SANTIAGO 1

1Yok Santiago. Yok Porrosht ɨr yɨlak hn eyok Ɨrhĩch Jesucristo ɨr yɨlakpo. Tokosɨm saludo erze israel oso õr wee dose uje okarẽhe lekɨtiyoni hn odebuhu erze dihipo kɨnãho õr hnɨmo. 2Pɨshɨbo watsaklo, olak Porrosht aabo. Uje nos wɨr kuche tĩ̵r olak par uje prowa olak ich tyenɨj olak aylpa pork 3erahalo uje shɨ tĩ̵r olak par prowa kɨmɨjɨ otiislo Cristo o kɨmɨjɨ ye otiislope. Uje ewenta ich shuu olak ma ye otiislope. 4Shish tyenɨj olak ewenta erze uje tĩ̵r olak nehech uhurc ich ma olak pwele ewenta. Heke ich ũrpa uje ye otiislo Porroshtpe hn ye olak koswãhape. 5Olak yeẽk uje sehe dɨraha kuchɨt shɨ tyenɨj sapur Porrosht hn Porrosht takashɨm ɨre par uje shuu chɨraha, hn Porrosht ye diyuhu lahwospe par uje shuu pook pork erze uje otsapur ɨre wɨchɨ shish shuu ochɨraha. 6Shɨ tyenɨj sapur hn ye dotiis hn ɨshɨmɨhɨ ɨre. Ye duhu ɨre koswãha, pork uje yeẽk sapur hn koswãha wɨchɨ shɨ ɨtso onoota bahluta wokor. Uje myent tɨbichu ich shuu tĩ̵r pɨt yet. Wɨsɨk wɨsɨk ich shuu tĩ̵r pɨt yet. 7Ese uje koswãha ye ompe chɨbɨte uje eyok Ɨrhĩch takashɨm ɨre uje sapur. 8Hnakɨrbich uje koswãha ich yelɨj eyuwo chɨhɨ lalerc. 9Porrosht aap uje ich losuhlaap ich tyenɨj aylpa pork ɨr owich de Porrosht ahɨr. 10Porrosht aap uje ich ɨrhĩch dich, kɨmɨjɨ pyert ɨr kushjãro ich shish tyenɨj aylpa pork ɨr owich de Porrosht ahɨr. Erze ɨr kushjãro tyenɨj sɨhna ɨre shɨchish shɨ ɨtso erze floro uje de aach. 11Deeych tokole ich duhlpa. Chihit asa pohorrza hn shuu erze floro nos kako hn kayɨhɨ hnɨmich. Erze floro ich ɨhĩ̵rts pisho per shɨ sɨhna ɨre. Ese ɨrhĩch dich shɨ ɨtso. Uje yesh chishew obiyo hn ɨr kushjãro sɨhna ɨre shɨchish. 12Titɨm olak. Ich om par ese hnakɨrbich uje ewenta erze uje tĩ̵r ɨre. Uje ewenta nehech uhurc ich premit ompa de par ɨre. Ese ɨr premit wɨchɨ uu ɨr ɨkɨrĩt uje de Porrosht ahɨr. Porrosht chɨbɨte lahwoskite par uje tyenɨj ɨshɨm erze uje otsahmũr ɨre ese ɨkɨrĩt uje yelɨj nɨhna ɨre. 13Uje yeẽk sehe duhu olak yet niyokõr uje mĩ̵hnɨk ich ye ompe uje wɨchɨ tata ɨm: —Porrosht sehe duhu tiyokõr uje mĩ̵hnɨk.— Ye õr pwelpe oshuu Porrosht shiyokõr uje mɨhnũwo, hn ɨre yelɨj duhu oso oniyokõr uje mĩ̵hnɨk. 14Kal nohmɨra shɨ ɨre uje sehnyẽr ɨre par uje shiyokõr uje mĩ̵hnɨk. Wap shɨ shuu deyuwo tɨsɨrĩ̵hɨ erze kuch mɨhnũwo hn uje ich uhurc hn sahmũr erze mɨhnũwo 15hn shiyokõr. Uje ich yakaha shiyokõr erze mɨhnũwo shuu ɨtsorz hn erze mɨhnũwo shuu toy. 16Pɨshɨbo watsaklo, ye ehnyẽrlo olak. 17Nos wɨr kuche uje ich ɨhĩ̵rtso, ye mɨhnũwo chɨhɨ ehetpe wɨr tãra poõrc. Tãra Porrosht uje de poõrc. Wɨchɨ uje shiyokõr deeych hn shiyokõr shekurko hn shiyokõr porrzeebe. Wɨr uje nos chihit nãhu ĩ̵rmo hn shish sɨhnak laleryo, heke shish shuu ɨr puuruwo sɨhnak laleryo per Porrosht yelɨj duhu ɨre kɨnaha. 18Shɨ pork wɨchɨ sahmũr eyok pork ye yotiis ɨr ahwospe uje ich ũru hn shuu eyok shurhãpo par uje yomsaha par eyok ɨr aabo. Wɨchɨ nos shiyokõr erze uje de ĩ̵rmo per eyok uje yomsaha wap par Porrosht aabo shɨ eyok ɨtso jõro webich oso uje ochekushu. 19Pɨshɨbo watsaklo, shɨ tyenɨj nos ẽrlo uje oso otata hn ye ey olak uhut shɨchish, hn ye aas olak uulo shɨchish, 20pork yeẽk uje chesdelo ye niyokõrpe erze om uje Porrosht sahmũr. 21Heke tyenɨj nos moymlo erze olak ɨluu mɨhnũ hn moymlopo erze kuche mɨhnũwo uje oso oshiyokorĩ̵hɨye. Ye olak narim olak. Ahakõrlo uje Porrosht ahwoso tata uje erahalo. Ɨr ahwoso wɨr shɨ ɨtso jõro eyhi uje Porrosht chukwerĩ̵hɨ olak aho. Ɨr ahwoso pwele shuu etĩ̵rlo Porrosht ahɨr nehe. 22Tyenɨj ahakõrlo uje ɨr ahwoso tata hn ye shɨ ẽrlo pork kɨmɨjɨ shɨ ẽrlo hn ye ahakõrlo hn shɨ olak pyens uje ich om ɨtsorz ich shɨ ehnyẽrlo olak uhulo ɨtsorz. 23Uje yeẽk chunt Porrosht ahwoso hn ye niyokõrpe wɨchɨ shɨ ɨtso ese hnakɨrbich uje teychɨm dechɨbich pejta ehet. Umo ɨr dechɨbich 24per uje tokole ich chɨkey ɨre shɨchish. 25Porrosht ahwoso wate ley uje shuu Porrosht aabo oshiyokõr uje Porrosht sahmũr, hn Porrosht aabo otsahmũr oshiyokõr oshuu ɨtsorz hn yelɨj onoym. Uje yeẽk tẽr Porrosht ahwoso hn ye dɨkeype pork sehe dɨraha par uje shiyokõr uje tata, Porrosht takashɨm ɨre. 26Uje yeẽk chɨbɨte uje ɨre Porrosht aap hn ye tɨbey lahwope wɨchɨ shɨ sehnyẽr ɨre hn uje teeychãha Porrosht ich ye jukur. 27Porrosht uu eyok Deych sahmũr erze uje oteeychãha ɨre hn oshiyokõr uje ɨre sahmũr. Sehe duhu otakashɨm erze kuhnẽre hn poluu uje õr nesita kuche, per ye oniyokõr erze mɨhnũwo uje oso oshiyokorĩ̵hɨ ahnũwo ĩ̵rmo.

will be added

X\