo uje ich ompa. Asa ley tata shuu ɨtsorz: —Tyenɨj ahmũr eshɨbo uhu ɨtso owa uje ahmũr owa.— 9Per kɨmɨjɨ ahakõrlo uhulo kɨnaha par yet hn kɨnaha par yet ich ahakõrlo uje ich mĩ̵hnɨk pork aluwelo uje Porrosht ley tata. 10Kɨmɨjɨ yeẽk chɨhɨ uje nos shiyokõr uje Porrosht ley tata per shɨ iyuwe Porrosht ley sohmɨra ich nos iyuwe Porrosht ɨr ley, 11pork Porrosht chɨbɨte lahwoso ɨm: —Ye orãha,— hn tata toy ɨm: —Ye tuk yet uhu toy.— Kɨmɨjɨ ye orãhape per tuk yet uhu toy ich aluwe Porrosht ley. 12Erahalo uje Porrosht wɨchɨ jwe uje teychɨm eyok nehe kɨmɨjɨ yiyuwe erze ley uje Cristo chɨbɨte uje ich ɨhĩ̵r pishɨ o kɨmɨjɨ ye yiyuwepe heke ye ompe uje yiyuwe. Ye aluwelo uje athɨlo kuche hn ye aluwelo uje ahakõrlo kuche. 13Uje yeẽk chɨhɨ hn ye nuunape uje yet losuhlaap par takashɨm ich Porrosht wɨchɨ jwe. Tyenɨj teychɨm ese uje ye takashɨm leshɨbichpe kɨmɨjɨ niyokõr uje mĩ̵hnɨk o ye niyokõrpe hn ye Porrosht nuunape uje wɨchɨ losuhlaap par uje takashɨm. Erze uje ochuuna uje õr leshɨbo losuhlaabo hn otakashɨm õr wɨr uje Porrosht chuuna uje õr losuhlaabo hn takashɨm õr uje otĩ̵r ɨre ahɨr nehe par uje teychɨm õr kɨmɨjɨ oniyokõr mɨhnũwo o ye oniyokõrpe. 14Pɨshɨbo watsaklo, ese uje tata uje ye lotiis Jesuspe per ye niyokõrpe uje Jesús sahmũr ich ye ɨr ahwoso jukur. ¿Je wɨchɨ Porrosht aap uje shɨ tata uje ye lotiis Jesuspe? 15Shɨ tɨteẽta kuchɨt. Kɨmɨjɨ Porrosht aap hnakɨrap o kɨmɨjɨ tɨmchar ɨr ɨshuwo nĩhyok o kɨmɨjɨ ɨr poso nĩhyok par ese deeych, 16kɨmɨjɨ olak yeẽk tatɨm ɨre shuu ɨtsorz ɨm: —Sehe tuu bu eyhi hn ehet kɨɨs. Sehe ye tuu hmemɨt nẽhi owape hn ew uje shɨ owa ahmũr.— Ye jukur uje wɨchɨ shuu ɨtsorz uje ye dosɨm uje ɨre nesita. 17Heke ese uje tata uje ye lotiis Jesuspe ich tyenɨj shiyokõr uje om par uje shuu ɨmeheeych uje ɨre Porrosht aap. Kɨmɨjɨ ye niyokõrpe uje om ich ye jukur erze ɨr ahwoso. 18Kɨmɨjɨ yeẽk tatɨm olak yet ɨm: —Atɨm yokɨke uje owa Porrosht aap pork ye otiis Jesuspe per yok tiyokõr uje Porrosht sahmũr.— Owa yok uje ye otiis Jesuspe per ye ahakõr uje Porrosht sahmũr hn yok ɨtspo, tokowa owa uje ye tokotiis Jesuspe pork tiyokõr uje Porrosht sahmũr. 19Ye otiispe uje shɨ Porrosht nohmɨra uje de. Ich om uje ata uhu ɨtsorz. Demonyo ɨtspo, wɨr ye olotiispe oshuu ɨtsorz heke otolpa nehech õr ɨkiyo tãra. 20Athaka uje ye otiis Jesuspe per ye ahakõr uje wɨchɨ sahmũr, heke owa shɨ ɨtso uje owa totihla. Shɨ ata uje ye otiis Jesuspe hn ye ahakõr uje sahmũr, heke tyenɨj tuu ɨmeheeych uje ahwoso ye jukur. 21Tyenɨj owa eyucha uu eyok porokkite Abraham lɨshɨ. Uu ɨr ijɨt iich otsɨɨ Isaac. Shiyokõr altar hn chɨbɨte Isaac eeychkite par uje shuu hn ɨshɨm Porrosht shuu ɨtso uje Porrosht tatɨm ɨre heke Porrosht chɨbɨte uje Abraham ɨr ɨluu om hn ɨr owich de Porrosht ahɨr. 22Ɨmeheeych uje Abraham ye lotiis Porroshtpe pork shiyokõr uje ɨre tata. Uje shiyokõr shuu ɨtsorz ich shuu ɨmeheeych uje ich ũrpa uje ye lotiis Porroshtpe. 23Heke Porrosht ahwoso ich yakaha uje tata uje Abraham ye lotiis Porrosht petɨkkite heke Porrosht ɨshɨ ɨr hnɨtew hn shuu owich de dahɨr. Oso otata uje Abraham wɨchɨ Porrosht ihyẽrak 24heke ich ɨmeheeych uje Jesús ɨshɨ oso õr hnɨtewɨhɨ Porrosht ahɨr shɨ uje oshiyokõr uje ɨre sahmũr pork ye olotiis ɨrpe. Ye doshɨpe par erze uje shɨ otata uje ye olotiis ɨrpe. 25Shɨ ɨtspo asa tɨmcharrza waa je iich otsɨɨ Rahab. Wate yɨtoro. Porrosht perdonar watkite pork takashɨm erze hnakɨrbo uje wɨr israel oso õr pahne, hn shuu oyuhwo ochɨkãha dehet yet. 26Shɨ tɨteẽta. Kɨmɨjɨ oso õr ɨchɨbiyo tokole ich otoy. Shɨ ɨtspo erze oso uje otata uje ye olotiis Jesuspe hn ye oniyokõr uje Porrosht sahmũr, ich õr ahwoso ye jukur.

will be added

X\